“16–22 Ogis.

Doktrin mo Ol Kavenan 89–92

“Wan Prinsipol Wetem Wan Promes”

Taem yu stap stadi ol trutok we oli stap long Doktrin mo Ol Kavenan 89–92, tingting hevi long ol wei we yu save helpem ol pikinini blong andastanem gud ol trutok ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong droem mo tokbaot ol gudfala samting we oli bin mekem long wik ia blong save kea long bodi mo spirit blong olgeta.

Stap Tijim Doktrin: Ol Smol Pikinini

Doktrin mo Ol Kavenan 89

Bae mi kasem blesing taem mi stap obei long Tok blong Waes.

Tijim ol pikinini se ol bodi blong yumi oli ol presen we oli kam long Papa long Heven mo Hem i wantem yumi blong tekem gud kea long olgeta.

Bodi blong yumi i wan presen we i kam long God.

Samfala Aktiviti we Yu Save Mekem

• Blong helpem ol pikinini blong andastanem ol komanmen blong Lod long Doktrin mo Ol Kavenan 89: 10–17, droem o soem ol pikja blong ol gud samting we yumi save kakae, o ol gud samting we yumi save mekem blong kipim bodi blong yumi i helti (luk tu long aktiviti pej blong wik ia). Mo tu, helpem ol pikinini blong andastanem se alkol, tabak, ti, kofi, mo ol narafala meresin we i nogud, i stap mekem sore long bodi blong yumi mo Lod i bin wonem yumi blong no yusum. Invaetem ol pikinini blong jusum wan samting we oli save mekem long wik ia blong kipim bodi blong olgeta i helti.

• Invaetem ol pikinini blong gat janis blong soem wan pikja long bod we i ripresentem wan samting we oli bin tijim long Tok blong Waes. Letem ol nara pikinini oli traem blong traem talem wanem i droing blong wanwan pikinini. Tokbaot ol komanmen blong Lod long seksen 89 we i go droing ia?

• Yusum eksampol ia, o sam narawan we yu save tingting long hem, blong soem olsem wanem yumi kasem blesing taem yumi stap obei long Tok blong Waes (luk long Doktrin mo Ol Kavenan 89:18–21). Mekem wan simpol eksasaes tugeta, olsem go wokbaot o ronron long wan semmak ples, afta priten blong yu “taet” o “ae i dak” (ves 20). Testifae long ol promes blong Lod.

• Soem wan pikja blong wan tempol, mo askem ol pikinini blong tokbaot gud wanem oli luk. Yusum wan singsing abaot helt long saed blong bodi, olsem “The Lord Gave Me a Temple” (Children’s Songbook, 153), blong tijim ol pikinini se bodi blong yumi i olsem ol tempol blong spirit blong yumi, mo God i wantem yumi blong kipim bodi blong yumi i helti. Helpem ol pikinini blong tingting long ol wei we yumi save lukaot long bodi blong yumi, mo letem ol pikinini i aktemaot.

Doktrin mo Ol Kavenan 90:5

God i stap givim ol profet blong soem rod long yumi mo protektem yumi.

Helpem ol pikinini blong andastanem olsem wanem ol profet blong Lod oli save helpem yumi blong faenem sefti taem i gat ol strong win blong laef.

Samfala Aktiviti we Yu Save Mekem

• Soem long ol pikinini sam pikja blong ol profet blong bifo, mo talem long olgeta olsem wanem ol profet ia oli bin givim woning long ol pipol long taem blong olgeta. (Blong kasem sam aedia, luk long “Follow the Prophet,” Children’s Songbook, 110–11.)

• ?From wanem nao yumi mas lisin long ol profet blong God? Soem wan pikja blong profet we i stap laef, mo serem sam samting we Hem i bin tijim o bin wonem yumi long hem i no longtaem i pas. Helpem ol pikinini blong tingbaot sam wei we yumi save folem profet. Serem testemoni blong yu abaot ol trutok we oli tijim insaed long Doktrin mo Ol Kavenan 90:5. (Tekem not se “ol revelesen” oli ol revelesen, o ol profet we oli kasem ol revelesen ia.)

Stap Tijim Doktrin: Ol Bigfala Pikinini

Doktrin mo Ol Kavenan 89

Tok blong Waes i helpem mi blong stap helti long bodi mo spirit.

Elda Gary E. Stevenson i bin givim kaonsel long ol yangfala pipol blong plan long fored from wanem bae oli mekem taem oli fesem temtesen blong alkol o drag. Afta, hem i bin tijim, “Bae yu faenem se temtesen i gat smol kontrol nomo moa ova long yu. Hemia from we yu mekem finis wan desisen long wei we bae yu fesem mo wanem bae yu mekem. Bae yu no nid blong disaed evri taem yu fesem temtesen” (“Prishud Pleibuk,” Ensign o Liahona, Mei 2019, 47). Leftemap tingting blong ol pikinini we yu stap tijim blong disaed naoia—se blong ful laef blong olgeta—bae oli laef folem Tok blong Waes.

