Tabu Tempol
Insaed long ol tempol, ol memba blong Jos we oli mekem laef blong olgeta i klin inaf, oli save tekempat long ol odinens blong pemaot man we oli moa hae we i bin soemaot long man long wol ia.
Insaed long ol tempol, yumi save tekempat long ol odinens blong pemaot man we oli moa hae.
I gat plante risen from wanem wan i mas wantem kam long tempol. Mo tu, aotsaed blong hem nomo i stap talemaot smol ol dip stamba tingting blong hem long saed blong spirit. Hemia i kamaot moa klia insaed long ol wol blong hem. Ova long doa blong tempol, toktok ia i stap long hem, “I Tabu, I blong Lod.” Taem yu go insaed long wan tempol we oli dediketem, yu stap insaed long haos blong Lod.
Insaed long ol tempol, ol memba blong Jos we oli mekem laef blong olgeta i klin inaf, oli save tekempat long ol odinens blong pemaot man we oli moa hae we i bin kamaot long man long wol ia. Insaed long tempol, long wan tabu seremoni, oli wasem mo anoentem wan man o woman, mo hem i kasem instraksen mo i endao mo i sil. Mo taem yumi bin kasem ol blesing ia blong yumiwan, yumi save tekempat blong olgeta we oli bin ded finis be oli no bin gat sem janis ia. Insaed long ol tempol, oli stap mekem ol tabu odinens blong olgeta we oli laef, mo tu, blong olgeta we oli ded i semmak nomo.
Ol odinens mo ol seremoni blong tempol oli simpol, naes, mo tabu
Sapos yumi ridim gud ol skripja, bae yu luk se Lod i no bin talemaot evri samting long evri pipol. I bin gat sam kwalifikesen i bin stap, we wan i mas kasem bifo i kasem wan tabu infomesen. Ol seremoni blong tempol oli olsem ia nao.
Yumi no toktok raon long ol odinens blong tempol aotsaed long tempol. Tingting i no from se save blong ol seremoni ia blong tempol i blong sam pipol nomo we bae oli mekemsua se ol nara man oli no save abaot ol seremoni ia. Hem i nara wei long hemia. Wetem bigfala hadwok, mifala i askem strong evri sol blong kwalifae mo rere blong kasem wan eksperiens blong tempol. Olgeta we oli bin go finis long tempol, oli tijim wan tingting long olgeta: Wan dei, evri sol we i laef, mo evri sol we i bin laef bae oli gat janis blong harem gospel mo blong akseptem o blong no akseptem wanem we tempol i gat blong givim. Sapos oli no akseptem janis ia, bae responsabiliti i blong wanwan man o woman ia we i no bin akseptem janis ia.
Ol odinens mo ol seremoni blong tempol oli simpol. Oli naes tumas. Oli tabu. Oli kipim oli konfidensiol, nogud oli givim long olgeta we oli no rere blong kasem. Blong wantem luk o save nomo, i no wan wei blong stap rere. Blong gat bigfala intres long tempol tu, i no wan wei blong rere. Blong stap rere blong kasem ol odinens ia, i tekem ol fas step ia: fet, fasin blong sakem sin, baptaes, konfemesen, fasin blong stap klin inaf, blong gat gud tingting mo respek we i stret blong wan we i kam olsem wan ges insaed long haos blong Lod.
Olgeta we oli klin inaf oli save go insaed long tempol
Evriwan we oli klin inaf mo oli kwalifae long evri saed, oli save go insaed long tempol; mo long ples ia oli kam blong save mo gotru long ol tabu seremoni mo odinens.
Taem yu gat sam filing blong hamas tempol blesing i impoten mo olsem wanem ol odinens we oli mekem insaed long tempol oli tabu, nao bae yu no save askem kwestinim ol hae standet we Lod i putum i stap blong save go insaed long tabu tempol.
