Tekem Tabu Spirit Olsem Gaed blong Yu

I Kam long Elda Larry Y. Wilson

Blong Olgeta Seventi

Hem i wan bigfala presen we i kam long olgeta we oli putum fet blong olgeta long Jisas Kraes.Hemia i presen we i Tabu Spirit.

Long Ista Sandei ia, ol tingting blong yumi i lukluk i go long Laef Bakegen long Ded blong Lod Jisas Kraes, mo long emti tumb we i givim evriwan we i biliv, hop long viktri blong Kraes ova long ded. Mi biliv, wetem Aposol Pol, se: “God i mekem Jisas Kraes i laef bakegen, semmak, from Spirit ia we i stap long yufala, God bambae i mekem bodi blong yufala i laef bakegen.”¹

Blong mekem i laef i minim blong mekem i laef i stap. Semmak olsem we Kraes i mekem bodi blong yumi i kambak long laef afta long ded blong bodi tru long paoa blong Laef Bakegen long ded, Hem i save mekem yumi laef bakegen, o mekem yumi laef i stap, yumi aot long ded blong spirit.² Insaed long buk blong Moses, yumi stap ridim abaot Adam, we i gotru long kaen ia: “[Adam]i bin kasem baptaes, mo Spirit blong God i kamdaon long hem, mo olsem ia nao hem i bon long saed blong Spirit, mo man we i stap insaed long hem i kam laef.”³

Hem i wan bigfala presen we i kam long olgeta we oli putum fet blong olgeta long Jisas Kraes.Presen ia, hem i Tabu Spirit we i stap givim long yumi wanem we Niu Testeman i singaotem “laef long Kraes.”⁴ Be samtaem, ?yumi tekem wan kaen presen olsem i blong nating?

Ol brata mo sista. Hem i wan bigfala spesel janis olgeta blong “tekem Tabu Spirit olsem gaed blong [yumi]”⁵ olsem we eksperiens ia i stap soem.

Long taem blong wo long Koria, Ensign Frank Blair i bin soldia long wan ami transpot sip we i stap long Japan.⁶ Sip ia i no bigwan inaf blong gat wan japlen, mekem se kapten i askem Brata Blair blong stap japlen from hem i luk se yang man ia i wan man we i gat fet mo prinsipol, mo ful tim i stap respektem hem bigwan.

Ensign Blair i raetem: “Sip blong mifala i fas insaed long wan bigfala hariken. Ol wef oli 14 mita hae. Mi nao mi wok. Long tetaem ia wan long ol trifala enjin i stop wok mo long sentalaen blong sip i brok smol. Mifala i gat tu enjin nomo i stap, mo wan i stap wok nomo long haf paoa. Mifala i stap long bigfala trabol.

Ensign Blair i finis long taem blong wok blong hem, mo i stap rere blong go long bed taem kapten i noknok long doa blong hem. Hem i askem: “?Plis, yu save prea from sip ia?” Yes, Ensign Blair i agri blong mekem.

Nao, Ensign Blair i save prea simpol nomo: “Papa long Heven, plis blesem sip blong mifala mo kipim mifala i sef,” mo afta, i go long bed. Be, hem i bin prea blong save wanem samting hem i save mekem, long stret taem ia, blong meksua se sip hem i sef. Ansa blong prea blong Brata Blair, Tabu Spirit i talem hem blong i go long brij, toktok wetem kapten, mo lanem moa. Hem i faenem se kapten i stap traem blong disaed se bae i mekem ol enjin blong sip oli ron long wanem paoa. Ensign Blair i gobak long rum blong hem, i prea bakegen.

Hem i prea: “?Wanem nao mi save mekem blong help blong lukluk long problem blong ol enjin?

Ansa i kam, Tabu Spirit i talem slo long hem se hem i nid blong wokbaot raon long sip, mo lukluk ol samting we i stap blong kasem moa infomesen. Bakegen, hem i gobak long kapten, mo i askem raet blong wokbaot raon long dek. Afta, wetem wan laeflaen raon long wes blong hem, hem i go aotsaed insaed long strong win ia.

