Ol Nambawan Presen we Oli Kam long God
I Kam long Presiden M. Russell Ballard
Akting Presiden blong Kworom blong Olgeta Twelef Aposol
Laef i save fulap wetem fet, glad, hapines, hop mo lav taem yumi yusum wan smolsmol pis blong tru fet long Kraes.
Ol brata mo sista blong mi. Yumi jes tekpat long wan tabu asembli, wan praktis we oli save folfolem i gobak long Baebol taem laen blong Isrel i kam tugeta blong filim we Lod i stap mo selebretem ol blesing blong Hem.1 Yumi gat spesel janis ia blong laef long wan taem we praktis ia blong bifo, i bin kambak tru long Profet Josef Smit.2 Mi askem strong long yufala blong save raetemdaon long jenol blong yufala wanem we yufala i bin filim long saed blong tabu taem ia we yufala i bin tekpat long hem.
I no longtaem i pas, yumi bin talem tata long dia fren mo profet blong yumi, Presiden Thomas S. Monson. Nomata we yumi stap misim hem, yumi glad tumas se Lod i bin singaotem wan niufala profet, Presiden Russel M. Nelson, blong prisaed ova long Jos blong Hem. Long wan wei we i gat oda, yumi nao stap statem wan niu japta long Jos histri blong yumi. Hem i wan nambawan presen we i kam long God.
Taem we wanwan long yumi i bin sastenem Presiden Nelson taem yumi bin leftemap han blong yumi, yumi bin stanap olsem ol witnes long fes blong God mo luksave se hem i stret man blong kam afta long Presiden Monson. Taem yumi leftemap han, yumi bin promesem blong mekem folem toktok blong voes blong hem taem hem i stap kasem daereksen we i kam long Lod.
Lod i talemaot se:
“Yufala i mas folem gud evri toktok mo komanmen blong hem [we i Presiden blong Jos] we bambae hem i givim long yumi olsem we hem i stap kasem olgeta. …
“From toktok blong hem, bambae yufala i kasem, semmak olsem se hem i kamaot long maot blong Lod Hemwan, wetem fasin blong save wet longtaem mo wetem fet.”3
Mi bin save niufala profet-presiden blong yumi blong ova long 60 yia. Mi mi wok wetem hem long Kworom blong Olgeta Twelef Aposol blong 33 yia. Mo mi witnesem han blong Lod we i bin mekem hem i rere blong kam prisaeding aposol mo profet blong yumi blong yusum evriwan long ol ki blong tabu prishud long wol ia. Bae wanwan long yumi i sastenem hem fulwan wetem ol kaonsela blong hem mo stap folem daereksen blong olgeta. Yumi welkamem tu Elda Gong mo Elda Soares blong stap olsem ol memba blong Kworom blong Olgeta Twelef Aposol.
Afta we Jisas i laef bakegen long ded, we i wan taem yumi stap selebretem bigfala glori blong Ista wiken ia. Hem i bin kamaot long ol disaepol blong Hem mo talem: “Pis i stap wetem yufala. Olsem we Papa blong mi i sanem mi mi kam, oraet, long sem fasin mi mi sanem yufala i go.”4 Luk, aksen ia we i hapen tu taem—God i sendem Pikinini blong Hem. Pikinini i sendem ol wokman blong Hem—man mo ol woman long wol ia—blong oli mekem wok blong Tufala.
Yumi no mas sapraes blong save se olgeta man o woman ia we God i singaotem olgeta blong mekem wok blong Lod, oli no ol man we oli stret evriwan. Ol stori long ol skripja oli talem gud ol taem we ol man mo ol woman we God i bin singaotem olgeta blong mekem ol bigfala wok—ol gudfala boe mo gel blong Papa long Heven—we God i singaotem olgeta long ol wok blong olgeta insaed long Jos, we oli bin traem bes blong olgeta, be yet, i no bin gat wan i stret evriwan. Hemia i tru wetem yumi tedei.
From se i tru we yumi, olsem ol man, yumi no strong mo yumi gat limit, ?olsem wanem nao bae yumi muv i go fored blong sapotem mo sastenem wanwan long yumi? I stat wetem fet—tru fet we i kam long hat, fet long Lod Jisas Kraes.Fet long Sevya i fasfala prinsipol blong doktrin mo gospel blong Kraes.
