Josef Smit i kasem Melkesedek Prishud

Restoresen, i kam long Lis Lemon Swindel

26 Julae–1 Ogis

Doktrin mo Ol Kavenan 84

“Paoa we I Olsem Hemia blong God”

Taem yu stap rid long Doktrin mo Ol Kavenan 84, ?wanem ol trutok nao yu filim se i stret blong tokbaot plante wetem ol pikinini we yu stap tijim? Raetemdaon ol tingting we oli kam long yu tru long Tabu Spirit.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem ol pikinini blong serem ol samting we oli save abaot prishud. Yu save soem wan pikja blong wan we oli blesem hem tru long paoa blong prishud, olsem pikja long Gospel Art Buk, ol namba 103–10, mo askem ol pikinini olsem wanem prishud i blesem ol famli.

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 84:19-22, 26–27

Prishud hem i paoa blong God.

?Ol pikinini we yu stap tijim, oli save ol stamba tingting blong prishud? Insaed long Doktrin mo Ol Kavenan 84, Lod i soemaot wan stamba tingting: blong helpem yumi blong gobak long Papa long Heven. (Blong lanem moa, luk long Gospel Topics, “Priesthood,” topics.ChurchofJesusChrist.org.)

Samfala Aktiviti we Yu Save Mekem

• Ridim Doktrin mo Ol Kavenan 84:20, mo askem ol pikinini blong stanap taem oli harem toktok ia “ol odinens.” Blong helpem olgeta blong andastanem wanem i wan odinens, soem sam pikja blong o prishud odinens, olsem Gospel Art Buk, pej 103–8, mo askem ol pikinini blong tokbaot gud wanem i stap hapen long wanwan pikja (luk tu long Gaed blong Ol Skripja, “Ol Odinens,” olskripja.ChurchofJesusChrist.org). Eksplenem se Papa long Heven i bin givim long yumi ol odinens blong helpem yumi blong gobak stap wetem Hem.

• Letem ol pikinini oli kalarem aktiviti pej blong olgeta. Taem oli stap mekem olsem, eksplenem ol defren prishud odinens we oli soem long pej ia, mo from wanem yu yu glad from ol odinens ia.

Doktrin mo Ol Kavenan 84:77

Mi mi fren blong Jisas taem mi stap folem Hem.

?Olsem wanem yu save helpem ol pikinini blong oli save se Sevya i lavem yumi i moa bitim wan gud fren blong yumi?

Samfala Aktiviti we Yu Save Mekem

• Soem wan pikja blong Sevya, mo semtaem ridim Doktrin mo Ol Kavenan 84:77. Invaetem ol pikinini blong poen i go long pikja blong Sevya evri taem oli harem toktok ia “ol fren.” Eksplenem se taem yumi traem blong kipim ol komanmen, yumi stap soem long Jisas se yumi lavem Hem. Serem wanem i minim long yu, blong gat Jisas olsem fren blong yu.

• Helpem ol pikinini blong mekem lis blong sam samting we oli save mekem blong soem long ol fren blong olgeta se oli lavem olgeta. ?Wanem nao Jisas i bin mekem blong soem long yumi se Hem i fren blong yumi? ?Wanem nao yumi save mekem blong soem long Sevya se yumi ol fren blong Hem? Sing tugeta wan singsing abaot Jisas, olsem “Jesus Is Our Loving Friend” (Children’s Songbook, 58).

Doktrin mo Ol Kavenan 84:88

Papa long Heven I helpem ol misinari blong Hem.

Aedia ia blong kam wan misinari wan dei, i wan samting blong glad from be, i mekem sam pikinini i fraet tu. Doktrin mo Ol Kavenan 84:88 i save tijim olgeta olsem wanem Papa long Heven i helpem olgeta we Hem i sendem olgeta blong go fored mo prijim gospel blong Hem.

Samfala Aktiviti we Yu Save Mekem

• Helpem ol pikinini blong tingting long ol misinari we oli save. Talem long olgeta se Papa long Heven i bin mekem wan spesel promes long ol misinari. Ridim Doktrin mo Ol Kavenan 84:88, mo helpem ol pikinini blong tingting long sam aksen we i go wetem ol promes insaed long ves ia. Tokbaot wan taem we yu stap givim seves long Lod mo yu bin filim se Hem i stap wetem yu, olsem we oli tokbaot long ves 88.

• Serem stori blong boe ia we i gat fo yia long mesej blong Elda Takashi Wada “Stap Kakae Gud long Ol Toktok blong Kraes,” (Ensign o Liahona, https://www.churchofjesuschrist.org/study/liahona/2019/05/26wada?lang=bis). Helpem wanwan pikinini blong tingting long wan samting we oli save talem blong serem testemoni blong olgeta wetem wan man–olsem blong serem wan toktok blong bilif. Askem wanwan pikinini blong priten blong serem gospel wetem wan fren. Testifae se Papa long Heven i helpem yumi blong save wanem blong talem taem yumi toktok wetem ol narawan abaot gospel.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 84:4–5, 18-28, 30

Ol prishud odinens i helpem mi blong rere blong laef wetem Papa long Heven bakegen.

