Misuri Reva

Kamp Faea long Misuri, i kam long Bryan Mark Taylor

31 Mei–6 Jun

Doktrin mo Ol Kavenan 60–62

“Evri Samting we I Laef I Stap long Han blong Mi”

Tingbaot se bes wei blong rere blong tijim Doktrin mo Ol Kavenan 60–62 hem i blong stadi ol seksen ia yuwan mo wetem famli.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Askem wan janis long wanwan pikinini blong serem wan samting we hem i jes lanem aot long ol skripja long wik we i jes pas, o long Praemeri klas blong las Sandei. Afta we wanwan pikinini i serem eksperiens blong hem, askem wan nara pikinini insaed long klas blong talem sot wanem fren blong hem i bin talem.

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 60:4; 61:1–2, 36; 62:1

Ol skripja oli stap tijim mi abaot Jisas Kraes.

Doktrin mo Ol Kavenan 60–62 i tekem fulap toktok we i save helpem ol pikinini we yu stap tijim blong oli andastanem huia i Jisas Kraes, mo blong oli gat moa lav long Hem.

Samfala Aktiviti we Yu Save Mekem

• Soem wan pikja blong Jisas Kraes, mo askem ol pikinini blong oli serem from wanem oli lavem Jisas. Jusum samfala sentens aot long Doktrin mo Ol Kavenan 60–62 we oli tijim yu abaot Sevya, mo serem olgeta wetem ol pikinini (eksampol, luk long Doktrin mo Ol Kavenan 60:4; 61:1–2, 36; 62:1). Helpem ol pikinini blong oli ripitim ol sentens ia wetem yu. Serem wanem yu stap filim abaot Jisas Kraes.

• Soem wan pikja blong Jisas taem Hem i stap mekem seves blong Hem long wol ia (luk long Gospel Art Buk, ol namba 34–61). Letem ol pikinini oli eksplenem wanem nao Jisas i stap mekem insaed long ol pikja ia. ?Olsem wanem nao Hem i stap soem lav blong Hem long ol pikinini blong Papa long Heven? Talem long ol pikinini abaot wan fevret skripja we i stap tij abaot Jisas.

• Singsing wetem ol pikinini “Mi Traem blong Kam Olsem Jisas” (Liahona, Epril 2012, 64; luk tu long singsing vidio we yu save singsing folem long ChurchofJesusChrist.org). Taem yu stap singsing abaot ol wei blong stap olsem Jisas, stop wanwan taem mo askem ol pikinini blong finisim sentens ia: “Mi save stap olsem Jisas taem mi …”

  Sevya we i laef bakegen long ded

  Mi Mi Kam From Samting Ia Nao, i kam long Yongsung Kim

Doktrin mo Ol Kavenan 62:3

Jisas Kraes i wantem mi blong serem gospel blong Hem.

OI pikinini oli lavem blong serem wetem ol narawan, wanem we oli save. Helpem olgeta blong andastanem se, taem oli serem wanem oli save abaot gospel, Papa long Heven i glad long olgeta.

Samfala Aktiviti we Yu Save Mekem

• Eksplenem se Lod i bin askem Profet Josef Smit mo ol nara lida blong Jos blong travel aot long Ketlan, Ohaeo, i go long Jakson Kaonti, Misuri. Hem i bin askem long olgeta blong prijim gospel folem rod blong olgeta, mo tu, long rod blong olgeta i kambak hom. Ridim Doktrin mo Ol Kavenan 62:3, mo askem ol pikinini blong oli lisin long wanem nao ol misinari oli bin mekem blong mekem Lod i glad long olgeta. Testifae se Lod i glad taem wetem yumi taem we yumi serem gospel wetem ol narafala man.

• Helpem ol pikinini blong mekemap ol baj blong olgeta we i soem se oli wantem stap ol misinari blong Jos. Letem olgeta oli werem baj blong olgeta mo oli praktisim fasin blong serem testemoni blong olgeta wetem wanwan long olgeta.

• Singsing tugeta wan singsing abaot wok blong serem gospel, olsem “I Want to Be a Missionary Now” (Children’s Songbook, 168). Helpem ol pikinini blong tingbaot wanem oli save talem sapos wan i askem olgeta wanem oli lavem abaot Jisas Kraes mo Jos blong Hem. Invaetem ol pikinini blong dro ol pikja blong ol samting we oli lavem tumas abaot gospel blong Kraes.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 60:7, 13; 62:3, 9

Mi save openem maot blong mi blong serem gospel blong Jisas Kraes.

Testemoni blong wan pikinini i save gat paoa semmak olsem hemia blong wan adalt; hemia, from se paoa blong testemoni i no kamaot from yia blong wan man o woman, o i no kamaot from eksperiens, be i kamaot from Tabu Spirit. Helpem ol pikinini blong kasem tras ia se oli save openem maot blong olgeta mo serem wetem ol narawan wanem oli save se i tru.

