Ol Blesing blong Tempol
Tempol i givim wan stamba tingting long laef blong yumi. Hem i tekem pis i kam long sol blong yumi—i no pis we man i save givim, be pis ia we Pikinini blong God i promesem taem Hem i talem, “Mi mi putum pis blong mi i stap wetem yufala. Mi nomo mi givim pis ya long yufala.”
Insaed long tempol, yumi save filim se yumi kolosap long Lod.
Mi ting se i no gat ples long wol we mi save filim kolosap moa long Lod bitim taem we mi stap insaed long wan long ol tabu tempol blong Hem. Blong talem sot wan poem:
Heven i longwe o no?
I no longwe tumas.
Insaed long ol tempol blong God,
Hem i stret ples we yumi stap long hem.
Lod i talem:
“I nogud yufala i stap hivimap ol gudgudfala samting blong yufala long wol ya blong kam rijman. Long ples ya, ol kakros oli save kakae, mo rosta i save spolem ol samting, mo i gat ol man blong stil we oli save brekem haos blong go insaed blong stil.
“Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting, mo ol man blong stil oli no save brekem haos blong go insaed blong stil.
“From we long weples we ol gudgudfala samting blong yufala i stap long hem, be oltaem tingting blong yufala tu i stap long ples ya.”1
Yufala, ol memba blong Jos blong Jisas Kraes blong Ol Lata-dei Sent, tempol i ples ia long wol we i tabu tumas. Hem i haos blong Lod, mo olsem we toktok long wol blong tempol i stap talem, tempol ia i “wan tabu haos long Lod.”
Tempol i leftemap tingting blong yumi mo i mekem yumi kam olsem god
Insaed long tempol, oli tijim tabu plan blong God. Insaed long tempol nao oli mekem ol kavenan we oli no save finis. Tempol i leftemap tingting blong yumi, i mekem yumi kam olsem god, i stap olsem wan ples we i singaotem yumi evriwan blong kam long hem, mo i poen i go long selestial glori. Hem i haos blong God. Evri samting we i stap hapen insaed long tempol i stap leftemap tingting mo i mekem yumi kam gud moa.
Tempol i blong ol famle, wan long ol bigfala rij samting we yumi gat long taem blong yumi long wol ia. Lod i bin talemaot klia long yumi, ol papa, mo i talem se yumi gat wan responsabiliti blong lavem ol waef blong yumi wetem evri hat blong yumi, mo blong yumi givim evri samting we oli nidim mo tu evri samting we ol pikinini oli nidim. Hem i bin talem we bigfala wok we yumi, olsem papa mo mama i save mekem, i stap hapen insaed long ol hom blong yumi, mo ol hom blong yumi oli save kam heven, speseli taem yumi silim mared blong yumi insaed long haos blong God.
Let Elda Matiu Kaoli, we i wan memba blong Kworom blong Olgeta Twelef Aposol, wan taem i bin talem bakegen eksperiens blong wan bubuman, long wan Satedei aftenun, taem bubuman ia i holem han blong smol apugel blong hem, long betdei blong hem, mo go mekem wan visit—i no long su (ples blong ol animol) o long sinema, be long yad blong tempol. Wetem raet blong man we i lukaotem tempol, tufala i bin wokbaot i go kasem ol bigbigfala doa blong tempol. Hem i talem long apugel blong hem blong putum han blong hem long strong wol, mo afta, long bigfala doa. Wetem kaen voes, hem i talem long apugel ia se, “Tingbaot dei ia we yu bin tajem tempol. Wan dei bae yu go insaed.” Presen blong hem long smol gel ia i no bin wan loli o aeskrim, be wan eksperiens we i gat moa mining mo bae i stap oltaem—wan taem blong talem tangkyu from haos blong Lod. Apugel ia i bin tajem tempol, mo tempol i bin tajem hem.
