ol fas misinari blong Jos

5–11 Epril

Doktrin mo Ol Kavenan 30–36

“Mi Singaotem Yu blong Prijim Gospel blong Mi”

Taem yu stap stadi wetem prea long Doktrin mo Ol Kavenan 30–36 wetem ol pikinini long klas blong yu long maen, Spirit bae i givim yu ol aedia abaot olsem wanem blong tijim olgeta. Lukaotem sam moa aedia long aotlaen ia.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Holem wan pikja blong ol misinari antap, mo askem ol pikinini blong serem wanem oli save abaot misinari wok.

tijing pikja bokis

Tijim Doktrin: Ol Smol Pikinini

Doktrin mo Ol Kavenan 33:2–3, 6–10

Mi save serem gospel blong Jisas Kraes.

Iven ol smol pikinini oli save serem witnes blong olgeta long gospel blong Jisas Kraes. ?Olsem wanem yu save yusum ol ves ia blong help givim insperesen blong oli mekem?

Samfala Aktiviti we Yu Save Mekem

• Invaetem ol pikinini blong traem talem wan sot sentens olsem “God i lavem yu” wetem wan maot we i sat. Poenemaot se yumi no save tijim ol pipol abaot gospel sapos yumi no openem ol maot blong yumi. Ridim Doktrin mo Ol Kavenan 33:8–10, mo invaetem ol pikinini blong openem ol maot blong olgeta evri taem oli harem sot sentens ia “openem ol maot blong yufala.” ?From wanem Papa long heven i wantem yumi blong openem ol maot blong yumi mo serem gospel wetem ol narawan?

• Wispa wan samting sloslo long ol pikinini, olsem “Josef Smit i bin wan Profet blong God,” mo askem olgeta blong ripitim wanem yu bin talem. Afta talem semmak sot sentens ia long wan voes we i laod moa. Ridim Doktrin mo Ol Kavenan 33:2. Helpem ol pikinini blong andastanem se “[blong] leftemap voes blong [yumi]” i minim blong no fraet blong talem long ol nara man abaot Jisas Kraes, Buk blong Momon, mo ol nara trutok blong gospel.

• Putum sam doli we oli mekem long pepa o sam pikja blong sam man raon long rum. Invaetem ol pikinini blong faenem ol pipol ia mo karem olgeta i kam tugeta long fored blong rum. Ridim Doktrin mo Ol Kavenan 33:6, mo eksplenem wanem i minim se bae Lod i “karem i kam wanples, olgeta we [Hem i] jusum aot.” Testifae se yumi save help blong karem i kam tugeta ol pipol long Lod taem yumi serem gospel.

• Singsing tugeta wan singsing abaot serem gospel, olsem “I Want to Be a Missionary Now” (Children’s Songbook,168). Helpem ol pikinini blong oli tingting long ol wei we oli save helpem ol nara man blong lanem abaot Jisas Kraes.

Doktrin mo Ol Kavenan 33:12–17

Mi save bildim laef blong mi long gospel blong Jisas Kraes.

Kaonsel we Lod i bin givim long Esra Teya mo Nortrop Swit i save helpem ol pikinini we yu stap tijim blong bildim laef blong olgeta long gospel blong Jisas Kraes.

Samfala Aktiviti we Yu Save Mekem

• Soem long ol pikinini wan pikja blong wan fandesen blong wan bilding, mo askem olgeta blong tokbaot gud. ?From wanem wan bilding i nidim wan strong fandesen? Ridim, wetem ol pikinini, Doktrin mo Ol Kavenan 33:12–13, mo eksplenem se Lod i wantem yumi blong bildim ol laef blong yumi long gospel blong Hem. Helpem ol pikinini blong tingting long sam wei we oli save bildim ol laef blong olgeta long gospel blong Jisas Kraes.

• Givim sam samting long ol pikinini blong mekem se oli save yusum blong bildim wan taoa, olsem ol blok o ol plastik kap. Putum wan pikja long evri blok o plastik kap we i ripresentem ol samting we Lod i bin talem long Doktrin mo Ol Kavenan 33:14–17. Invaetem ol pikinini blong bildim wan taoa taem yu stap toktok wetem olgeta abaot olsem wanem ol samting i helpem yumi blong bildim ol laef blong yumi long gospel blong Jisas Kraes.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 30:1–2

Mi mas lukluk nomo long ol samting blong God bitim ol samting blong wol ia.

Kaonsel blong Lod i go long Deved Witma insaed long seksen 30, i save helpem ol pikinini we yu stap tijim blong stap fetful long gospel blong Jisas Kraes.

Samfala Aktiviti we Yu Save Mekem

• Ridim Doktrin mo Ol Kavenan 30:1 tugeta, mo askem ol pikinini blong talemsot, long toktok blong olgetawan, kaonsel we Lod i bin givim long Deved Witma. Long ol wanem wei, ?maet bae samtaem yumi “fraet long man,” o wari long wanem ol nara man i tingting long hem, be i no blong mekem wanem yumi sud mekem?

