“24–30 Mei. Doktrin mo Ol Kavenan 58–59: ‘Wok Wetem Strong Tingting long Wan Gud Wok,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“24–30 Mei. Doktrin mo Ol Kavenan 58–59” Kam Folem Mi—Blong Wanwan Man, Woman mo Famli: 2021
Indipendens, Misuri, i kam long Al Rounds
24–30 Mei
Doktrin mo Ol Kavenan 58–59
“Wok Wetem Strong Tingting long Wan Gud Wok”
Presiden Dallin H. Oaks i tijim: “Ol skripja bae oli helpem yumi blong faenem ansa blong evriwan long ol kwestin blong yumiwan, from se, taem yumi ridim ol skripja, yumi stap invaetem mo mekem yumi kwalifae blong kasem insperesen blong Tabu Spirit, we bae i lidim yumi i go long evri trutok” (insaed long David A. Edwards, “Are My Answers in There?” New Era, May 2016, 42).
Raetemdaon Ol Filing mo Tingting blong Yu
Taem we ol elda blong Jos oli bin luk ples blong siti blong Saeon blong fas taem—we i Indipendens, Misuri—i no bin wanem we oli stap tingting long hem. Sam oli tingting se bae oli faenem wan komuniti we i stap wok strong, i save mekem samting, mo wan strong grup blong Ol Sent. Be, oli faenem wan ples we i no gat fulap pipol long hem, we i no gat kaen fasin blong laef we oli bin save long hem, mo insaed long hem i gat ol man olbaot, be i no Ol Sent. I luk olsem se Lod i no bin stap askem olgeta blong jes kam long Saeon—Hem i bin wantem olgeta blong bildimap Saeon.
Taem ol samting we yumi wet from oli no go stret wetem ril samting, yumi save tingbaot wanem Lod i bin talem long Ol Sent long 1831: “Yufala i no save luk wetem ae blong yufala nomo, long taem naoia, plan ia blong God blong yufala, … mo glori we bae i kam afta plante hadtaem” (Doktrin mo Ol Kavenan 58:3). Yes. Laef i fulap long ol hadtaem, iven ol fasin nogud, be yumi save “mekem plante stret mo gud wok oli kamtru, from paoa ia i stap long [yumi]” (ol ves 27–28).
Luk tu long Saints, 1:127–33.
Sam Aedia blong Skripja Stadi blong Yuwan
Doktrin mo Ol Kavenan:1–5, 26–33, 44; 59:23
Ol blesing we oli kam folem taem blong God mo hamas yumi wok strong.
Ol Sent oli bin putumdaon fandesen blong Saeon long Jakson Kaonti, Misuri, wan ples we oli bin gotru long fulap tes. Oli bin hop tru, se, long taem blong laef blong olgeta, bae eria ia i kam wan gudfala ples we Ol Sent oli save kam tugeta long hem. Be, oli bin ronemaot Ol Sent aot long Jakson Kaonti afta samfala yia, mo Lod i bin talemaot long ol pipol blong Hem we oli “mas wet blong smol taem blong putumbak Saeon” (Doktrin mo Ol Kavenan 105:9).
Taem yu stap stadi long ol skripja ia, lukaotem ol risen we i save holemtaet ol blesing blong wan smol taem. Ol kwestin ia oli save helpem yu blong tingting hevi.
Doktrin mo Ol Kavenan 58:1–5; 59: 23. ?Wanem mesej we i stap long ol ves ia we oli mekem yu gat moa strong paoa blong gotru long ol hadtaem blong yu wetem moa fasin blong save wet longtaem? ?Wanem blesing yu yu bin kasem afta long hadtaem blong yu? ?Long tingting blong yu, from wanem sam blesing oli kam nomo afta long hadtaem?
Doktrin mo Ol Kavenan 58:26–33. ?Wanem i rol blong “mas wok wetem strong tingting long wan gud wok” blong mekem se ol promes blong God oli save kamtru? ?Wanem rol nao, fasin blong yu blong stap obei i stap plei long ples ia?
Doktrin mo Ol Kavenan 58:44. ?Wanem nao hem i rilesensip bitwin “prea blong fet” mo tingting we Lod i gat long yumi?
Doktrin mo Ol Kavenan 59, seksen heding
?Huia i Poli Naet?
Poli Naet mo hasban blong hem, Josef Naet Senia, oli bin sam long ol faswan blong biliv long koling blong Josef Smit olsem wan profet. Poli mo Josef, tufala i givim stamba sapot long Profet long wok ia blong stap transletem Buk blong Momon. Naet famli i aot long Kolesvil, Niu Wok blong kam tugeta wetem Ol Sent long Ohaeo, mo afta, oli kasem komanmen blong muv i go long Jakson Kaonti, Misuri. Taem oli bin travel i go, helt blong Poli i stat blong go daon, be hem i bin gat strong tingting blong luk Saeon bifo hem i ded. Hem i bin stap long Misuri blong sam dei nomo taem hem i pasawe (luk long Saints, 1:127–28, 132–33). Doktrin mo Ol Kavenan 59, Josef Smit i bin kasem long dei we hem i bin ded, mo i luk se ol ves 1 mo 2 oli speseli blong hem.
