Michelle D. Craig

Fas Kaonsela long Yang Woman Jeneral Presidensi

Taem hem i gat 16 yia, Sista Michelle D. Craig i lanem se famli blong hem bae i muv i aot long Provo, Yuta, YSA, i go long Harrisbeg, Pensilvania, YSA, blong mekem se papa blong hem i save statem wan seves olsem wan misin presiden.

Hem i bin hapi blong stap wetem famli blong hem, be muv ia i mekem se yangfala Michelle “i stap hemwan,” i no gat fren long ol yia we hem i stap long junia mo senia yia blong sekendri skul.

“Ol yia ia, oli ol yia we i developem man,” Sista Craig i talem. “Mi no stap dipen long ol fren, be mi dipen long famli blong mi, mo testemoni blong mi, mo Jos i kam long laen blong laef.” Hem i tekem se rilesensip blong hem wetem Papa long Heven mo Sevya oli impoten moa.

Michelle Daines Craig i bon long namba 13 Julae 1963 long Provo, Yuta, mo hem i faswan long seven pikinini we papa mo mama blong olgeta oli Janet Lundgren mo Robert Henry Daines III. Hem i laef long Provo kasem taem famli blong hem i muv i go long Pensilvania. Tu yia afta, Sista Craig i gobak long Provo blong go long Brigham Yang Yunivesiti; mo long ples ia hem i kasem wan digri long prameri edukesen. Long 1984, hem i akseptem koling ia blong go long misin long Dominik Ripablik Santo Domingo Misin.

“Mi wan woman we i stap biliv,” Sista Craig i talem; oli sastenem hem olsem Fas Kaonsela long Yang Woman Jeneral Presidensi long 31 Maj 2018. “Taem mi yangfala nomo mi bin save se mi mi wan gel blong God. Be mi rimemba se long misin blong mi, evri taem mi talem testemoni blong mi abaot Profet Josef Smit, bae mi filim Spirit. Mi gat wan bigfala konfemesen we i mekem testemoni blong mi i strong.”

Sam dei afta we hem i kambak, brata blong Sista Craig i talem long hem se hem i mas go long wan deit wetem Boyd Craig, wan fren blong hem long misin. Eit manis afta, kapol ia i mekem promes blong mared. Tufala i mared long 19 Disemba 1986 long Sol Lek Tempol. Tufala i papa mo mama blong trifala pikinini, mo tufala i gat sikis apupikinini.

Hem i bin holem fulap koling, mo sam i tempol odinens wokwoman long Provo Yuta Tempol mo olsem wan Gospel Doktrin tija. Long taem ia we oli bin singaotem hem long Yang Woman Jeneral Presidensi, hem i bin stap givim seves long jeneral bod blong Praemeri.