“12–18 Epril. Doktrin mo Ol Kavenan 37–40: ‘Sapos Yufala I No Stap Wan, Yufala I No blong Mi,’” Kam Folem Mi—Blong Praemeri: Doktrin mo Ol Kavenan 2021 (2020)
“12–18 Epril. Doktrin mo Ol Kavenan 37–40,” Kam Folem Mi—Blong Praemeri: 2021
Ol Sent Oli Muv I Go long Ketlan, i kam long Sam Lawlor
12–18 Epril
Doktrin mo Ol Kavenan 37–40
“Sapos Yufala I No Stap Wan, Yufala I No blong Mi”
God i save wanem ol pikinini long klas blong yu i nidim blong lanem. Letem Hem i gaedem yu taem yu stap jusum ol prinsipol mo aktiviti blong helpem yu tijim olgeta.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Pasem raon wan kopi blong ol skripja. Taem wanwan pikinini i holem ol skripja, letem pikinini ia i serem wan samting we hem i tingbaot long lesen blong las wik o taem hem i stap ridim ol skripja long hom blong hem long wik ia.
Stap Tijim Doktrin: Ol Smol Pikinini
Doktrin mo Ol Kavenan 38:24–27
Mi save lavem ol narawan.
Lod i bin wantem ol Sent blong kam tugeta long Ohaeo mo blong lavlavem olgeta semsemmak. ?Olsem wanem yu save helpem ol pikinini blong oli filim se oli stap wan wetem ol narawan, mo oli lavem ol narawan?
Samfala Aktiviti we Yu Save Mekem
-
Yusum aktiviti pej blong wik ia blong soem long ol pikinini se taem Jos i niu nomo, Lod i bin askem ol memba blong muv tugeta i go long Ohaeo (luk tu long map long aotlaen blong wik ia long insaed long Kam Folem Mi—Blong Wanwan Man, Woman mo Famli). God i bin wantem olgeta blong lanem olsem wanem blong lavem mo wok tugeta wetem wanwan long olgeta. Askem ol pikinini blong oli givim sam aedia abaot sam wei we oli save soem lav blong olgeta long wanwan long olgeta.
-
Ridim Doktrin mo Ol Kavenan 38:25 long ol pikinini, mo talem long olgeta, long toktok blong yuwan, wanem i minim blong mas lukluk brata blong yu olsem se hem i yuwan stret (luk tu long Matiu7:12). Helpem olgeta blong ripitim skripja ia, mo putum nem blong olgetawan long ples blong “brata blong hem.”
-
Sing wan singsing blong stap lav o mekem ol narawan oli pat tu, olsem “I’ll Walk with You” o “We Are Different” (Children’s Songbook, 140–41, 263). Taem yu stap singsing hemia, letem ol pikinini blong holem ol pikja blong ol pikinini long ol nara ples long wol.
-
Helpem ol pikinini blong aktemaot wan stori blong wan niu man we i kam joenem praemeri klas blong olgeta. ?Olsem wanem yumi save helpem hem i filim se yufala i welkamem hem? Maet ol pikinini bae oli laekem blong mekem rolplei ia wetem ol fingga doli, o ol fes blong ol man mo woman we oli katem long katen.
Sapos mi bin rere, mi no nid blong fraet.
Wan wei we Papa long Heven i stap helpem yumi blong no fraet i taem Hem i tijim yumi blong stap rere.
Samfala Aktiviti we Yu Save Mekem
-
Ripitim fulap taem sot sentens ia: “Sapos yufala i rere, bae yufala i no fraet” (ves 30). Afta long sam taem, lego wan toktok, mo letem ol pikinini i talem ol toktok we i no gat. Talem long ol pikinini abaot wan taem we yu bin rere from wan samting, mo taem yu rere, i bin helpem yu blong no fraet.
-
Helpem ol pikinini blong tingting long ol samting we Papa long Heven i wantem olgeta blong oli rere from, olsem blong kasem baptaes o go long tempol. Yusum ol pikja o ol samting blong givim sam aedia long olgeta. Tokbaot ol wei we oli save rere, mo letem olgeta oli droem ol pikja blong olgetawan, we i soem se oli stap rere o stap tekpat long ol samting we oli bin tingting long hem.
Doktrin mo Ol Kavenan 39:6, 23
Mi kasem presen we i Tabu Spirit taem oli mekem mi kam memba blong Jos.
?Wanem nao ol pikinini long klas blong yu i nid blong andastanem abaot fasin ia blong kasem presen we i Tabu Spirit? Maet instraksen blong Lod i go long James Kovel abaot odinens ia i save help.
Samfala Aktiviti we Yu Save Mekem
-
Soem wan pikja blong wan man we i kasem baptaes mo wan man we oli putum han antap long hed blong mekem hem i kam memba blong Jos (luk long Gospel Art Buk, namba 104, 105). Ridim Doktrin mo Ol Kavenan 39:23, mo askem ol pikinini blong poenem stret pikja taem oli harem yu rid abaot baptaes o putum han antap long hed blong mekem hem i kam memba blong Jos.
-
Ridim tugeta Doktrin mo Ol Kavenan 39:6, mo soem long ol pikinini ol pikja mo samting we i ripresentem ol wei we Tabu Spirit i stap blesem yumi (mo tu, olgeta we oli tokbaot olgeta long ves 6). Mekem ol pikinini oli holem pikja mo samting, wan afta wan, mo taem oli mekem hemia, serem testemoni abaot olsem wanem Tabu Spirit i bin blesem yu long ol wei ia. Helpem ol pikinini blong luksave ol taem we maet oli filim save paoa blong Spirit.
