Davis Kaonti, Misuri

14–20 Jun

Doktrin mo Ol Kavenan 64–66

“Lod I Askem blong Mas Gat Wan Hat Mo Wan Maen we I Wantem Mekem Samting”

Taem yu stap rere blong tij, tingting long wanem wei nao yu save stretem wei blong yu tij blong i stret wetem ol nid blong ol pikinini. Tingbaot se yu save yusum eniwan long ol aktiviti ia insaed long aotlaen ia blong ol smol pikinini mo ol pikinini we oli bigwan.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Givim janis long wanwan pikinini blong hem i holem pikja blong Sevya mo serem wan samting we oli stap lanem abaot Hem mo gospel blong Hem.

Stap Tijim Doktrin: Ol Smol Pikinini

Doktrin mo Ol Kavenan 64:9–10

Jisas i wantem mi blong fogivim ol narafala man.

?Wanem ol lesen o aktiviti we i yusum samting, we yu save tingting long hem we bae i helpem ol pikinini blong andastanem wanem i minim blong fogiv? Taem yu stap storian raon long fasin blong fogiv, rimaenem ol pikinini se blong stap fogiv i no minim blong letem ol narawan blong mekem nogud long yu.

Samfala Aktiviti we Yu Save Mekem

• Ridim sot sentens ia “yufala i mas fofogivim wanwan long yufala” (Doktrin mo Ol Kavenan 64:9), mo askem ol pikinini se i minim wanem blong fogivim wan man. Blong helpem olgeta blong andastanem, serem sam simpol eksampol. Helpem olgeta blong mekem wan rol plei long ol eksampol ia blong praktis blong stap fogiv.

• Ridim Doktrin mo Ol Kavenan 64:10 sloslo long ol pikinini, mo mekem olgeta i sekhan wetem wan nara pikinini taem oli harem toktok ia “fogiv.” Serem testemoni blong yu abaot pis mo hapines we i kam taem yu fogivim ol narawan.

• Tingting blong singsing wan singsing abaot fasin blong fogiv, olsem “Help Me, Dear Father” (Children’s Songbook, 99). ?Wanem nao singsing ia i stap tijim yumi long saed blong fasin blong fogivim narafala man?

Doktrin mo Ol Kavenan 64:34

Mi save obei long Jisas wetem evri hat mo maen blong mi.

Lod i bin tijim Ol Sent se, blong bildim Saeon, i nid blong oli givim hat blong olgeta mo maen blong olgeta blong wantem mekem samting long Hem. Tingting long olsem wanem bae yu helpem ol pikinini blong stat blong tingbaot wanem hemia i minim long olgeta.

Samfala Aktiviti we Yu Save Mekem

• Ridim Doktrin mo Ol Kavenan 64:34i go long ol pikinini: “Luk, Lod i askem blong mas gat wan hat mo wan maen we i wantem mekem samting.” Ripitim sot sentens ia fulap taem mo poen i go long hat mo hed blong yu taem yu stap ridim ol toktok ia, mo invaetem ol pikinini blong mekem semmak. ?Olsem wanem nao yumi givim hat mo maen blong yumi i go long Sevya? (Maet bae i help blong eksplenem se hat blong yumi i stap minim ol filing blong yumi mo lav mo maen blong yumi i minim ol tingting blong yumi.)

• Sing wan singsing abaot fasin blong lavem mo folem Jisas Kraes, olsem “I Feel My Savior’s Love” (Children’s Songbook, 74–75; speseli ves 3). ?Olsem wanem nao yumi soem long God se yumi lavem Hem? Serem ol filing we yu gat long Jisas Kraes.

Doktrin mo Ol Kavenan 66

Lod i save huia mi mo i lavem mi.

William E. McLellin i bin gat faef stret kwestin blong Lod. Josef Smit i bin kasem ansa long ol kwestin ia long wan revelesen, nomata hem i no bin save wanem ol kwestin blong William. Eksperiens ia i save helpem yu blong tijim ol pikinini se God i luksave olgeta mo Hem i save ansa long ol kwestin blong olgeta.

Samfala Aktiviti we Yu Save Mekem

• Talem abaot olsem wanem Lod i bin ansarem o kwestin blong William E. McLellin tru long wan revelesen we i kam long Profet Josef Smit (luk long Doktrin mo Ol Kavenan seksen heding). Testifae se Papa long Heven i save yumi mo i wantem blong helpem yu. Askem ol pikinini blong serem olsem wanem oli save se God i lavem olgeta.

• Ridim long ol pikinini Doktrin mo Ol Kavenan 66:4. Talem long ol pikinini abaot wan taem we Lod i bin soem long yu wanem Hem i bin wantem yu blong mekem. Ridim ves ia bakegen, be long tis taem, yu putum nem blong wan long ol pikinini. Ripitim hemia blong wanwan long ol pikinini.

  

  Jisas i lavem wanwan long yumi.

Stap Tijim Doktrin: Ol Bigfala Pikinini

Doktrin mo Ol Kavenan 64:7–10

Lod i wantem mi blong fogivim evriwan.

