2–8 Ogis

Doktrin mo Ol Kavenan 85–87

“Yufala I Mas Stanap long Ol Tabu Ples”

From se yu gat sot taem nomo wetem ol pikinini, lukaotem blong Spirit i soem rod long yu blong save wanem prinsipol yu mas tokbaot plante aot long ol skripja. Trastem ol kwaet toktok blong Spirit we yu kasem.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem long ol pikinini sam long ol pikja o aktiviti pej we yu bin yusum long ol las lesen, mo invaetem ol pikinini blong serem wanem oli tingbaot abaot ol pikja ia, long klas o long hom.

Stap Tijim Doktrin: Ol Smol Pikinini

Doktrin mo Ol Kavenan 85:6

Spirit i stap toktok wetem wan “kwaet, smol voes.”

Elda Richard G. Scott i talem: “Sapos, long rilesensip blong yu wetem ol studen blong yu, yu no mekem eni samting moa bitim blong helpem olgeta blong luksave mo folem ol kwaet toktok blong Spirit, nao bae yu blesem laef blong olgeta long wan wei we i bigwan we oli no save makem, mo tu, blong taem we i no save finis” (“To Learn and to Teach More Effectively” [Brigham Young University Education Week devotional, Aug. 21, 2007], 5, speeches.byu.edu).

Samfala Aktiviti we Yu Save Mekem

• Ridim long ol pikinini olsem wanem Josef Smit i stap tokbaot Spirit: “Yufala i mas givim taem blong yufala blong stap stadi long ol skripja” (Doktrin mo Ol Kavenan 85:6). Askem ol pikinini blong talem nem blong sam samting we oli smol (soem ol pikja sapos oli nidim help). Invaetem olgeta blong oli benbenem olgeta long graon blong oli mekem olgeta i smol we i smol. Helpem olgeta blong tingting se, wan voes i smol olsem wanem, mo letem olgeta oli praktis blong lisin mo toktok long wan voes we i kwaet mo smol. Talem long ol olgeta abaot wan taem we Spirit i bin toktok long yu long wan kwaet, smol voes.

• Singsing tugeta wan singsing abaot Spirit, olsem “The Holy Ghost” (Children’s Songbook, 105). Invaetem olgeta blong singsing wan singsing ia wetem yu, long wispa. ?Wanem nao singsing ia i stap tijim yumi long saed blong Tabu Spirit? Helpem ol pikinini blong oli luksave se, maet oli bin filim Hem i lidim tingting blong olgeta (olsem taem we oli bin stap prea, singsing ol hym, o stap helpem ol narafala man).

Doktrin mo Ol Kavenan 86:11

Mi save kam wan laet long ol narafala man.

Seksen 86 i tokbaot gud impoten wok we Lod i wantem ol wokman blong Hem blong mekem long ol las dei. Wan wei we ol pikinini oli save helpem wok ia, i blong stap olsem wan laet long ol pipol raon long olgeta.

Samfala Aktiviti we Yu Save Mekem

• Ridim long ol pikinini, sentens ia we i stap long Doktrin mo Ol Kavenan 86:11: “yufala i gat blesing sapos yufala i gohed blong kasem gud fasin blong mi, olsem wan laet long Ol Jentael, [o ol pipol we oli no gat gospel].” ?Olsem wanem laet ia i blesem yumi? ?Hem i olsem wanem taem yumi no gat laet? ?Olsem wanem yumi save stap olsem wan laet long ol nara pipol we oli no save abaot gospel? Helpem ol pikinini blong tingting long ol wei we yumi save serem gud fasin blong Jisas wetem ol nara man.

• Askem ol pikinini blong traem tingting long maen blong olgeta se wan fren i stap traem blong wokbaot long tudak (ofem ol laet sapos i help). ?From wanem i had blong wokbaot long tudak? ?Wanem nao yumi save mekem blong helpem fren blong yumi? Eksplenem se taem yumi folem Sevya, i olsem we yumi stap onem wan laet we i save helpem ol narawan blong soem rod blong folem.

• Insaed long ol magasin ia, Liahona mo Fren i gat ol stori abaot ol pikinini we oli ol gudfala eksampol. Lukaotem wan blong serem wetem ol pikinini; stori ia bae i givim insperesen long olgeta blong stap olsem ol gudfala eksampol tu.

Doktrin mo Ol Kavenan 87

Ol hom blong yumi oli save stap ol “tabu ples.”

I no gat wan hom we i stret evriwan, be i gat ol samting we yumi evriwan i save mekem blong mekem se ol hom blong yumi oli stap ol tabu ples blong pis.

Samfala Aktiviti we Yu Save Mekem

• Eksplenem long ol pikinini se Josef Smit i bin wari abaot ol samting we oli bin stap hapen insaed long wol. Talem aot heding blong seksen 87, o ridim “Japta 30: Wan Revelesen abaot Wo” (Ol Doktrin mo Kavenan Stori, 117–18; luk tu long vidio long ChurchofJesusChrist.org). Askem ol pikinini blong lisin long ol samting we maet i mekem Josef i wari long hem. Blong tijim wanem Lod i talem se yumi mas mekem abaot ol problem ia, ridim Doktrin mo Ol Kavenan 87:8.

