I Stap long Hat blong Man blong Lukaot long Sipsip, i kam long Simon Dewey

28 Jun–4 Julae

Doktrin mo Ol Kavenan 71–75

“I No Gat Wan Tul blong Faet we Oli Mekem Agensem Yufala we Bae I Win”

Ol pikinini we yu tijim oli save lanem plante samting long klas, be bae oli save lanem moa samting sapos oli developem wan evri dei fasin blong stadi ol skripja long hom. Tingting long sam wei we yu save leftemap tingting blong olgeta mo sapotem fasin blong lanem gospel insaed long hom.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong sidaon long wan sekol long flo, afta rolem wan bol i go long wan long olgeta. Askem wan pikinini blong serem wan samting we hem i jes lanem abaot gospel long hom o long Praemeri. Afta askem pikinini ia blong rolem bol i go long wan narafala pikinini. Ripitim olsem kasem evri pikinini i gat janis blong serem wan samting.

Stap Tijim Doktrin: Ol Smol Pikinini

Doktrin mo Ol Kavenan 72:2, 10

Lod i bin singaotem wan bisop blong helpem mi.

Ol smol pikinini bae oli no save tumas samting abaot wanem bisop blong olgeta i mekem blong olgeta mo ol nara memba blong wod. Yu save helpem olgeta blong talem tangkyu from seves blong bisop.

Samfala Aktiviti we Yu Save Mekem

• Tekem sam samting i kam long klas we i ripresentem ol responsabiliti olsem wan bisop, olsem wan taeting slip, ol skripja, o wan pikja blong wan bisop we i stap givim kaonsel (luk long pikja we i stap long en blong aotlaen blong wik ia insaed long Kam Folem Mi—Blong Wanwan Man, Woman mo Famli). Ridim Doktrin mo Ol Kavenan 72:2, mo eksplenem se Lod i bin singaotem wan bisop blong helpem yumi. Yusum ol samting ia we yu bin tekem i kam blong helpem ol pikinini blong oli andastanem sam long ol samting we wan bisop i stap mekem blong givim seves long wod.

• Tekem ol pikinini oli go wokbaot i go long ofis blong bisop (bae yu wantem blong wok tugeta long hemia wetem ol nara tija). Tokbaot sam taem we bae oli save go mit wetem bisop long ofis blong hem (olsem long taem blong intaviu blong baptaes, o long taeting setelmen). Talem long ol pikinini olsem wanem seves blong bisop i bin blesem yu.

• Helpem ol pikinini blong mekem ol kad blong givim long bisop, mo talem tangkyu long hem from wanem hem i stap mekem blong help wetem wok blong Lod.

Doktrin mo Ol Kavenan 75:3

Mi save givim bes hadwok blong mi i go long Lod.

Nomata yia blong olgeta i smol, ol pikinini oli save faenem glad blong mekem bes blong olgeta blong kipim ol komanmen blong Lod.

Samfala Aktiviti we Yu Save Mekem

• Invaetem wanwan pikinini blong oli kam, wan afta wan, blong aktemaot olsem wanem bae oli mekem wan seves, olsem blong klinim wan rum insaed long jos, o wasem ol plet long hom. Ridim Doktrin mo Ol Kavenan 75:3, mo askem ol pikinini blong soem olsem wanem bae oli mekem hemia wetem fasin blong stap les, taem yu stap talem “no stap mekem nating,” mo soem olsem wanem blong wok had taem yu talem “wok wetem strongfala paoa blong yufala.” ?From wanem nao hem i impoten blong yumi mekem bes blong yumi blong givim seves long Lod?

• Serem wetem ol pikinini ol stori blong Presiden Dieter F. Uchtdorf abaot wok, we i stap long “Two Principles for Any Economy,” (Ensign o Liahona, Nov. 2009, 55–58). ?Yumi filim olsem wanem taem yumi save se yumi mekem bes blong yumi?

• Sing wan singsing fasin blong wok tugeta, olsem “When We’re Helping” (Children’s Songbook,198). Helpem ol pikinini blong mekemap ol aksen blong oli go wetem ol toktok ia.

  

  Ol fas memba blong Jos, samtaem oli bin givim kaekae i go long Jos blong Jos i helpem ol narafala man.

Stap Tijim Doktrin: Ol Bigfala Pikinini

Doktrin mo Ol Kavenan 71

Mi save difendem trutok taem mi serem testemoni blong mi.

Lod i no wet blong luk se ol pikinini bae oli difendem ol toktok agensem Jos olsem we Hem i bin singaotem Josef Smit mo Sidni Rigdon blong mekem. Be yu save helpem ol pikinini blong oli andastanem se simpol testemoni blong olgeta long saed blong trutok, i save gat wan strong paoa long ol narawan.

Samfala Aktiviti we Yu Save Mekem

• Yusum seksen heding blong Doktrin mo Ol Kavenan 71 o “Japta 25: Josef Smit mo Sidni Rigdon Oli Go long Wan Misin” (Ol Doktrin mo Kavenan Stori, 96) blong tijim ol pikinini abaot ol situesen we i bin givim insperesen blong mekem seksen 71 i kam. Ridim Doktrin mo Ol Kavenan 71:1 wetem ol pikinini, mo helpem olgeta blong faenem wanem Lod i bin wantem Josef mo Sidni blong mekem abaot ol “nogud filing” we ol pipol oli bin gat agensem Jos (seksen heding). ?Wanem nao Jisas i bin talem se bae Hem i givim olgeta blong helpem olgeta? ?Olsem wanem nao yumi save stap olsem Josef mo Sidni?