Samfala Aktiviti we Yu Save Mekem

• Seraotem ol pikinini long tu grup, mo askem wan grup blong ridim Doktrin mo Ol Kavenan 89:1–4 mo nara grup blong ridim ol ves 18–21. Askem olgeta blong tingting hevi long ol kwestin olsem: ?From wanem Lod i givim Tok blong Waes long yumi? ?Blong stap laef folem Tok blong Waes bae i blesem mi long saed blong bodi mo spirit olsem wanem?

• Mekem sam sentens we bae i gat ol emti spes blong fulumap, mo yusum ol sentens aot long Doktrin mo Ol Kavenan 89, olsem “ Lod i putum blong man i yusum mo blong animol i yusum” o “Mo bambae mo ae i no save dak” (ol ves 14, 20). Invaetem ol pikinini blong wok tutu blong faenem ol ansa long seksen 89. Ol pikinini oli save seraotem ol sentens ia i go long ol grup ia: ol gudfala samting blong bodi blong yumi, ol rabis samting blong bodi blong yumi, mo ol blesing.

• Invaetem wan pikinini blong ridim Doktrin mo Ol Kavenan 89:4 mo wan narawan blong ridim toktok we i kam long Elda Stevenson antap. ?From wanem yumi mas disaed naoia blong obei long Tok blong Waes, bitim blong stap wet kasem taem ia blong temtesen? Helpem ol pikinini blong mekem wan rol plei long olsem wanem, maet, bae oli ansa long wan man, iven wan fren, taem oli givim wan samting we i agensem Tok blong Waes long olgeta. ?Olsem wanem nao Tok blong Waes i protektem yumi?

Doktrin mo Ol Kavenan 90:2, 5, 14-16

Fas Presidensi i holem “ol ki blong kingdom.”

Instraksen blong Lod abaot Fas Presidensi long 1833 (Josef Smit, Sidni Rigdon, mo Frederik G. Williams) i save helpem testemoni blong ol pikinini abaot Fas Presidensi blong tedei, i kam moa strong.

Samfala Aktiviti we Yu Save Mekem

• Invaetem ol pikinini blong lukaot long Doktrin mo Ol Kavenan 90: 14–16 mo raetemdaon sam samting we Lod i bin askem Fas Presidensi blong mekem. Soem wan pikja blong Fas Presidensi tedei long ol pikinini, mo serem wan samting abaot olgeta. (Yu save ridim laef stori blong olgeta insaed long “Living Prophets and Church Leaders” long ChurchofJesusChrist.org.) Serem testemoni blong yu abaot ol tabu koling blong olgeta mo ol blesing we yu bin kasem taem yu stap folem kaonsel blong olgeta.

• Luklukbak long wan samting we wan memba blong Fas Presidensi i bin tijim, wetem ol pikinini. Afta, ridim tugeta Doktrin mo Ol Kavenan 90:5. Talemaot se “ol revelesen” oli ol revelesen, o ol profet we oli kasem ol revelesen ia. ?Hem i minim wanem blong “kasem ol revelesen we oli kam long God … [mo] tekem i wan smol samting”? ?Olsem wanem nao yumi soem se ol profet mo ol samting we oli tijim oli impoten long yumi?

Doktrin mo Ol Kavenan 91

Spirit i save helpem mi blong save wanem i tru.

Taem yu stap ridim wanem Lod i bin talem long Josef Smit abaot Apokrifa, tingbaot olsem wanem kaonsel ia i save helpem ol pikinini blong luksave raet mo rong bitwin trutok mo mistek, we bae oli fesem truaot long laef blong olgeta.

Samfala Aktiviti we Yu Save Mekem

• Tugeta, ridim seksen heding blong Doktrin mo Ol Kavenan 91 blong helpem ol pikinini blong andastanem wanem hem i Apokrifa (luk tu long Gaed blong Ol Skripja, “Apokrifa,” olskripja.ChurchofJesusChrist.org). Helpem ol pikinini blong tingting long ol nara ples, olsem long media, we maet, bae oli faenem “tedei, yumi fesem ol mesej we, insaed, i gat “plante samting … we oli tru” mo “plante samting … we oli no tru” (ol ves 1–2). Afta, invaetem ol pikinini blong lukaot long seksen 91 blong lanem wanem Lod i bin talem blong yumi save mekem blong luksave raet mo rong bitwin trutok mo mistek.

• Tugeta, ridim Doktrin mo Ol Kavenan 91:4–6, mo askem ol pikinini, wanem nao ol ves i tijim abaot Tabu Spirit. Invaetem ol pikinini blong serem wan eksperiens blong olgetawan taem “Spirit [i bin soem] trutok” long olgeta. Mo tu, serem ol eksperiens blong yuwan. ?Long wanem nara wei nao Spirit i bin save helpem yumi?

Stap Leftemap Tingting blong Lanem Samting long Hom

Invaetem ol pikinini blong serem wetem famli blong olgeta wanem we oli bin lanem tedei abaot fasin blong kea long bodi mo spirit blong olgeta, o abaot gol blong olgeta blong stap obei long Tok blong Waes.

Stap Kam Antap long Fasin blong Yumi blong Stap Tij

Lukaotem insperesen blong yuwan. Ol aotlaen ia oli no ol instraksen we yu mas folem taem yu stap tij. Be, oli stap blong oli givim insperesen long yu taem yu stap tingting hevi long ol nid blong ol pikinini we yu stap tijim. (Luk long Teaching in the Savior’s Way,7