Mi Luk Pikinini blong Man long Raet Han blong God, i kam long Walter Rane

23–29 Ogis

Doktrin mo Ol Kavenan 93

“Kasem Ful Paoa mo Glori blong Hem”

Wanwan long ol pikinini we yu stap tijim i wan boe o gel blong Papa mo Mama long Heven we oli impoten tumas long Tufala, mo oli bin laef wetem Tufala bifo oli kam long wol ia. Afta we yu stadi long Doktrin mo Ol Kavenan 93, ?wanem insperesen yu filim blong mekem blong helpem olgeta pikinini ia oli groap “wetem laet mo trutok”? (ves 40).

Raetemdaon Ol Filing mo Tingting blong Yu

Invaetem Ol PIkinini blong Serem Wanem Oli Gat

Soem ol pikja blong Sevya (luk long Gospel Art Buk, o ol magasin blong Jos), mo askem ol pikinini blong tokbaot wanem oli save abaot Hem. Ol pikinini we oli bigwan oli save serem wan skripja we i kam long Doktrin mo Ol Kavenan 93 we i helpem olgeta blong lanem wan samting abaot Jisas Kraes.

Tijim Doktrin: Ol Smol Pikinini

Doktrin mo Ol Kavenan 93:2–21

Jisas Kraes I Pikinini blong God.

Hem i impoten se ol pikinini we yu stap tijim oli lanem huia i Jisas Kraes mo from wanem oli mas folem Hem. Ol trutok abaot Jisas Kraes we oli faenem insaed long seksen 93 oli save help.

Yumi kasem laet blong Jisas Kraes taem yumi stap obei ol komanmen blong Hem.

Samfala Aktiviti we Yu Save Mekem

• Jusum samfala trutok we yu bin lanem abaot Sevya insaed long seksen 93 we oli givim insperesen long yu. Long wanwan trutok ia we yu jusum, ridim ves ia long ol pikinini mo talem ples we ves ia i stap long hem, mo givim olgeta wan ki toktok blong lisin long hem taem yu stap rid. Serem wan sot testemoni abaot Sevya, mo letem ol pikinini blong mi blong serem testemoni blong olgeta. Lis ia blong ol trutok oli save givim sam aedia long yu:

  Jisas Kraes i bin mekem ol wok ia blong Papa (ves 5).

  Jisas Kraes i Laet blong Wol (ves 9).

  Jisas Kraes i Krieta blong wol (ves 10).

  Jisas Kraes i bin kasem evri paoa long heven mo long wol (ves 17).

  Jisas Kraes i bin stap wetem God long stat (ves 21).

• Askem ol pikinini blong lisin long wan samting we bae oli lanem abaot Sevya taem yu talem sot, wetem toktok blong yu nomo, sam long ol trutok ia we oli tijim insaed long seksen 93. (Mo tu, yu save yusum “Japta 33: Wan Revelesen Abaot Jisas Kraes” [Ol Doktrin mo Kavenan Stori, 126–27].)

Doktrin mo Ol Kavenan 93:23, 29

Mi bin laef wetem Papa long Heven bifo mi kam long wol ia.

?From wanem hem i impoten blong helpem ol pikinini we yu stap tijim blong oli andastanem se oli bin stap laef wetem Papa long Heven bifo oli bon i kam long wol? ?Olsem wanem nao wan save abaot trutok ia i save blesem yu?

Samfala Aktiviti we Yu Save Mekem

• Wetem ol pikinini, ripitim tugeta ol toktok “Yufala i bin stap tu long stat wetem Papa” (Doktrin mo Ol Kavenan 93:23). Eksplenem se, bifo yumi bon i kam long wol ia, yumi bin stap laef i stap long heven, wetem Papa long Heven. Tugeta singsing long “Mi Pikinini blong God” STSP, pej 58, o “I Lived in Heaven” (Children’s Songbook, 2–3, 4).

• Invaetem ol pikinini blong kalarem aktiviti pej mo droem ol pikja blong olgetawan wetem Papa long Heven mo Jisas Kraes long laef bifo laef long wol ia. Talem testemoni blong yu se God i lavem yumi evriwan mo se yumi evriwan i ol pikinini blong Hem.

Stap Tijim Doktrin: Ol Bigfala Pikinini

Doktrin mo Ol Kavenan 93:2–21

Jisas Kraes I Pikinini blong God.

Moa yumi andastan abaot Jisas Kraes, bae moa bae yumi filim dip moa, mo wetem moa ones fasin se yumi wantem wosipim Hem mo kam long Papa tru long Hem (luk long Doktrin mo Ol Kavenan 93:19).