Sam yia i pas, mi bin stap visitim Holi Lan. Taem mifala i draev pasem wan masted plant, daerekta blong BYU Jerusalem Senta i askem sapos mi luk wan masted plant finis. Mi neva luk, mekem se mifala i stop. Hem i soem long mi ol sid blong masted plant. Oli smolsmol we.
Nao, mi tingbaot tijing blong Jisas: “Tru, mi talem long yufala, nating sapos bilif blong yufala i smol nomo, be bambae yufala i save talem long bigfala hil ia se ‘Yu gowe’ nao bambae hem i mas gowe. Bambae i no gat wan samting we yufala i no save mekem.”5
Sapos yumi gat fet we i smol olsem wan sid blong masted tri, bae Lod i save helpem yumi blong muvumaot ol bigfala hil blong slak tingting, mo tu tingting long ol wok we oli stap long fored blong yumi taem yumi stap givim seves long ol pikinini blong God, we i tekem ol memba blong famli, ol memba blong Jos, mo olgeta we oli no yet ol memba blong Jos.
Ol brata mo sista, laef i save fulap wetem fet, glad, hapines, hop mo lav taem yumi yusum smolsmol pis blong tru fet long Kraes we yumi gat—we i smol olsem masted sid blong fet.
Elda George A. Smith i tingbaot sam advaes we Profet Josef Smit i bin givim long hem: “Hem i talem long mi se bae mi neva mas slakem tingting blong mi, nomata wanem hadtaem i raonem mi. Sapos oli slakem mi long bigfala hol blong Nova Skotia mo evri Ston blong Hil oli hip antap long mi, bambae mi no mas slakem tingting blong mi, be mi mas hang i stap, mi praktisim fet blong mi, mo gat gudfala paoa long tingting mo mi mas kamaot i go antap long hip ia long en blong dei.”6
Yumi mas tingbaot toktok blong Pol: “Mi save mekem evri samting long paoa blong Kraes ya we i stap mekem mi mi strong”7 Blong save samting, hem i wan nara nambawan presen we i kam long God.
Antap long ol presen we mi bin tokbaot finis, i gat plante, plante moa. Bae mi talem samfala nomo—presen we i Sabat dei, sakramen, seves long ol narawan, mo presen we i bigwan tumas we i kam long God, we i Sevya blong yumi.
Paoa blong Sabat dei i blong gat eksperiens long Jos mo long hom, long glad ia, hapi filing, mo wom filing blong Spirit blong Lod, mo i no gat eni kaen samting i pulumaot yumi long hemia.
Plante tumas long yumi i letem olgeta blong laef onlaen wetem mobaelfon o kompiuta blong olgeta—ol skrin i saenem fes blong olgeta dei mo naet, mo ol iafon i blokem kwaet, smol voes blong Spirit. Sapos yumi no faenem taem blong karemaot ol samting ia, bae yumi mestem janis blong harem voes blong Hem we i talem: “Stap kwaet. Yufala i mas save we mi mi God.”8 Nao. I no gat samting i rong blong yusum ol niufala teknoloji we oli kam long insperesen blong Lod, be yumi mas waes blong yusum olgeta. Tingbaot presen ia we i Sabat dei.
Blesing ia blong kasem sakramen long sakramen miting, i neva mas kam olsem wan samting nating we yumi stap mekem oltaem, o i wan samting we yumi jes stap mekem nomo. Hem i 70 minit nomo long wan ful wik, we yumi save stop smol mo faenem moa pis, glad mo hapines long laef blong yumi.
Blong kakae sakramen mo blong stap riniu kavenan blong yumi i wan saen we i kam long yumi i go long Lod se bae yumi tingbaot Hem oltaem. Atonmen i wan presen blong gladhat we i kam long God.
Spesel janis ia blong givim seves long ol pikinini blong Papa long Heven i wan narajanis blong folem eksampol blong Pikinini blong Hem we Hem i Lavem, taem yumi givgivim seves long wanwan long yumi.
Sam seves oli ofisol—insaed long famli blong yumi, long Jos koling, mo taem yumi tekpat long komuniti seves.
Ol memba blong Jos—tugeta ol man mo ol woman—oli no mas tingting tu taem, sapos oli wantem, blong stanap from ol ofis blong long gavman long eni level blong gavman long eni ples we oli stap long hem. Voes blong yumi tedei, oli nidim mo oli impoten blong harem insaed long ol skul, long ol taon, mo long ol kantri blong yumi. Taem i gat dimokrasi i stap, hem i diuti blong yumi olsem ol memba blong vot blong putum ol gudfala man mo woman we oli glad blong givim seves.