• Invaetem ol pikinini blong oli stap tutu, mo oli praktisim olsem wanem blong serem, wetem ol narawan, wanem oli save abaot Jos. Eksampol: oli save serem wan simpol testemoni, o oli save serem wan long Ol Toktok blong Bilif.

Doktrin mo Ol Kavenan 72:8

Lod i stap singaotem ol bisop blong oli helpem Hem blong mekem wok blong Hem.

Wan bisop i save gat wan strong gud paoa insaed long laef blong wan yangfala. ?Wanem nao yumi save mekem blong help blong luk bisop olsem wan ripresentativ blong Lod Jisas Kraes?

Samfala Aktiviti we Yu Save Mekem

• Eksplenem se long 1831, Lod i bin singaotem bisop blong Jos, Edwod Patrij, blong muv i go long Ketlan, Ohaeo, blong i stap olsem bisop long Indipendens, Misuri (luk long “Japta 17: Ol Fas Bisop blong Jos,” Ol Doktrin mo Kavenan Stori, 64–66). Ridim Doktrin mo Ol Kavenan 72:8 wetem ol pikinini, mo askem ol pikinini blong lisin se huia nao Lod i bin singaotem blong i stap olsem niufala bisop long Ketlan. ?From wanem Lod i stap singaotem ol bisop? Serem, wetem ol pikinini, wan eksperiens blong wan taem we yu bin gat blesing from seves blong wan bisop.

• Invaetem ol pikinini blong mekem wan lis blong sam long ol samting we oli bin luk bisop i bin mekem blong helpem ol pipol insaed long wod. Askem ol pikinini blong oli droem ol pikja blong wan bisop we i stap mekem wan samting we oli bin tokbaot. Talem testemoni blong yu se Lod i bin singaotem bisop blong yu blong i stap olsem wokman blong Hem. “?From wanem yumi mas talem tangkyu se Lod i bin singaotem wan bisop insaed long wod blong yumi?

Doktrin mo Ol Kavenan 73:3

Lod i bin givim komanmen long Josef Smit blong putumbak ol gudfala trutok we oli bin lus, oli nomo stap long Baebol.

Olsem pat blong koling blong hem olsem wan profet, Jisas Kraes i bin kasem oda long Lod blong mekem ol revisen ia, we oli kam tru long insperesen, long Baebol. Olgeta revisen ia, we Lod i bin singaotem se hem i wan “translesen” (Doktrin mo Ol Kavenan 90:13) i bin putumbak ol impoten trutok we oli bin lus, o oli bin karemaot long Baebol ova long plante handred yia.

Samfala Aktiviti we Yu Save Mekem

• Eksplenem se taem Josef Smit mo Smit mo Sidni Rigdon i bin kambak long wan sot misin blong hem kolosap long Ketlan, Lod i bin wantem olgeta blong oli statembak wok long wan impoten projek. Invaetem ol pikinini blong ridim Doktrin mo Ol Kavenan 73:3 blong faenem wanem projek ia. Blong helpem ol pikinini blong andastanem wanem we Lod i bin wantem Josef mo Sidni blong transletem, ridim, wetem olgeta, sam pat blong Bible Dictionary blong “Joseph Smith Translation (JST).”

• Pasem raon wan kopi blong Baebol, mo letem ol pikinini oli openem mo luk hamas pej oli stap insaed long hem. Invaetem ol pikinini blong traem tingting we oli bin askem olgeta blong transletem Baebol i go long wan nara lanwis. ?Wanem janis nao i stap blong oli maet mekem sam mistek? Eksplenem se, taem ol pipol oli stap transletem o kopi long Baebol bifo taem blong Josef Smit, oli bin mekem samfala mistek, mo samtaem, oli bin karemaot ol impoten trutok. Lod i bin givim oda long Profet Josef Smit blong stretem ol samting, tru long insperesen. ?From wanem nao wok blong Josef Smit i impoten tumas long yumi?

Stap Leftemap Tingting blong Lanem Samting long Hom

Invaetem ol pikinini blong jusum wan samting we bae oli mekem from ol samting we oli bin lanem tedei; olsem blong talem tangkyu long bisop from seves blong hem, o blong stap rere blong difendem ol bilif blong olgeta taem oli lanem Ol Toktok blong Bilif.

Stap Kam Antap long Fasin blong Yumi blong Stap Tij

Yusum ol samting we ol defren pat blong bodi oli save mekem. “Plante long ol pikinini (mo ol adalt) oli lanem gud ol samting taem oli yusum ol plante defren samting we bodi blong olgeta i save mekem. Faenem ol wei blong helpem ol pikinini blong olgeta blong oli yusum ol ae, ol sora, mo ol han blong olgeta taem oli stap lanem samting” (Teaching in the Savior’s Way, 25).