Yu mas gat wan rekomen we i laef blong save go insaed long tempol. Rekomen ia, ol stret ofisa blong Jos nao oli mas saenem. Olgeta nomo we oli klin inaf oli save go insaed long tempol. Lokol bisop o branj presiden blong yu i gat responsabiliti ia blong askem ol kwestin abaot laef blong yu blong luk sapos yu yu klin inaf bifo yu kasem ol odinens blong tempol blong yu. Intaviu ia, hem i impoten tumas, from se hem i wan taem blong luklukgud, wetem wan wokman blong Lod we oli odenem hem, long rod blong laef blong yu. Sapos i gat eni samting i no stret long laef blong yu, bisop bae i save givhan blong stretem. Tru long wei ia, yu save talemaot, o yu save kasem help blong talemaot sapos yu klin inaf blong go insaed long tempol wetem raet blong Lod.
Intaviu blong kasem wan tempol rekomen, oli mekem long praevet bitwin bisop mo memba blong Jos ia we i wantem go long tempol. Long taem ia, bisop i askem ol kwestin we i lukluk long fasin blong memba ia, fasin blong stap klin inaf blong memba ia, mo i lukluk sapos memba ia i tru long Jos mo ol ofisa blong Jos. Man o woman ia i mas talem tru se hem i klin inaf long saed blong seks mo i stap folem Tok blong Waes, i stap pem wan ful taeting, i stap laef stret folem ol tijing blong Jos, mo i no stap joenem grup o gat sore wetem ol grup we oli mekem apostasi. Bisop i kasem instraksen ia se ol toktok ia oli mas stap konfidensiol bitwin hem mo man o woman we hem i stap toktok long hem nomo, mo hemia i impoten tumas.
Sapos bisop i akseptem ol ansa ia, hemia bae i talemaot sapos wan i klin inaf blong kasem wan tempol rekomen. Sapos wan i no stap kipim ol komanmen o, sapos i gat wan samting we i no stret yet long laef blong man o woman ia, we i nid blong stretem, bae man o woman ia i mas soemaot se hem i sakem sin tru bifo oli givim wan tempol rekomen long hem.
Afta we bisop i mekem wan intaviu olsem, stek presiden tu i mas mekem intaviu bifo yu save kasem ol odinens blong tempol.
Tijing insaed long tempol i hapen wetem ol saen
Bifo yu go long tempol blong fas taem, o afta plante taem, bae i helpem yu blong luksave se tijing insaed long ol tempol i hapen wetem ol saen. Lod, we i Masta Tija, i bin givim plante instraksen blong Hem long wei ia.
Tempol i wan gudfala skul. Hem i wan haos blong lanem samting. Insaed long ol tempol, oli mekem ples i stap gud blong kasem instraksen long ol samting we oli dip long saed blong spirit. Let Elda Jon A. Widso blong Kworom blong Olgeta Twelef Aposol, i bin wan hae yunivesiti presiden mo wan waes man we oli save gud hem raon long wol. Hem i bin gat bigfala respek long wok blong tempol mo wan taem hem i bin talem:
“Ol odinens blong tempol oli tekem ful plan blong fasin blong sevem man, olsem we ol lida blong Jos oli stap tijim evri taem, mo i givim moa laet long ol poen we i had blong andastanem. I no gat fasin blong tantanem o twistim ol tijing blong tempol blong oli go stret wetem bigfala plan blong fasin blong sevem man. Ful tingting blong endaomen i wan bigfala poen we i talemaot se ol odinens blong tempol oli tru. Antap long hemia, ful stadi mo eksplenesen blong plan blong Gospel, i mekem se tempol wosip i wan long ol wei we i wok gud moa blong mekem man i tingbaot gud moa ful pikja ia blong Gospel” (“Temple Worship,” Utah Genealogical and Historical Magazine, Epril 1921, 58).
Sapos yu go long tempol mo tingbaot se tijing insaed long hem i hapen wetem ol saen, bae yu no save go wetem stret fasin; be sapos yu go wetem stret tingting ia, bae yu kamaot wetem wan visen we i bigwan moa, yu filim moa olsem wan god, mo save blong yu i kam antap long saed blong ol samting we i blong spirit. Tijing plan ia i gud tumas. Hem i kam tru long insperesen. Lod Hemwan, we i Masta Tija, i bin tijim ol disaepol blong Hem oltaem wetem ol parabol—wan wei blong toktok blong ripresentem ol samting wetem ol saen, we sapos oli talem stret bae i had blong andastanem.
