Hem I Abaot Pipol
I Kam long Bisop Gérald Caussé
Prisaeding Bisop
Jos, hem i abaot yu, ol disaepol blong Lod—olgeta we oli lavem mo folem Hem mo oli tekem long olgeta nem blong Hem.
Taem oli stap rere blong bildim naesfala Paris Franis Tempol, mi gat wan eksperiens we bae mi neva fogetem. Long 2010, taem oli faenem ples we bae tempol i stap long hem, meya blong siti i askem blong mit wetem mifala blong save moa abaot Jos blong mifala. Miting ia hem i wan impoten step blong kasem raet ia blong bildim tempol. Mifala i lukaotgud mo rere long wan presentesen, we insaed i gat ol naesfala pikja blong ol Lata-dei Sent tempol. Hop blong mi hem we, naesfala akitek blong ol tempol ia bae ipulum meya blong sapotem projek blong mifala.
Long sapraes blong mi, meya i talem se bae hem i no luk presentesen blong mifala, bae hem mo tim blong hem oli jusum blong faenemaot wanem kaen jos nao hem i jos blong mifala. Long manis afta, oli invaetem mifala i gobak blong harem wan ripot we i kam long wan siti kaonsela we hem i semtaem wan profesa long saed blong histri blong relijin. Woman ia i talem, “Antap long evri samting, mifala i wantem blong andastanem huia ol memba blong jos. Faswan, mifala i go long wan long ol sakramen miting blong yufala. Mifala i sidaon biaen long japel mo lukluk gud ol pipol insaed long miting ia mo wanem olgeta oli stap mekem. Afta mifala i mit wetem ol neiba blong yufala—olgeta we i stap raon long stek senta blong yufala—mo mifala i askem olgeta abaot yufala ol Momon, se yufala ol wanem kaen man.”
?“So wanem nao ol las tok blong yufala?” Mi askem, mo wari smol. Woman ia i ansa, “Mifala i faenemaot se Jos blong Jisas Kraes blong Ol Lata-dei Sent hem i kolosap moa long stret Jos blong Jisas Kraes bitim ol nara jos we mifala i save.” Kolosap mi agens mo talem se, “!Ansa ia i no stret evriwan! Hem i no jos we i kolosap moa; hem i Jos blong Jisas Kraes—semfala Jos, tru Jos!” Be mi holemtaet miwan mo talem wan kwaet prea blong tangkyu. Afta meya i advaesem mifala se, folem ol samting we oli faenem, hem mo tim blong hem oli no gat eni agens wetem wok blong bildim tempol long komuniti blong olgeta.
Tedei, taem mi tingabaot merikel long eksperiens ia, mi fulap long tangkyu from waes tingting blong meya mo spirit blong luksave samting. Hem i save se ki blong andastanem Jos i no blong lukluk long bodi blong ol bilding aotsaed o iven long hao hem i oganaes olsem wan oganaesesen, be tru long ol milian fetful memba, we oli traehad evri dei blong folem ol eksampol blong Jisas Kraes.
Mining ia, blong Jos i defren long wan ves long Buk blong Momon we i talem se: “Mo olgeta [we mi minim ol disaepol blong Lod] we oli bin baptaes long nem blong Jisas, oli bin singaotem olgeta jos blong Kraes.”1
Long nara toktok, Jos hem i abaot pipol. Hem i abaot yu, ol disaepol blong Lod—olgeta we oli lavem mo folem Hem mo oli tekem long olgeta nem blong Hem tru long kavenan.
Presiden Russell M. Nelson i bin komperem Jos long wan naes trak. Yumi evriwan i laekem taem trak blong yumi i klin mo saen gud. Be stamba tingting blong trak ia i no blong stap olsem wan masin we i blong pulum ae; hem i blong muvum ol pipol long trak.2 Long sem fasin, yumi, olsem ol memba long Jos, yumi glad blong gat ol naes ples blong wosip we oli klin mo oli stap gud oltaem, mo yumi glad tu blong gat ol program we oli stap gohed gud. Be ol samting ia oli ol sapot sistem nomo. Stamba tingting blong yumi i blong invaetem wanwan pikinini boe mo gel blong God blong kam long Kraes mo blong givhan long hem long rod blong kavenan. I no gat wan samting i moa impoten. Evri wok blong yumi i abaot pipol mo ol kavenan.
