Ol Kaonsel Miting blong Fas Sandei

Long fas Sandei blong evri manis, miting blong kworom blong ol elda, mo Rilif Sosaeti bae i no gat wan lesen we tija i tijim. Be, presidensi blong kworom blong ol elda, mo presidensi blong Rilif Sosaeti i lidim ol kaonsel miting ia. Long ol kaonsel miting blong fas Sandei, wanwan, kworom blong ol elda mo Rilif Sosaeti oli kaonsel tugeta o toktok tugeta abaot ol lokol responsabiliti,ol janis, mo ol jalenj; oli lanem samting aot long ol niu tingting mo eksperiens blong wanwan; mo oli mekem plan long sam wei blong tekem aksen folem ol filing o toktok we oli kasem long Spirit. Olgeta toktok ia oli mas folem ol stret skripja mo ol tijing blong ol profet we oli stap laef.

Bae i no evri kaonsel miting we oli semmak. Hemia sam gaedlaen blong helpem ol presidensi blong lidim wan kaonsel we i wok gud.

Bifo long Kaonsel Miting

Mekem olgeta samting ia:

Faenemaot ol lokol nid, ol janis, mo ol jalenj.
Wetem prea, jusum wan topik blong toktok raon long hem.
Invaetem ol memba blong kworom o ol sista blong Rilif Sosaeti blong oli kam, we oli rere blong serem ol tingting mo ol eksperiens blong olgeta.

Yu no mas:

Rere long wan lesen.
Kam wetem ol ansa o ol aksen plan we i stap long maen blong yu finis.

Long taem blong kaonsel miting

Mekem olgeta samting ia:

Invaetem ol memba blong serem ol eksperiens we oli bin gat taem oli bin mekem folem ol toktok blong Spirit mo ol plan we oli bin tokbaot long ol miting we i tekem ples bifo.
Presentem topik blong miting mo leftemap tingting blong ol memba blong kaonsel tugeta abaot topik ia, lukaotem sam ansa mo daereksen we i kam long ol skripja, ol toktok blong ol profet, mo long Tabu Spirit.
Plan blong tekem aksen long wanem yufala i tokbaot. I save gat ol grup plan, o ol plan we wanwan i mekem hemwan.

Yu no mas:

Toktok bitim evri narawan long taem blong kaonsel.
Traem blong winim tingting blong ol narawan wetem ol aedia blong yu.
Tokbaot ol konfidensiol samting, o sam samting we i no blong tokbaot.
Tijim wan lesen.
Fosem eniwan blong tekpat.

Afta long kaonsel miting

Mekem olgeta samting ia:

Folemap ol plan mo ol wok we yu bin givimaot long taem blong kaonsel miting.
Faenem sam wei blong yusum olgeta ia we oli no save kam long miting from se oli gat nara koling, o from sam nara risen. Letem olgeta oli save abaot ol plan we yufala i bin mekem.
Givim ol janis, long ol memba, blong oli serem ol eksperiens blong olgeta long ol miting we oli stap kam.

Samfala Topik blong Kaonsel Miting blong Fas Sandei

Ol aedia blong ol topik blong toktok raon long hem long ol kaonsel miting i save kam long wod kaonsel, presidensi miting, eria plan, wanem filing we i kam long Spirit i go long ol lida taem oli stap givhan long ol memba, mo ol toktok we oli kam long Spirit. Ol topik daon ia, oli sam tingting nomo. Ol lida oli save long samfala nara nid tu we oli save filim insperesen blong putum blong toktok raon long olgeta.

?Olsem wanem nao yumi stap givhan long olgeta raon long yumi? Luk long Mosaea 18:21
?Olsem wanem nao yumi save putum evri defren responsabiliti blong yumi long oda folem hemia we i moa impoten?
?Olsem wanem bae yumi serem gospel wetem ol fren mo ol neiba blong yumi? (luk long Alma 17
?Olsem wanem yumi save protektem yumi mo ol famli blong yumi long ponografi mo nogud fasin blong yusum media?
?Wanem nao bae yumi mekem blong help blong tijim tingting blong ol pikinini blong yumi mo mekem olgeta mo ol yut blong wod oli kam strong moa?
?Olsem wanem nao yumi save mekem moa long wok blong famli histri mo tempol wosip?
?Olsem wanem yumi stap invaetem Lod blong help taem yumi stap lukaotem ol ansa blong ol kwestin blong yumi, mo stap lukaotem blong andastanem gospel i dip moa?
?Olsem wanem yumi save mekem testemoni blong yumi long saed blong Lod mo gospel blong Hem i kam strong moa, mo semtaem, helpem ol famli blong yumi blong stap dipen long olgetawan long saed blong spirit?