“24–30 Mei. Doktrin mo Ol Kavenan 14–17: ‘58–59: ‘Wok Wetem Strong Tingting long Wan Gud Wok,’” Kam Folem Mi—Blong Praemeri: Doktrin mo Ol Kavenan 2021 (2020)
“24–30 Mei. Doktrin mo Ol Kavenan 58–59,” Kam Folem Mi—Blong Praemeri
Indipendens, Misuri, i kam long Al Rounds
24–30 Mei
Doktrin mo Ol Kavenan 58–59
“Wok Wetem Strong Tingting long Wan Gud Wok”
Taem yu stap ridim Doktrin mo Ol Kavenan 58–59, raetemdaon eni filing mo tingting long saed blong spirit, we yu kasem. Ol filing ia bae i helpem yu blong mekem plan blong tijim doktrin we yu bin lanem, long ol pikinini. Maet bae yu faenem tu, ol aedia we oli stap long aotlaen blong wik ia long Kam Folem Mi—Blong Wanwan Man, Woman mo Famli, o insaed long ol magasin blong Jos.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem ol pikinini blong serem wan samting we oli bin mekem long wik, blong oli lanem samting aot long ol skripja.
Stap Tijim Doktrin: Ol Smol Pikinini
Doktrin mo Ol Kavenan 58:27–28
Papa long Heven i bin givim mi paoa blong jusum samting.
Helpem ol pikinini blong oli save se Papa long Heven i wantem yumi blong mekem ol gudfala joes we i tekem hapines i kam insaed long ol laef blong yumi, mo insaed long laef blong ol narawan.
Samfala Aktiviti we Yu Save Mekem
-
Ridim ol sentens we oli stap long Doktrin mo Ol Kavenan 58:27–28 blong helpem ol pikinini blong oli andastanem se oli save jusum blong mekem gud samting. Putum wan hapi fes long wan saed blong rum mo fes we i no hapi long narafala saed blong rum. ?Yumi filim olsem wanem taem yumi jusum blong mekem gud samting? Tokbaot samfala situesen we i gat wan gud joes, o wan nogud joes. Afta we yu tokbaot gud wanwan situesen mo joes, askem ol pikinini blong oli stanap long saed blong hapi fes sapos joes i gud, mo oli stanap long fes we i no hapi sapos joes ia i nogud.
-
Soem, long ol pikinini, wan kontena we i gat plante defren kala blong kreyon o kala pensel insaed long hem. Soem long olgeta, wan nara kontena we i gat wan kreyon o kala pensel insaed long hem. Askem ol pikinini se wijwan long ol kontena nao bae oli wantem yusum. ?From wanem? Eksplenem se blong save jusum samting, hem i wan blesing we i kam long Papa long Heven. Testifae se Papa long Heven mo Jisas Kraes, Tufala i lavem yumi, mo Tufala i wantem yumi blong mekem ol gudfala joes.
-
Talem long ol pikinini abaot wan taem we yu bin mekem wan gudfala joes, mo tokbaot olsem wanem yu bin filim afta. Invaetem ol pikinini blong droem wan pikja blong stori blong yu, o wan stori we oli jusum. Afta, letem olgeta oli serem pikja long klas mo talem wanem nao oli bin lanem aot long stori ia.
Papa long Heven i wantem mi blong gat hat blong talem tangkyu.
?Olsem wanem nao yu save helpem ol pikinini blong oli andastanem hamas i impoten blong talem tangkyu long Papa long Heven from ol blesing we oli stap kasem?
Samfala Aktiviti we Yu Save Mekem
-
Talem long ol pikinini wan samting we yu yu talem tangkyu from, mo askem olgeta blong serem ol samting we oli talem tangkyu from. Ridim Doktrin mo Ol Kavenan 59:7, mo invaetem ol pikinini blong tingting long sam wei we oli save talem tangkyu long Papa long Heven from ol blesing blong olgeta. ?Wanem nao oli save mekem blong tekem i go long haos blong rimaenem olgeta blong talem tangkyu long Papa long Heven from ol blesing blong olgeta?
-
Sing tugeta wan singsing abaot fasin blong talem tangkyu, olsem “For Health and Strength” (Children’s Songbook, 21). Invaetem ol pikinini blong riplesem ol toktok insaed long singsing wetem nem blong ol samting we oli talem tangkyu from.
-
Askem ol pikinini blong talem nem blong sam samting we oli talem tangkyu from.
Sabat i dei ia blong Lod.
Taem yu stap serem glad we yu gat blong stap kipim Sabat dei i tabu, yu save helpem ol pikinini blong oli luk Sabat dei olsem wan dei we yumi stap wosipim Lod.
Samfala Aktiviti we Yu Save Mekem
-
Tekem ol pikja o ol samting oli kam, we oli soem ol gudfala samting we yumi save mekem long Sandei blong wosipim Lod mo faenem glad. Sam aedia oli stap long Doktrin mo Ol Kavenan 59:9–12 mo “Kipim Sabat Dei” (Blong Ol Yut Oli Kam Strong, 30–31). Eksampol: blong ripresentem sakramen, yu save soem pikja 108 insaed long Gospel Art Buk o wan sakramen kap mo wan pis bred. ?Olsem wanem nao, wanwan long ol samting ia, i stap helpem yumi kam kolosap moa long Papa long Heven mo Jisas Kraes, long Sabat dei?
