21–27 Jun

Doktrin mo Ol Kavenan 41–44

“Praes blong Olgeta I Moa Bigwan Bitim Ol Rij Samting blong Ful Wol Ia”

Taem yu stap ridim ol tingting we oli stap long aotlaen ia, stadi long Doktrin mo Ol Kavenan 67-70, raetemdaon eni filing mo tingting long saed blong spirit, we yu kasem. Ol filing ia bae i helpem yu blong mekem plan blong tij. Afta, komplitim plan ia wetem ol aedia we oli stap long aotlaen ia, we oli kamaot long Kam Folem Mi—Blong Wanwan Man, Woman mo Famli, o long ol magasin blong Jos.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong droem wan pikja blong wan samting we oli lanem aot long skripja stadi blong olgeta long hom, o long Praemeri. Sapos oli gat trabol blong tingting long wanem blong dro long Hem, yu save rimaenem olgeta long saed blong samfala topik we oli stap long Doktrin mo Ol Kavenan 67–70, olsem ol baptaes, kasem wan testemoni abaot ol skripja, o papa mo mama we i stap tijim ol pikinini abaot gospel.

Stap Tijim Doktrin: Ol Smol Pikinini

Doktrin mo Ol Kavenan 67

Buk ia blong Doktrin mo Ol Kavenan i holem ol revelesen we oli kam long God.

Long Novemba 1831, ol lida blong Jos oli disaed blong putum ol revelesen blong Josef Smit long wan buk blong evri man i ridim. Tedei ol revelesen ia oli printim long Doktrin mo Ol Kavenan.

Samfala Aktiviti we Yu Save Mekem

• Talem long ol pikinini abaot olsem wanem oli kam blong printim ol revelesen blong Josef Smit long wan buk (luk long “Japta 23: Doktrin mo Ol Kavenan,” Ol Doktrin mo Kavenan Stori, 90–92, o vidio we i go wetem long ChurchofJesusChrist.org). Serem testemoni blong yu se Doktrin mo Ol Kavenan i holem ol revelesen we i save helpem yumi tedei. Serem wan long ol fevret ves blong yu long Doktrin mo Ol Kavenan.

• Soem long ol pikinini wanwan long ol standet wok wan afta wan, mo taem yu stap holem wanwan i go antap, serem abaot olsem wanem yumi bin kasem olgeta (luk storian blong wanwan long Gaed long Ol Skripja). Taem yu holem Doktrin mo Ol Kavenan i go antap, serem wetem ol pikinini wanem nao i mekem skripja buk ia i defren long ol narawan (eksampol, i holem ol revelesen we oli givim long taem blong yumi tedei).

Doktrin mo Ol Kavenan 68:25–28

Mi wantem blong baptaes long eit yia blong mi.

Long Doktrin mo Ol Kavenan 68:25–28, Lod i bin talem long Josef Smit se ol pikinini i mas lan blong gat fet long Jisas Kraes, sakem sin, mo kasem baptaes taem oli kasem eit yia blong olgeta. Hem i talem tu se oli mas lan blong prea mo folem ol komanmen blong God.

Samfala Aktiviti we Yu Save Mekem

• Invaetem ol pikinini blong kaontem namba kasem eit long ol fingga blong olgeta. Wanem nao i spesel blong gat eit yia? Helpem ol pikinini blong luksave se taem oli kasem eit yia, oli save kasem baptaes. Wetem ol toktok mo sot sentens ia we yu save faenem long Doktrin mo Ol Kavenan 68:25–28, serem wetem olgeta sam long ol samting we Lod i wantem olgeta blong lanem bifo oli gat eit yia (luk tu long Ol Toktok blong Bilif 1:4). Helpem olgeta blong andastanem ol stamba tingting we maet oli no save tumas long hem.

• Wetem ol pikinini, singsing wan singsing abaot baptaes, olsem “Baptism” o “When I Am Baptized” (Children’s Songbook, 100-101, 103). Askem ol pikinini blong serem olsem wanem oli fil blong kasem baptaes mo wanem oli save mekem blong stap rere from.

Stap Tijim Doktrin: Ol Bigfala Pikinini

Doktrin mo Ol Kavenan 67:4, 9

Ol revelesen we Josef Smit i bin kasem oli tru.

Plante long ol instraksen long Doktrin mo Ol Kavenan 67–70 i abaot ol hadwok blong Ol Sent blong printim ol revelesen blong Josef Smit. Maet bae hemia i wan janis blong helpem ol pikinini blong luksave se long ol revelesen ia, we naoia oli printim insaed long Doktrin mo Ol Kavenan, yumi save faenem voes blong Lod.

Taem yu stap rere blong tij, maet bae yu wantem luklukbak long Saints, 1:140–43 o “Japta 23: Doktrin mo Ol Kavenan” (Ol Doktrin mo Kavenan Stori, 90–92).