Samfala Aktiviti we Yu Save Mekem

• Soem wan pikja blong Sevya, mo askem ol pikinini se from wanem hem i impoten blong yumi save abaot Jisas Kraes. Invaetem olgeta blong faenem sam moa ansa long Doktrin mo Ol Kavenan 93:19. Invaetem olgeta blong tingting long wan wei we oli save lanem moa abaot Jisas long wik we i stap kam, mo givim wan janis blong oli serem ol aedia blong olgeta.

• Tingting long wan gudfala niu wei blong leftemap tingting blong rid abaot Sevya long seksen 93. Yu save raetem ol refrens blong ol ves insaed long seksen 93 long ol pis pepa, we oli tijim ol trutok abaot Jisas Kraes (eksampol, luk long ol ves 5, 9–10, 17, 21). Putum ol pis pepa ia insaed long wan kontena, mo askem ol pikinini, wan afta wan, blong kam jusum wan mo ridim skripja i go long klas. ?Wanem nao yu lanem abaot Jisas Kraes aot long ol ves ia?

Doktrin mo Ol Kavenan 93:23, 29, 38

Mi bin laef wetem Papa long Heven bifo mi kam long wol ia.

Sevya i bin talemaot bigwan tri taem insaed long seksen 93 we yumi bin laef wetem God “long stat” (ol ves 23, 29, 38). ?From wanem nao Hem i wantem yumi blong save hemia? ?Olsem wanem nao taem bae oli save trutok ia, bae trutok ia i blesem ol pikinini we yu stap tijim?

Samfala Aktiviti we Yu Save Mekem

• Ridim Doktrin mo Ol Kavenan 93:23, 29, 38 tugeta, mo invaetem ol pikinini blong lukaotem wan trutok abaot olgetawan we oli ripripitim long ol ves ia. Askem ol pikinini blong serem olsem wanem oli fil blong kasem baptaes mo wanem oli save mekem blong stap rere from. Givim wanwan pikinini, wan long olgeta skripja ia, mo helpem olgeta blong faenem wan samting we ol skripja ia oli stap tijim abaot laef we yumi bin stap long hem bifo yumi kam long wol ia: Jeremaea 1:5; Doktrin mo Ol Kavenan 138:53–56; Moses 3:5; Ebraham 3:22–26.

• Tugeta singsing long “Mi Pikinini blong God” STSP, pej 58, o “I Lived in Heaven” (Children’s Songbook, 2–3, 4). ?Wanem trutok nao yumi stap lanem aot long singsing ia abaot stamba tingting blong yumi blong kam long wol ia?

Doktrin mo Ol Kavenan 93:24

Trutok hem i save blong ol samting we oli blong bifo, blong naoia, mo blong fiuja.

Wol ia i gat fulap defren tingting abaot wanem i wan trutok mo olsem wanem blong faenem trutok ia. ?Olsem wanem yu save helpem ol pikinini we yu stap tijim blong oli andastanem se trutok i tru i nomata wanem we ol narawan oli save talem; mo mekem olgeta oli andastanem se Papa long Heven i save evri trutok?

Samfala Aktiviti we Yu Save Mekem

• Raetem toktok ia trutok long bod, mo askem ol pikinini blong raetem mining blong hem long saed blong hem. Tugeta, ridim fas laen long Doktrin mo Ol Kavenan 93:24. Singsing wan hym abaot trutok, olsem “Oh Say, What Is Truth?” (Hymns, no. 272), mo invaetem ol pikinini blong faenem, insaed long hym ia, ol nara wei blong tokbaot trutok.

• Blong helpem ol pikinini blong praktisim ol trutok we oli stap insaed long Doktrin mo Ol Kavenan 93, raetem sam skripja refrens aot long seksen long sam pis pepa. Long sam nara pis pepa, raetem ol trutok we wanwan long ol ves ia oli stap tijim. Invaetem ol pikinini blong wok tugeta blong ridim ol ves mo majem ol trutok ia wetem ol ves we oli stap ridim. ?From wanem nao yumi talem tangkyu blong gat wan save abaot trutok?

Stap Leftemap Tingting blong Lanem Samting long Hom

Invaetem ol pikinini blong raetemdaon o droem wan samting we oli bin lanem long klas mo blong serem wetem famli blong olgeta taem oli kasem hom.

Stap Kam Antap long Fasin blong Yumi blong Stap Tij

Helpem ol pikinini blong luksave huia Spirit. Taem yu stap gat ol eksperiens long saed blong spirit wetem ol pikinini (eksampol, taem yu stap ridim ol skripja wetem olgeta, harem ol testemoni blong olgeta, o singsing tugeta,) helpem olgeta blong luksave paoa blong Tabu Spirit we i stap lidim tingting blong olgeta.