?I no naes olsem se nem we i kam tru long revelesen blong putumbak Jos i fasem tugeta tufala impoten samting insaed long wanwan gospel kavenan? Faswan hem i nem blong Jisas Kraes. Jos ia i blong Hem, mo tabu Atonmen blong Hem we i klinim man, mo ol kavenan oli wan rod ia nomo blong fasin blong sevem man mo blong fasin blong kam olsem wan god.Nambatu nem i tokbaot yumi: Ol Sent, o long nara toktok, ol witnes blong Hem mo ol disaepol blong Hem.
Mi lanem impoten saed blong lukluk long pipol taem mi wan stek presiden long Franis. Long stat blong taem blong seves blong mi, mi bin gat ol plan we mi wantem tumas blong luk long stek: ol niufala wod, ol niufala bilding blong mitinghaos, mo iven fasin blong bildimap tempol long eria blong mifala. Taem mi rilis long koling blong mi sikis yia afta, mi no bin save kasem ol samting ia we mi plan from.Hemia filing blong hem bae olsem we mi no mekem wan samting nating be nomo se, long ol sikis yia ia, ol plan blong mi oli bin jenis smol.
Taem mi stap sidaon long fored long dei we bae oli rilisim mi, mi fulap wetem glad folem wan filing blong tangkyu mo filing se mi bin mekem wan samting. Mi luk ol fes blong handred memba we oli bin kam. Mi tingbaot wan eksperiens long saed blong spirit we i go wetem wanwan long olgeta.
Olgeta ia nao oli ol brata mo sista we oli bin go tru long wota blong baptaes, olgeta we mi bin saenem fasfala tempol rekomen blong olgeta blong oli save kasem ol tabu odinens long tempol, mo olgeta yang pipol mo ol kapol we mi bin setem olgeta apat o rilisim olgeta olsem ol fultaem misinari. I gat plante nara moa we mi bin givhan long olgeta taem oli go tru long ol tes mo hadtaem long laef blong olgeta. Mi filim lav ia olsem wan brata blong wanwan long olgeta. Mi bin faenem klin glad taem mi stap givim seves long olgeta mo hapi long ona blong olgeta long Sevya, mo fet blong olgeta long Sevya.
Presiden M. Russell Baladi bin tijim se, “Wanem we i moa impoten long Jos blong yumi hem i ol responsabiliti be i no namba we oli ripotem o ol miting we oli stap hapen, be sapos wanwan pipol—we yu stap givhan wan afta wan olsem we Sevya i bin mekem—oli bin kam antap mo leftemap tingting, mo oli bin jenis long en.”3
?Ol dia brata mo sista blong mi, yumi stap strong long gospel ia, o yumi stap bisi nomo long ol wok blong Jos? Ki hem i blong folem Sevya long evri samting. Sapos yumi mekem hemia, yumi bae lukluk moa blong sevem wanwan man bitim blong mekem ol wok mo mekem evri program.
?Yu bin gat tingting ia blong askem long yuwan se bae i olsem wanem sapos Sevya i visitim wod blong yu o branj long nekis Sandei? ?Wanem nao bae Hem i mekem? ?Bae Hem i wari blong save sapos ol pikja oli gud o nogat o sapos ol jea oli stap stret mo gud insaed long klasrum? ?O bae Hem i faenem wan man we Hem bae lavem, tijim mo blesem? Ating Hem bae i lukaotem ol niu memba o wan fren blong welkamem hem, wan sik brata o sista we i nidim kamfot, o wan yangfala we i gat hadtaem wetem testemoni blong hem we i nidim blong oli mekem hem i kam antap mo leftemap tingting blong hem.