-
Finisim aktiviti pej blong wik ia blong helpem ol pikinini blong givim long olgeta, sam aedia, long wei blong mekem Sabat i wan tabu dei.
Pikjabred mo kap blong sakramenBlong stap tekem mo kakae sakramen i pat blong kipim Sabat dei i tabu.
Stap Tijim Doktrin: Ol Bigfala Pikinini
Doktrin mo Ol Kavenan 58:27–28
Fridom blong joes i paoa blong mekem ol joes.
God i bin givim yumi paoa blong mekem joes, mo wetem paoa ia, yumi save “mekem plante stret mo gud wok oli kamtru” (ves 27). Olsem wanem nao yu save helpem ol pikinini we yu stap tijim blong luk se, iven we i gat fasin nogud insaed long wol ia, “paoa i stap wetem olgeta” blong “mekem gud samting”? (Vesves 28).
Samfala Aktiviti we Yu Save Mekem
-
Soem wan pis pea we i gat ol toktok ia long hem: joes we oli raetem long wan saed, mo toktok ia risal we oli raetem long nara saed pepa. Eksplenem se ol joes oli gat ol risal, o samting we i kam afta we yumi tekem ol aksen. Invaetem wan pikinini blong pikimap pepa blong soem se, taem yu pikimap pepa, yu gat tufala samting ia, joes mo risal blong joes ia. Askem wan pikinini blong ridim Doktrin mo Ol Kavenan 58:27–28. ?Wanem joes yumi save mekem blong mekem se “plante stret mo gud wok oli kamtru”, o blong mekem se i gat ol gudfala risal i kamaot? (ves 27). ?Wetaem nao yumi bin mekem ol gudfala joes we i gat ol risal we i bin blesem ol narawan?
-
Raetem ol sot sentens we oli stap long Doktrin mo Ol Kavenan 58:27–28 long ol longfala smol pis pepa, mo givim wan long wanwan pikinini. Invaetem olgeta blong ridim ol ves long saelen, mo blong oli tingting hevi long sentens we oli gat. Invaetem ol pikinini blong sidaon folem oda we sentens blong olgeta i kamaot long ol ves 27–28 mo serem wetem wanwan wanem oli bin lanem. ?Wanem hem i mesej blong Lod we i kam long yumi long ol ves ia?
-
Singsing wan singsing abaot ol joes, olsem “Choose the Right” (Hymns, no. 239). Askem ol kwestin blong helpem ol pikinini blong oli tingting hevi long ol toktok blong singsing ia—eksampol: ?Huia i stap soem rod long yu blong yu mekem raet joes? ?Huia i stap traem blong mekem yu yu mekem rong joes? ?Yu harem olsem wanem taem yu jusum raet?
Sabat i dei ia blong Lod.
Lod i bin talem se blong kipim Sabat dei i tabu hem i helpem yumi blong “yu lukaot gud blong ol samting blong wol oli no spolem yu” (Doktrin mo Ol Kavenan 59:9). ?Olsem wanem nao yu save helpem ol pikinini we yu stap tijim blong oli kipim Sabat hem i tabu, mo mekem i kam wan saen blong lav ia we oli gat long Papa long Heven mo long Jisas Kraes?
Samfala Aktiviti we Yu Save Mekem
-
Invaetem ol pikinini blong oli sidaon tutu, mo ridim Doktrin mo Ol Kavenan 59:9–16 mo raetemdaon wan samting we oli bin lanem abaot Sabat dei aot long ves ia. Afta sam minit, askem wanwan smol grup ia blong serem, wetem klas, wanem nao oli bin raetem. ?Wanem nao bae yumi mekem i defren long Sabat ia from ol samting we yumi bin lanem?
-
Rere long wan maj gem mo mekem ol pikinini oli yusum ol sentens we oli stap long Doktrin mo Ol Kavenan 59:9–16 mo mekem i maj wetem stret ves. Jusum ol sentens we oli tijim wanem we Lod i wantem yumi blong mekem long Sabat. Toktok raon long wanem nao ol sentens ia oli stap tijim yumi abaot dei ia blong Lod, mo olsem wanem nao yumi kam kolosap moa long Hem.
-
Sabat dei, hem i “dei blong Lod” (Doktrin mo Ol Kavenan 59:12)—wan dei blong soem we yumi stap tingbaot ol plante wok blong Lod taem yumi stap wosipim Hem (luk long Bible Dictionary, “Sabbath”). Helpem ol pikinini blong tingting hevi long ol wok ia taem yu invaetem olgeta blong ridim olgeta skripja ia mo soem olgeta ol pikja we oli go wetem: Jenesis 2:1–3 (luk long Gospel Art Buk, namba 3); Jon 20:1–19 (luk long Gospel Art Buk, namba 59). ?Wanem nara bigfala wok blong Lod nao bae yumi save tingbaot long Sabat? ?Wanem nao yumi lanem abaot Sabat aot long Doktrin mo Ol Kavenan 59:9–16?
Stap Leftemap Tingting blong Lanem Samting long Hom
Invaetem ol pikinini blong serem wetem famli blong olgeta abaot wan samting we oli save mekem blong kipim Sabat dei i tabu.
Stap Kam Antap long Fasin blong Yumi blong Stap Tij
Bildimap ol pikinini blong oli gat tras long olgetawan. Sam pikinini bae oli filim se oli no gat paoa blong lanem gospel olgetawan. Promesem long ol pikinini se bae Tabu Spirit i helpem olgeta blong lanem samting.