Tempol Mared blong Mitufala I Inaf long Eni Praes
Fas bisnis projek blong mi i bin brok daon mo seken bisnis blong mi i bin bon mo foldaon tu, mo afta long hemia, mi stap tingting sapos bae mi save tekem gelfren blong mi, Beni, i go long tempol. Mitufala i bin harem se blong go long ples ia, bae i wan tes blong fet, be taem mitufala i bin mekem tempol mared blong mitufala i kam olsem wan gol, mitufala i no save nating hamas nao bae oli testem fet blong mitufala.
Beni mo mi i bin mit long homples blong mitufala long Panama afta we mitufala i kambak long misin. From ol loa blong Panama, ol kapol we oli wantem blong statem mared laef blong olgeta insaed long tempol, oli mas mared fastaem long gavman stret bifo oli aot i go long tempol we i kolosap moa, we i Guatemala Siti Guatemala Tempol. Bae i wan trip we i sas mo i had, be blong mitufala i sil tugeta i wan blesing we mitufala i no wantem laef mo no kasem.
Dei afta we mi askem gelfren blong mi blong mared, mi lusum wok blong mi. Mi no givap, mo mi disaed blong winim mane taem mi stap givim ol tua long bas. Bas blong mi i brokdaon long fas naet. Mi wari be mi gat strong tingting, mo nekis samting mi mekem i blong salem ol T-sot. Moning, mi go pikimap ol sot long ples we oli mekem olgeta, mo mi faenem se bilding ia i bon long faea long naet bifo mo i no gat samting i stap. I luk olsem se ol hop blong mi oli go tu wetem ol smok blong faea ia.
Sam manis nomo i stap bifo nekis tempol trip i kam, mo yet, kasem taem ia, evri samting we mi stap mekem blong winim mane i no kamaot gud. Mi aot long ples ia we i asis nomo mo mi go faenem Beni.
“Mi no gat wan samting nating,” mi talem long hem. “Ating i moa gud yu no maredem mi.”
“Sapos mi stap mared from mane, hemia mi mared finis,” Beni i talem. “Be mi no mared from mane. Mi maredem yu from we mi lavem yu.”
Hemia i bin wan impoten taem. Mitufala i filim se mitufala i bin pasem wan impoten tes. Mitufala i gohed fored wetem fet, mo ol doa oli stat blong open. Mi faenem wok blong stap mekem ol fenija, nating we salari ia i no naf blong lukluk long ol nid blong mitufala. Wan kaen bisop i bin talem se bae hem i helpem mitufala wetem mane blong pem bas blong mitufala. Hemia i bin wan gudfala samting, be mitufala i filim se i no stret. Mitufala i gat tingting blong dipen long mitufalawan. Be mitufala i luk se hem i wantem tumas blong help, nao mitufala i bin askem hem sapos hem i save givim wok long Beni. Hem i bin mekem olsem.
Afta we mitufala i winim inaf mane blong go long tempol, mitufala i go mared long gavman, mo nao mitufala i stap long rod ia blong go long Guatemala wetem 10 narafala memba blong Jos. Be tes blong mitufala i no finis yet.
Ol straek long saed blong transpot i bin stopem mitufala long boda blong Kosta Rika. Afta we mifala i bin stap wet long boda blong tu dei, draeva blong mifala i disaed blong gobak. Be Beni mo mi, wetem tu brata mo wan nara kapol, i bin disaed blong no givap. Afta we mifala i lukluk bas i tanem raon mo i livim mifala, mifala i wokbaot i go long Kosta Rika. Mifala i gohed blong wokbaot, silip long ol selta long saed blong rod, kasem taem we mifala i kasem boda blong Nikaragua. Long ples ia mifala i bin save faenem wan taksi i go long kapitol siti mo pem wan tikit blong bas blong kasem boda blong Hondura. Tu dei—mo tu moa bas—afta, mifala i jes kasem tempol. Mifala i doti mo taed, mo mifala i bin spendem moa mane bitim we mifala i bin mekem plan from, be mifala i bin hapi.
Long nekis dei, afta long evri tes mo ol dilei, mitufala i bin sil blong taem we i no save finis olsem hasban mo waef. Glad blong mitufala—i inaf long wokbaot, wet, mo wari we mitufala i bin gotru long hem—glad blong mitufala i fulwan!
I no evriwan we i mared insaed long tempol bae i fesem ol jalenj olsem, be blong Beni mo mi (mo ol narawan we oli bin go long tempol wetem mitufala), ol eksperiens ia oli bin wan taem blong mekem mitufala i kam gud moa. Hem i bin wan long ol bigfala eksperiens blong laef blong mi.
Sapos gol blong mitufala blong mared long tempol i from lav blong wol ia nomo, bae mitufala i no save mekem. Be from we mitufala i bin biliv long siling paoa blong prishud we i bin kambak long dei blong yumi tedei, mitufala i no bin givap, from we mitufala i bin save se tempol mared blong mitufala—blong taem naoia mo taem we i no save finis—i inaf long eni sakrifaes we mitufala i mas mekem.