Elda Gerrit W. Gong

Kworom blong Olgeta Twelef Aposol

“Long Ista Sabat ia, mi singsing wetem glad, ‘Aleluia,’” Elda Gerrit W. Gong i talem long fas jeneral konfrens toktok blong hem olsem wan memba blong Kworom blong Olgeta Twelef Aposol. “Singsing ia blong lav we i pemaot yumi blong Sevya we i raesap, i selebretem yuniti blong ol kavenan … mo Atonmen blong Jisas Kraes.”

Elda Gong i bin spendem laef blong hem blong glad long yuniti ia. Hem i save se paoa blong ol kavenan blong yumi, wetem antap long hemia, Atonmen blong Sevya, “i mekem yumi save mekem samting, mo i mekem se yumi kam tabu.” “Tugeta, oli mekem samting i swit, i holemtaet, i mekem i tabu mo i pemaot man,” hem i talem.

Long wan mared long tempol, wan dei, paoa blong ol kavenan ia, wetem hemia blong Atonmen, i bin kamkamaot long ol mira blong tempol. Hem i pikjarem ol jeneresen blong ol famli blong hem we oli gogo kasem taem we i no save finis, stat long faswan famli we hem i save, Fas Dragon Gong, we i bon 837 A K D, i go tru long 36 jeneresen i go kasem ol apupikinini blong hem, mo afta i go, i go, long tufala wei.

Hem i talem: “Mi stat blong andastanem se waef blong mi, mo miwan bakegen, olsem ol pikinini blong papa mo mama blong mitufala, mo papa mo mama blong ol pikinini blong mitufala, olsem ol apupikinini blong ol bubu blong mitufala, mo olsem ol bubu blong ol apupikinini blong mitufala.” “Ol bigfala lesen blong laef long wol ia oli go insaed sloslo insaed long sol blong yumi taem yumi stap lanem mo stap tijim ol rol we oli no save finis, wetem hemia blong stap olsem wan pikinini mo papa o mama, mo papa mo mama mo pikinini.”

Elda Gong i bin stap olsem wan Jeneral Atoriti Seventi stat long Epril 2010, mo olsem wan memba blong Presidensi blong Olgeta Seventi stat long Oktoba 2015. Oli bin sastenem hem i kam wan memba blong Kworom blong Olgeta Twelef Aposol long 31 Maj 2018, mo hem i talem se hemia i wan “tabu koling we i kam long Lod we i sarem win blong mi.”

Stat long 2011 i go kasem 2015, Elda Gong i bin stap olsem wan memba blong Esia Eria Presidensi, mo long en blong seves ia, hem i bin stap olsem Eria Presiden. Hem i bin go long fultaem misin long Taewan Taepe Misin, i bin wan hae kaonsela, wan hae pris grup lida, wan stek Sandei Skul presiden, wan seminari tija, wan bisop, wan stek misin presiden, wan stek presiden mo wan Eria Seventi.

Elda Gong i winim wan Art digri long saed blong Esia Studi mo Yunivesiti Stadi long Brigham Yang Yunivesiti long 1977. Long 1979, hem i kasem wan masta long filosofi digri, mo long 1981, pepa blong dokta long saed blong intanasonol rilesen long Oksfod Yunivesiti, mo hemia stadi long ples ia anda long wan Rhodes skolasip. Long 1985, hem i wok olsem wan spesel asisten blong anda sekretari blong stet long Yunaeted Stet stet dipatmen, mo long 1987 olsem spesel asisten long Yunaeted Stet ambasada long Beijing, Jaena. Long stat blong 1989, hem i bin stap long plante defren posisen long Senta blong Stratejik mo Intanasonol Stadi long Wasington D.K. Hem i bin asisten long presiden blong mekem ol plan mo mekem ol stadi long Brigham Yang Yunivesiti kasem Epril 2010.

Ol bubu blong Elda Gong oli aot long Jaena mo muv i go long Yunaeted Stet. Elda Gong i bon long Redwud Siti, Kalifonia, YSA, long 1953. Hem i maredem Susan Lindsay long Jenuware 1980, mo tufala i papa mo mama blong fo pikinini, mo tufala i gat tri apupikinini.

“Evri samting we i gud inaf mo i no save finis i fas long trutok ia se God, Papa blong yumi we i no save finis we i gat lav, i ril, mo Pikinini blong Hem, Jisas Kraes, mo Atonmen blong Hem i ril mo Tabu Spirit i witnes long hemia,” Elda Gong i bin talem long konfrens ia. “Wetem respek, mi witnesem mo testifae long tabu fasin abaot Kraes we i stap laef—Hem i bin stap wetem yumi long stat, Hem i stap wetem yumi kasem en.”