Tempol i karem pis i kam long sol blong yumi
Taem yumi stap tajem tempol mo lavem tempol, laef blong yumi bae i soemaot fet blong yumi. Taem yumi stap go long tabu haos, taem yumi stap tingbaot ol kavenan we yumi stap mekem insaed long hem, bae yumi save tekem evri tes mo save winim wanwan temtesen. Tempol i givim wan stamba tingting long laef blong yumi. Hem i karem pis i kam long sol blong yumi—i no pis we man i givim, be pis we Pikinini blong God i bin promesem yumi taem Hem i talem, “Mi mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim, i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”2
I gat bigfala fet i stap long medel blong ol Lata-dei Sent. Lod i givim yumi ol janis blong luk sapos bae yumi folem ol komanmen blong Hem, sapos bae yumi folem rod we Jisas blong Nasaret i bin folem, sapos bae yumi lavem Lod wetem evri hat, strong paoa, maen, mo paoa blong yumi, mo sapos bae yumi lavem ol neiba blong yumi semmak olsem yumi lavem yumiwan.3
Mi biliv long proveb ia “Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”4
Hem i bin olsem longtaem i kam; bambae i olsem oltaem i go. Sapos yumi mekem diuti blong yumi mo trastem fulwan Lod, bae yumi fulumap ol tempol blong Hem; i no taem yumi mekem ol odinens wok blong yumiwan nomo, be tu, taem yumi gat janis ia blong mekem wok long bihaf blong ol narawan. Bae yumi nildaon long ol tabu olta blong stap olsem ol proksi long ol siling we i joenem ol hasban mo ol waef mo ol pikinini blong taem we i no save finis. Ol yang man mo yang woman we oli yangfala, stat long 12 yia i go, oli save stap olsem proksi blong olgeta we oli bin ded be oli no bin kasem ol blesing blong baptaes. Hemia i wanem Papa blong yumi long Heven i wantem blong yu mo mi i mekem.
Wan merikel i hapen
Plante yia i pas, wan petriak we i gat tingting i stap daon mo i fetful, Brata Persi K. Fetsa, oli bin singaotem hem blong givim petriakel blesing long ol memba blong Jos we oli laef biaen long Aean Keten (insaed long Komunis kantri).
Brata Fetsa i bin go long graon blong Polan long ol dei ia we i had tumas. Ol boda oli sil, olsem oli blokem olgeta, mo i no gat wan sitisen i gat raet blong aot. Brata Fetsa i bin mit wetem ol Sent long Jemani we oli bin fas i stap long ol ples ia, hemia afta we oli bin droem bakegen ol boda afta long Wol Wo II, mo graon we oli bin stap long hem i bin kam pat blong Polan.
Lida blong mifala long medel blong evri Sent ia blong Jemani, i Brata Erik P. Koniets, we i bin stap long ples ia wetem waef mo ol pikinini blong hem. Brata Fetsa i bin givim Brata mo Sista Koniets mo ol bigfala pikinini, petriakel blesing blong wanwan long olgeta.
Taem Brata Fetsa i bin gobak long Yunaeted Stet, hem i bin ringim mi mo askem mi sapos hem i save kam visitim mi. Taem hem i sidaon long ofis blong mi, hem i stat blong krae. Hem i talem se, “Brata Monson, taem mi putum han blong mi antap long hed blong wanwan memba blong Koniets famle, mi bin mekem ol promes we oli no save kamtru. Mi promesem Brata mo Sista Koniets we bae tufala i save gobak long homples blong olgeta long Jemani, se bae ol desisen blong ol kantri ia we oli stap faet bae oli no save holemtaet olgeta , mo se bae oli save sil tugeta olsem wan famle insaed long haos blong Lod. Mi bin promesem boe blong tufala se bae hem i go long wan fultaem misin, mo mi bin promesem tufala se gel blong tufala bae i mared insaed long tabu tempol blong God. Yu mo mi i save se from ol boda oli klos, bae oli no save luk ol blesing ia oli hapen. Wanem nao mi bin mekem?”
Mi talem, “Brata Fetsa, mi save yu gud inaf blong save se yu bin mekem stret samting we Papa long Heven i wantem yu blong mekem.” Mitufala i bin nildaon long saed blong tebol blong mi mo mitufala i talemaot hat blong mitufala long Papa blong mifala long Heven, mo talemaot se i gat ol promes we oli mekem long wan strong famle long saed blong tempol blong God mo ol nara blesing we naoia i stap, oli no save kasem. Be Hem nomo, i save mekem merikel ia we mitufala i bin nidim.
Merikel ia i bin hapen. Gavman blong Polan mo ol lida blong Federal Ripablik blong Jemani oli bin saenem wan agrimen, we i bin letem ol sitisen blong Jemani we oli bin fas long eria ia blong oli save muv i go long Wes Jemani. Brata mo Sista Koniets mo ol pikinini blong tufala oli bin muv i go long Wes Jemani, mo Brata Koniets i bin kam bisop blong wod we tufala i bin stap long hem.
