Fil long Misuri

Springhil, Davis Kaonti, Misuri, i kam long Garth Robinson Oborn

7–13 Jun

Doktrin mo Ol Kavenan 63

“Wanem I Kamaot long Antap I Tabu”

Ol trutok we oli stap tijim insaed long Doktrin mo Ol Kavenan 63 i save helpem ol pikinini we yu stap tijim blong bildimap fet blong olgeta long Papa long Heven mo Jisas Kraes. From se yu gat smol taem nomo wetem olgeta, skelem se wijwan trutok nao bae i gat moa mining long olgeta, hemia folem nid blong olgeta.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Lukaotem sam simpol mo niu wei blong givim ol janis long ol pikinini blong oli serem wanem we oli stap lanem. Eksampol: rere long ol defren saes pepa, sam i sot, sam i longwan, mo letem wanwan pikinini i jusum wan. Invaetem pikinini we i karem pepa we i moa longfala blong i serem eksperiens blong hem faswan.

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 63:23

Papa long Heven i wantem mi blong lanem abaot gospel.

Ol pikinini, oltaem nomo oli stap lanem samting. Helpem olgeta blong luk se Papa long Heven bae i helpem olgeta blong lan abaot Hem sapos oli stap obei long ol komanmen blong Hem.

Samfala Aktiviti we Yu Save Mekem

• Ridim Doktrin mo Ol Kavenan 63:23 , i go long ol pikinini, mo askem ol pikinini blong lisin long wanem bae God i givim yumi sapos yumi stap obei long ol komanmen. Helpem olgeta blong andastanem se “ol sikret” oli ol samting we God i save tijim yumi moa abaot, olsem wei blong kam moa olsem Jisas Kraes.

• Karem ol pikja i kam long klas we oli ripresentem ol topik blong gospel we ol pikinini oli save lanem moa abaot, olsem baptaes, Sevya, ol tempol mo sam moa. Putum ol pikja long floa we oli fes i go daon, mo letem ol pikinini oli gat wan taem blong tanem wan pikja. Askem olgeta blong serem wanem we oli save mo eni kwestin we oli gat abaot wanwan topik.

Doktrin mo Ol Kavenan 63:49

Bae mi laef bakegen long ded.

Samtaem naoia, o long wan fiuja taem, ol pikinini ia we yu stap tijim bae oli kasem kamfot blong save se, from Atonmen blong Sevya, evriwan we i bin ded, bae oli laef bakegen long ded, wan dei.

Samfala Aktiviti we Yu Save Mekem

• Soem long ol pikinini wan pikja blong wan we yu lavem, we i ded finis, mo serem wan stori abaot man o woman ia. Ridim Doktrin mo Ol Kavenan 63:49, i go long ol pikinini, mo testifae se, wan dei, bae man o woman ia bae i “girap, i aot long ded” mo bae i neva ded bakegen. Askem ol pikinini sapos oli save wan we i bin ded finis. Testifae se bae yumi evriwan i laef bakegen long ded, mo hemia from Jisas Kraes.

• Soem ol pikja blong taem we oli berem Jisas, mo laef bakegen long ded blong Sevya (luk long Gospel Art Buk, namba 58, 59). Askem ol pikinini blong talem wanem nao i stap hapen long ol pikja. Invaetem ol pikinini blong oli ledaon taem yu stap talem abaot taem we oli berem Jisas, mo afta, blong oli stanap taem yu stap talem abaot taem ia we Hem i laef bakegen long ded. Ridim Doktrin mo Ol Kavenan 63:49, mo talem testemoni blong yu se, yumi evriwan bae i girap long ded wan dei, semmak olsem Sevya i bin mekem.

  Jisas i kamaot long Meri

  Tumb Garen, i kam long Jon McNaughton

Doktrin mo Ol Kavenan 63:64

Mi mas mas tritim ol tabu samting wetem respek.

Yumi stap laef long wan taem we, ol tabu samting, man i no ting long olgeta, o oli stap jikim olgeta. Yu save helpem ol pikinini blong developem wan fasin blong gat respek long ol tabu samting.

Samfala Aktiviti we Yu Save Mekem

• Aot long Doktrin mo Ol Kavenan 63:64, ridim long ol pikinini: “Wanem we i kamaot long antap, i tabu.” Askem ol pikinini blong tingting long wan samting we i spesel long olgeta, olsem wan fevret pleiplei o buk. ?Hao nao oli tekem kea long samting ia mo hao oli stap protektem samting ia? Helpem olgeta blong tingting long ol samting we oli spesel—o tabu—long Papa long Heven. ?Olsem wanem nao bae yumi tokbaot ol samting ia? ?Olsem wanem nao bae yumi stap tritim olgeta?

• Wetem ol pikinini, singsing long wan singsing abaot respek, olsem “Reverently, Quietly” (Children’s Songbook, 26). Helpem olgeta blong tingbaot ol wei we oli yumi save soem se yumi gat respek from ol samting we oli tabu.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 63:9–10

Ol saen oli kam tru long fet mo tru long tingting blong God.

Esra But i bin jenisim laef blong hem, i kam joenem Jos afta we hem i bin luk Josef Smit i bin hilim han blong Elda Johnson. Be Afta long hemia, Esra i bin lusum fet blong hem mo hem i stap tokbaot nogud Profet. Insaed long Doktrin mo Ol Kavenan 63 i gat ol woning blong agensem fasin blong bildimap fet blong yumi long ol saen, olsem ol merikel hiling, be blong bildimap fet from ol konfemesen blong trutok tru long Spirit.

