Kraes mo Yangfala Rij Loya

Kraes mo Yangfala Rij Loya,, i kam long Heinrich Hofmann

19–25 Julae.

Doktrin mo Ol Kavenan 81–83

Taem “Mi Givim Plante, Mi Askem Plante”

?Olsem wanem ol revelesen we oli stap long Doktrin mo Ol Kavenan 81–83 oli helpem ol pikinini we yu stap tijim blong mekem gud samting long medel blong ol famli mo ol fren blong olgeta?

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem ol pikinini blong serem wan samting we oli bin mekem blong helpem wan long wik ia. ?Olsem wanem nao fasin blong givim seves long ol narawan oli helpem yumi blong kam olsem Sevya blong yumi?

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 81:3

Mi mas prea oltaem

Taem we Lod i bin singaotem Frederik G. Wiliams blong i stap olsem kaonsel long Profet Josef Smit, Hem i bin givim kaonsel ia long Frederik blong hem i mas “fetful … oltaem long prea.”

Samfala Aktiviti we Yu Save Mekem

• Ridim long ol pikinini kaonsel blong Lod blong stap “fetful … oltaem long prea, long wan voes we i laod mo long hat blong yu, long pablik mo long praevet” (Doktrin mo Ol Kavenan 81:3). Eksplenem wanem i minim blong prea long hat blong yumi, mo serem wan eksampol blong yuwan. Helpem ol pikinini blong tingbaot ol taem we oli save prea “long pablik mo long praevet.”

• Tijim ol pikinini olsem wanem blong prea. Tokbaot bigwan se oli save talem tangkyu long Papa long Heven from ol blesing blong olgeta mo askem Hem ol samting we oli nidim. Wan singsing abaot prea, olsem “I Thank Thee, Dear Father” (Children’s Songbook, 7), i save helpem ol pikinini blong save wanem blong talem long ol prea blong olgeta. Givim janis long wanwan pikinini blong talem wan sot prea.

• Askem ol pikinini blong tingting long sam samting we oli save talem tangkyu long Papa long Heven from, o, oli save askem Hem. Mekem olgeta oli droem ol pikja blong ol samting ia mo serem wetem klas.

Doktrin mo Ol Kavenan 81:5; 82:19

Mi save givim seves long olgeta raonabaot long mi.

Papa long Heven i save ol nid blong wanwan pikinini blong Hem, mo fulap taem, Hem i yusum ol nara man–olsem ol pikinini we yu stap tijim–blong helpem Hem blong ansarem ol nid ia. ?Olsem wanem nao yu save helpem ol pikinini blong luksave ol nid blong ol narawan mo givim seves long olgeta?

Samfala Aktiviti we Yu Save Mekem

• Ridim Doktrin mo Ol Kavenan 81:5 i go long ol pikinini, mo helpem olgeta blong andastanem ol sot sentens olsem “givhan long olgeta we oli no strong” mo “leftemap ol han we oli hang i kamdaon.” Mekem olgeta i aktemaot ol wei we yumi save mekem wanem Lod i askem long ves ia. Yusum ol pikja o vidio blong talem ol simpol stori blong Jisas Kraes we i stap givim seves long ol nara man (luk long Gospel Art Buk, namba 41, 42, 46, 47, 55; biblevideos.ChurchofJesusChrist.org). ?Olsem wanem nao yumi save folem eksampol blong Sevya blong stap helpem ol narawan?

• Singsing long nambafo ves blong “I Feel My Savior’s Love” (Children’s Songbook, 74–75) o wan singsing abaot seves. Tokbaot wan taem we wan we yu filim lav blong Sevya from wan man i bin helpem yu.

• Ridim Doktrin mo Ol Kavenan 82:19 i go long ol pikinini, mo tokbaot bigwan sot sentens ia “traem blong lukaotem gud laef blong neba blong hem.” Eksplenem se hemia i minim blong mekem ol samting we i helpem neba blong yumi–mo tu, famli blong yumi. Helpem ol pikinini blong tingting long ol wei we oli save givim seves long wan long wik ia.

  ol boe oli stap digim graon

  God i stap askem yumi blong givim seves long ol narawan blong yumi soem lav we yumi gat long Hem.

Doktrin mo Ol Kavenan 82:10

God i promesem ol blesing taem mi stap obei long Hem.

Taem oli stap groap, maet bae ol pikinini i askem olgetawan from wanem God i givim tumas komanmen long yumi. Yu save helpem ol pikinini blong andastanem se, Hem i givim ol komanmen blong blesem yumi.

Samfala Aktiviti we Yu Save Mekem

• Helpem ol pikinini blong tingting long ol komanmen we God i bin givim long yumi (eksampol, luk long, Eksodas 20:4–17; Matiu 22:37–39; Doktrin mo Ol Kavenan 89:5–17). Droem ol pikja long bod blong helpem ol pikinini blong andastanem mo tingbaot ol komanmen ia. Givim ol eksampol long olsem wanem ol komanmen blong God i save blesem mo protektem yumi.

• Ridim “Mi, Lod, mi mas mekem folem promes blong mi taem yufala i mekem wanem mi talem” (Doktrin mo Ol Kavenan 82:10) i go long ol pikinini. Askem ol pikinini blong ripitim sot sentens ia fulap taem wetem yu, mo tingting long sam wei blong helpem olgeta blong tingbaot, olsem blong invaetem olgeta blong klap folem bit blong sot sentens ia. Testifae se taem yumi obei long ol komanmen blong God, Hem i kipim ol promes blong Hem long yumi.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 81:3

Mi save prea long “wan voes we i laod mo long hat blong [mi].”