Tempol hemwan i kam olsem wan saen. Sapos yu bin luk wan long ol tempol long naet, we i laet fulwan, yu save se i wan bigfala samting blong stap lukluk long hem. Haos blong Lod, we laet i raonem, i saen aot long tudak, i kam saen blong paoa mo insperesen blong gospel blong Jisas Kraes, mo i stap olsem wan laet blong hop insaed long wan wol we i stap draon oltaem insaed long tudak long saed blong spirit.
Taem yu go insaed long tempol, yu karemaot ol klos blong wokbaot wetem mo yu putum ol waet klos blong tempol. Yu jenisim klos ia insaed long wan ples blong dresap insaed long tempol, mo wanwan i gat wan smol kabod we i gat lok mo wan ples blong jenis we i praevet. Insaed long tempol, oli lukaotgud blong yu mas dresap gud. Taem yu stap putum ol klos blong yu insaed long kabod, yu livim tu ol tingting mo wari, mo samting we i pulum tingting blong yu insaed long kabod ia. Yu kamaot long smol ples blong jenis ia wetem ol waet klos, mo yu filim se yu semmak long ol narawan, yu filim se yu ikwol, from evriwan raon long yu oli dresap semmak nomo.
Tempol mared, hem i odinens blong tempol we i moa hae
Yufala we yufala i stap lukluk i go fored blong mared long tempol, bae yufala i wantem save wanem nao bae i hapen. Yumi no stap talemaot ol toktok blong siling (mared) odinens aotsaed long tempol, be yumi save tokbaot se siling rum i naes, mo i stret long seremoni ia, i kwaet mo i gud tumas long saed blong spirit, mo i tabu from tabu wok we oli stap mekem insaed long hem.
Bifo ol kapol oli kam long olta blong kasem odinens blong siling, hem i janis blong man we i mekem siling ia, blong givim sam kaonsel, mo blong yang kapol ia blong kasem sam kaonsel. Hemia sam long ol tingting we wan yang kapol i save harem long taem ia.
“Tedei i dei we yutufala i mared. Yutufala i fulap long ol filing blong mared blong yutufala. Oli stap bildim ol tempol olsem ol tabu ples blong kasem ol tabu odinens, olsem odinens ia. Yumi no blong wol ia. Ol samting blong wol oli no wok long ples ia, mo oli no gat paoa long ol samting we yumi stap mekem long ples ia. Yumi bin kamaot long wol ia mo kam insaed long tempol blong Lod. Hemia i kam olsem dei blong laef blong yumi we i moa impoten.
“Yu bin bon long wol, from wan papa mo mama, we tufala i bin invaetem yu, mo tufala i bin mekem rere wan tabenakol blong spirit blong yu i stap insaed long hem. Wanwan long yutufala i bin baptaes. Baptaes i wan tabu odinens, i wan saen blong kam klin, wan saen blong ded mo laef bakegen long ded, i wan saen blong kam long wan niufala laef. Hem i tekem fasin blong sakem sin mo blong kam klin aot long ol sin. Sakramen blong Sapa blong Lod i wan taem blong mekem bakegen kavenan blong baptaes ia, mo yumi save, sapos yumi laef from, holem taet fasin ia blong kam klin aot long ol sin blong yumi.
“Yu, man we i mared, oli bin odenem yu long prishud. Yu bin kasem fastaem Aronik Prishud, mo yu bin progres tru long evri ofis we i stap—dikon, tija mo pris. Afta, dei i bin kam we yu bin kam klin inaf blong kasem Melkesedek Prishud. Prishud ia, we i prishud we i moa hae, oli talem se hem i prishud we i folem oda blong God we i moa tabu, o i Tabu Prishud we i folem Oda blong Pikinini blong God (luk long Alma 13:18; Hileman 8:18; Doctrine and Covenants 107:2–4). Yu bin kasem wan ofis insaed long prishud ia. Naoia yu wan elda.
