“5–11 Julae. Doktrin mo Ol Kavenan 76: ‘Praes blong Olgeta Bae I Bigwan, Mo Glori blong Olgeta Bae I No Save Finis,’” Kam Folem Mi—Blong Praemeri: Doktrin mo Ol Kavenan 2021 (2020)
“5–11 Julae. Doktrin mo Ol Kavenan 76,” Kam Folem Mi—Blong Praemeri: 2021
Ples blong Haed, i kam long Shaelynn Abel
5–11 Julae
Doktrin mo Ol Kavenan 76
“Praes blong Olgeta Bae I Bigwan, Mo Glori blong Olgeta Bae I No Save Finis”
Taem yu stap stadi long Doktrin mo Ol Kavenan 76, tingting hevi long wanem nao Papa long Heven i wantem ol pikinini insaed long klas blong yu oli save abaot hem, abaot Sevya, abaot olgetawan, mo abaot fiuja ples we bae oli stap long hem blong taem we i no save finis.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem long ol pikinini, ol pikja o ol aktiviti pej we i blong aotlaen blong wik ia, o i blong ol fasfala aotlaen. Letem ol pikinini oli tokbaot long yu wanem wanem oli stap luk insaed long ol pikja ia, mo wanem nao oli tingbaot we oli bin lanem aot long ol pikja ia.
Stap Tijim Doktrin: Ol Smol Pikinini
Yumi evriwan, yumi ol pikinini blong God.
Presiden Dallin H. Oaks i bin talem se sapos yumi tijim “aedia ia i fulap long paoa, long wan yangfala man, se hem i wan pikinini blong God,” yumi save givim hem wan “fasin blong gat respek long hemwan mo paoa blong pusum hem blong muv agensem ol problem blong laef” (“Powerful Ideas,” Ensign, Nov. 1995, 25).
Samfala Aktiviti we Yu Save Mekem
-
Blong helpem ol pikinini blong andastanem paoa blong olgeta blong kam olsem God, i faenem ol wei blong soem long olgeta se ol bebi animol oli gro blong kam olsem mama mo papa blong olgeta–maet ol pikinini i save joenem ol pikja blong ol animol wetem ol pikja blong ol bebi blong ol animol ia. Openem ol skripja i go long Doktrin mo Ol Kavenan 76:24, mo talem long ol pikinini se yumi evriwan yumi ol “stret boe mo gel long God.” Talem testemoni blong yu se God i Papa blong yumi mo yumi save gro blong kam olsem Papa mo Mama blong yumi long Heven.
-
Singsing tugeta “Mi Pikinini blong God” (STSP, pej 58), mo invaetem ol pikinini blong poen i gobak long olgetawan taem oli sing “Mi.” Askem olgeta blong singsing singsing ia bakegen, mo talem “Mi mi” long ples blong “yu yu” mo poen i go long wan narawan long klas.
Doktrin mo Ol Kavenan 76:40–42
Jisas Kraes i Sevya blong wol.
Toktok ia gospel i minim gud nius. Gudfala nius ia we gospel ia i karem i we Jisas Kraes “i bin kam long wol … blong hem i klinim wol ia long evri fasin we i no stret mo i no gud” (ves 41).
Samfala Aktiviti we Yu Save Mekem
-
Talem long ol pikinini abaot sam gud nius we yu bin harem i no longtaem i pas. Askem olgeta blong serem gud nius we oli bin harem. Afta, serem wetem olgeta gudfala nius blong gospel taem yu ridim Doktrin mo Ol Kavenan 76:41–42. Askem ol pikinini olsem wanem oli filim abaot gud nius ia. Serem wetem olgeta glad ia we gud nius ia i karem i kam long yu.
-
Soem wan pikja blong Jisas Kraes. Askem ol pikinini sapos oli save wanem Jisas Kraes i bin mekem blong yumi. Soem wan samting we i toti long ol pikinini mo wan samting we i klin (olsem wan waet hankijif o wan pis pepa), mo eksplenem se sin i olsem doti we i stap long ol spirit blong yumi, be Jisas Kraes i bin kam blong helpem yumi blong kam klin bakegen.
PikjaJisas wetem ol pikininiLego Ol Smol Pikinini Oli Kam, i kam long J. Kirk Richards
!Papa long Heven i wantem mi blong gobak blong laef wetem Hem blong oltaem.
Visen blong Josef Smit mo Sidni Rigdon blong selestial kingdom i bin soemaot ol bigfala blesing we God i bin rere blong ol pikinini blong Hem, mo tu, ol samting we yumi mekem blong kasem ol blesing ia.
Samfala Aktiviti we Yu Save Mekem
-
Talem long ol pikinini abaot ol tri kingdom we Josef mo Sidni i bin luk long visen blong tufala. (Maet bae yu wantem ridim wan pat o evri pat blong “Japta 26: Ol Trifala Kingdom blong Heven” [Ol Doktrin mo Kavenan Stori, 97–103], o vidio we i go wetem long ChurchofJesusChrist.org). Askem ol pikinini wanem oli save abaot visen ia. Lukluk plante blong tokbaot gud selestial kingdom, mo testifae se ples ia i ples we Papa long Heven i wantem wanwan long yumi blong stap long hem.
-
Ridim Doktrin mo Ol Kavenan 76: 62, long ol pikinini, mo invaetem ol pikinini blong droem pikja blong olgetawan wetem Papa long Heven mo Jisas Kraes long selestial kingdom.