Olsem ol ves ia i soem, iven ol disaepol blong Jisas Kraes, samtaem oli gat hadtaem blong fofogivim wanwan long olgeta. Tingting long olsem wanem bae yu helpem ol pikinini blong oli andastanem oda blong Lod “blong fogivim evriwan.” (Eksplenem gud se blong stap fogiv i no minim blong letem ol man i mekem nogud long yumi; oltaem, oli mas talem long wan adalt we oli trastem sapos wan man i stap mekem nogud long olgeta.)

Samfala Aktiviti we Yu Save Mekem

• Invaetem ol pikinini blong pikjarem se oli askem olgeta blong tijim wan brata o sista we i yang moa, abaot blong stap fogivim ol narawan. ?Olsem wanem oli mekem samting ia? Invaetem olgeta blong oli sidaon tutu mo ridim Doktrin mo Ol Kavenan 64:7–10, mo blong oli faenem ol sentens we bae oli yusum long tijing blong olgeta. Oli save praktis tu blong stap tijim wanwan long olgeta.

• Tugeta, singsing long “Help Me, Dear Father” (Children’s Songbook, 99). ?Olsem wanem nao Papa long Heven i helpem yumi blong fogivim ol narawan?

• Tingting long wan wei blong komperem samting we bae i save helpem ol pikinini blong andastanem olsem wanem bae yumi gat “hadtaem” taem yumi no fogiv (ves 8). Eksampol: Soem long ol pikinini wan basket blong sofmad o graon; mo askem olgeta blong pikjarem se wan man i sakem sofmad long olgeta. ?Olsem wanem nao blong yumi no fogiv i semmak long lego sofmad ia i stap nomo mo, oltaem stap karem wetem yumi? ?From wanem bae i moa gud blong sakemaot sofmad ia? Helpem ol pikinini blong tingting long sam nara wei blong komperem samting we i tijim from wanem i impoten blong fogiv.

Doktrin mo Ol Kavenan 64:33–34

Lod i askem blong mas gat “wan hat mo wan maen we i wantem mekem samting.”

Blong Stap Bildim Saeon–o blong stap helpem Jos i gro– i “wan bigfala wok.” Blong winim hemia, Lod i nidim yumi blong givim hat mo ol maen we i wantem mekem samting long Hem. Olgeta we oli laef long Saeon oli “gat wan hat mo wan maen” (Moses 7:18).

Samfala Aktiviti we Yu Save Mekem

• Soem long ol pikinini sam samting we oli mekem aot long fulap smosmol pat, olsem wan pasel o wan kaliko blong waepem leg. Helpem olgeta blong tingting long ol narafala eksampol. Invaetem olgeta blong ridim Doktrin mo Ol Kavenan 64:33. ?Wanem nao God i wantem yumi blong mekem blong helpem Hem blong winim “bigfala wok” blong Hem? ?Wanem “ol smol samting” yumi save mekem we bae i help blong yumi winim wok ia?

• Askem ol pikinini blong flatem wan aksen we i nidim tu samting, be, givim olgeta wan samting nomo (eksampol, raet long wan bod be no givim jok o katem wan pis pepa be no givim sisis). Invaetem ol pikinini blong ridim Doktrin mo Ol Kavenan 64:34 blong faenem wanem tu samting we Lod i askem long yumi. ?From wanem yumi nid blong givim, tugeta, hat mo maen blong yumi long Lod? ?Olsem wanem nao yumi mekem hemia?

Doktrin mo Ol Kavenan 65

Mi save helpem blong mekem wol ia i rere blong welkamem Jisas Kraes.

Misin blong Jos—Kingdom blong God long wol ia—i blong mekem wol ia i rere blong Sevya i kambak. Ol pikinini we yu stap tijim, oli wan impoten pat blong misin ia. ?Wanem nao yu save mekem blong helpem olgeta blong oli tekpat?

Samfala Aktiviti we Yu Save Mekem

• Olsem wan klas, o tutu,ridim Doktrin mo Ol Kavenan 65, mo kaontem hamas taem oli raetem toktok ia “rere”. ?Wanem nao Lod i askem yumi blong rere from? ?Wanem nao yumi save mekem blong mekem yumi mo wol ia i rere?

• Soem wan pikja blong Seken Kaming blong Sevya (luk long Gospel Art Buk, no. 64), mo askem ol pikinini blong tokbaot gud wanem oli luk o wanem oli save abaot taem ia. Givim ol ki toktok mo sot sentens long ol pikinini blong faenem insaed long Doktrin mo Ol Kavenan 65 (olsem “fulumap ful wol” mo “ol merikel wok”). ?Wanem nao ol toktok mo sot sentens ia oli stap tijim yumi abaot Sekem Kaming mo wok blong yumi blong stap rere from taem ia?

Stap Leftemap Tingting blong Lanem Samting long Hom

Afta, helpem ol pikinini blong faenem wan ves long Doktrin mo Ol Kavenan 64–66 we oli laekem mo oli wantem blong serem wetem wan memba blong famli, o wetem wan fren.

Stap Kam Antap long Fasin blong Yumi blong Stap Tij

Lanem blong luksave revelesen. Taem yu tingting hevi long ol skripja, bae yu luk se ol tingting mo ol filing oli save kam eni taem mo long eni ples—taem yu stap travel i go long wok, taem yu stap mekem ol wok long haos, o stap wetem ol famli o ol fren” (Teaching in the Savior’s Way,12).