Hem i stanap i go biaen long sip evriwan, i stap lukluk ol bigfala propela blong sip taem oli stap kamaot long wota taem sip i stap antap evriwan long wef. Wan nomo i stap wok fulwan, mo i stap spin i kwik we i kwik. Afta we i lukluk olsem, Ensign Blair i bin prea bakegen. Klia ansa we hem i kasem, i we, gudfala enjin we i stap, i wok strong tumas mo i nid blong i slodaon. Mekem se hem i gobak long kapten, mo i talem samting ia. Kapten i sapraes, i talem long hem se enjinia blong sip i talem defren olgeta—se bae oli mas mekem gudfala enjin i spid moa blong save winim hariken. Be nomata hemia, kapten i jusum blong folem tingting blong Ensign Blair, mo i mekem enjin i slodaon. Taem i kasem moning, sip i stap sef long ol wota we i kwaet.

Tu aoa afta, gudfala enjin i stop blong wok wantaem. Wetem nara enjin we i stap long haf paoa, sip i bin save go saed long wof.

Kapten i talem long Ensign Blair: “Sapos yumi no mekem enjin ia i slodaon long stret taem we yumi bin mekem, bae yumi lusum enjin ia long medel blong hariken.”

Sapos i no gat enjin ia, bae i no gat rod blong save stiarem sip. Sip bae i kapsaet mo bae i draon. Kapten i talem tangkyu long yangfala LDS ofisa ia, mo i talem se hem i biliv se from oli folem ol filing blong spirit blong Ensign Blair, hemia i sevem sip mo ol wokman blong sip.

Nao. Stori ia i bigwan smol. Maet bae yumi no save fesem sam kaen situesen olsem, be stori ia, i gat ol impoten gaedlaen abaot hao yumi save kasem help blong Spirit, plante moa taem.

Faswan, taem yumi tokbaot revelesen, yumi mas tanem ki blong redio blong yumi i stap long stret frikwensi blong heven. Ensign Blair i bin stap laef long wan klin mo fetful laef. Sapos hem i no bin stap obei, bae hem i no gat tras ia we i nid long saed blong spirit blong prea olsem we hem i bin mekem from sefti blong sip blong hem, mo blong kasem ol stret help. Wanwan, i mas traehad blong stretem laef blong laef i folem ol komanmen blong save kasem daereksen we i kam long Hem.

Samtaem, yumi no save harem signol blong heven from se yumi no stap klin inaf. Fasin blong sakem sin mo stap obei, oli rod ia blong kasem klia komunikesen bakegen. Toktok blong OlTesteman blong toktok ia, sakem sin, i minim “blong tanem,” o “blong tanemraon.”⁷ Taem yu filim se yu stap longwe long God, yu nidim nomo blong mekem desisen ia blong tanem yu longwe long sin, fesem Sevya long weaples bae yu faenem se Hem i stap wet long yu, wetem han blong Hem we i open bigwan i stap. Hem i wantem tumas blong lidim yu, mo i nidim wan prea nomo blong yu kasem help blong hem bakegen.⁸

Sekenwan, Ensign Blair, i no jes askem Lod blong stretem problem blong hem. Hem i askem wanem hem i save mekem blong kam pat blong ansa. Semmak, yumi save askem: “Lod, wanem mi mas mekem blong mi pat blong ansa ia?” Bae yumi no jes listim daon ol problem blong yumi mo askem Lod blong stretem olgeta, be yumi mas lukaot blong girap mo faenem sam wei blong kasem help blong Lod, mo tu, blong komitim yumiwan blong tekem aksen folem wanem Spirit i talem long yumi.

I gat wan nambatri impoten lesen insaed long stori ia blong Ensign Blair. ?Bae hem i save prea wetem ful tras ia sapos hem i no bin kasem help blong Spirit long sam taem bifo long hemia? Taem hariken i kam, i no taem blong stap karemaot das long presen we i Tabu Spirit, mo traem faenem olsem wanem blong yusum Hem. Yangfala man ia, i klia se hem i bin stap folem wan paten we hem i bin yusum plante taem bifo, wan paten we hem i bin lanem olsem wan fultaem misinari. Yumi nidim Tabu Spirit olsem gaed blong yumi long ol kwaet wota, blong mekem se Hem i no save mekem mistek long voes blong Hem long taem blong strongfala hariken.