“Wanwan long yutufala i bin kasem endaomen blong yutufala. Long endaomen ia, yutufala i bin kasem ol paoa blong yutufala we i no save finis. Be evri samting ia, long wan wei, oli bin kam fastaem mo blong mekem yutufala i rere blong yutufala i kam long olta blong sil olsem hasban mo waef blong taem naoia mo blong taem we i no save finis. Naoia, yutufala i kam wan famle, we i fri blong mekem samting blong krietem laef, blong gat janis blong mekem samting folem fasin blong givim evri samting mo sakrifaes blong tekem ol pikinini oli kam long wol ia, mo blong lukaotem olgeta mo lidim olgeta long sef wei tru long laef blong olgeta long wol ia; mo blong luk olgeta, wan dei, oli kam olsem we yutufala i kam, blong tekem pat long ol tabu odinens blong tempol.
“Yutufala i bin kam folem tingting blong yutufala, mo oli bin jajem se yutufala i klin inaf. Blong akseptem wanwan long yutufala bakegen long kavenan blong mared, hem i wan bigfala responsabiliti, wan we i tekem i kam ol blesing blong hem we oli bigwan tumas.”
Siling paoa i joenem man long wol mo tu long heven
Sapos yumi andastanem tugeta, histri mo doktrin blong wok blong tempol, yumi mas andastanem wanem nao hem i siling paoa. Yumi mas traem kasem pikja, kasem wan level, long from wanem ol ki blong atoriti blong yusum siling paoa ia, oli impoten tumas.
“Nao Jisas i kam kasem eria blong taon ya Sisaria Filipae, mo long taem ya hem i askem long ol man blong hem se, ‘ol man oli stap tokbaot mi, mi Pikinini blong Man, se mi hu? …
“Nao Saemon Pita i taem se, ‘Yu yu [Kraes], Yu yu Pikinini blong God ya we i laef, i stap we i stap.’
“Nao Jisas i talem long hem se, ‘Saemon, pikinini blong Jon, yu yu save harem gud, from we i no man we i soemaot samting ya long yu. Papa blong mi long heven, hem nomo i soemaot long yu.’
“Mo mi mi talem long yu, se yu Pita, we i min se ston. Mo bambae mi mi stanemap jos blong mi long ston ya, mo paoa blong ded bambae i no naf blong winim jos ya.
“Bambae mi mi givim long yu, ol ki blong niufala wol ya we God i king long hem. Nao wanem samting we yu yu blokem long wol ya, bambae God i stap long heven, hem tu bambae i blokem, mo wanem samting we yu yu letem long wol ya bambae hem tu i letem olsem” (Matiu 16:13, 16–19).
Pita nao i blong holem ol ki. Pita nao i holem siling paoa ia, atoriti ia we i tekem paoa blong joenem o silim long wol, o blong lusum long wol mo bambae i olsem tu long ol heven. Ol ki ia oli blong Presiden blong Jos—long profet, sia mo reveleta. Tabu siling paoa ia i stap wetem Jos naoia. Olgeta we oli save mining blong atoriti ia oli lukluk hemia i hevi. I gat sam man nomo we oli bin givim siling paoa ia long wol long eni taem—insaed long wanwan tempol, i gat ol brata we oli bin givim olgeta siling paoa ia. I no gat wan i save kasem be nomo tru long profet, sia mo reveleta mo Presiden blong Jos blong Jisas Kraes blong Ol Lata-dei Sent.
