Rere From Ol Blesing blong Tempol
Wanwan tempol hem i wan saen blong fet blong yumi long God mo wan pruf blong fet blong yumi long laef ia afta we yumi ded. Tempol hem i stamba samting blong evri aktiviti, evri lesen, evri step blong progres insaed long Jos.
Taem oli stap mekem rere ol tempol blong ol pipol, ol pipol i nid blong oli mas mekem olgeta oli rere blong go long tempol
Ol toktok we oli raetem long wanwan tempol hem i “I Tabu, I blong Lod.”1 Toktok ia i soemaot gud tugeta samting ia, tempol mo ol tabu stamba tingting blong hem oli tabu. Olgeta we oli go insaed long tempol tu, bae oli mas soemaot fasin blong stap tabu oltaem.2 Taem oli stap mekem rere ol tempol blong ol pipol, ol pipol i nid blong oli mas mekem olgeta oli rere blong go long tempol.
Wan tempol i defren long ol narafala haos blong wosip. I no olsem ol japel. Ol tempol oli klos long Sabat blong mekem se ol pipol oli save go long jos mo stap wetem ol famle blong olgeta long tabu dei ia. Ol tempol oli open long ol narafala dei blong wik blong mekem ol tabu wok. Wan tempol hem i stret haos blong Lod, we oli kipim blong mekem ol odinens we mining blong olgeta i no save finis. Ol odinens ia, i gat ol baptaes, ol mared, ol endaomen, mo ol siling.
Wanwan tempol hem i wan saen blong fet blong yumi long God mo wan pruf blong fet blong yumi long laef ia afta we yumi ded. Tempol hem i stamba samting blong evri aktiviti, evri lesen, evri step blong progres insaed long Jos. Evri hadwok blong yumi blong prijim gospel, blong mekem ol Sent oli kam stret moa, mo blong pemaot ol dedman i lidim yumi i go long tabu tempol. Hemia i from ol tempol odinens oli tabu tumas. Yumi no save gobak long ples blong God sapos yumi no mekem ol odinens ia.
Wanwan tempol odinens hem i wan aksen blong mekem ol tabu promes
Long tempol yumi kasem wan endaomen, we long tru mining, hem i, wan presen. Yumi nid blong andastanem se presen ia hem i impoten long saed blong spirit mo hem i impoten blong kipim ol tabu kavenan mo diuti we yumi mekem blong kasem presen ia. Wanwan “tempol odinens hem i no jes wan seremoni nomo we yumi gotru long hem, be hem i wan aksen blong mekem ol tabu promes.”3
Tempol endaomen oli givim tru long revelesen. Mekem se, taem yumi lukaot wetem wan klin hat, bae yumi save andastanem gud tru long revelesen. Presiden Brigham Yang i bin eksplenem se “endaomen blong yu hem i blong kasem evri odinens long haos blong Lod, we yu nidim afta taem we yu livim laef ia long wol, blong yu save wokbaot i gobak long ples blong Papa, mo pasem ol enjel we oli stanap olsem ol gad, … mo kam olsem god we i no save finis.”4
Fasin blong obei long ol tabu kavenan we yumi mekem long ol tempol i mekem yumi kwalifae from laef we i no save finis
Long wanwan tempol oli stap yusum siling atoriti blong prishud. Presiden Godon B. Hinkli i bin eksplenem se “i no gat wan king, o presiden blong wan kantri, o eni ofisa blong eni yunit long wol ia we yumi stap olsem wan pat blong hem, we i gat eni atoriti ova long ol samting we i go bitim gref. Evriwan i no gat paoa long fored blong ded, be wan hae pris we tingting blong hem i stap daon, we hem i stret mo gud mo i gat siling atoriti ia nao, i save joenem long heven wanem oli bin joenem long wol ia.”5
Semmak olsem we prishud i no save finis—i no gat stat o en—nao i semmak long atoriti blong prishud ia.6 Mekem se, ol odinens mo kavenan blong prishud oli go bitim taem. Fas revelesen we enjel Moronae i bin givim long Profet Josef Smit i stap tokbaot prishud atoriti ia.7 Long ol instraksen we oli kam long Profet, afta, long saed blong tempol, Lod i talem
long ol Sent blong oli bildim haos ia i go long nem blong Hem, blong Hem i save soemaot ol odinens blong Hem we i stap insaed ia i go long ol pipol blong Hem.