Stap Tijim Doktrin: Ol Bigfala Pikinini
Doktrin mo Ol Kavenan 37; 38:31–33
God i karem yumi kam tugeta blong blesem yumi.
Kam tugeta long Ohaeo i bin wan bigfala sakrifaes blong fulap Sent blong bifo. Tedei yumi no gat oda blong kam tugeta long wanples, be yumi kam tugeta olsem ol famli, ol wod, mo ol stek.
Samfala Aktiviti we Yu Save Mekem
-
Soem long ol pikinini aktiviti pej blong wik ia o map we i stap long aotlaen blong wik ia insaed long Kam Folem Mi—Blong Wanwan Man, Woman mo Famli. Ridim tugeta Doktrin mo Ol Kavenan 37, mo helpem ol pikinini blong faenem long map ol ples we oli bin tokbaot long revelesen ia. ?Wanem nao Lod i bin givim oda long ol Sent blong mekem?
-
Jusum wan ki sot sentens o sentens long Doktrin mo Ol Kavenan 38:31–33 we yu filim se i tokbaot gud from wanem Lod i bin wantem ol pipol blong Hem blong kam tugeta. Seraotem ol toktok blong sentens ia raon long rum, mo invaetem ol pikinini blong karem olgeta oli kam tugeta, putum olgeta long stret oda, mo faenemaot weaples sentens ia i kamaot long ol ves ia. ?From wanem Lod i bin wantem yumi blong kam tugeta?
Doktrin mo Ol Kavenan 38:24–27
God i wantem ol pipol blong Hem blong oli yunaet.
Blong rere long Ol Sent blong oli kam tugeta, Lod i bin tijim olgeta blong lukluk olgetawan se oli semsemmak nomo mo oli “stap wan” (ves 27). ?Olsem wanem nao instraksen ia i blesem ol pikinini we yu stap tijim?
Samfala Aktiviti we Yu Save Mekem
-
Ridim tugeta Doktrin mo Ol Kavenan 38:24–27, mo invaetem ol pikinini blong raetemdaon ol toktok long ol ves ia we oli filim se oli impoten, mo tu, ol toktok we oli stap ripitim. ?From wanem Lod i bin ripitim ol toktok ia? Mekem olgeta i serem wanem oli bin raetem, mo tokbaot raon long wanem oli lanem aot long ol toktok ia.
-
Helpem ol pikinini blong tingting long ol situesen we maet wan man i filim se hem i stap hemwan nomo, olsem wan niu memba blong Jos o blong muv i go long wan niu haos mo ol neba o skul. ?Wanem nao Doktrin mo Ol Kavenan 38:24–27 i talem abaot olsem wanem yumi mas tritim wan man long ol situesen olsem? Mekem wan rol plei blong soem sam situesen.
-
Serem wan lesen we i yusum wan samting we i soem olsem wanem ol samting i save joen o yunaet blong kam wan, olsem ol pisis kaliko we i mekem wan blangket o ol samting blong kuk we i mekem wan bred. ?Wanem nao ol eksampol ia i tijim yumi blong kam wan olsem ol pipol blong God?
Mi save kipim ol promes blong mi.
James Kovel i bin mekem wan promes blong obei Lod, be hem i no kipim promes blong hem. Blong lanem abaot eksperiens blong hem i save ol helpem ol pikinini blong tingbaot olsem wanem i impoten blong stap obei.
Samfala Aktiviti we Yu Save Mekem
-
Invaetem ol pikinini blong ridim seksen heding blong Doktrin mo Ol Kavenan 39 mo 40, mo askem olgeta blong talemsot long toktok o droing wanem oli lanem abaot James Kovel.
-
Raetem ol kwestin long bod we bae i helpem ol pikinini blong andastanem seksen 40, olsem ?Wanem nao kavenan blong James Kovel i mekem? ?From wanem hem i no kipim kavenan blong hem? Invaetem ol pikinini blong faenem ol ansa long seksen 40.
-
Helpem ol pikinini blong tingbaot ol promes we oli bin mekem taem oli kasem baptaes (luk long Mosaea 18:8–10). Helpem ol pikinini blong mekem wan lis blong sam fraet o “kea long ol samting blong wol ia” (Doktrin mo Ol Kavenan 40:2) we maet bae i stopem wan man blong stap kipim ol promes ia. Invaetem ol pikinini blong raetem wan sot mesej i go long olgetawan olsem wan rimaenda we blong stap obei ol komanmen blong Papa long Heven bae i helpem olgeta blong winim ol fraet o ol wari blong wol ia. Leftemap tingting blong olgeta blong putumgud rimaenda blong olgeta long wan ples we oli save luk oltaem.
Stap Leftemap Tingting blong Lanem Samting long Hom
Invaetem ol pikinini blong toktok raon wetem ol papa mo mama o ol nara memba blong famli blong olgeta olsem wanem oli save kam yunaet moa olsem wan famli.
Stap Kam Antap long Fasin blong Yumi blong Stap Tij
Lanem wan skripja baehat Tingting blong jusum wan sot stori long skripja we yu ting se i save mekem ol testemoni blong ol pikinini i kam strong moa, mo helpem olgeta blong lanem baehat. Ol smol pikinini i save lanem baehat wan smol pat blong wan skripja o wan sot sentens nomo.