• Soem wan pikja blong tempol mo serem from wanem tempol i wan tabu ples. Soem wan pikja blong wan hom, mo helpem ol pikinini blong tingting abaot ol wei we oli save mekem hom blong olgeta i tabu semmak olsem tempol (luk long aktiviti pej blong wik ia). ?From wanem nao yumi wantem stap long ol tabu ples?

Stap Tijim Doktrin: Ol Bigfala Pikinini

Doktrin mo Ol Kavenan 85:6

Spirit i stap toktok wetem wan “kwaet, smol voes.”

Wol ia i gat fulap samting insaed long hem we i mekem i had blong harem Spirit. ?Olsem wanem nao yu save helpem ol pikinini blong lisin long voes blong Spirit?

Samfala Aktiviti we Yu Save Mekem

• Askem ol pikinini wanem nao bae oli talem sapos wan i askem olgeta olsem wanem nao oli save taem Tabu Spirit i stap toktok long olgeta. Invaetem olgeta blong ridim wan wei we Josef Smit i tokbaot voes blong Spirit, insaed long Doktrin mo Ol Kavenan 85:6.

• Plei wan hym o wan singsing blong pikinini long kwaet fasin, mo askem wan long ol pikinini blong traem faenem se hemia i wanem singsing, be long semtaem, ol nara pikinini oli mekem ol noes we i pulumaot tingting blong hem, olsem blong klapem han o wokbaot strong long leg. Afta, askem ol nara pikinini blong oli stop, mo toktok raon long wei we hemia i olsem blong harem Tabu Spirit taem we yumi karemaot ol samting we oli stap spolem yumi long laef blong yumi. Helpem ol pikinini blong tingbaot ol samting we i pulum tingting blong olgeta, we oli save karemaot long laef blong olgeta blong save filim Spirit plante moa.

Doktrin mo Ol Kavenan 86

Mi save help blong pulum ol pipol blong God oli kam tugeta.

Parabol ia blong gudfala sid mo ol rabis gras, hem i abaot “ol las dei, iven naoia” (Doktrin mo Ol Kavenan 86:4). Yusum parabol ia blong helpem ol pikinini blong filim insperesen blong tekpat long “putum tugeta ol gudfala sid” (ves 7).

Samfala Aktiviti we Yu Save Mekem

• Talem parabol blong gudfala sid mo ol rabis gras long ol pikinini, o invaetem wan pikinini blong talem (luk long Matiu 13:24–30). Invaetem ol pikinini blong dro wan pikja blong wan samting aot long parabol ia. Afta, ridim tugeta Doktrin mo Ol Kavenan 86: 1–7, mo invaetem ol pikinini blong raetem long ol droing blong olgeta, wanem nao samting we oli droem i ripresentem.

• Rere long sam smol pikja o droing blong gudfala sid, mo haedem olgeta olbaot long rum. Invaetem wanwan pikinini blong help blong karem ol gudfala sid ia i kam tugeta mo, raetem nem blong wan man we oli save “karem tugeta” i kam long Jisas Kraes long hem. ?Wanem nao i minim blong karem tugeta ol pipol i kam long Jisas Kraes? ?Wanem sam wei we yumi save mekem hemia? ?Wanem i minim blong “gohed blong kasem gud fasin [blong Sevya],” mo olsem wanem hemia i help blong karem tugeta ol pipol i kam long Hem? (Doktrin mo Ol Kavenan 86:11).

Doktrin mo Ol Kavenan 87

Mi save “stanap … long ol tabu ples.”

Ol pikinini we yu tijim bae oli fesem fulap denja long saed blong spirit mo long saed blong bodi truaot long laef blong olgeta. Yu save helpem olgeta blong rere blong fesem ol denja taem yu stap tijim olgeta blong faenem mo stanap long ol tabu ples.

Givim seves insaed long tempol, i wan wei we yumi save help blong karem tugeta ol pipol blong God.

Samfala Aktiviti we Yu Save Mekem

• Ridim Doktrin mo Ol Kavenan 87:6 tugeta blong lanem abaot ol samting we Lod i talem bae i hapen long ol las dei. Askem ol pikinini blong tokbaot ol jalenj blong olgeta we ol pikinini we oli gat semmak yia olsem olgeta, i stap fesem. Invaetem olgeta blong faenem wanem Lod i bin talem we bae yumi mas mekem long ol had taem, long ves 8. Talem long ol pikinini abaot ol tabu ples long laef blong yu.

• Helpem ol pikinini blong mekem wan lis blong ol tabu ples, ol tabu tingting, mo ol tabu aksen we i save helpem olgeta blong fesem denja long saed blong spirit (blong gat sam aedia, luk ol vidio “Standing in Holy Places” mo “Stand Ye in Holy Places—Bloom Where You’re Planted,” ChurchofJesusChrist.org). Invaetem olgeta blong kipim lis blong olgeta blong stap luklukbak long hem taem i nid.

Stap Leftemap Tingting blong Lanem Samting long Hom

Invaetem ol pikinini blong jusum wan samting we bae oli mekem, blong mekem hom o laef blong olgeta i wan “tabu ples.”

Stap Kam Antap long Fasin blong Yumi blong Stap Tij

Yusum tingting blong yu blong mekem samting i moa intresting. No stopem yuwan long ol ol aedia blong aktiviti we oli talem long aotlaen ia. Mekem ol aedia i pusum tingting blong yu blong mekem samting i moa intresting. Tingbaot wanem ol pikinini long klas blong yu bae i laekem mo wanem bae i helpem olgeta blong lan.