?Olsem wanem yu save givim insperesen long ol pikinini blong oli tanem olgeta i go long Lod tru long “prea oltaem” taem we oli stap long nid?

Samfala Aktiviti we Yu Save Mekem

• Invaetem wan blong ridim Doktrin mo Ol Kavenan 81:3, mo askem ol pikinini se i minim wanem blong prea “long hat blong [yumi].” Serem wan eksperiens abaot wan taem we yu bin prea long wan voes we i laod, o insaed long hat blong yu, mo afta, Lod i bin helpem yu. Invaetem ol pikinini blong serem eksperiens blong olgetawan. ?Olsem wanem nao prea i save tekem yumi i go kolosap long Papa long Heven?

• Ridim o singsing wetem ol pikinini, abaot prea, olsem “?Yu Bin Mekem Prea?” (STSP, pej 48), o “Sweet Hour of Prayer” (Hymns, no.144). Invaetem ol pikinini blong serem wan sentens we i kamaot long hym we i helpem olgeta blong andastanem wan samting abaot prea. Givim olgeta taem blong oli tingting hevi long wanem oli save mekem blong mekem prea blong olgeta i kam antap, mo afta, raetemdaon ol aedia blong olgeta.

Doktrin mo Ol Kavenan 81:5

God i wantem mi blong givim seves mo mekem olgeta we oli stap long nid oli kam strong moa.

Helpem ol pikinini blong andastanem se i gat plante wei we oli save givim seves long famli, fren, mo neba blong olgeta, evri dei.

Samfala Aktiviti we Yu Save Mekem

• Droem ol pikja blong ol han mo ol ni long bod. Askem ol pikinini blong ridim Doktrin mo Ol Kavenan 81:5 blong lanem wanem Lod i talem abaot ol pat blong bodi ia. Wajem vidio ia “Pass It On” (ChurchofJesusChrist.org), o serem olsem wanem yu mo ol pikinini i bin luk ol man i givim seves long wanwan long olgeta. ?Olsem wanem yumi save luksave ol pipol we oli stap long nid, raon long yumi? Invaetem ol pikinini blong givim seves long wan man o moa. Blong gat sam aedia abaot ol wei blong givim seves long ol narawan, singsing wan singsing abaot seves, olsem “Have I Done Any Good?” (Hymns, no. 223).

• Invaetem ol pikinini blong gat janis blong putumap ol domino (o sam samting we i kolosap semmak) taem oli stap talem ol wei we oli save givim seves long ol narawan. Askem wan pikinini blong pusum wan domino i foldaon mo luksave olsem wanem i gat paoa long ol narawan. ?Olsem wanem seves blong yumi i gat wan paoa we i kolosap semmak, long ol pipol raon long yumi? (Luk tu long vidio ia “Dominoes,” ChurchofJesusChrist.org.) Tokbaot olsem wanem seves we wan man i givim wetem lav, i bin leftemap tingting blong yu blong givim seves long wan nara man moa.

Doktrin mo Ol Kavenan 82:8–10

God i promesem ol blesing taem mi stap obei long Hem.

Taem ol pikinini oli stap developem tras long ol promes blong God, bambae hat mo tingting blong olgeta blong wantem obei long ol komanmen blong Hem, bambae i gro.

Samfala Aktiviti we Yu Save Mekem

• Invaetem ol pikinini blong traem pikjarem se oli gat wan fren we i ting se God i bin givim tumas komanmen. Askem olgeta blong lukaot long Doktrin mo Ol Kavenan 82:8–10 blong faenem wan samting we bae i helpem fren blong olgeta blong andastanem from wanem God i givim ol komanmen ia. Serem olsem wanem ol komanmen blong God i bin blesem yu, mo invaetem ol pikinini blong serem ol tingting blong olgeta tu.

• Blong helpem ol pikinini blong andastanem ol promes blong Papa long Heven long yumi, seraotem klas long tri grup, mo givim ol skripja ia long wanwan grup blong ridim: Doktrin mo Ol Kavenan 1:37–38; 82:10; 130:20–21. Invaetem olgeta blong serem wanem we oli lanem abaot ol promes blong Papa long Heven. ?Olsem wanem fasin blong yumi blong stap obei i gat paoa long ol blesing we yumi stap kasem? Helpem ol pikinini blong tingting long ol eksampol long laef blong olgeta o long ol skripja, taem fasin blong stap obei i bin kasem ol blesing long God i kam.

• Serem wan eksperiens blong yuwan we i testifae long o prinsipol we oli tijim insaed long Doktrin mo Ol Kavenan 82:8–10. ?Olsem wanem yu kam blong trastem Lod mo ol promes blong Hem?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong tingbaot olsem wanem bae oli wantem blong givim seves long wan man long famli blong olgeta long wik ia. Letem olgeta oli serem wanem we oli mekem, long taem blong lesen long nekis wik.

Stap Kam Antap long Fasin blong Yumi blong Stap Tij

Helpem ol pikinini blong oli kam blong lanem samting long wan moa gud wei. Blong stap tij, i minim moa bitim blong stap talemaot trutok nomo. Hem i minim blong stap helpem ol narawan blong developem fasin blong stap dipen long olgetawan long saed blong spirit. Leftemap tingting blong ol pikinini blong oli tingting long ol aedia blong olgetawan bitim blong talem simpol nomo long olgeta, olsem wanem oli save givim seves long ol narawan.

aktiviti pej: Mi save givim seves long ol narawan