Ketlan Tempol

Ketlan Tempol, i kam long Al Rounds

30 Ogis–5 Septemba

Doktrin mo Ol Kavenan 94–97

“Blong Mi Sevem Saeon”

Lukaotem insperesen blong save wanem prinsipol aot long ol seksen 94–97 blong tokbaot bigwan taem bae yu stap tij. Yu save stretem ol aktiviti aedia we oli blong ol smol pikinini taem yu stap tijim ol bigfala pikinini, mo semmak long nara wei.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Soem pikja blong wan tempol long ol pikinini, mo invaetem olgeta blong serem wanem we oli save abaot ol tempol. Oli save tokbaot tu olsem wanem oli filim taem oli luk wan tempol.

tijing pikja bokis

Tijim Doktrin: Ol Smol Pikinini

Doktrin mo Ol Kavenan 95:8; 97:15–16

Tempol hem i haos blong Lod.

Iven ol pikinini long Ketlan oli help, long ol smol wei we i gat mining, blong bildim Ketlan Tempol. Helpem ol pikinini we yu stap tijim blong oli lavem strong moa blong go long tabu haos blong Lod.

Samfala Aktiviti we Yu Save Mekem

• Soem wan pikja blong Ketlan Tempol (luk long aotlaen blong wik ia we i stap long Kam Folem Mi—Blong Wanwan Man, Woman mo Famli). Yusum ol sentens we oli kam long Doktrin mo Ol Kavenan 95:8 blong tijim ol pikinini abaot komanmen blong Lod blong bildim tempol ia. Letem ol pikinini oli kam, wan afta wan, blong holem pikja ia mo talem “Tempol hem i haos blong Lod.”

  Ketlan Tempol

  Ol Sent oli bildim wan tempol blong oli filim se oli stap kolosap moa long God.

• Talem long ol pikinini se long evri tempol, oli raetem “Tabu Fasin long Lod. Haos blong Lod.” Sapos hem i posibol, soem olgeta wan pikja blong ol toktok ia we oli stap long wol blong wan tempol. ?From wanem nao tempol i wan spesel ples? Ridim ol sentens we oli stap long Doktrin mo Ol Kavenan 97:15–16 we oli stap tij abaot tempol we hem i haos blong Lod, mo serem ol filing blong yu abaot tempol.

• Invaetem ol pikinini blong priten se oli stap help blong bildim wan tempol (katem wud, hamarem nil, pentem ol wol, mo sam moa). Eksplenem se hamas tempol hem i impoten long Lod, hamas Ol Sent oli bin wokhad blong bildim Ketlan Tempol, mo hamas sakrifaes oli bin mekem from hemia (luk long Saints 1:210).

• Singsing tugeta long wan singsing blong helpem ol pikinini blong filim respek long haos blong Lod, olsem “I Love to See the Temple” (Children’s Songbook, 95). Letem ol pikinini oli serem ol filing blong olgeta abaot tempol.

Doktrin mo Ol Kavenan 97:8

Mi save stap ones.

Insaed long Doktrin mo Ol Kavenan 97:8, Lod i putum se, fasin blong stap ones, i wan fasin blong olgeta we Hem i “akseptem olgeta.”

Samfala Aktiviti we Yu Save Mekem

• Eksplenem long ol pikinini we God i bin tijim se, taem yumi ones, Hem i akseptem yumi (luk long Doktrin mo Ol Kavenan 97:8). Serem wetem olgeta samfala stori we i helpem olgeta blong andastanem se i minim wanem blong stap ones. Ol stori ia, oli save kamaot long laef blong yuwan, aot long laef blong wan we yu save hem, o i kamaot long Fren o Liahona. Helpem ol pikinini blong oli talembak ol stori ia long yu, o blong oli serem sam eksperiens abaot fasin blong stap ones, we i kamaot long laef blong olgeta.

• Helpem ol pikinini blong oli lanem ol fas sentens insaed long nambatetin toktok blong bilif: “Mifala i bilif blong mas stap ones.” Helpem ol pikinini blong aktemaot ol eksampol blong fasin blong stap ones mo blong no stap ones. Eksampol: ol pikinini oli save aktem we wan i tekem wan samting long brata o sista blong hem, mo i talem long papa mo mama se hem i no tekem. Afta long hemia, helpem ol pikinini oli aktem semfala stori, be naoia, bae oli talem trutok long papa mo mama blong olgeta. Eksplenem se, hemia nao fasin blong stap ones.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 95:1–3, 8, 11–17; 97:10–17

Tempol hem i haos blong Lod.

Tingting hevi long wei we yu save yusum ol ves ia blong helpem ol pikinini oli andastanem hamas nao tempol hem i impoten long Lod—so hamas nao bae i mas impoten long yumi evriwan?

Samfala Aktiviti we Yu Save Mekem

• Invaetem ol pikinini blong tokbaot sam taem we oli sapos blong mekem wan samting we oli no mekem kwiktaem. Helpem wan pikinini blong ridim Doktrin mo Ol Kavenan 95:3, 8, mo askem ol pikinini wanem komanmen nao Lod i bin talem se Ol Sent oli no bin mekem. Ridim tugeta ves 11. ?Wanem nao Ol Sent oli nidim blong mekem blong save bildim tempol? ?Wanem nao yumi save lanem aot long promes se Lod i mekem long olgeta?