Bae Hem i soemaot long Jos blong Hem, ol samting ia we oli bin kipim i stap haed bifo oli krietem wol ia, ol samting long saed blong dispensesen blong fulnes blong ol taem (luk long D&C 124:40–41).8
Yumi stap laef long dispensesen ia. Ol tempol, ol odinens, ol kavenan, ol endaomen, mo ol siling, oli bin putumbak, stret olsem we profesi i bin talem. Ol odinens blong tempol i givim wan rod blong mekem pis wetem Lod mo i silim ol famle tugeta blong oltaem. Fasin blong obei long ol tabu kavenan ia we yumi mekem long ol tempol i mekem yumi kwalifae from laef we i no save finis—we hem i presen blong God we i moa bigwan we Hem i givim long man.9
Eniwan we i wantem blong rere gud bae i save go insaed long tempol
From we tempol i tabu, Lod i askem se oli mas protektem blong oli no mekem i doti o no gat respek long hem. Eniwan we i kam insaed long tempol, bae i wantem blong mas rere gud from spesel janis ia. Tingting ia blong rere i mas winim ol narafala aktiviti. Mi tingbaot taem mi bin wan yang boe, mi talem long papa mo mama blong mi se mi wantem blong go long yunivesiti. Oli talem se mi save go, be nomo sapos mi wokhad fastaem long ol skul blong mi mo mekem evri samting we oli askem taem yu aplae blong go long yunivesiti. Long sem wei ia, yumi mas kwalifae blong gat raet blong go insaed long tempol. Yumi mas rere long saed blong bodi, tingting, mo long spirit. Blong talem sapos yu kwalifae o no, bae oli skelem folem wanwan man we i wantem blong kasem wan rekomen.
Olgeta we oli kasem ol ki blong prishud atoriti mo responsabiliti ia, oli helpem yumi blong rere taem oli mekem ol tempol rekomen intaviu. Ol lida ia, oli kea long yumi mo helpem yumi blong faenemaot sapos yumi rere blong go insaed long tempol. Oli lavem Lod tu, mo mekemsua se i no gat eni samting we i doti bae i save kam insaed long haos blong Hem.10 Mekem se, ol intaviu ia oli mekem olgeta wetem wan spirit blong stap akaontebol.
Olsem wanem nao yu rere blong kasem wan tempol rekomen? Yu save toktok wetem bisoprik blong yu, mo tu, papa mo mama blong yu, famle, stek presidensi, tija, o kworom advaesa. Ol samting we yu nidim blong mekem ia oli simpol nomo. Long sot toktok, wan man o woman i nidim blong kipim ol komanmen blong Hem we haos ia i blong Hem. Hem i bin setemap ol standet. Yumi go insaed long tempol olsem ol ges blong Hem.
Lod bae i glad sapos evri adalt memba oli stap klin inaf blong kasem—mo holem—wan tempol rekomen we i laef. “Ol intaviu … blong ol tempol rekomen, wetem [ol memba blong bisoprik blong yu] mo ol memba blong stek presidensi blong yu oli ol tabu eksperiens. Mo, long wan wei, yumi mas tingting long olgeta olsem ol ‘praktis’ we i gat mining, from bigfala miting ia taem bae yu stanap long fored blong Bigfala Jaj.”11
Rere long saed blong bodi blong go long tempol
Nao, wetem wan tempol rekomen long han blong yu, naoia yu mas rere sam moa. Yu rere long saed blong bodi taem yu dresap gud blong go insaed long tempol. Hem i no wan ples blong werem ol klos olbaot. Ol lata-dei profet oli bin stap toktok bigwan long fasin blong gat respek long yumiwan from ol bodi blong yumi. Respek ia yumi mas kipim, speseli olgeta we bae oli go insaed long wan tabu tempol.12
Insaed long tempol, evriwan i dresap long waet klos nomo we i no gat mak long hem. “Semmak we waet i ripresentem klin fasin, hem i mekem yumi tingbaot se God i mas gat wan klin pipol.”13 Yia, kantri, lanwis blong yu—mo tu, posisen insaed long Jos—oli kam ol seken impoten samting. Mi bin go long plante endaomen sesen taem Presiden blong Jos i tekempat long hem tu. Evriwan insaed long rum oli givim hem sem hae lukluk we oli givim long Presiden. Evriwan i sidaon saedsaed long olgeta mo oli semmak nomo long ol ae blong Lod. Tru long sem fasin blong dresap ia, taem yumi go long tempol i mekem yumi tingbaot se “God i stap mekem i [semmak] nomo long olgeta man.”14
Ol woman mo ol man we bae oli mared oli go insaed long tempol blong mared blong taem naoia mo taem we i no save finis. Long tempol, ol woman we bae oli mared oli werem ol dres we oli waet, i gat longfala han, mo kaliko mo stael blong olgeta i stret mo gud, mo i no gat ol samting blong flasflas o i saensaen long hem. Ol man oli no werem ol taksido (ol blak sut we i sas) o ol klos olbaot. Presiden Boed K. Peka, we naoia hem i Presiden blong Kworom blong Olgeta Twelef Aposol, i bin raetem: “Lod i glad taem yumi wasem bodi blong yumi mo putum ol klin klos long hem, be i nomata sapos klos ia i no sas. Yumi mas dresap long wan wei we yumi save harem gud long hem taem yumi go long wan sakramen miting o wan kam tugeta we i stret mo i tabu.”15
Taem yumi tokbaot klos blong tempol, ol mama mo ol bubuwoman oli save stap olsem wan gudfala paoa blong mekem gud long medel blong ol pikinini mo ol apupikinini blong olgeta. Taem skil mo situesen blong olgeta i letem olgeta, oli save mekem wan samting we i pusum tingting blong famle blong olgeta. Wan presen blong mama blong wan angkejif we oli somap ol naes pikja long hem o wan nara pis blong tempol klos we i save kam olsem wan samting blong leftemap tingting, i gat plante paoa long wan pikinini o wan apupikinini we oli lavem mo wantem mekem hem i harem glad long hem.