Stap Tijim Doktrin: Ol Bigfala Pikinini
Doktrin mo Ol Kavenan 76:5, 41–42, 69
Jisas Kraes Hem I Sevya blong Mi.
Helpem ol pikinini blong oli andastanem se ol bigfala blesing we God i promesem i go long olgeta we oli fetful long nekis laef, i posibol nomo from Sevya, Jisas Kraes.
Samfala Aktiviti we Yu Save Mekem
-
Raetem long bod: ?Wanem nao Jisas Kraes i bin mekem blong mi? Askem wanwan pikinini blong ridim kwaet ves 5, ol ves 41–42, o ves 69 long seksen 76, mo lukaotem ol ansa we bae i stret long kwestin we i stap long bod. Letem olgeta i serem ol ansa blong olgeta (luk tu long “He Sent His Son,” Children’s Songbook, 34–35). ?Olsem wanem yumi save talem tangkyu long Sevya from wanem Hem i bin mekem blong yumi?
-
Raetem nambatri toktok blong bilif long bod, mo lego ol emti spes long ples blong ol ki toktok. Givim ol toktok ia we i nogat long ol pis pepa long ol pikinini, mo invaetem olgeta blong putum ol toktok blong olgeta long ol stret ples blong olgeta long bod. ?Wanem nao toktok blong bilif ia i tijim yumi abaot? ?From wanem yumi nidim Jisas Kraes? (luk vidio tu long “Why We Need a Savior,” ChurchofJesusChrist.org).
Doktrin mo Ol Kavenan 76:12, 15–19, 114–16
Blong stap stadi ol skripja, i save helpem mi “andastanem ol samting we oli blong God.”
Josef Smit mo Sidni Rigdon, tufala i bin kasem Doktrin mo Ol Kavenan 76 taem tufala i bin stap tingting hevi long ol skripja. Helpem ol pikinini blong luk hao blong stap stadi ol skripja i save invaetem revelesen blong kam tru long Tabu Spirit.
Samfala Aktiviti we Yu Save Mekem
-
Askem ol pikinini sapos oli save wanem Josef Smit mo Sidni Rigdon i bin stap mekem taem oli bin luk visen ia long Doktrin mo Ol Kavenan 76. Invaetem olgeta blong ridim ol ves 15–19 blong faenemaot. Serem wan taem we yu bin kasem insperesen taem yu stap ridim ol skripja, mo askem ol pikinini blong tokbaot ol filing blong olgeta long saed blong spirit taem we oli bin gat taem oli stap ridim ol skripja.
-
Askem ol pikinini blong sarem ol ae blong olgeta mo traem blong mekem wan samting, olsem kalarem wan pikja o openem ol skripja i go long wan stret ves. ?Wanem sam samting we i had blong mekem taem ol ae blong yu sat long saed blong spirit? Tugeta, ridim Doktrin mo Ol Kavenan 76:12, 15–19, 114–16 blong faenemaot wanem yumi nid blong mekem blong mekem ol ae blong yumi long saed blong spirit i open.
Doktrin mo Ol Kavenan 76:50–70
Papa long Heven i bin rere wan kingdom blong selestial glori blong mi.
Blong save abaot selestial glori ia we God i bin rere long hem i save givim insperesen long ol pikinini blong “win tru long fet” (ves 53) ol hadtaem mo temtesen we oli fesem.
Samfala Aktiviti we Yu Save Mekem
-
?Sapos wan i askem yumi, “From wanem mi mas folem Jisas Kraes mo kipim ol komanmen blong Hem?” wanem nao bae yumi talem? Invaetem ol pikinini blong lukaotem ol ansa long Doktrin mo Ol Kavenan 76:50–70, we i tokbaot gud olgeta we oli kasem laef we i no save finis long selestial kingdom. Letem ol pikinini oli mekem wan rol plei blong ansarem kwestin ia. Talem testemoni blong yu abaot ol bigfala blesing we Papa long Heven i bin rere blong yumi, sapos yumi folem Jisas Kraes.
-
Droem wan bigfala pikja blong san long wan pis pepa, mo katem i go long ol pis blong pasol. Givim wanwan pikinini wan pis, tugeta, wetem wan long ol skripja ia blong ridim: Doktrin mo Ol Kavenan 76:51; 76:52; 76:53; 131:1–2. Askem ol pikinini blong faenem wan samting long ol ves blong olgeta we yumi mas mekem blong kasem laef we i no save finis long selestial kingdom (sam ves i gat bitim wan ansa), mo raetem long pis blong san blong olgeta. Taem oli stap wok tugeta blong putum tugeta pasel ia, serem tras blong yu long olgeta se wetem help blong Sevya, bae oli save kwalifae from selestial kingdom ia.
Stap Leftemap Tingting blong Lanem Samting long Hom
Invaetem ol pikinini blong yusum aktiviti pej blong wik ia blong tijim ol famli blong olgeta wanem we oli bin lanem abaot visen we Josef Smit mo Sidni Rigdon i bin gat.
Stap Kam Antap long Fasin blong Yumi blong Stap Tij
Yusum olgeta skripja. Iven sapos ol pikinini ia we yu stap tijim oli no save rid gud yet, yusum ol skripja plante taem, taem yu stap tijim olgeta. Letem olgeta oli luk se ol trutok we yu stap serem oli kam long ol skripja.