Ol Kwestin we Oli Stap Askem Oltaem
Wanem nao ol pipol oli mekem insaed long tempol?
Insaed long tempol oli tijim yumi, yumi mekem ol kavenan, mo oli promesem ol blesing long yumi. Yumi kasem ol odinens we bae i save letem yumi blong go stap long ples blong God.
Wan odinens we yumi kasem long tempol hem i endaomen. Toktok ia endaomen i minim “presen” o “blong givim.” Olsem pat blong odinens ia, oli tijim yumi abaot stamba tingting blong laef, misin mo Atonmen blong Jisas Kraes, mo plan we Papa long Heven i gat blong ol pikinini blong Hem. Yumi kasem wan aedia long olsem wanem blong stap laef long ples blong Hem taem yumi filim naesfala filing blong tempol.
Wan nara odinens blong tempol hem i siling odinens, we hasban mo waef, tufala i sil long tufala mo ol pikinini oli sil long papa mo mama blong olgeta insaed long ol famle we oli no save finis. Hemia i minim se sapos yumi stap fetful long ol kavenan blong yumi, ol famle rilesensip blong yumi bae oli gohed blong taem we i no save finis.
Yumi kasem ol odinens ia blong yumiwan mo antap long hemia, yumi save kasem olgeta odinens ia long bihaf blong ol bubu blong yumi we oli bin ded finis. Long wei ia, ol pipol we oli bin ded be oli no bin kasem ol impoten odinens ia, olsem baptaes mo konfemesen, endaomen, mo siling bae oli gat janis blong akseptem ol odinens ia.
Insaed long tempol, i olsem wanem?
Tempol hem i wan kwaet ples, wan tabu ples, we i seperet long ol trabol mo kaen tingting blong wol ia. Evri eria blong tempol i naes mo oli lukaotem gud blong kipim wan spirit blong stap revren. From hem i haos blong Lod, mo from oli stap mekem tabu wok insaed long hem, insaed long tempol, yumi save filim Spirit bigwan mo filim se yumi stap kolosap long Lod. Longwe tu, yumi save kasem revelesen blong yumiwan mo paoa long saed blong spirit blong i helpem yumi blong winim ol tes blong yumi. Hemia i pat blong risen from wanem oli stap leftemap tingting blong yumi blong go long tempol oltaem.
Olsem wanem nao mi mas dresap taem mi go insaed long tempol?
Werem ol gudfala klos we yu stap werem nomo long Sandei taem yu go long tempol. Traem blong no werem ol klos we i naes tumas, semmak olsem taem yu stap go long wan sakramen miting. Yu mas soem fasin blong stap revren mo respek long Lod mo haos blong Hem mo invaetem Spirit taem yu stap klin mo dresap gud.
Insaed long tempol i gat ol praevet rum blong jenis we yu save karemaot Sandei klos blong yu mo werem ol waet klos. Fasin ia blong jenisim klos i mekem yumi tingbaot se yumi stap livim wol ia blong smol taem mo go insaed long wan tabu ples. Waet klos ia i minim klin fasin, mo tru samting ia we yumi evriwan i dresap semmak insaed long tempol i krietem wan tingting blong yuniti mo tingting blong stap ikwol.
Wetaem nao mi save kasem endaomen blong mi?
Plante taem bae yu save kasem endaomen blong yu smol taem bifo yu go long wan fultaem misin o bifo yu mared long tempol. Ol singgel memba we oli yangfala, we oli jes gat twante yia o moa we oli no bin kasem wan misin koling, mo oli no mekem promes yet blong mared long tempol oli no nid blong kasem endaomen blong olgeta yet.
Ol niu memba oli mas wet wan yia afta long baptaes mo konfemesen blong olgeta bifo oli save kasem endaomen blong olgeta.
Blong kasem endaomen blong yuwan hem i wan impoten samting. Toktok raon long hem wetem bisop blong yu. Prea mo tingting hevi blong save wetaem yu rere blong kasem.
Wanem nao mi save talem long ol narafala abaot eksperiens blong mi insaed long tempol?
