Profet blong God
I Kam long Elda Neil L. Andersen
Blong Kworom blong Olgeta Twelef Aposol
Wan profet i no stanap bitwin yu mo Sevya. Be, hem i stanap long saed blong yu, mo i poenem rod i go long Sevya.
Mi tu, mi wantem welkamem Elda Gong mo Elda Soares blong stap olsem ol memba blong Kworom blong Olgeta Twelef Aposol.
Taem yumi bin sastenem Presiden Russel M. Nelson olsem profet blong Lod mo olsem Presiden blong Jos blong Jisas Kraes blong Ol Lata-dei Sent, yumi bin pat blong wan tabu asembli we heven i putum i stap—i tabu from ol samting we oli jes hapen, ol heven oli bin wet from stat long stat we wol i bin stap. Lod Jisas Kraes, we i stap lidim wok blong Hem, tedei, tru long Presiden Aering, i bin presentem profet blong Hem, lida we Hem i bin jusum blong yumi, ol kavenan pipol blong Hem, mo i givim janis blong yumi soem long pablik, se yumi wantem sastenem hem mo folem kaonsel blong hem.
Long olgeta milian memba we oli no stap wetem yumi long ples ia, long Konfrens Senta ia, mi wantem yufala i save se Spirit blong Lod, insaed long bilding ia, long taem we oli sastenem Presiden Nelson, i stret olsem we yufala i tingting long hem—i fulap long paoa blong Spirit. Be, Asembli blong yumi, we heven i lidim, i no hapen long Konfrens Senta ia nomo, be raon long wol: long ol japel long Esia, Afrika, Not Amerika; long ol hom long Sentrol mo Saot Amerika mo Yurop; long ol selta long Pasifik mo ol aelan blong solwota. Asembli ia i stap long eni pat blong wol we yufala i stap long hem, iven sapos yu lisin nomo tru long saon blong smatfon blong yu. Han blong yumi we yumi leftemap, ol bisop oli no kaontem, be oli raetem long heven, semmak olsem kavenan blong yumi wetem God, mo aksen blong yumi, oli rekodem long buk blong laef.
Lod i Jusum Profet blong Hem
Huia blong kam wan profet, Lod Hemwan i jusum. I no gat kampen from, no gat toktok from, no gat giaman fes, no gat raorao, no gat tu tingting, no gat konfius, o muv muv olbaot. Mi tu, mi konfemem se paoa blong heven i bin stap wetem mifala long rum antap insaed long tempol, taem mifala i bin raonem Presiden Nelson mo prea from hem mo filim we mifala i no save mestem se Lod i agri long hem.
Joes ia blong Presiden Nelson i stap olsem profet blong God, oli bin mekem longtaem finis i kam. Ol toktok blong Lod i go long Jeremaea, i go tu long Presiden Nelson: “Taem mi mi no wokem yu yet long bel blong mama blong yu, be mi mi save yu finis. Mo taem yu no bon yet, mi mi jusumaot yu, mo mi makemaot yu, mi mekem yu yu tabu, blong yu kam wan profet, blong yu talemaot tok blong mi long ol man blong olgeta kantri long wol.”1 Tri yia i pas, Elda Nelson, we i gat 90 yia, i nambafo moa olfala Aposol wetem tu long ol trifala senia Aposol we oli moa yangfala long hem. Lod, we i stap kontrolem laef mo ded, i jusum profet blong Hem. Presiden Nelson, i gat 93 yia, mo i helti gud. Yumi hop se bambae hem i stap wetem yumi blong nara 10 o 20 yia, be naoia i stap, yumi stap traem blong winim tingting blong hem blong hem i nomo go ski long ol hil.
Nomata we yumi sastenem profet mo hem we Lod i jusum, i mas klia se yumi stap wosipim God nomo, Papa blong yumi we i stap long Heven, mo Pikinini blong Hem we i Hae. Hem i tru long win, sore, mo gladhat blong Sevya blong yumi, Jisas Kraes, we wan dei, bambae yumi save go stap wetem Tufala.2
From Wanem Yumi Stap Folem Profet
Be Jisas i tijim wan impoten trutok abaot ol wokman we Hem i stap sendem i kam long yumi. Hem i talem se: “Hem we i akseptem yu, i stap akseptem mi, mo hem we i stap akseptem mi, i akseptem Hem we i sendem mi mi kam.”3
Rol i moa impoten blong profet blong Lod i blong tijim yumi mo testifae abaot Sevya mo i lidim yumi long Hem.
I gat plante stret risen blong folem Presiden Russell M. Nelson. Iven, olgeta we oli no blong jos blong yumi, bambae oli singaotem se hem i smat. Hem i bin wan medikol dokta taem hem i gat 22 yia, i wan top dokta blong hat, mo i wan paeonia long divelopmen blong open hat operesen.
Plante bambae oli luksave waes mo gud jajmen blong hem: naenti yia blong lanem samting abaot laef mo ded, no gat selfis fasin, i lavem mo tijim ol pikinini blong God long evri kona blong raon wol ia, mo ol eksperiens we i mekem hem i raep afta we hem i gat 10 pikinini, 57 apupikinini, mo 118 smol apupikinini (mo namba ia i stap jenis oltaem; wan apuboe i bin bon i kam long wol las Wenesdei).