?Wanem klas nao Jisas bae i visitim? Mi bae no sapraes sapos hem i visitim ol pikinini long Praemeri faswan. Ating Hem bae i nildaon mo toktok wetem ae long olgeta nomo. Hem bae i talemaot lav blong Hem long olgeta, talem ol stori long olgeta, glad long ol droing blong olgeta, mo testifae abaot Papa blong Hem we i stap long Heven. Fasin blong Hem bae i simpol, ril, mo i no wan giaman lav. ?Bae yumi save mekem semmak?
Mi promesem yufala se taem yu stap traehad blong stap long ajenda blong Lod, i no gat samting bae i kam moa impoten bitim blong faenem ol pipol we yu save helpem mo blesem. Long jos, bae yu lukluk nomo blong tijim wanwan man mo tajem hat blong olgeta. Wari blong yu i blong developem waneksperiens long saed blong spirit bitim blong oganaesem wan gudfala aktiviti, blong givhan long ol memba bitim blong tikim wan bokis blong namba blong ol visit we yu bin mekem. Hem i no abaot yu, be hem i abaot olgeta we yumi singaotem brata mo sista.
Samtaem yumi tokbaot blong stap go long Jos. Be Jos i moa long wan bilding o wan ples. Hem i ril mo i stap laef insaed long ol simpol haos long plante eria long wol we oli stap olgetawan, semmak olsem we i stap long ples ia, long Jos hedkwota long Sol Lek Siti. Lod Hemwan i talem se, “From we long weaples we tu no tri man oli joen wanples long nem blong mi, mi mi stap wetem olgeta.”4
Yumi tekem Jos wetem yumi weples yumi go: long wok, long skul, long holidei, mo speseli long ol hom blong yumi. Presens blong yumi mo paoa long mekem jenis hem i inaf blong mekem wanem we yumi faenem long ol tabu ples.
Mi rimemba wan storian we mi bin gat wetem wan fren we i no memba blong fet blong yumi. Hem i sapraes blong lanem se eni man we i klin inaf long Jos blong yumi i save kasem prishud. Hem i askem: “Be hamas prishud man nao yu gat long wod blong yu?”
Mi ansa: “Bitwin 30 mo 40”
Hem i konfius mo gohed: “Long kongregesen blong mi, mifala i gat wan pris nomo. ?From wanem nao yufala i nidim plante pris long Sandei moning?”
Mi wari long kwestin blong hem, mo filim insperesen blong ansa: “Mi agri wetem yu. Mi no ting se yumi nidim plante prishud man long jos long Sandei. Be yumi nidim wan prishud man insaed long evri hom. Mo taem i no gat wan we i holem prishud insaed long wan hom, oli singaotem nara man we i holem prishud blong lukaotem mo givhan long famli ia.”
Jos blong mifala i no jes wan Sandei jos nomo. Wosip blong mifala i gohed evri dei blong wik, weaples mifala i stap mo long wanem mifala i stap mekem. Ol hom blong mifala oli ol stamba ples we mifala i praktisim relijin blong mifala.5 I hapen moa long ol hom blong mifala we mifala i prea, mifala i stadi, mifala i tijim toktok blong God, mifala i givim seves wetem wan klin lav. Mi save testifae long eksperiens blong miwan se ol hom blong yumi oli ol tabu ples we yumi save faenem Spirit—semmak, mo samtaem i moa bitim insaed long ol ples blong wosip.
Mi witnesem se Jos ia, hem i Jos blong Jisas Kraes. Paoa mo laef blong jos i kam tru long ol evri dei aksen blong ol milian disaepol blong Hem we oli traehad evri dei blong folem nambawan eksampol blong Hem blong kea long ol narafala. Kraes i stap laef, mo Hem i stap lidim Jos ia. Presiden Russell M. Nelson hem i profet we Hem i bin jusum blong lidim yumi long ol dei blong yumi. Long ol samting ia, mi testifae long nem blong Jisas Kraes, amen.