Becky Craven

Seken Kaonsela long Yang Woman Jeneral Presidensi

I gat wan toktok we Sista Becky Craven i stap serem oltaem olsem wan misinari: “Taem yu save se huia yu, yu mekem samting i defren long ol narawan.”

“Mo hemia, long saed blong evri samting—stat long fasin we yu dresap, wei we yu toktok, hao yu stanap mo presentem yu, mo ol aktiviti we yu tekpat long hem,” Sista Craven i talem; hem i bin wok wetem hasban blong hem, Ronald L. Craven taem hem i bin prisaed long Not Karolina Misin stat long 2012 kasem 2015.

Sista Craven oli sastenem hem olsem Seken Kaonsela long Yang Woman Jeneral Presidensi long 31 Maj 2018. “Taem ol yang woman oli stat blong luk olgeta long ples blong olgeta insaed long plan ia blong God, oli save luk wan visen we i blong olgetawan,” hem i talem. “Yu mas gat wan visen. Sapos yu no gat wan visen, yu no save weaples yu stap go long hem, mo yu no save wanem blong mekem blong kasem ples ia.”

Rebecca Lynn Craven i bon long 26 Oktoba 1959, long Jadon, Ohaeo, YSA; papa mo mama i Walter Mitchell mo Linda Louise Kazsuk Mitchell. Hem i praod blong singaotem hem “wan ami fren.” Hem i groap long Teksas, YSA, taem ol famli blong hem oli joenem Jos; mo long Jemani, taem we famli blong hem i sil long Swis Temple; afta long Yuta, YSA, long ples ia, hem i bin baptaes long taem we papa blong hem i mekem fas tua long Vietnam; mo long ol stet blong Yunaeted Stet, hemia long Merilan, Kentaki, Misuri, mo Kansas.

Hem i mared long 5 Ogis 1980 long Sol Lek Tempol long 1980, mo tufala i kam papa mo mama blong faef pikinini.

Bifo oli sastenem hem long niufala koling blong hem, hem i bin stap olsem kaonsela long wan wod Rilif Sosaeti presidensi, mo olsem wan odinens wokwoman insaed long Baontiful Yuta Tempol. Hem i bin stap tu olsem wan wod Yang Woman presiden, stek Rilif Sosaeti bod memba, stek misinari mo Webelos lida.

Sista Craven i kasem digri long fasin blong flasem insaed long haos, long Brigham Yang Yunivesiti, mo hem i bin givim seves long atletik advaes komiti. Hem i bin stap tu olsem wan eksekutiv bod memba blong CHOICE yumaniterian, wan jareti oganaesesen we i stap long Yuta.

Hem i laekem blong stap wokbaot, ol wota spot, plei long sno, peinting, i somap blangket, mo mekem ol gem mo ol aktiviti wetem famli blong hem.