Famli Histri: Faenemaot, Putum Tugeta, Joenem

Ol lokol konsalten blong tempol mo famli histri oli save helpem ol memba blong Jos mo ol narawan blong faenem glad we i kam taem wan i faenemaot, i putum tugeta, mo i joenem ol bubu, Elda Bradley D. Foster, Jeneral Atoriti Seventi mo Eksekutiv Daerekta blong Jos Famli Histri Dipatmen, i talem.

Evriwan i gat ol stori blong famli histri blong hem. Mo ol gudfala samting oli hapen taem yu stat blong lukaotem mo faenem olgeta.

“Bigfala lukluk blong yumi long yia we i stap kam, i blong helpem ol konsalten blong luksave rol blong olgeta blong helpem ol memba blong gat eksperiens ia,” Elda Foster i talem. “Yumi mekem hemia, wan afta wan. Yumi go long ol pipol long weaples we oli stap long hem, wetem wan spesel lukluk i go long olgeta we oli bae oli kasem 12 yia, mo olgeta we oli ol niu konvet.” Tufala grup ia, oli benefit kwiktaem blong luk olsem wanem tempol wok i mekem ol famli oli kam strong moa tru long ol taem we oli no save finis, mo plante taem, i mekem se i gat glad long medel blong ol fren mo ol famli.

Iven olgeta we oli no memba blong Jos, oli save gat eksperiens ia blong faenemaot, putum tugeta mo joenem famli tru long wanwan help we oli save kasem long moa long 5000 FamilySearch famli histri senta raon long wol.