Ol tempol gamen oli ripresentem wan komitmen we i stap gohed
Taem yumi werem tempol gamen i soemaot bigfala impoten saen blong hem mo i ripresentem wan komitmen we i stap gohed. Olsem we Sevya i bin givim long yumi wan eksampol blong paoa blong Hem blong save stanap strong kasem en, taem yumi werem gamen hem i wan wei we yumi soemaot fet blong yumi we i stanap strong long Hem mo long ol kavenan blong Hem wetem yumi we i no save finis.
Fas Presidensi i bin mekem rere wan leta i go long Jos long saed blong poen ia. Oli bin raetem:
“Ol praktis we oltaem oli stap luk long medel blong ol memba blong Jos i talemaot se sam memba oli no andastanem fulwan kavenan we oli mekem long tempol blong werem gamen folem spirit blong tabu endaomen.
“Ol memba blong Jos we oli bin putum klos blong gamen ia long olgeta insaed long tempol, oli bin mekem wan kavenan blong werem gamen ia long ful laef blong olgeta. Hemia oli bin talem se i minim se oli mas werem gamen olsem ol klos insaed, tugeta long dei mo naet. … Promes blong proteksen mo ol blesing i kam nomo sapos man o woman ia i stap klin inaf mo i fetful blong kipim kavenan ia.
“Stamba prinsipol hem i blong werem gamen mo no faenem eskius blong karemaot. Mekem se, ol memba oli no mas karemaot evriwan o pat blong gamen ia blong go wok long yad o blong wokbaot raon long hom wetem klos blong swim o klos we i no stret. O, oli no mas karemaot blong oli tekempat long ol aktiviti blong pleiplei we oli save mekem nomo wetem gamen blong olgeta we oli werem gud andanit long ol nomol klos blong olgeta. Yu save karemaot gamen nomo, taem yu go swim, be yu mas putumbak hariap.
“Ol prinsipol blong dresap gud mo kavremap gud bodi oli talemaot klia blong andastanem long kavenan, mo i mas stap olsem rul blong ol kaen klos we yumi stap werem. Ol memba we oli bin endao long Jos oli werem gamen blong i mekem olgeta oli tingbaot ol tabu kavenan we oli bin mekem wetem Lod, mo tu, i stap olsem wan proteksen agensem temtesen mo rabis samting. Olsem wanem yumi werem, hem i fasin blong wanwan blong soemaot aotsaed, komitmen blong hem we hem i gat insaed long hem, blong folem Sevya.”16
Rere long saed blong tingting mo spirit blong go insaed long tempol
Antap long fasin blong rere long saed blong bodi, yumi nid blong stap rere long saed blong tingting mo spirit tu. From ol odinens mo kavenan blong tempol oli tabu, mo yumi stap anda long bigfala komitmen blong no tokbaot, aotsaed long tempol, ol samting we i bin hapen insaed long tempol. Ol tabu samting i nid blong yumi tingting tabu long olgeta.
Insaed long haos ia blong lanem samting, oli tijim yumi long ol wei blong Lod. Ol wei blong Hem oli no ol wei blong yumi.17 Yumi no mas sapraes sapos ol teknik blong tij oli defren long hemia we yumi stap kasem long skul we yumi save gud long hem. Ol tempol odinens mo kavenan oli bin wan impoten pat blong gospel stat long ol dei blong Adam mo Iv. Long taem bifo, oli bin stap yusum ol saen blong tijim ol bigfala tabu trutok, mo stael blong tij ia, oli stap yusum insaed long tempol tedei.