Olgeta we oli save gud hem, bae oli tokbaot se Presiden Nelson i fesem ol hadtaem blong laef wetem fet mo strong paoa long tingting. Taem kansa i tekemaot laef blong gel blong hem we i gat 37 yia, Emili, i livim wan hasban mo faef smol pikinini, mi harem hem i talem: “Mi bin papa blong hem, wan dokta mo Aposol blong Lod Jisas Kraes, be naoia, mi mas benem hed blong mi, mo luksave se, “Yu mekem tingting blong Yu, i no tingting blong mi.”4
Gadman Antap long Taoa
Nomata we yumi stap laekem tumas ol gudgudfala kwaliti blong hem, be, ?from wanem nao yumi stap folem Presiden Nelson? From wanem yumi stap folem Profet? From se Lod Jisas Kraes i bin singaotem hem mo putum hem i stap olsemgadman blong Hem we i stap long taoa.
Karkason i wan gudfala taon long Franis we wol i raonem, we i stanap longtaem finis i kam. Ol tolfala taoa oli kamkamaot insaed long ol wol ia, we oli bildim blong ol gadman, we oli stanap long ol taoa ia, dei mo naet, oli save lukluk longwe sapos enemi i kam. Taem ol gadman oli luk se wan enemi i kam kolosap, woning voes blong hem i protektem ol pipol blong Karkason long denja ia we oli no save luk.
Wan profet i wan gadman we i stap long taoa, we i protektem yumi long ol denja long saed blong spirit, we yumi no save luk.
Lod i talem long Esikel: “Mi mi mekem yu yu kam wan wajman blong lukaot long ol laen blong Isrel. Bambae yu tekem strong tok ya blong mi we mi talem long yu, yu go talem long olgeta blong wonem olgeta.”5
Plante taem, yumi tokbaot nid blong yumi blong folem profet, be tingting long hevi wok ia we Lod i putum long profet blong Hem: “[Sapos yu no toktok blong givim woning long man nogud, mo man nogud ia i ded wetem ol rabis sin blong hem, nao blad blong hem i stap long han blong yu.]”6
Wan Witnes blong Miwan
Yumi akseptem Presiden Nelson semmak olsem we bae yumi akseptem Pita o Moses sapos yumi bin laef long taem blong olgeta. God i talem long Moses: “!Yu go naoia! Bambae mi mi givhan long yu long toktok blong yu, mo bambae mi talem long yu wanem we yu yu mas talemaot.”7 Yumi stap lisin long profet blong Lod wetem fet ia se ol toktok blong hem oli “kamaot long stret maot blong Lod nomo.”8
?Hemia i fet we i blaen? No. Nogat. Wanwan long yumi i gat wan witnes we i kam long Spirit se Gospel we i Kambak blong Jisas Kraes i tru. Folem tingting mo joes blong yumi, yumi bin leftemap han long moning ia, we yumi talemaot se yumi wantem sastenem profet blong Lod, wetem “tras blong yumi, fet, mo prea,9 mo taem yumi folem kaonsel blong hem. Yumi gat spesel janis ia, olsem ol Ol Lata-dei Sent, blong kasem wan witnes blong yumiwan, se koling blong Presiden Nelson i kam long God. Nomata we waef blong mi, Keti, i save Presiden Nelson blong kolosap 30 yia ia, hem i no gat kwestin abaot tabu wok we hem i kasem; stat long taem we oli setem Presiden apat, hem i stat blong ridim evri jeneral konfrens toktok blong hem blong ol las 34 yia, i stap prea blong save tru se hem i profet. Mi promesem yufala we bigfala witnes ia bae i kam long yu taem yu putum tingting i stap daon mo lukaotem ansa ia wetem ful tingting.
?From wanem yumi glad tumas blong save folem voes blong profet blong yumi? Long olgeta we oli stap strong blong lukaotem laef we i no save finis, voes blong profet i tekem sefti long saed blong spirit long wan taem we i trabol tumas.
Yumi stap laef long wan wol we i gat tumas voes i singaot. Intanet, ol smatfon blong yumi, ol bokis blong entetenmen, evri samting ia, i wantem pulum tingting blong yumi, mo oli sakem paoa blong olgeta antap long yumi, mo hop se bae yumi pem ol samting blong olgeta mo yusum ol standet blong olgeta.
Wanem we yumi luk se oli ol infomesen mo tingting we i no gat en, oli stap rimaenem yumi long ol woning blong skripja se bae oli saksakem yumi i go i kam,10 bae oli pulum yumi folem win11 bae ol waes giaman wok blong olgeta we oli wet blong trikim yumi bae oli winim yumi.12
Blong angkarem sol blong yumi long Lod Jisas Kraes, i minim se yumi mas lisin long olgeta we Hem i sendem i kam. Taem yumi stap folem profet long wan wol we i stap muvmuv, i olsem se yumi kavremap yumi long wan smut, wom blangket long wan kolkol dei.
