Stap Gobak Hom, i kam long Yongsung Kim

12–18 Julae.

Doktrin mo Ol Kavenan 77–80

“Bambae Mi Lidim Yufala I Go”

Taem yu stap stadi Doktrin mo Ol Kavenan 77–80, lukaotem ol sentens mo ol ves we i save helpem ol pikinini blong andastanem gud ol prinsipol blong gospel. Yu tu yu save serem ol ves we yu faenem, iven sapos oli no stap long ol aktiviti daon ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Askem ol pikinini blong talem nem blong sam samting we oli glad mo talem tangkyu from. ?Wanem wan samting, olgeta mo famli blong olgeta, oli stap mekem blong soem long Papa long Heven se oli talem tangkyu from ol blesing blong Hem?

Stap Tijim Doktrin: Ol Smol Pikinini

Doktrin mo Ol Kavenan 77:2

God i bin krietem evri samting long wol ia.

Blong stap lanem abaot ol samting we God i bin krietem i save helpem ol pikinini blong filim lav we Hem i gat long olgeta.

Samfala Aktiviti we Yu Save Mekem

• Soem long ol pikinini, ol pikja blong ol animol, wetem sam bebet mo ol pijin. Taem yu stap ridim ol toktok ia “ol animol,” “ol animol we oli stap wokbaot long graon,” mo “ol pijin” long Doktrin mo Ol Kavenan 77:2, invaetem ol pikinini blong poen i go long ol pikja we i go wetem. Testifae se God i krietem evri samting ia from se Hem i lavem yumi mo i wantem yumi blong yumi hapi (luk tu long Doktrin mo Ol Kavenan 59:16–20).

• Singsing wan singsing wetem ol pikinini abaot ol kriesen blong God, olsem “My Heavenly Father Loves Me” (Children’s Songbook, 228–29). Askem ol pikinini olsem wanem ol samting ia we oli singsing abaot olgeta i helpem olgeta blong filim lav blong God.

  

  God i bin krietem wol ia mo evri samting we i stap insaed long hem.

Doktrin mo Ol Kavenan 78:6

Mi save serem ol samting we mi gat wetem ol narafalawan.

Papa long Heven i wantem yumi blong serem ol blesing blong yumi i fri nomo wetem wanwan long yumi, mekem se yumi save “semmak long ol samting blong wol ia” mo long “ol samting blong heven” (ves 6).

Samfala Aktiviti we Yu Save Mekem

• Blong tijim wanem i minim blong “semmak long ol samting blong wol ia” (ves 6), givim ol pikja blong ol pipol we oli stap long nid (olsem ol man we oli hanggri, kasem kil, o kolkol) long ol pikinini. Afta givim long ol nara pikinini ol samting we i save help (olsem kaekae, wan plasta, o wan blangket). Invaetem ol pikinini blong serem wanem oli gat blong helpem ol man long ol pikja ia. Mekem ol nara pikinini i gat wan taem blong serem wanem hem i gat. Helpem ol pikinini blong andastanem se Papa long Heven i wantem evri pikinini blong Hem blong gat ol samting we oli nidim, mo blong mekem hemia, fulap taem Hem i stap askem yumi blong serem wanem yumi gat wetem ol narawan.

• Ridim ol sentens andanit long tufala fas pikja long “Japta 28: Profet Josef I Go long Misuri Bakegen” long ol pikinini (Ol Doktrin mo Kavenan Stori,108). Askem ol pikinini blong priten se oli stap helpem wan man blong bildim wan haos, stap serem kaekae, o stap givim seves long wan nara wei. ?Yumi filim olsem wanem taem yumi stap help mo serem samting? Helpem ol pikinini blong tingbaot sam samting we Jisas Kraes i bin serem wetem yumi.

Doktrin mo Ol Kavenan 78:18

Jisas Kraes bae i lidim mi i go.

Sapos yumi wantem blong letem Lod i “lidim [yumi] i go,” yumi save “stap glad,” nomata sapos ol samting we yumi “no save tekem … naoia” (ves 18).

Samfala Aktiviti we Yu Save Mekem

• Invaetem ol pikinini blong serem ol taem, taem we oli bin wan lida, olsem blong stap long fored blong wan laen o lidim wan miusik. ?Wanem nao wan lida i stap mekem? Soem wan pikja blong Sevya taem yu stap ridim smol pat ia long Doktrin mo Ol Kavenan 78:18: “Yufala i stap glad, from we bambae mi lidim yufala i go.” Yusum aktiviti pej blong wik ia blong helpem ol pikinini blong tingting long ol wei we yumi save mekem blong folem Sevya.

• Invaetem ol pikinini blong folem Jisas, mo lidim olgeta i go raon long rum taem yu stap holem wan pikja blong Hem. Taem yu mekem hemia, singsing tugeta wan singsing abaot fasin blong stap folem Sevya, olsem “Mi Traem blong Kam Olsem Jisas” Liahona, Epril 2012, 64, o “Choose the Right Way” (Children’s Songbook, 160). Mekem ol pikinini oli gat janis blong holem pikja ia mo lidim ol narafala pikinini.

Stap Tijim Doktrin: Ol Bigfala Pikinini

Doktrin mo Ol Kavenan 77

Mi save faenem ansa long ol kwestin blong mi abaot ol skripja.