Ful Koniets famle i bin go long tabu tempol long Switselan. Mo huia nao i bin tempol presiden we i bin werem waet klos mo i gat open han we i bin welkamem olgeta? I no nara man be Persi Fetsa nomo—petriak ia we i bin givim promes ia long olgeta. Naoia, olsem presiden blong Ben Switselan Tempol, hem i bin welkamem olgeta insaed long haos blong Lod, blong mekem promes ia i hapen, mo i bin silim hasban mo waef ia tugeta, mo i bin silim ol pikinini i go long papa mo mama blong olgeta.
Yangfala gel blong famle Koniets i bin mared tu long haos blong Lod afta. Yangfala boe blong tufala i bin kasem koling blong hem mo i bin go long wan fultaem misin.
“Bae mifala i luk yu long tempol!”
Long sam long yumi, rod i go kasem tempol i tekem sam minit nomo. Be long narawan, i gat ol bigfala solwota blong krosem mo plante kilometa blong go long hem bifo oli kasem tabu tempol blong God.
Sam yia i bin pas finis, bifo oli finisim blong bildim wan tempol long Saot Afrika, mi bin go long wan distrik konfrens long wanem oli bin singaotem long taem ia, Salisberi, Rodesia; mo mi mitim distrik presiden, Rejinol J. Nild. Hem mo waef blong hem, mo ol naesfala gel blong hem oli bin mitim mi taem mi go insaed long japel. Oli bin eksplenem long mi se oli stap sevem wanem oli save sevem, mo oli bin stap rere from dei ia we bae oli save tekem rod i go long tempol blong Lod. Be, o sore tumas, tempol ia i stap longwe tumas.
Long en blong miting, ol fofala naes gel ia oli bin askem mi sam kwestin abaot tempol: “Tempol i olsem wanem? Mifala i bin luk wan pikja nomo.” “Bae mifala i filim olsem wanem taem bae mifala i go insaed long tempol?” “Wanem nao bae mifala i tingbaot moa?” blong wan aoa olsem, mi bin gat janis blong toktok long ol fofala gel ia abaot haos blong Lod. Taem mi aot blong go long eapot, oli bin sakem han long mi, mo gel we i yangfala long olgeta evriwan i talem, “Bae mifala i luk yu long tempol!”
Wan yia afta, mi bin gat janis blong gritim Nild famle insaed long Sol Lek Tempol. Long wan kwaet siling rum, mi bin gat janis blong joenem blong taem we i no save finis, mo blong taem naoia, Brata mo Sista Nild. Taem ol doa oli bin open, mo ol naesfala gel ia, we wanwan i dresap long waet klos we i no gat mak long hem, oli kam insaed long rum. Oli kisim mama, mo afta papa blong olgeta. Wota i fulap long ae blong olgeta, mo tangkyu i bin fulap long hat blong olgeta. Mifala i bin stap kolosap long heven. Naoia oli save talem long wanwan long olgeta, “Naoia yumi wan famle blong taem we i no save finis.”
Hemia i naesfala blesing we i stap wet long olgeta we oli kam long tempol. Bae wanwan long yumi i laef folem wan laef we i klin inaf, wetem ol han we oli klin mo ol hat we oli klin evriwan, blong mekem se tempol i save tajem laef blong yumi mo famle blong yumi.
Heven i longwe o no? Mi testifae se insaed long ol tabu tempol, heven i no stap longwe nating—from se insaed long ol tabu ples ia nao heven mo wol i mit, mo Papa blong yumi long Heven i givim ol blesing ia blong Hem we oli moa hae long ol pikinini blong Hem.
St. Joj Yuta Tempol. Oli dediketem long 6 Epril 1877. Oli dediketem bakegen long 11 Novemba 1975.
Manila Filipin Tempol. Oli dediketem long 25 Septemba 1984.
Baontiful Yuta Tempol. Oli dediketem long 8 Jenuware 1995.
Ben Switselan Tempol. Oli dediketem long 11 Septemba 1955. Ol dediketem bakegen long 23 Oktoba 1992.
Siling Rum, Sol Lek Tempol.