Taem oli stap kam bigwan, ol pikinini we yu stap tijim, bae oli save tekpat long sam moa prishud odinens we i gat tu, ol baptaes mo ol konfemesen blong olgeta dedman insaed long tempol. ?Olsem wanem nao yu save helpem olgeta blong andastanem ol stamba tingting mo paoa blong ol prishud odinens?

Samfala Aktiviti we Yu Save Mekem

• Raetem Aronik Prishud mo Melkesedek Prishud long bod. Tugeta, ridim Doktrin mo Ol Kavenan 84:18, 26–28, 30, mo helpem ol pikinini blong mekem wan lis blong ol trutok we oli lanem aot long ol ves ia abaot Aronik Prishud. Afta, tugeta, ridim Doktrin mo Ol Kavenan 84:18–25, mo mekem wan lis blong ol trutok abaot Melkesedek Prishud.

• Invaetem ol pikinini blong mekem wan lis blong ol prishud odinens we oli bin tekpat o witnes long hem, olsem kasem baptaes, kasem konfemesen, ol prishud blesing, o sakramen. Askem olgeta blong serem ol eksperiens blong olgeta wetem ol odinens ia. Ridim Doktrin mo Ol Kavenan 84:20 tugeta (helpem olgeta blong oli andastanem ol toktok we oli no save gud). ?From wanem Lod i stap invaetem yumi blong tekpat long ol odinens? ?Olsem wanem prishud i helpem yumi blong gobak long Papa long Heven?

  ol pikinini oli tekem sakramen

  Ol odinens oli helpem yumi blong tingbaot ol promes we yumi mekem long God.

• Krietem wan pasol aot long wan pikja blong wan tempol. Wetem ol pikinini, ridim Doktrin mo Ol Kavenan 84:5, mo askem olgeta blong lisin long wanem nao Lod i bin givim komanmen long Ol Sent blong oli bildim. Givim long wanwan pikinini wan pis blong pasol, mo askem olgeta blong serem wan samting we oli save mekem blong go insaed long tempol.

Doktrin mo Ol Kavenan 84:64–72, 81–88

Lod i protektem mo givim paoa long ol misinari.

Ol ves ia i holem ol promes we Lod i bin mekem long olgeta we Hem i bin singaotem blong prijim gospel. Ol promes ia i save givim insperesen tu long ol pikinini, taem oli stap serem gospel wetem ol narawan.

Samfala Aktiviti we Yu Save Mekem

• Mekem ol pikinini i grup tu tu, mo givim wanwan grup sam ves blong ridim long Doktrin mo Ol Kavenan 84:64–72, 81–88. Invaetem olgeta blong lukaotem ol promes we Lod i givim long olgeta we oli serem gospel. Askem olgeta blong serem wanem we oli lanem wetem klas. Helpem ol pikinini blong tingting long ol man we oli save, o ol man long ol skripja, we oli bin kasem help blong Lod taem oli stap prijim gospel (olsem Man Laman ia, Samuel [luk long Hileman 13:2–4; 16:6–7] o Amon [luk long Alma 17:32–38]). Serem wan eksperiens blong wan taem we yu bin filim sapot blong Lod taem yu stap givim seves long Hem.

• Karem sam kap o sam kontena we i kolosap semmak, i kam long klas. Raetem ol wei we oli save stap olsem ol misinari naoia long ol pis pepa, mo putum wanwan pis pepa long wan kap. Mekem ol kap i grup tugeta long flo mo mekem ples we i open i fes antap. Invaetem ol pikinini blong gat ol janis blong sakem wan smol samting i go insaed long wan long ol kap ia mo afta, aktemaot wanem i stap long pepa long kap ia. ?Olsem wanem Papa long Heven i helpem yumi taem yumi serem gospel wetem ol narawan, nomata taem i had o yumi filim fraet?

• Helpem ol pikinini blong luksave se yumi evriwan i ol memba blong Jos Ia blong Jisas Kraes Ia blong Ol Lata-dei Sent, from misinari wok–ol misinari oli tijim gospel long yumi, long mama mo papa blong yumi, o ol bubu blong yumi. Talem long ol pikinini abaot olsem wanem ol misinari i bin helpem yu o ol bubu blong yu blong akseptem gospel. Letem ol pikinini oli serem ol eksperiens blong olgeta we i kolosap semmak. Leftemap tingting blong olgeta blong askem mama mo papa blong olgeta abaot, olsem wanem ol fas Jos memba long famli blong olgeta i bin lanem abaot gospel.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong mekem wan samting long wik ia blong serem gospel wetem wan man long hom blong olgeta o wetem wan fren. Leftemap tingting blong olgeta askem help blong Papa long Heven mo blong lukluk gud, wanem Hem i mekem blong helpem olgeta.

Stap Kam Antap long Fasin blong Yumi blong Stap Tij

Yusum ol samting we ol defren pat blong bodi oli save mekem. “Plante long ol pikinini (mo ol adalt) oli lanem gud ol samting taem oli yusum ol plante defren samting we bodi blong olgeta i save mekem. Faenem ol wei blong helpem ol pikinini blong olgeta blong oli yusum ol ae, ol sora, mo ol han blong olgeta taem oli stap lanem samting” (Teaching in the Savior’s Way, 25).

Jisas, Hem I fren blong Mi