Wan Pipol Wetem Strong Tingting blong Go long Tempol
Kipim wan pikja blong wan tempol long hom blong yu we ol pikinini i save luk. Tijim olgeta abaot ol stamba tingting blong haos blong Lod.
Tempol hem i wan bigfala saen blong membasip blong yumi
Hem i wan gudfala samting blong yumi blong gat wan janis blong go long tempol from ol blesing blong yumiwan. Afta taem yumi go long tempol from ol blesing blong yumiwan, hem i wan gudfala janis blong mekem wok blong olgeta we oli bin stap laef bifo long yumi. Pat ia blong tempol wok hem i no wan wok blong selfis. Be yet, taem yumi mekem tempol wok blong ol narafala pipol, i gat wan blesing we i kambak long yumi. Mekem se, hem i no wan sapraes long yumi se Lod i wantem se ol pipol blong hem oli kam wan pipol wetem strong tingting blong go long tempol.
Hem i Lod Hemwan we, long ol revelesen blong Hem long yumi, i bin mekem tempol i kam wan bigfala saen blong ol memba blong Jos. Traem tingting long ol fasin mo ol stret mo gud aksen we Lod i talem se yumi mas developem, hemia long kaonsel we Hem i bin givim long ol Sent long Ketlan tru long profet Josef Smit taem oli stap rere blong bildim wan tempol. Kaonsel ia, i stap yet tedei:
Lod i bin komandem ol Sent blong oganaesem olgetawan; blong oli rere long evri samting we oli nidim; mo blong stanemap wan haos, we i wan haos blong prea, wan haos blong livim kakae, wan haos blong fet, wan haos blong lanem samting, wan haos blong glori, wan haos blong oda, wan haos blong God (luk long Doctrine and Covenants 88:119). Olsem wanem? Ol fasin mo aksen ia oli soemaot tru strong tingting blong yumi wanwan mo wanem yumi lukaot blong kam olsem?
Evri hadwok blong yumi long Jos i lidim yumi i go long tabu tempol
Evri hadwok blong yumi blong prijim gospel, blong mekem ol Sent oli kam stret moa, mo blong pemaot ol dedman i lidim yumi i go long tabu tempol. Hemia i from ol tempol odinens oli tabu tumas; yumi no save gobak long ples blong God sapos yumi no mekem ol odinens ia.
I tru, Lod i wantem se ol pipol blong Hem bae oli kam wan pipol wetem strong tingting blong go long tempol. Hem i bigfala strong tingting blong hat blong mi, blong evri memba blong Jos oli klin inaf blong go insaed long tempol. Mi hop se evri adalt memba bae oli klin inaf blong kasem —mo holem—wan tempol rekomen we i laef, nomata sapos rod blong go long tempol i no letem memba blong i yusum rekomen blong hem naoia o oltaem.
Tempol hem i tabu long Lod; mo i mas tabu long yumi tu
Letem yumi kam wan pipol we i stap go long tempol mo wan pipol we i lavem blong go long tempol. Letem yumi go kwik long tempol oltaem, taem yumi gat taem mo mane mo wanwan situesen blong yumi i letem. Letem yumi go, i no from ol bubu blong yumi we oli ded nomo, be tu, letem yumi go blong kasem blesing blong yumiwan blong mekem tempol wosip, mo blong faenem, insaed long ol wol ia we oli mekem i kam tabu mo oli konsekretem, wan ples we i sef mo i tabu. Tempol hem i wan naesfala ples, hem i wan ples blong revelesen, hem i wan ples blong pis. Hem i haos blong Lod. Hem i tabu long Lod. Hem i mas tabu long yumi tu.
Letem yumi serem wetem ol pikinini blong yumi ol filing long saed blong spirit we yumi gat insaed long tempol. Mo letem yumi tijim olgeta moa gud long ol samting we oli stret blong tokbaot abaot ol stamba tingting blong haos blong Lod. Kipim wan pikja blong tempol long hom blong yu blong ol pikinini blong yu oli save luk. Tijim olgeta abaot ol stamba tingting blong haos blong Lod. Mekem olgeta oli plan from, taem oli yang yet, blong oli save go long tempol mo stap klin inaf oltaem from blesing ia.
Lod i glad taem yumi klin inaf blong go insaed long tempol
Lod i glad taem ol yut blong yumi oli stap klin inaf blong go insaed long tempol mo mekem ol tabu baptaes long bihaf blong olgeta we oli no gat janis blong baptaes long laef ia. Lod i glad taem yumi stap klin inaf blong go insaed long tempol blong mekem ol kavenan blong yumiwan wetem Hem mo blong sil olsem ol kapol mo olsem ol famle. Mo Lod i glad taem yumi stap klin inaf blong go insaed long tempol blong mekem ol semfala odinens ia we i sevem laef long bihaf blong olgeta we oli bin ded, plante long olgeta nao oli stap wet blong oli finisim ol odinens ia long bihaf blong olgeta.
Blong gat tempol, hem i tru, hem i kam olsem wan saen long yumi, mo yumi mas wantem se hem i kam olsem ia. Yumi mas stap laef klin inaf blong go insaed long tempol. Yumi mas kipim ol komanmen blong Lod blong yumi. Sapos yumi save mekem laef blong yumi olsem hemia blong Masta, mo tekem tijing mo eksampol blong Hem olsem bes eksampol blong yumiwan, bae yumi no save faenem i had blong stap klin inaf blong go long tempol, blong stap mekem sem samting oltaem mo blong stap tru long evri pat blong laef blong yumi long wol ia; from bae yumi komitim yumiwan i go long wan singgel, tabu standet blong aksen mo bilif. Nomata yumi stap long hom o long maket ples, nomata yumi stap long skul o afta we yumi finis skul longtaem finis, nomata yumi stap tekem aksen yumiwan nomo o long wan konset wetem wan grup blong ol narafala pipol, rod blong yumi bae i kam klia mo ol standet blong yumi bae oli kamaot klia.
Paoa blong stanap long ol prinsipol blong yu, blong laef wetem fasin blong stap tru mo fet folem bilif blong yu—hemia nao i moa impoten. Divosen ia long tru prinsipol—long wanwan laef blong yumi, long hom mo famle blong yumi, mo long evri ples we yumi mitim mo lidim ol narafala pipol—divosen ia hem i wanem God i stap wantem tumas blong yumi mas mekem long en. Divosen ia i nidim komitmen blong—wan komitmen blong ful sol, we yumi holemtaed strong, mo yumi kipim gud blong taem we i no save finis, long ol prinsipol we yumi save se oli tru we oli stap insaed long ol komanmen we God i bin givim. Sapos bae yumi stap tru mo fetful long ol prinsipol ia blong Lod, afta bae oltaem yumi stap klin inaf blong go insaed long tempol, mo Lod mo ol tabu tempol blong Hem bae oli kam ol bigfala saen long fasin blong yumi blong stap olsem disaepol wetem Hem.
Ketlan Tempol. Oli dediketemlong 27 Maj 1836.
Logan Yuta Tempol. Oli bin dediketem long 17 Mei 1884. Oli dediketem bakegen long 13 Maj 1979.