9–15 Ogis

Doktrin mo Ol Kavenan 88

“Stanemap … Wan Haos blong God”

Doktrin mo Ol Kavenan 88:118 i givim kaonsel ia: “Tijim long wanwan long yufala bakegen, ol toktok blong waes tingting.” ?Wanem “toktok blong waes tingting” nao we i stap long Doktrin mo Ol Kavenan 88 we i go stret moa wetem ol pikinini we yu stap tijim?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Talem long ol pikinini se Papa long Heven mo Jisas Kraes, Tufala i wantem yumi gohed blong lanem samting truaot ol laef blong yumi. Afta, askem olgeta blong serem wan samting we oli stap lanem long hom, long skul, o long Jos.

Stap Tijim Doktrin: Ol Smol Pikinini

Doktrin mo Ol Kavenan 88:63

God i wantem mi blong stap kolosap long Hem.

?Wanem nao yu save mekem blong helpem ol pikinini we yu stap tijim blong oli filim God i stap insaed long laef blong olgeta?

Samfala Aktiviti we Yu Save Mekem

• Taem yu stap rid long Doktrin mo Ol Kavenan 88:63, invaetem ol pikinini blong aktemaot sam long ol toktok ia we oli harem. Eksampol: oli save priten se oli stap lukaotem wan samting o oli noknok long doa.

• Askem wan pikinini blong i holem wan pikja blong Jisas long fored blong rum long sem taem we ol nara pikinini oli stanap long bak blong rum. Invaetem ol pikinini blong tekem wan step i go fored evri taem we yu talem wan samting we yumi save mekem blong kam kolosap moa long Sevya, mo tekem wan step i gobak biaen evri taem we yu talem wan samting we i mekem yumi go longwe long Sevya. Talem testemoni blong yu se, taem yumi traem kam kolosap long Lod, Hem i kam kolosap long yumi.

Doktrin mo Ol Kavenan 88:118

Papa long Heven i wantem mi blong lanem samting.

“Edukesen i wan impoten pat blong plan blong Papa long Heven blong helpem yu blong kam moa olsem Hem. … Edukesen we bambae yu kasem bae i gat bigfala valiu long yu long laef ia, mo long laef we i stap kam” (Blong Ol Yut Oli Kam Strong, 9).

Samfala Aktiviti we Yu Save Mekem

• Soem wan pikja blong wan skul, o droem wan long bod, mo afta, invaetem ol pikinini blong eksplenem wanem hem i wan skul, mo wanem i stap hapen long ples ia. Talem olgeta abaot skul we Josef Smit i bin statem (luk long “Japta 31: Tok blong Waes,” Ol Doktrin mo Kavenan Stori, 119–22). Soem long ol pikinini ol pikja blong wan hom, wan jos, mo wan tempol, mo askem olgeta olsem wanem ol ples ia oli olsem ol skul tu.

• Singsing wan singsing abaot fasin blong stap lanem samting, olsem “Search, Ponder, and Pray” (Children’s Songbook, 109). Askem ol pikinini wanem oli laekem blong stap lanem abaot.

• Ridim Doktrin mo Ol Kavenan 88:118, mo tokbaot bigwan toktok ia “tijim wanwan long olgeta.” Serem sam waes tingting we yu bin lanem aot long wanwan long ol pikinini insaed long klas blong yu, mo invaetem olgeta blong serem waes tingting ia we oli bin lanem.

  

  Yumi mas lukaotem blong gat waes tingting mo stap lanem samting.

Doktrin mo Ol Kavenan 88:119

Tempol hem i haos blong God.

Tingting long wanem wei nao bae yu helpem ol pikinini blong oli lavem tempol mo oli filim blong wantem wosipim Lod long ples ia taem bae oli rere from.

Samfala Aktiviti we Yu Save Mekem

• Soem long ol pikinini olsem wanem blong mekem “spia” taem oli leftemap tufala han mo tajtajem ol en blong fingga. Ridim Doktrin mo Ol Kavenan 88:119, mo askem olgeta blong mekem wan spia evri taem we yu talem toktok ia “haos.” Eksplenem se Papa long Heven i wantem Josef Smit mo Ol Sent blong oli bildim wan tempol, o wan “haos blong God.” Soem wan pikja blong tempol we i stap kolosap taem yu stap tokbaot ol defren samting bitwin wan tempol mo wan mitinghaos blong Jos.

• Serem testemoni blong yu abaot tempol, mo tugeta, singsing long wan singsing abaot tempol, olsem “I Love to See the Temple” (Children’s Songbook, 95). Invaetem ol pikinini blong dro wan pikja blong olgetawan i stap go long tempol.

Stap Tijim Doktrin: Ol Bigfala Pikinini

Doktrin mo Ol Kavenan 88:68, 74

Jisas Kraes i save mekem mi kam klin aot long sin.

Blong kam tabu, i minim blong oli mekem yumi kam klin mo kam klin evriwan. ?Olsem wanem nao yu save helpem ol pikinini we yu stap tijim, blong andastanem se oli save kam tabu taem oli stap folem Jisas Kraes?