• Askem ol pikinini blong traem blong mekem tu wok long semmak taem, olsem blong talem baehat toktok blong bilif mo long semmak taem raetem ol nem blong ol pikinini long klas. Askem olgeta from wanem i had blong oli lukluk nomo long fas wok. ?Wanem sam long “ol samting blong a wol ia” (Doktrin mo Ol Kavenan 30:2) we i save karemaot lukluk blong yumi blong stap tingbaot Jisas Kraes mo gospel blong Hem? ?Olsem wanem yumi save lukluk nomo long Hem bitim ol nara samting we i no impoten tumas?

Doktrin mo Ol Kavenan 30–34

Mi save serem gospel blong Jisas Kraes.

Fulap pikinini long Jos i wantem tumas blong go givim seves long wan fultaem o seves misin. Ol eksperiens blong ol misinari we oli tokbaot insaed long ol seksen 30–34 i save helpem olgeta blong rere.

Samfala Aktiviti we Yu Save Mekem

• Invaetem wan memba blong wod blong lanem abaot wan long ol misinari we oli bin singaotem long Doktrin mo Ol Kavenan 30–34 mo blong serem wanem oli bin lanem (luk long “Ol Voes blong Restoresen: Ol Testemoni blong Ol Fasfala Konvet” insaed long Kam Folem Mi—Blong Wanwan Man, Woman mo Famli o “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69).

• Droem wan bigfala maot long bod, mo helpem ol pikinini blong faenem long Doktrin mo Ol Kavenan 33:8–10 ol promes we Lod i mekem long yumi taem yumi openem maot blong yumi blong serem gospel. Mekem ol pikinini oli raetem ol promes ia long bod, mo helpem olgeta blong andastanem wanem ol promes ia oli minim. Askem wanwan pikinini blong raetem wan trutok blong gospel we oli save serem wetem ol nara wan insaed long maot ia.

• Soem wan pikja blong wan trampet, mo tokbaot wanem i minim blong prijim gospel “semmak olsem saon blong wan pupu.” ?Olsem wanem nao yumi “leftemap” voes blong yumi? (Doktrin mo Ol Kavenan 33:2; 34:6).

• Askem ol pikinini blong serem olsem wanem oli stap rere blong go long ol misin sam dei. Sapos oli save wan man (maet wan memba blong famli) we i stap long misin, invaetem olgeta blong tokbaot ol eksperiens blong hem. O invaetem ol misinari, wan misinari we i kambak long misin, o wan man we i stap rere blong go long misin blong serem glad blong hem from misinari wok. Serem sam long ol eksperiens blong yu blong stap serem gospel, mo tu ,ol eksperiens blong yu blong evri dei laef.

  ol boe oli stap pleplei

  Mi save serem gospel wetem ol fren blong mi.

Doktrin mo Ol Kavenan 33:12–17

Mi save bildim laef blong mi long gospel blong Jisas Kraes.

Sapos ol pikinini i save lan long wan eli yia long olsem wanem blong bildim laef blong olgeta long gospel blong Jisas Kraes, bae oli stap fetful long Hem. Kaonsel we oli bin givim long ol ves ia i save helpem olgeta.

Samfala Aktiviti we Yu Save Mekem

• Karem sam samting we strong blong hem i defdefren, olsem wan doli, wan spons, sofmad we i kam strong, mo wan ston. Letem ol pikinini i taj tajem wanwan long olgeta. Askem olgeta blong lukluk long Doktrin mo Ol Kavenan 33:12–13 blong faenemaot olsem wanem Lod i tokbaot gud gospel blong Hem. ?From wanem “strong ston” i wan gudfala toktok blong tokbaot gospel? ?Olsem wanem yumi save bildim ol laef blong yumi long strong ston blong gospel?

• Helpem ol pikinini blong ridim Doktrin mo Ol Kavenan 33:12–17 mo faenem ol samting we yumi save mekem blong bildim ol laef blong yumi long gospel blong Jisas Kraes. Invaetem ol pikinini blong droem wan pikja blong wan samting we oli faenem, mo mekem olgeta i ges wanem ol pikja blong olgeta i stap soem mo tokbaot.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong kam olsem ol misinari taem oli stap serem wan samting we oli bin lanem long Praemeri tedei wetem ol famli blong olgeta.

Stap Kam Antap long Fasin blong Yumi blong Stap Tij

Testifae abaot ol blesing we Hem i promesem. Taem yu invaetem ol pikinini blong laef folem wan gospel prinsipol, serem ol we God i bin mekem wetem olgeta we oli laef folem prinsipol ia. Eksampol, yu save serem testemoni abaot ol blesing we Lod i givim long olgeta we oli openem maot blong olgeta blong serem gospel.

aktiviti pej: Mi save serem gospel