Samfala Aktiviti we Yu Save Mekem

• Soem pikja long aotlaen blong wik ia we i stap long Kam Folem Mi—Blong Wanwan Man, Woman mo Famli, mo talem long ol pikinini se Josef Smit i bin yusum prishud ia blong hilim han blong Elsa Johnson, mo han ia, hem i no bin stap yusum blong tu yia finis. Invaetem ol pikinini blong ridim Doktrin mo Ol Kavenan 63: 9–10, mo askem olgeta blong serem wan samting we Lod i bin talem abaot fet mo ol saen (o merikel).

• Invaetem ol pikinini blong dro wan haos we i sidaon antap long wan rektangol mo wan haos we i sidaon long poen blong wan traengol. Talem long ol pikinini se ol haos ia, oli ripresentem fet mo ol testemoni blong yumi. Askem olgeta blong ridim Doktrin mo Ol Kavenan 63:9–10 mo Hileman 5:12. Afta, mekem olgeta oli raet insaed long rektangol ol samting we yumi mas mekem blong bildimap fet blong yumi antap long hem, mo blong raet insaed long traengol, ol samting we yumi no mas bildimap fet blong yumi antap long ol. Poenemaot se rektangol i givim wan gudfala ples blong bildimap yumi antap long hem, be traengol ia i no sef mo i no wan gudwan. ?From wanem hem i impoten blong bildimap fet blong yumi long Jisas Kraes be i no antap long ol nara samting?

Doktrin mo Ol Kavenan 63:23

Taem mi stap obei long ol komanmen, God bambae i tijim mi ol trutok ia blong Hem.

Ol “sikret blong kingdom blong God” oli stap nomo blong olgeta we oli stap obei long ol komanmen blong God. From hemia nao oli ol sikret long plante pipol. Prinsipol ia bae i helpem ol pikinini taem oli stap lukaotem trutok.

Samfala Aktiviti we Yu Save Mekem

• Raetem long bod: Sapos mi obei long ol komanmen, nao, mo askem ol pikinini blong raetem long bod, ol defren wei blong finisim sentens. Askem olgeta blong ridim Doktrin mo Ol Kavenan 63:23, mo blong oli faenem wan samting we oli save ademap i go long lis blong olgeta. Soem long ol pikinini wan glas wota, mo askem olgeta olsem wanem ol trutok blong gospel oli olsem wota ia long yumi.

• Soem long ol pikinini wan pikja blong wan wel, mo askem olgeta blong oli droem, o blong oli tekem pikja blong wan. Afta we yufala i rid tugeta long Doktrin mo Ol Kavenan 63:23, helpem ol pikinini blong tingting long sam trutok we oli save abaot gospel, mo invaetem olgeta blong oli raetem ol trutok ia raon long ol wel blong olgeta. ?Olsem wanem nao ol trutok ia oli stap olsem “wota we i laef”?

Doktrin mo Ol Kavenan 63:58–64

Mi no mas yusum nogud nem blong God.

Ol pikinini we yu stap tijim oli save harem ol narawan oli stap yusum nem blong God long wan fasin we i no gat respek mo long ol wei blong talem nogud nem blong Hem. ?Olsem wanem nao yu save helpem olgeta blong oli andastanem se ol nem blong Papa long Heven mo Jisas Kraes, “oli mas lukaot gud blong tokbaot”? (Doktrin mo Ol Kavenan 63:64).

Samfala Aktiviti we Yu Save Mekem

• Ridim Doktrin mo Ol Kavenan 63:58 long ol pikinini: ridim long ol pikinini: “hemia i wan dei blong woning.” Askem olgeta blong tokbaot ol woning we oli harem long papa mo mama blong olgeta, long ol tija mo ol lida blong Jos. Afta, helpem olgeta blong faenem ol woning we i kam long Lod insaed long ol ves 58–64. ?Wanem sam long ol stret wei blong “yusum nem blong Lod? (ves 62).

• Tugeta, lukluk bak long “Lanwis” insaed long Blong Ol Yut Oli Kam Strong (ol pej 20–21). Askem ol pikinini blong mekem ol smol posta blong rimaenem olgeta abaot wan samting we oli bin lanem abaot wei blong yusum ol nem blong Papa long Heven mo Jisas Kraes.

• Sing tugeta wan singsing abaot respek, olsem “Reverence Is Love” (Children’s Songbook, 31). ?Olsem wanem nao yumi save meksua se yumi gat respek taem yumi tokbaot Papa long Heven mo Jisas Kraes?

stap lanem samting pikja bokis

Stap Leftemap Tingting blong Lanem Samting long Hom

Sapos yu no bin gat taem blong finisim aktiviti pej long klas, tingting blong sendem sam kopi i go long hom wetem olgeta pikinini blong oli save wok long hem wetem ol famli blong olgeta.

Stap Kam Antap long Fasin blong Yumi blong Stap Tij

Bildimap ol pikinini blong oli gat tras long olgetawan. Sam pikinini bae oli filim se oli no gat paoa blong lanem gospel olgetawan. Wan wei blong bildimap tras blong olgetawan i blong presem olgeta taem oli tekpat insaed long klas. Promesem long ol pikinini se bae Tabu Spirit i helpem olgeta taem oli stap lanem samting.

aktiviti pej: Mi mas mas tritim ol tabu samting wetem respek