Samfala Aktiviti we Yu Save Mekem

• ?Wanem blesing nao Lod i promesem insaed long Doktrin mo Ol Kavenan 60:7; 62:3, 9 long olgeta we oli stap serem gospel blong Hem? ?Olsem wanem nao fasin blong stap serem gospel i save blesem ol narawan? Tingting blong serem wan eksperiens aot long laef blong yu abaot wan taem we yu bin serem gospel—?wanem blesing nao oli bin kamaot aot tru long ol hadwok blong yu? Invaetem ol pikinini blong serem eni eksperiens we oli bin gat. Yu save singsing tu wan singsing abaot misinari wok, olsem “Go Forth with Faith” (Hymns, no. 263), mo tokbaot ol blesing we singsing i talem.

• Helpem ol pikinini oli rolplei long sam situesen we oli save serem gospel wetem ol fren blong olgeta. Eksampol: ?Wanem nao bae oli talem sapos wan i askem olgeta se from wanem nao oli stap go long jos? O, ?olsem wanem sapos wan fren i luk olgeta oli werem wan JR ring, o oli stap ridim Buk blong Momon, mo askem ol kwestin? ?Wanem nao bae oli talem?

Doktrin mo Ol Kavenan 60:7; 61:1–2, 36; 62:1

Lod i glad blong fogivim mi sapos mi sakem sin.

Josef Smit mo ol nara lida blong Jos oli no stret evriwan. Samtaem oli bin raorao smol mo oli no bin save wet longtaem (luk long “Ezra Booth and Isaac Morley,” Revelations in Context, 133). Be Lod i bin gat sore long olgeta, mo oltaem i bin talem se bae Hem i fogivim olgeta sapos oli sakem sin.

Samfala Aktiviti we Yu Save Mekem

• Wetem ol pikinini, ridim Doktrin mo Ol Kavenan60:7; 61:2, mo askem olgeta blong oli faenem ol toktok, insaed long ol ves ia, we oli semsemmak. Mekem ol pikinini oli tingbaot se ol revelesen ia, God i bin givim long Josef Smit, mo ol nara lida blong Jos. ?Wanem nao Lod i wantem olgeta blong save? ?Wanem nao yumi lanem aot long ol ves ia abaot olsem wanem nao Lod i stap filim abaot yumi taem yumi stap mekem ol mistek?

• Raetem ?Jisas i olsem wanem? antap long bod. Tugeta, ridim: Doktrin mo Ol Kavenan 61:1–2, 36; 62:1, mo mekem wan lis blong ol ansa long kwestin ia we ol pikinini oli faenem insaed long ol ves ia. ?Olsem wanem nao ol fasin antap long bod ia oli helpem yumi andastanem from wanem Sevya i glad blong save fogivim yumi? ?Wanem nao sam wei we yumi save folem eksampol blong Hem?

Doktrin mo Ol Kavenan 60:5; 61:22; 62:5–8

Lod i wantem mi blong mi yusum fridom blong mekem joes mo Spirit blong Hem blong mekem ol gud joes.

?Olsem wanem nao yu save yusum ol ves ia blong tijim ol pikinini olsem wanem Lod i stap helpem olgeta blong mekem ol gudfala joes?

Samfala Aktiviti we Yu Save Mekem

• Askem ol pikinini blong tokbaot wan taem we oli mas mekem wan desisen. ?Olsem wanem nao oli bin disaed long wanem blong mekem? Tugeta, ridim Doktrin mo Ol Kavenan 62:5, 7–8 blong lanem abaot wanem Lod i bin talem long ol elda we oli bin stap rere blong longfala wokbaot blong olgeta, aot long Misuri i go long Ketlan, Ohaeo. ?Wanem joes nao oli nidim blong mekem abaot wokbaot ia? ?Wanem nao Lod i bin givim long yumi blong help blong mekem ol joes ia? Talem long ol pikinini abaot hao nao yu bin yusum tok blong Spirit mo bes jajmen blong yu blong mekem ol desisen.

• Serem klas long trifala grup mo askem wanwan grup blong ridim wan long ol ves ia, we Lod i givim sam instraksen long ol misinari abaot wei we bae oli mekem misin blong olgeta i hapen: Doktrin mo Ol Kavenan 60:5; 61:22; 62:5 ?Wanem nao yumi luk abaot instraksen blong Lod insaed long ol ves ia? ?From wanem, samtaem, hem i impoten blong yumi mekem jajmen yumiwan be i no blong stap wet long ol spesifik instraksen we i kam long God long saed blong evri samting?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong praktis blong serem gospel wetem wan memba blong famli. Eksampol: oli save serem olsem wan samting we oli bin lanem insaed long Praemeri.

Stap Kam Antap long Fasin blong Yumi Blong Stap Tij

Serem testemoni blong yu long klas. Taem yu stap serem testemoni blong yu plante taem, bae i helpem ol pikinini we yu stap tijim blong oli kasem testemoni blong olgetawan. Wan testemoni hem i save simpol nomo olsem “Mi save se Papa long Heven i lavem wanwan long yufala” o “Mi harem gud insaed taem mi lanem abaot Jisas Kraes.”

aktiviti pej: Mi save serem gospel