I gat plante janis blong givim seves we oli no ofisol—we oli no givimaot—mo oli kam taem yumi go kasem ol narawan we yumi stap mitim long wokbaot blong laef. Tingbaot se Jisas i tijim loya se yumi mas lavem God mo neiba blong yumi i semmak olsem yumiwan bakegen, mo hem i yusum Gudfala Man Sameria olsem wan eksampol.9
Seves i openem wan windo we tru long hem, yumi andastanem laef mo seves blong Kraes. Hem i kam blong yumi givim seves, olsem we skripja i stap tijim, “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli go fri.”10
Pita, maet hem i tokbaot seves blong Sevya long wol ia long naen toktok taem hem i tokbaot Jisas: “we i go, i stap mekem ol gud wok.”11
Lod Jisas Kraes i nambawan presen olgeta aot long evri presen we i kam long God. Jisas i talem: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam.”12
Nifae i kasem hamas Sevya i impoten taem hem i talem: “Mo mifala i tokbaot Kraes, mifala i glad long Kraes, mifala i prij long saed blong Kraes, mifala i profesae long saed blong Kraes, mo mifala i raetem folem ol profesi blong mifala blong mekem se ol pikinini blong mifala i save gat save long wanem ples oli save lukluk long hem blong kam klin aot long ol sin blong olgeta.”13 Yumi mas kipim Kraes i stap long medel blong laef blong yumi long evri taem mo long evri ples.
Yumi mas tingbaot se nem blong Hem nao i kamkamaot long ol ples blong yumi blong wosip; yumi kasem baptaes long nem blong Hem; mo yumi kasem konfemesen, oli odenem, givim endaomen mo silim yumi long mared long nem blong Hem. Yumi tekem sakramen, mo promesem blong tekem long yumi, nem blong Hem—mo kam ol tru Kristin Man. Long en, oli askem yumi, long prea blong sakramen, “blong oltaem tingbaot hem.”14
Taem yumi stap rere from Ista Sandei tumoro, bae yumi tingbaot se Kraes i hae olgeta. Hem i stret mo gud Jaj ia, fetful Loya blong yumi, Ridima blong yumi we i gat blesing, Gudfala Man ia blong Lukaot long Sipsip, Mesaea ia blong Promes, wan tru Fren, mo plante, plante moa. Yes i tru, Hem i wan nambawan presen blong yumi we i kam long Papa blong yumi.
Wok blong yumi, blong stap disaepol, i askem plante samting, i gat fulap wari, mo wok blong mekem. Be, sam aktiviti i mas stap oltaem long hat blong Jos membasip blong yumi. Nao, Lod i givim komanmen ia: “Taswe, stap fetful; stanap long ofis we mi bin putum yu long hem; givhan long olgeta we oli no strong, leftemap ol han we oli hang i kamdaon, mo mekem ol ni ia we oli no strong oli kam strong moa.”15
!Hemia i Jos blong Hem long aksen! !Hemia klin mo stret relijin! !Hemia i gospel wetem tru mining blong hem taem we yumi stap helpem, leftemap mo mekem i kam strong olgeta we oli gat nid long saed blong spirit mo laef! Blong mekem olsem, i nid blong yumi go visitim olgeta mo helpem olgeta,16 blong mekem se testemoni blong fet blong olgeta long Papa we i stap long Heven, mo Jisas Kraes mo long Atonmen blong Hem bae i hang strong long hat blong olgeta.
Bae Lod i helpem mo blesem yumi blong holemtaet gud ol plante nambawan presen we oli kam long God, wetem tu, membasip blong yumi insaed long Jos ia we i Kambak we i blong Hem. Mi prea se bambae yumi fulap long lav long evriwan long ol pikinini blong Papa blong yumi long Heven, mo bambae yumi save luk nid blong olgeta mo glad blong ansarem kwestin blong olgeta abaot gospel long wan klia mo kaen fasin, blong mekem se oli andastanem moa mo oli glad moa long wanwan long yumi.
Mi testifae se Jisas Kraes i Sevya blong yumi. Wanem we bae oli tijim yumi long jeneral konfrens ia i kam long yumi tru long insperesen long ol aposol mo ol profet, long ol Jeneral Atoriti, mo ol sista lida we oli ol Jeneral Ofisa blong Jos. Bae glad mo pis blong Lod i stap wetem wanwan long yumi, mi prea wetem tingting i stap daon, long nem blong Lod Jisas Kraes, amen.