Profet Josef Smit i bin talem se plante taem oli bin askem kwestin ia long hem “‘Olsem wanem? Bae yumi no save sef sapos yumi no gotru long ol odinens ia, mo ol nara samting? Bae mi ansa, No, bae yumi no save kasem ful fasin blong sevem man. Jisas i bin talem, ‘Long haos blong Papa blong mi, i gat plante rum i stap. Tok ya i tru, taswe mi talemaot long yufala. Naoia, bambae mi mi go mekem rere ples blong yufala.’ [Luk long Jon 14:2.] Haos long ples ia, oli sapos blong transletem olsem kingdom; mo eniwan we i kam olsem wan god long ples we i moa hae long ol narafalawan i mas obei long wan selestial loa, mo ful loa tu” (long History of the Church, 6:184).
Tempol wok i wan stamba blong paoa long saed blong spirit
Ol tempol oli stret senta blong paoa blong Jos long saed blong spirit. Bambae yumi luk se man we i agens bae i traem blong blokem yumi olsem wan Jos mo wetem wanwan long yumi taem yumi stap traem blong tekempat long wok ia we i tabu mo i kam tru long insperesen. Tempol wok i tekem plantem samting we i kam agensem yumi from se hem i stamba blong plante paoa long saed blong spirit we i kam long ol Lata-dei Sent mo long ful Jos.
Long kona ston dedikesen blong Logan Yuta Tempol, Presiden Joj K. Kanon we i blong Fas Presidensi long taem ia, i bin talem toktok ia:
“Evri fandesen we oli putumdaon from wan Tempol, mo evri Tempol we oli finis blong bildim folem oda we Lod i bin talemaot blong tabu Prishud blong Hem, i mekem paoa blong Setan long wol ia i go daon, mo i leftemap paoa blong God mo fasin blong God, i muvum ol heven i kam antap long bigfala paoa long bihaf blong yumi, mo i askem mo singaotem ol blesing blong Ol God we Oli No Save Finis, mo olgeta we oli stap wetem olgeta, blong oli kamdaon long yumi” (long “The Logan Temple,” Millennial Star, 12 Nov. 1877, 743).
Taem ol memba blong Jos oli gat trabol , o taem ol had desisen oli hevi long maen blong olgeta, hem i wan nomol samting blong olgeta blong stap go long tempol. Hem i wan gudfala ples blong tekem ol samting we yumi wari from. Insaed long tempol, yumi save kasem wan lukluk long saed blong spirit. Long ples ia, long taem blong tempol seves, yumi stap “aot long wol ia.”
Samtaem, maen blong yumi oli tingting nomo long ol problem, mo i gat plante samting tu we oli wantem se yumi mas lukluk long olgeta tu long semtaem, mekem se yumi no save tingting klia o luk samting klia. Long tempol, das blong ol samting we i spolem tingting blong yumi oli kamdaon, klaod mo smol smok blong moning i stap go antap, mo yumi save “luk” ol samting we yumi no bin save luk bifo, mo yumi faenem wan wei tru long ol trabol blong yumi we yumi no bin save long hem bifo.
Lod bae i blesem yumi taem yumi stap go mekem ol wok blong ol tabu odinens blong ol tempol. Ol blesing long ples ia, bae i no stop nomo long tempol seves blong yumi. Bae yumi kasem blesing long evri samting blong yumi.
Ol wok blong yumi insaed long tempol i kavremap yumi wetem wan aean mo wan proteksen
I no gat wan nara wok we i givim moa proteksen long Jos ia bitim wok blong tempol mo wok blong lukaotem famle laen we i sapotem wok ia. I no gat wok we i mekem yumi kam gud moa long saed blong spirit. I no gat wan wok we yumi mekem we i givim yumi moa paoa. I no gat wok we i nidim wan standet blong stret mo gud fasin we i hae moa.
Ol wok blong yumi insaed long tempol i kavremap yumi wetem wan aean mo wan proteksen, tugeta olsem wanwan man mo woman, mo tu, olsem wan pipol.
So, yufala i kam long tempol—kam mo klemem ol blesing blong yufala. Hem i wan tabu wok.
Panama Siti, Panama Tempol. Oli dediketem long 10 Ogis 2008.
Tokio Japan Tempol. Oli dediketem long 27 Oktoba 1980.
Kuritiba Brasil Tempol. Oli dediketem long 1 Jun 2008.