Sam oli save tingting se yumi no sapos blong ting se Spirit bae i givhan evri dei, from se “hem i no stret blong [God] i talemaot evri samting blong mekem,” nogud yumi kam ol les wokman.⁹ Be skripja ia, Lod i givim long ol fas misinari we oli bin askem Josef Smit blong kasem wan revelesen we olgetawan nao oli sapos blong kasem. Wan ves bifo long hemia, Lod i talem olgeta blong kam long misin fil taem oli stap tokbaot hemia bitwin olgeta, mo tu, wetem mi.” ¹⁰

Olgeta misinari ia oli bin wantem kasem wan spesel revelesen abaot travel plan blong olgeta. Oli no bin lanem yet blong kasem daereksen blong olgetawan long saed blong ol poen we i blong olgeta nomo. Lod i bin singaotem fasin ia long stret nem blong hem: les wok. Ol fas memba blong Jos, maet oli glad tumas we oli gat wan tru profet, mekem se oli stap long denja blong foldaon, foldaon blong no lanem hao blong kasem revelesen blong olgetawan bakegen. Blong stap dipen long yuwan long saed blong spirit, hem i blong save harem voes blong Lod tru long Spirit blong Hem long saed blong laef blong yuwan bakegen.

Alma i givim kaonsel long boe blong hem blong “askem advaes long Lod long evri wok blong yu.”¹¹ Blong laef long wei ia—wanem we yumi singaotem plante taem “laef wetem Spirit”—i wan hae spesel janis. Hem i tekem i kam wan fasin we i kwaet, mo i sua, wetem tu ol frut blong Spirit, ol frut olsem lav, glad, mo pis.¹²

Ensign Blair i bin gat paoa blong tekem Tabu Spirit olsem gaed blong Hem, mo from hemia, i bin sevem hem mo ol fren long sip long taem blong hariken. Ol nara kaen hariken oli stap blo strong tedei. Parabol blong Buk blong Momon abaot tri blong laef,¹³ i givim wan strong pikja long wei blong kasem wan sef ples long wan kaen wol olsem. Drim ia, i tokbaot ol klaod blong tudak we oli kamaot kwik blong prapa spolem gud ol memba blong Jos we oli stap wokbaot long rod i gobak long God.¹⁴

Taem mi lukluk long pikja ia, mi stap luk, long ae blong maen blong mi, plante pipol we oli stap wokbaot long rod ia, sam we han blong olgeta i hang strong long rel blong aean, be plante moa, oli stap folem nomo leg blong ol pipol we oli stap wokbaot long fored blong olgeta. Laswan ia, i mas tingting mo wokhad smol moa. Yu save mekem mo tingting folem wanem ol narawan oli stap mekem mo tingting long hem. Hemia i save wokgud taem san i saen gud. Be ol hariken blong giaman, mo ol klaod blong giaman samting oli girap we oli no givim woning. Long ol situesen ia, blong savegud voes blong Tabu Spirit, i wan poen blong laef mo ded blong spirit.

Strong promes blong Nifae i we: “eni man we bae i lisin gud long toktok blong God, mo bae i hang strong long hem, bae i no save lus; mo tu, ol temtesen mo ol spia blong devel, we i gat faea long hem, i no save winim olgeta blong mekem oli kam blaen, blong lidim olgeta oli gowe blong lus.”¹⁵

Blong folem leg blong ol pipol long fored blong yu long rod ia, hem i no inaf. Yumi no save jes mekem mo tingting folem wanem ol narawan oli stap mekem mo tingting long hem. Yumi mas gat wan laef we Wan i lidim yumi long hem. Yumi wanwan i mas gat han blong yumiwan we i hang long rel blong aean. Afta nao, bae yumi save go long Lod, wetem tingting i stap daon mo wetem tras, mo save se bae “Hem, bae i tekem han blong [yumi] mo lidim [yumi], mo givim ansa long ol prea blong [yumi].”¹⁶ Long nem blong Jisas Kraes, amen.