Yu save tokbaot insaed blong tempol i olsem wanem, mo yu save serem ol filing blong yu taem yu stap insaed long tempol. Be, ol tempol kavenan mo odinens, wetem ol toktok we oli yusum, oli tabu tumas blong oli toktok raon long hem aotsaed long tempol. Taem yumi stap longwe blong stap storian abaot ol tabu samting ia aotsaed long tempol, yumi stap protektem ol samting ia blong ol man i no tok jikim o mekem fani, o no gat respek long ol samting ia. No toktok krangke taem yu stap tokbaot ol eksperiens blong yu we yu bin gat insaed long tempol.
From wanem oli stap yusum ol saen insaed long tempol?
Long taem blong ministri blong Hem long wol ia, oltaem Sevya i tij wetem ol parabol blong oli ripresentem ol trutok we i no save finis. Hem i givim daereksen se yumi mas kasem tijing long sem wei ia insaed long tempol. I gat ol saen wetem mining insaed long ol tempol odinens mo kavenan, long presentesen blong olgeta, long ples blong olgeta, mo long ol klos we oli werem. Taem yu stap tingting hevi long mining blong ol saen ia wetem givhan blong Tabu Spirit, bae i save helpem yu blong luksave trutok, lanem abaot Papa long Heven mo Jisas Kraes, mo gro long saed blong spirit.
Mi gat ol famle memba we oli no save go insaed long tempol. Wanem nao mi save mekem blong helpem olgeta blong oli filim se olgeta tu oli tekempat long tempol mared blong mi?
Hemia wan topik we i mekem man i harem nogud. From we tempol hem i haos blong Lod, we oli dediketem long Hem, olgeta we oli go insaed oli mas holem wan tempol rekomen we i laef, we i talemaot se oli stap laef folem ol standet we Hem i bin putum. Be, olgeta we oli no holem wan tempol rekomen we i laef, oli welkam blong kam long ol tempol graon, mo plante tempol oli gat wan rum we oli save sidaon mo wet taem ol famle memba oli stap sil. Wan kapol wetem ol famle memba we oli no save go insaed long tempol i save invaetem bisop blong olgeta o wan nara memba blong Jos blong i stap wetem olgeta long rum mo wet.
Wan kapol i save lukluk tu wetem bisop blong olgeta blong holem wan spesel miting afta long siling blong tufala blong ol famle mo fren we oli no gat wan tempol rekomen. Miting ia i givim wan janis long olgeta blong oli filim se oli tekempat tu long mared ia mo lanem abaot mared we i no save finis. Nomata sapos i no gat seremoni o ol promes we man mo woman i mekem long tufala, kapol ia i save putum ol ring long wanwan long tufala long wan miting olsem ia.
Wanem nao mi mas mekem blong rere blong kasem ol tempol odinens?
Yu save rere taem yu stap go long tempol oltaem blong tekempat long ol baptaes blong olgeta dedman, taem yu tekempat long wan tempol priperesen semina we bisop blong yu bae i oganaesem, mo tru long stadi long olgeta skripja mo ol stori insaed long buk ia.
Yu save rere tu taem yu laef folem ol standet blong Lod blong fasin blong stap klin inaf blong go long tempol. Fidim testemoni blong yu abaot God Papa mo abaot Jisas Kraes mo gospel blong Hem we i bin kambak. Obei long Tok blong Waes mo loa blong jastiti. Sastenem ol Jos lida blong yu, pem wan ful taeting, mo go long ol Jos miting. Stap talem trutok oltaem long ol wok blong yu wetem ol narafala, mo mekemsua se famle laef blong yu i stap long pis wetem ol tijing blong Jos. Kipim ol kavenan blong baptaes blong yu blong yu save rere blong kasem ol hae kavenan blong tempol.
Selestial rum, Maot Timpanogos Yuta Tempol.
Jodan Reva Yuta Tempol. Oli dediketem long 16 Novemba 1981.
Nauvu Ilinoa Tempol. Oli dediketem long 27 Jun 2002.