• Long sam kad, raetemdaon ol prinsipol abaot tempol we oli stap long Doktrin mo Ol Kavenan 95 mo 97, wetem ol skripja refrens we oli go wetem, mo putum ol kad i go insaed long wan basket. Eksampol: Blong stap bildim ol tempol, i nid blong mekem sakrifaes (Doktrin mo Ol Kavenan 97:11–12) mo Yumi mas klin inaf blong go insaed long tempol (Doktrin mo Ol Kavenan 97:15–17). Mekem ol pikinini oli sidaon tutu. Mekem tu pikinini we tufala i sidaon tugeta oli putum wan kad long basket, mo afta, wok tugeta blong ridim ol skripja long kad mo tokbaot wanem prinsipol ia i minim long tufala. Helpem ol pikinini blong andastanem wanem oli stap ridim, sapos i nid.

• Invaetem wan yang man o woman blong wod blong yu o blong branj blong yu we i bin go long tempol finis, blong hem i serem eksperiens blong hem, mo talem long ol pikinini wanem oli save mekem blong rere blong go long tempol.

• Yusum atikol ia “Rod blong Yu I Go long Tempol” (insaed long Ol Tempol blong Jos Ia blong Jisas Kraes Ia blong Ol Lata-dei Sent [spesel namba blong Ensign o Liahona, Okt 2010], 72–75) blong helpem ol pikinini blong oli andastanem wanem i stap hapen insaed long ol tempol mo olsem wanem oli save rere. Tingting blong givim wan seksen blong atikol ia long wanwan pikinini blong oli ridim mo blong oli serem wanem we oli lanem.

• Serem vidio ia: “Two Apostles Lead a Virtual Tour of the Rome Italy Temple” (ChurchofJesusChrist.org), mo invaetem ol pikinini blong serem hao oli filim long tingting ia se bae oli go long tempol wan dei.

• Singsing wan singsing abaot tempol, olsem “I Love to See the Temple” (Children’s Songbook,95). ?Wanem sentens insaed long singsing ia i stap tijim yumi from wanem tempol i tabu?

Doktrin mo Ol Kavenan 97:1–2, 8–9, 21

Saeon i olgeta “we hat blong olgeta i klin evriwan”.

Helpem ol pikinini blong oli andastanem se Saeon i no jes wan ples; hem i olgeta tu “we hat blong olgeta i klin evriwan” (Doktrin mo Ol Kavenan 97:21).

Samfala Aktiviti we Yu Save Mekem

• Invaetem ol pikinini blong ridim Doktrin mo Ol Kavenan 97:21, mo askem olgeta se toktok ia, “klin evriwan,” i minim wanem. Blong soem long olgeta, soem wan glas wetem klin wota insaed long hem; mo toktok raon long from wanem nao hem i impoten blong gat klin wota. Ademap wan samting long wota we i mekem se bae wota i no klin (olsem graon o pepa blong kuk). Invaetem ol pikinini blong ridim Doktrin mo Ol Kavenan 97:21 bakegen, mo putum fingga blong olgeta long toktok ia, “klin evriwan.” ?I minim wanem blong hat blong yumi i klin evriwan? Helpem ol pikinini blong oli andastanem se blong hat blong yumi i klin evriwan, i no minim se bae yumi neva mekem mistek. ?Wanem nao yumi save mekem blong mekem hat blong yumi i moa klin? ?Olsem wanem nao Sevya i stap helpem yumi blong mekem hemia?

• Helpem ol pikinini blong oli luklukgud insaed long Doktrin mo Ol Kavenan 97:1–2, 8–9, 21, blong lukaotem ol toktok o ol sentens we oli tokbaot olsem wanem blong kam klin insaed long hat blong yumi. Askem olgeta blong jusum wan toktok o wan sentens, blong raetemdaon long wan pis pepa, mo blong putum insaed long wan kontena. Pulum wan pis pepa long wan taem, mo askem ol pikinini blong givim tingting blong wanem oli save mekem blong yusum aedia ia insaed long laef blong olgeta. Eksampol: ?Wanem nao yumi save mekem blong “faenem trutok” (ves 1) o blong stap “ones” moa (ves 8)?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong yusum aktiviti pej blong wik ia blong serem wetem ol famli blong olgeta wanem we oli bin lanem abaot tempol.

Stap Kam Antap long Fasin blong Yumi blong Stap Tij

Leftemap tingting blong ol pikinini blong oli askem kwestin. “ Traehad blong luk ol kwestin blong ol pikinini olsem ol janis, be i no olsem wan samting we i kam spolem yumi, mo i blokem lesen blong yu. Ol kaen kwestin olsem, oli givim ol bigfala niu tingting long wanem ol pikinini oli stap tingting long hem, long wanem wari oli gat yet, mo olsem wanem blong fesem ol samting we oli stap lanem. Helpem olgeta blong luk se ansa long ol kwestin blong olgeta, oli save fanem insaed long ol skripja mo ol toktok blong ol profet we oli stap laef (luk long (Teaching in the Savior’s Way, 25–26).

aktiviti pej: tempol hem i haos blong Lod