Mekem se, yumi nid blong mas stap tingting hevi long ol saen we oli prisentem long tempol mo luk ol bigfala mining we wanwan saen ia i representem.18 “Ol tempol odinens oli fulap wetem ol mining blong saen blong i givim wan gudfala tingting mo samting blong lanem blong wan laef taem.”19 Ol tijing blong tempol oli simpol nomo mo oli naes. Olgeta we oli no gat wan janis blong gat wan gud edukesen oli save andastanem gud, mo yet, ol tijing ia oli save pulum tingting blong maen blong olgeta we oli kasem wan hae edukesen.
Mi advaesem ol memba we oli stap go long tempol blong fas taem blong oli ridim ol fas toktok we oli stap insaed long Bible Dictionary we i tokbaot tempol, olsem “Anoint,” “Covenant,” “Sacrifices,” mo “Temple.” Bae yufala i wantem blong ridim tu Eksodas, ol japta 26–29, mo Levitikas, japta 8. OlTestamen, mo tu, ol buk blong Moses mo Ebraham long Pearl of Great Price (Perel blong Bigfala Praes), oli talemaot gud olfala stael blong bildim ol tempol mo fasin we ol odinens blong hem oli stanap strong kasem en.
Blong stap kipim wan kavenan wetem God i tugeta, i protektem yumi mo i letem yumi mekem samting
I gat tu aedia we yumi nidim blong kipim long maen speseli taem yumi rere blong go insaed long tempol. Fas tingting hem i kavenan. Yumi nidim blong tingbaot se wan kavenan hem i wan promes. Wan kavenan we yumi mekem wetem God, yumi no mas luk olsem wan samting we i blokem yumi, be olsem wan proteksen. Ol kavenan we yumi mekem wetem Hem oli protektem yumi long denja.
Aedia ia hem i no niu. Olsem eksampol, sapos yumi no save gud long kwaliti blong wota saplae blong yumi, yumi mas sefem o klinim wota ia. I semmak, ol kavenan we oli kam long God oli protektem yumi long ol samting we bae oli kam spolem yumi. Taem yumi jusum blong no akseptem ol samting we i no blong God,20 yumi no lusum eni samting we i gat valiu long hem; be yumi kasem glori we olgeta we oli kasem laef we i no save finis nomo oli save long hem. Blong stap kipim wan tempol kavenan hem i no holem taet yumi be hem i letem yumi mekem samting. Hem i leftemap yumi bitim ol limit blong tingting mo paoa blong yumiwan. Hem i wanem i defren bitwin blong muv sloslo tru long wan yad blong sofmad mo blong muv kwiktaem tru long ol skae insaed long wan plan we i spid nomo. Blong stap kipim wan kavenan i tugeta, i protektem yumi mo i letem yumi mekem samting.
Seken aedia blong poenemaot gud taem yumi stap rere long saed blong tingting, hem i Atonmen. Atonmen blong Jisas Kraes hem i stamba wok blong evri histri blong man long wol ia. Hem i stamba blong plan blong fasin blong sevem man. Sapos yumi no gat wan Atonmen we i no gat en, evri man blong wol ia bae oli lus fogud. Ol tempol odinens mo ol kavenan oli tijim paoa blong Atonmen blong pemaot man.
Laef we i no save finis i stap blong yumi kasem tru long fasin blong yumi blong obei long ol kavenan we yumi bin mekem insaed long tempol
Seves insaed long tempol i karem ol blesing i kam long yumi long laef ia, mo tu, long taem we i no save finis. Elda Nil A. Makswel blong Kworom blong Olgeta Twelef Aposol i bin talem se “tempol wok i no wan ples blong ronwe long wol, be wan sapot blong nid blong yumi blong mekem gud wol taem yumi stap mekem yumiwan i rere from wan nara wol we i moa gud. Mekem se, taem yumi stap insaed long haos blong Lod; bae i save helpem yumi blong kam defren long wol blong mekem se yumi save mekem wan samting we i defren long wol ia.”21
Sapos yumi stap tru mo fetful long laef ia, bae yumi save kasem laef we i no save finis. Fasin blong nomo save ded hem i blong laef blong oltaem. Laef we i no save finis i minim moa bitim blong nomo save ded. Laef we i no save finis hem i blong kam olsem God long heven we i moa hae mo laef insaed long famle yunit. God i bin talemaot se wok mo glori blong Hem i blong karem fasin blong nomo save ded i kam mo laef we i no save finis long man.22 Presen blong fasin blong nomo save ded i bigwan—wan fri presen blong sevem man long evri man long wol ia. Janis blong laef we i no save finis—iven fasin blong kam olsem god—hem i blong yumi tru long fasin blong obei blong yumi long ol kavenan we yumi bin mekem mo ol odinens we yumi bin kasem long ol tabu tempol blong God.