Samfala Aktiviti we Yu Save Mekem

• Invaetem wan pikinini blong ridim Ol Doktrin mo Ol Kavenan 88:68 laod, mo wan narawan blong ridim ves 74. Invaetem ol pikinini blong lisin long wan sentens ia we i stap long olgeta trifala ves ia. ?Olsem wanem nao yumi mekem yumi “kam tabu”? (Sapos i nid, helpem ol pikinini blong luk long “Tabu, Fasin blong Mekem I Kam” insaed long Gaed long Ol Skripja.) Droem blong wan hat, wan han, mo wan leg antap long bod. Helpem ol pikinini blong tingting se i minim wanem blong “mekem i kam klin evriwan” mo “klinim” hat, han mo leg blong yumi. ?Olsem wanem nao Sevya i stap helpem yumi blong mekem hemia? ?Olsem wanem yumi save yusum hat, han mo leg blong yumi blong kam moa olsem Jisas?

• Eksplenem se Lod i bin wantem se ol pipol blong Hem oli mas kam tabu bifo oli save go insaed long tempol. Tingting blong invaetem wan yang man o wan yang woman we i gat wan tempol rekomen blong hem i kam blong visitim klas. Invaetem hem blong soem ol pikinini se wan rekomen i luk olsem wanem, mo toktok raon long wanem oli stap mekem blong laef klin inaf long hemia, mo serem from wanem hem i impoten blong gat wan tempol rekomen iven sapos yumi no stap laef kolosap long wan tempol.

Doktrin mo Ol Kavenan 88:77–80, 118

Papa long Heven i wantem mi blong lanem samting.

Yu save helpem ol pikinini blong andastanem se, blong stap lanem abaot ol samting long saed blong spirit mo long saed blong laef long wol ia, i save mekem olgeta oli rere blong givim seves long Lod.

Samfala Aktiviti we Yu Save Mekem

• Antap long bod, raetem Wanem, From Wanem, mo Olsem Wanem. Invaetem ol pikinini blong oli sidaon tutu mo ridim Doktrin mo Ol Kavenan 88:77–79 mo mekem wan lis blong wanem Lod i wantem yumi blong lanem abaot wanem. Afta, askem olgeta blong luklukgud insaed long ves 80 blong faenemaot from wanem Hem i wantem yumi blong stap lan. Afta, oli save lukluk long ves 118 blong faenemaot olsem wanem yumi mas lanem samting. ?Wanem nao yumi lanem aot long ol ves ia abaot olsem wanem nao Lod i stap lukluk long saed blong edukesen mo fasin blong stap lanem samting?

• Hangem wan map blong wol, mo tugeta, ridim Doktrin mo Ol Kavenan 88:79. ?From wanem i impoten blong yumi lanem abaot ol nara kantri mo ol kalja? Sapos yu o ol pikinini we yu stap tijim oli bin visitim, o oli bin stap laef long wan nara kantri, soem ol samting we oli ripresentem kalja, mo serem ol samting we yu bin lanem.

Doktrin mo Ol Kavenan 88:119–26

“Stanemap … Wan Haos blong God.”

Instraksen blong Lod long saed blong “haos blong God”, bae i wan gudfala gaed blong yumi taem yumi stap bildimap laef mo hom blong yumi.

Samfala Aktiviti we Yu Save Mekem

• Invaetem ol pikinini blong jusum seven toktok we i tokbaot hom blong olgeta mo wan nara hom we oli bin visitim. Afta, askem olgeta blong ridim Doktrin mo Ol Kavenan 88:119 mo faenem ol seven toktok we Lod i stap yusum blong tokbaot haos blong Hem. Helpem ol pikinini blong oli tingting long ol wei we oli save helpem ol hom blong olgeta oli “wan haos blong God.”

• Long wanwan pikinini, givim wan sentens we i stap long Doktrin mo Ol Kavenan 88:119–26 blong hem i droem. Taem oli stap soem ol pikja blong olgeta long wanwan long olgeta, letem ol pikinini oli luklukgud insaed long ol ves ia blong traem faenem wanem nao wanwan sentens ia nao wanwan pikja i ripresentem.

• Long bod, raetem: Mekem mo No Mekem. Invaetem ol pikinini blong oli ridim Doktrin mo Ol Kavenan 88:119–26 mo mekem wan lis blong ol samting we Lod i wantem Ol Sent blong mekem o blong no mekem blong mekem rere blong lan insaed long tempol. Oli save lukaotem ol toktok we oli no save gud insaed long wan diksonari. Invaetem ol pikinini blong jusum wan samting we bae oli stat blong mekem, o wan samting we bae oli stop blong mekem.

Stap Leftemap Tingting blong Lanem Samting long Hom

Invaetem ol pikinini blong raetemdaon o droem wan samting we oli bin lanem we bae oli wantem serem wetem ol famli blong olgeta.

Stap Kam Antap long Fasin blong Yumi blong Stap Tij

Helpem ol yang pikinini blong oli tekpat long ol storian abaot gospel. Maet bae yu nidim blong tingting long sam niu wei blong toktok raon long gospel wetem ol yangfala pikinini. Eksampol: maet yu tekem i kam insaed long klas, wan samting we ol pikinini oli save holem taem hem i taem blong olgeta blong toktok.