Samfala Aktiviti we Yu Save Mekem

• Soem Baebol, Buk blong Momon, Doktrin mo Ol Kavenan, Perel we I Gat Bigfala Praes long ol pikinini. Helpem ol pikinini blong mekem wan lis, antap long bod, blong wanem nao i mekem wanwan buk blong skripja i defren mo wanem i mekem oli semmak. Sapos oli nidim help, serem olsem wanem oli tokbaot gud ol buk ia wetem olgeta long Gaed blong Ol Skripja. Askem ol pikinini olsem wanem yumi save save se ol skripja oli tru. ?Wanem nao yumi lanem aot long Doktrin mo Ol Kavenan 67:4, 9 abaot ol revelesen we Lod i bin givim long Josef Smit?

• Serem wan ves long Doktrin mo Ol Kavenan we i mekem “testemoni [blong yu] long ol trutok blong ol komanmen ia” i kam moa strong (ves 4). Givim janis long ol pikinini blong serem wan fevret ves blong olgetawan. Eksplenem long ol pikinini se ol Jos lida long taem ia, oli bin disaed blong printim aot testemoni blong olgeta long ol revelesen we Josef Smit i bin kasem. Taem oli bin mekem, wan long ol lida ia, Levi Hancock, i raetem narasaed long nem blong hem se, “Bae oli neva karemaot” (luk long “Testimony, circa 2 November 1831,” Revelation Book 1, 121, josephsmithpapers.org). ?From wanem nao Levi Hancock i wantem blong “bae oli neva karemaot” nem blong hem long testemoni ia we oli bin printim? Givim janis long ol pikinini blong raetem testemoni blong olgeta abaot wanem oli jes lanem aot long Doktrin mo Ol Kavenan.

  

  God i bin askem yumi blong stadi ol skripja.

Doktrin mo Ol Kavenan 68:3–4

Taem ol lida blong yumi long Jos oli toktok tru long insperesen, oli stap talem “tok blong Lod.”

Taem ol wokman blong Lod oli toktok wetem paoa blong Tabu Spirit, ol toktok blong olgeta i wanem Lod i wantem, hem i maen, i toktok, mo i voes blong Lod (luk long ves 4). Blong save trutok ia, i save helpem ol pikinini blong wantem blong lisin mo folem ol tijing blong ol wokman blong Lod.

Samfala Aktiviti we Yu Save Mekem

• Invaetem ol pikinini blong ridim Doktrin mo Ol Kavenan 68:3–4 long ol smol grup mo serem wetem wanwan long olgeta, wanem oli lanem aot long ol ves ia. Invaetem ol pikinini blong raetem wan samting we oli bin lanem, long bod. ?From wanem hemia i wan impoten trutok blong save?

• Afta we yu ridim Doktrin mo Ol Kavenan 68:3-4 tugeta wetem ol pikinini, givim ol kopi blong sam mesej blong jeneral konfrens we i bin pas i no longtaem. Invaetem olgeta blong faenem ol trutok we Lod i bin tijim yumi tru long ol wokman blong Hem long ol mesej ia.

Doktrin mo Ol Kavenan 69:1–2

Mi save “stap tru mo fetful.”

Taem Oliva Kaodri i nid blong travel i go long Misuri, Lod i bin singaotem Jon Witma, wan man we i “tru mo stap fetful” (ves 1), blong go wetem hem. ?Olsem wanem nao ol pikinini i save stap tru mo fetful olsem Jon Witma?

Samfala Aktiviti we Yu Save Mekem

• Talem long ol pikinini se taem Lod i bin sendem Oliva Kaodri i go long Misuri, Hem i bin talem se wan man we “tru mo stap fetful” (ves 1) i mas go wetem hem, mekem se Hem i sendem Jon Witma tu. ?Hem i minim wanem blong stap tru mo fetful? ?Olsem wanem nao bae yumi meksua se yumi stap tru mo fetful mekem se Lod i save yusum yumi blong blesem ol narawan?

• Invaetem sam pikinini blong stori abaot wan man we oli save we oli ting se oli “tru mo stap fetful.” ?Olsem wanem nao oli save se man ia i tru mo stap fetful? Helpem olgeta blong luk se Lod i bin trastem Jon Witma from we long taem ia, hem i bin stap tru mo fetful (luk long Doktrin mo Ol Kavenan 69:1–2). Singsing tugeta wan singsing we i leftemap tingting blong ol pikinini blong stap tru mo fetful olsem Sevya, olsem “Mi Traem blong Kam Olsem Jisas” (Liahona, Epril 2012, 64).

Stap Leftemap Tingting blong Lanem Samting long Hom

Invaetem ol pikinini blong eksplenem long wan long hom wanem hem i Doktrin mo Ol Kavenan, se hem i kam wea, mo from wanem hem i impoten long olgeta.

Stap Kam Antap long Fasin blong Yumi blong Stap Tij

Stretem ol aktiviti blong oli fit wetem yia blong ol pikinini we yu stap tijim. Ol yangfala pikinini bae oli nidim help blong oli givim tingting long wanem oli save serem. Ol bigfala pikinini gat moa eksperiens, mo olgeta nao oli save serem ol tingting blong olgeta. Kipim ol defren samting olsem i stap long maen taem yu stap mekem plan blong ol aktiviti.