Ol blesing blong tempol i kam blong gat moa mining taem olgeta we yumi lavem tumas oli ded long ol famle yunit blong yumi. Blong save se taem blong yumi seraot hem i blong sot taem nomo; i givim pis we i bitim nomol andastaning blong yumi.23 Presiden Josef Filding Smit i bin raetem, “Tru long paoa blong prishud ia we Elaeja i bin givim, hasban mo waef i save sil, o mared blong taem we i no save finis; ol pikinini oli save sil long papa mo mama blong olgeta blong taem we i no save finis; mekem se famle i kam wan famle we i no save finis, mo ded i no save seraotem ol memba blong hem.”24 Wetem ol siling we oli no save finis we yumi kasem blesing from, yumi save fesem ded olsem wan pat blong bigfala plan blong God blong hapines.25
Lukluk we i no save finis we yumi kasem insaed long tempol i givim paoa long yumi blong stanap strong kasem en long ol tes blong laef
Wan lukluk we i no save finis i helpem yumi blong yumi holem taet yumi blong stap fetful long ol kavenan we yumi mekem. Presiden Peka i talemaot gud se “ol odinens mo kavenan oli kam ol kwalifikesen blong yumi blong yumi save go insaed long ples blong [God]. Blong stap klin inaf blong kasem olgeta odinens mo kavenan ia, hem i wan misin blong wan laeftaem; blong kipim olgeta afta hem i jalenj blong laef ia.”26
Ol odinens blong tempol oli no go nomo wetem glori blong yumi we i no save finis, be tu, wetem hemia blong ol bubu blong yumi we oli bin ded finis. Fasin blong sevem ol bubu blong yumi we oli ded finis i mas hapen mo hem i impoten long fasin blong sevem yumiwan, … olsem we olgeta oli no save kam stret evriwan sapos yumi no gat, o yumi no save kam stret evriwan sapos olgeta i no gat.27 Seves long bihaf blong olgeta i givim wan janis blong yumi gohed long tempol wosip, wan seves we oli mekem olsem wan bigfala wok we Lod i bin soemaot taem Hem i bin karem Atonmen i kam blong blesem evriwan we bae i laef.
Wan dei bae yumi mitim Man Ia we I Bin Mekem yumi mo bae yumi stanap long fored blong Hem long ples blong jajmen. Skripja i tijim yumi se “wajman blong get i Tabu Wan blong Isrel; Mo hem i no yusum wan wokman long ples ia; mo i no gat wan narafala rod be tru long get nomo; from i no save gat wan man i save giaman long hem, from Lod God i nem blong hem.”28 Lod Hemwan bae i luk sapos yumi bin stap tru long ol kavenan we yumi bin mekem wetem Hem insaed long tempol mo olsem wan risal i karem i kam ol gudfala blesing we Hem i bin promesem long olgeta we oli kipim ol kavenan blong olgeta.
Lukluk ia i givim long yumi paoa blong stanap strong long ol tes blong laef. Presiden Peka i bin talem, “Stamba tingting blong evri samting we yumi tijim hem i blong mekem ol papa mo mama mo ol pikinini oli kam wan long fet long Lod Jisas Kraes, blong oli stap hapi long hom, sil long wan mared we i no save finis, joen wetem ol jeneresen blong olgeta, mo promes blong kam olsem ol god long ples blong Papa blong yumi long Heven.”29
Wanwan tempol i stanap olsem wan saen blong membasip blong yumi long Jos, olsem wan saen blong fet blong yumi long laef ia afta we yumi ded, mo olsem wan step i go long glori blong yumi we i no save finis mo famle blong yumi. Mi prea se wanwan memba blong Jos bae i rere from ol gudfala blesing blong tempol.
Yuston Teksas Tempol. Oli bin dediketem long 26 Ogis 2000.
Johanesbeg Saot Afrika Tempol. Oli dediketem long 24 Ogis 1985.
Helsinki Finlan Tempol. Oli dediketem long 22 Oktoba 2006.
Resif Brasil Tempol. Oli dediketem long 15 Disemba 2000.