Yumi stap laef long wan wol we i wantem risen, i toktok, o raorao, i wantem stret tingting mo eksplenesen. Blong gat kwestin ia, “?from wanem?, i wan gud samting long plante saed blong laef blong yumi, mo i letem paoa blong waes blong yumi i lidim yumi long fulap joes mo desisen we yumi fesem evri dei.
Be plante taem, voes blong Lod i kam we i no gat eksplenesen long hem.13 Longtaem bifo we ol man blong skul oli stadi long risal blong fasin blong no stap fetful long tras blong ol hasban, waef mo pikinini, Lod i bin talem: “Yufala i no mas mekem adaltri.”14 Bitim waes tingting hemwan, yumi holemtaet moa presen we i Tabu Spirit.
Yu No Sapraes
Voes blong profet, we oltaem i wan voes we i kaen, bae i wan voes we i askem yumi blong jenis, blong sakem sin, blong kambak long Lod. Taem i nid blong stretem yumi, yumi no wet moa. Yu no sek taem we woning voes blong profet i agensem tingting blong plante long tedei. Ol faeabol blong jik blong olgeta we oli no biliv, oltaem, oli sakem i kam long stret taem we profet i stat blong toktok. Taem yu stap putum tingting blong yu i stap daon blong folem kaonsel blong profet blong Lod, mi promesem yu se bae yu kasem wan moa blesing blong sefti mo pis.
Yu no sek sapos, samtaem, ol tingting blong yuwan i no oltaem agri, long fas ples, wetem ol tijing blong profet blong Lod. Ol taem ia, oli ol taem blong lanem samting, blong putum tingting i stap daon, taem yumi go daon long ol ni blong yumi blong prea. Yumi wokbaot fored wetem fet, yumi trastem God, yumi save se long stret taem bae yumi kasem samting i klia moa we i kam long Papa long Heven. Wan profet i tokbaot bigfala presen blong Sevya olsem we hem i tingting blong Pikinini we i draon insaed long tingting blong Papa.”15 Taem yumi sarenda long tingting blong yumi i go long hemia blong God, hemia, i no blong sarenda, be i stat blong wan win blong glori.
Sam bae oli traem blong brekbrekem tumas ol toktok blong profet, oli traehad blong faenemaot wanem i voes blong profet, mo wanem i tingting blong hemwan.
Long 1982, tu yia bifo oli singaotem hem olsem wan Jeneral Atoriti, Brata Russel M. Nelson i talem: “Mi neva askem miwan, ‘?Wetaem nao profet i toktok olsem wan profet, mo wetaem nao hem i no toktok olsem?’ Intres blong mi, hem i: ‘?Olsem wanem mi save kam moa olsem Hem?” Hem i ademap: “fasin blong tingting blong mi i blong stop blong gat kwestin mak long ol toktok blong profet, mo putum ol singaot mak.”16 Wei ia nao wan we i gat tingting i stap daon mo i gat Spirit i jusum blong putum oda long laef blong hem. Naoia, 36 yia afta, hem i profet blong Lod.
Stap Mekem Fet blong Yu long Sevya?
Long laef blong miwan, mi bin faenem se taem mi stap stadi wetem prea long ol toktok blong profet blong God, mo wetem longfala tingting, mi stretem tingting blong mi, long saed blong spirit, i go wetem ol insperesen tijing blong hem, nao fet blong mi long Lod Jisas Kraes, oltaem i kam antap.17 Sapos yumi jusum blong putum kaonsel ia i stap long saed mo disaed se, yumi nao, yumi save samting, bae fet blong yumi i safa mo lukluk i go long samting we i no save finis, bae klaod i blokem. Mi promesem yufala se taem yufala i stap gohed blong stap strong evriwan blong folem profet, bae fet blong yu long Sevya bae i kam antap.
Sevya i talem: “Evri profet, … oli bin testifae abaot mi.”18
Wan profet i no stanap bitwin yu mo Sevya. Be, hem i stanap long saed blong yu, mo i poenem rod i go long Sevya. Bigfala responsabiliti mo hae presen olgeta we wan profet i givim long yumi, i sua witnes blong hem, stret save blong hem, se Jisas, Hem i Kraes. Olsem Pita blong bifo, profet blong yumi i talem: “Hem, Hem i Kraes, Pikinini blong God we i stap laef.”19
Wan dei, long fiuja, taem bae yumi luklukbak long laef blong yumi long wol ia, bambae yumi glad se yumi bin wokbaot long wol ia taem wan profet we i stap laef i stap. Long dei ia, mi prea se bae yumi save talem:
Mifala i bin lisin long Hem.
Mifala i bin biliv long Hem.
Mifala i bin stadi long ol toktok blong Hem wetem longfala tingting mo wetem fet.
Mifala i bin prea from Hem.
Mifala i bin stanap long saed blong Hem.
Mifala i bin gat tingting i stap daon inaf blong save folem Hem.
Mifala i bin lavem Hem.
Mi givim tabu witnes blong mi se, Jisas, Hem i Kraes, i Ridima mo Sevya blong yumi, mo se Presiden Russel M. Nelson, i profet we Hem i jusum long wol ia. Long nem blong Jisas Kraes, amen.