Blong stap tijim ol pikinini abaot olsem wanem Josef Smit i bin lukaotem ol ansa long ol kwestin blong hem, i save helpem olgeta blong save se Papa long Heven bae i ansarem olgeta taem oli lukaotem blong Hem i gaedem olgeta. Tingting blong serem sam eksperiens blong yu we yu bin gat taem yu bin kasem ol ansa long Hem.

Samfala Aktiviti we Yu Save Mekem

• Ridim ol toktok ia andanit long ol fas trifala pikja long “Japta 27: Profet I Gohed Wetem Wok blong Hem Nomata Ol Hadtaem” long ol pikinini (Ol Doktrin mo Kavenan Stori,104). Askem ol pikinini sapos olgeta, olsem Josef, oli bin filim se oli no andastanem wan samting insaed long ol skripja. Letem olgeta oli serem eksperiens blong olgeta. ?Wanem nao Josef i bin mekem blong faenem ol ansa? Talem long ol pikinini abaot wan taem we Papa long Heven i bin helpem yu blong andastanem wan samting we i bin stap insaed long ol skripja.

• Maet ol pikinini we yu stap tijim oli laekem blong ridim sam long ol ves insaed long buk blong Revelesen we Josef Smit i bin gat ol kwestin long hem. Afta oli save luk long Doktrin mo Ol Kavenan 77 blong faenem wanem Lod i bin wantem Josef Smit blong andastanem. Jusum samfala ves we yu filim se bae i gat fulap mining long hem.

Doktrin mo Ol Kavenan 78:3–7

Mi save help blong “mekem wok ia blong [Jisas Kraes] i go.”

Long seksen 78, Lod i bin givim sam stret instraksen long sam lida blong Jos we i save helpem olgeta blong “mekem wok ia [blong God i go” (ves 4). Helpem ol pikinini blong luksave wanem nao, maet, i rol blong olgeta blong mekem wok blong Lod i go.

Samfala Aktiviti we Yu Save Mekem

• Askem ol pikinini blong ridim Doktrin mo Ol Kavenan 78:4. ?Wanem nao “wok” ia we yumi “putum yumi long hem” (bin akseptem o jus blong sapotem) taem yumi bin kasem baptaes? Leftemap tingting blong olgeta blong lukluk insaed long ol pat blong skripja olsem olgeta ia blong gat sam posibol ansa: Mosaea 18:8–10; Doktrin mo Ol Kavenan 20:37; Moses 1:39.

• Eksplenem long ol pikinini se Niuwel K. Witni i bin gat wan stoa mo Lod i bin askem hem mo sam nara man blong yusum sam mane blong olgeta blong help blong pem wok blong Lod (luk long Doktrin mo Ol Kavenan 63:42–43). Invaetem olgeta blong ridim Doktrin mo Ol Kavenan 78: 3–7 mo lukaotem from wanem nao oli askem ol man ia blong mekem ol samting ia. ?Bae yumi filim olsem wanem sapos oli askem yumi blong serem samting olsem we Niuwel i bin mekem? Helpem olgeta blong tingting long sam wei we ol man i stap kontribiut long wok blong Lod long taem blong yumi, olsem blong stap pem taeting mo fas ofring, stap wok long ol koling, mo i go.

Doktrin mo Ol Kavenan 78:19

Mi sapos blong akseptem “evri samting wetem fasin blong talem tangkyu.”

Fulap taem, Lod i stap blesem yumi moa sapos yumi stap talem tangkyu from wanem Hem i bin givim finis long yumi. ?Olsem wanem nao yu save helpem ol pikinini we yu stap tijim, blong stap talem tangkyu from ol blesing blong olgeta?

Samfala Aktiviti we Yu Save Mekem

• Askem ol pikinini blong ridim Doktrin mo Ol Kavenan 78: 19 mo faenem wanem nao God i promesem i go long olgeta we oli stap talem tangkyu. Helpem ol pikinini blong andastanem wanem “wan handred taem” i minim taem yu stap soem wan smol samting, mo afta, 100 moa blong semmak samting ia.

• Singsing wan singsing abaot fasin blong talem tangkyu, olsem “I Am Glad for Many Things” (Children’s Songbook, 151), o wajem vidio ia “Think to Thank” (ChurchofJesusChrist.org). Givim taem long ol pikinini blong mekem ol lis blong ol samting we oli stap talem tangkyu from. Leftemap tingting blong olgeta blong raetemdaon hamas samting we i posibol blong raetem long sot taem ia we bae yu givim long olgeta.

Stap Leftemap Tingting blong Lanem Samting long Hom

Tingting blong stap kontaktem papa mo mama blong ol pikinini we yu stap tijim mo givim tingting blong wan kwestin we oli save askem long ol pikinini blong olgeta abaot wan samting we oli bin lanem insaed long klas.

Stap Kam Antap long Fasin blong Yumi blong Stap Tij

Testifae abaot ol blesing we Hem i promesem. Taem yu stap invaetem ol pikinini blong laef folem wan gospel prinsipol, serem ol promes we God i bin mekem, tru long ol profet, wetem olgeta we oli laef folem prinsipol ia. Wan eksampol blong wan promes we yu save serem, i stap insaed long Doktrin mo Ol Kavenan 78: 19. (Luk tu long Teaching in the Savior’s Way,35.)