Blong kipim Sabat i tabu, i tekem ol blesing long saed blong laef ia mo long saed blong spirit, oli kam.
Afta we Hem i bin promesem Ol Sent long Saeon “plante komanmen,” Lod i bin tokbaot bigwan wan komanmen: oda ia blong givim ona long “tabu dei” blong Hem (Doktrin mo Ol Kavenan 59:4, 9). Taem yu stap stadi long Doktrin mo Ol Kavenan 59: 9–19, tingting hevi long olsem wanem, blong kipim Sabat dei, bae i impoten tumas long Ol Sent ia taem oli bin stap lukaot blong bildimap Saeon.
Mo tu, yufala i save toktok raon tu long ol kwestin olsem: ?Mi mi stap yusum Sabat dei olsem we Lod i wantem? ?Olsem wanem nao, blong kipim Sabat dei i tabu i save helpem mi blong “lukaot gud blong ol samting blong wol oli no spolem [mi]? (ves 9). ?Wanem nao mi save mekem blong “mekem wosip blong leftemap nem blong Hae God we I Hae Olgeta”? (ves 10).
Afta we yu ridim olgeta ves ia, ?wanem insperesen nao yu kasem blong mekem blong kipim Sabat dei i tabu moa fulwan? Jenesis 2:2–3; Eksodas 20:8–11; 31:13, 16; Dutronome 5:12–15; Aesea 58:13–14; Mak 2:27; Jon 20:1–19; Ol Wok 20:7.
Maet bae yu laekem blong lukluk wan long ol plante vidio, o ol nara risos we i stap abaot Sabat, we oli faenem long sabbath.ChurchofJesusChrist.org.
Luk tu long Russell M. Nelson, “The Sabbath Is a Delight,” Ensign o Liahona, May 2015, 129–32; Bible Dictionary, “Sabbath.”
Blong stap tekem mo kakae sakramen i pat blong kipim Sabat dei i tabu.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 58:26–29.Maet ol memba blong famli oli save mekem wan lis blong sam long ol samting we oli bin “wok wetem strong tingting” long olgeta. ?Evriwan ia, oli “ol gudfala wok”? ?From wanem Lod i wantem yumi “mekem fulap samting long tingting blong yumiwan nomo”? Invaetem wanwan memba blong famli blong tingting long wanem oli save mekem long wik ia blong “mekem plante stret mo gud samting i hapen.” Samtaem afta, oli save givim ripot long wanem oli bin mekem.
-
Doktrin mo Ol Kavenan 58:42–43.?Wanem nao ol memba blong famli oli filim taem oli stap ridim olgeta ves ia? ?Olsem wanem nao, ol ves ia oli save helpem wan we i nid blong sakem sin?
-
Doktrin mo Ol Kavenan 59:3–19.?Bae i minim wanem blong “kasem, olsem wan hat blong king, ol komanmen”? (ves 4). Taem yu stap ridim ol komanmen insaed long ol ves 5–19, toktok raon long ol blesing we yu bin kasem taem yu bin stap obei long wanwan long ol komanmen ia.
Yu save tek not long, olsem wanem nao, oli yusum ol toktok olsem “glad”, “stap glad,” “hapi,” “glad hat” blong tokbaot komanmen ia blong givim ona long Sabat dei. ?Olsem wanem yu save mekem Sabat i wan dei blong glad moa? Mebi famli blong yu i save mekem wan maj gem wetem ol kad we oli soem ol samting we yu save mekem blong kipim Sabat dei i tabu.
-
Doktrin mo Ol Kavenan 59:18–21.?Wanem nao yumi save mekem blong “luksave han blong God long evri samting”? (ves 21). Tingting blong go wokbaot, o blong go lukluk long ol pikja, mo luk ol samting we “luk naes long ae blong hem mo blong i mekem hat blong hem i glad” (ves 18). Yu save tekem o droem ol pikja blong wanem yu faenem, mo afta, tokbaot olsem wanem yu save soem tangkyu blong yu from ol samting ia. ?Long wanem wei nao yu bin luk han blong God insaed long laef blong yu?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Choose the Right,” Hymns, no. 239.
Stap Kam Antap long Fasin blong Yumi blong Stap Tij
Serem ol skripja. Givim taem long ol memba blong famli blong oli serem ol ples long ol skripja, we oli bin stadi olgetawan, we oli faenem se i gat mining long olgeta.
Pikja i kam long Marti Major