Rod blong Yu I Go long Tempol
Blong Ol Pikinini
Yu yu save wij tempol nao i stap kolosap long yu? Droem wan pikja blong tempol ia, mo hangem long wan ples we bae yu save luk evri dei.
Tempol i haos blong Lod. Hem i wan ples we yumi lanem samting abaot Papa long Heven, yumi mekem ol kavenan (o promes) wetem Hem, mo kasem ol bigfala blesing. Insaed long tempol, yumi mekem ol impoten wok blong yumiwan mo blong ol memba blong famle blong yumi we oli bin ded finis. Wok ia we oli mekem insaed long tempol, i gat baptaes blong olgeta dedman, ol endaomen, mo ol siling. Hemia oli singoatem ol tempol odinens.
Wanem I Hapen Insaed long Tempol
Ol Baptaes blong Olgeta Dedman
Taem yu gat eit yia, yu save baptaes mo kasem konfemesen olsem wan memba blong Jos blong Jisas Kraes blong Ol Lata-dei Sent. Plante long ol bubu blong yu oli bin ded be oli no bin baptaes mo kasem konfemesen. Nomata we bodi blong olgeta i ded, spirit blong olgeta i laef yet long spirit wol, mo long ples ia oli save lanem gospel blong Jisas Kraes.
Taem yu kasem 12 yia, yu save go long tempol mo helpem olgeta pipol ia taem yu nao yu mekem baptaes mo kasem konfemesen long nem blong olgeta. Olgeta, oli save jusum o no jusum blong akseptem baptaes mo konfemesen. Bae yu dresap long ful waet klos taem yu mekem baptaes blong olgeta dedman, semmak olsem we yu mekem taem yuwan yu baptaes.
Askem papa mo mama blong yu blong helpem yu blong mekem wan lis blong ol memba blong famle we oli bin ded mo oli no kasem baptaes insaed long Jos blong Jisas Kraes blong Ol Lata-dei Sent. Faenemaot sapos i gat wan we i bin go long tempol blong mekem baptaes long bihaf blong olgeta.
Endaomen
Wan long ol bigfala blesing blong tempol, hem i endaomen. Endaomen i minim “presen.” Taem yu kasem endaomen blong yu, bae yu lanem moa abaot plan blong fasin blong sevem man mo bae yu mekem ol kavenan. Ol kavenan oli ol promes we yumi mekem wetem Papa long Heven. Taem yu stap kipim ol kavenan ia, yu rere blong laef wetem Papa long Heven mo Jisas Kraes wan dei.
Insaed long tempol, i gat wan naes ples, we i gat pis, we oli singaotem selestial rum. Insaed long selestial rum, yumi filim kolosap long Papa long Heven mo Jisas Kraes, mo yumi filim wan smol pat blong ples ia we bae yumi stap long hem wetem Tufala insaed long selestial kingdom.
Ol Siling blong Taem Naoia mo Taem we I No Save Finis
Taem wan man mo wan woman, tufala i mared insaed long tempol, tufala i nildaon long wan olta mo tufala i sil blong taem naoia mo taem we i no save finis. Hemia i minim se tufala wetem ol pikinini blong tufala, oli save joen tugeta olsem wan famle we i no save finis. Mekem plan blong mared long tempol wan dei. Hemia i blesing we i moa bigwan we tempol i stap givim.
Tempol Rekomen
Tempol i wan tabu ples. Ol bisop mo ol branj presiden oli mekemsua se olgeta we oli go insaed long tempol oli rere mo oli klin inaf. Bifo yu go long tempol, bae yu gat wan spesel intaviu wetem bisop o branj presiden blong yu. Bae hem i askem sapos yu gat wan testemoni abaot Jos, sapos yu stap kipim ol komanmen, sapotem ol lida blong Jos, obei long Tok blong Waes, pem taeting, mo yu stap ones wetem evri samting we yu stap mekem mo talem. Bae hem i helpem yu blong save wanem blong mekem blong stap klin inaf blong go insaed long tempol.
Rere Naoia blong Go Insaed long Tempol
Papa long Heven i givim plante blesing long olgeta we oli laef stret mo gud mo oli stap go long tempol. Hem i impoten blong rere blong go long tempol taem yu yangfala.
Papa long Heven i lavem yu mo i wantem yu blong kasem ol blesing blong tempol. Bae Hem i blesem yu blong mekem ol tempol odinens blong yuwan mo blong ol narawan. Nomata bae yu no save go insaed long tempol naoia, sapos i gat wan tempol we i stap kolosap, yu save visitim ol yad blong tempol mo filim spirit we i stap long ples ia. Mo tu, yu save kipim wan pikja blong tempol insaed long hom blong yu blong mekem yu tingbaot hamas nao tempol i impoten. Laef stret mo gud blong mekem se yu stap klin inaf blong go insaed long haos blong Lod.
Lukluk long mira long pikja ia. Sam siling rum oli gat ol mira olsem hemia. From ol siling insaed long tempol, ol famle blong yumi, semmak olsem pikja we i stap long mira ia, i save gohed blong oltaem.
Lukluk long selestial rum long pikja ia mo pikja we i stap long pej 64. Yu filim olsem wanem taem yu luk wan selestial rum?
Boston Masajusets Tempol. Oli dediketem long 1 Oktoba 2000.
Siling rum, Aba Naejeria Tempol.
Selestial rum, Nukualofa Tonga Tempol.