C. C. A. Christensen (1831–1912), Oli Ronemaot Ol Sent aot long Jakson Kaonti, Misuri, c. 1878, tempera long muslin, 77 ¼ × 113 inj. Brigham Yang Yunivesiti Miusiom blong Art, presen we i kam long ol apupikinini blong C. C. A. Christensen, 1970

6–12 Septemba

Doktrin mo Ol Kavenan 98–101

“Stap Kwaet, mo Save se Mi Mi God”

“Wanem mesej nao ol pikinini insaed long klas blong yu oli nidim blong harem long wik ia? ?Olsem wanem maet ol prinsipol insaed long Doktrin mo Ol Kavenan 98–101 oli save helpem olgeta blong stap olsem ol moa gud disaepol blong Jisas Kraes?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Leftemap tingting blong ol pikinini blong oli serem wan samting we oli bin lanem aot long Doktrin mo Ol Kavenan long hom o long Praemeri. Askem olgeta wanem nao oli laekem moa blong lanem aot long Doktrin mo Ol Kavenan.

Tijim Doktrin: Ol Smol Pikinini

Doktrin mo Ol Kavenan 98:39–40

Mi save fogivim olgeta we oli no kaen long mi.

Lod i askem Ol Sent we oli stap mekem nogud long olgeta long Jakson Kaonti, Misuri, blong oli fogivim olgeta we oli stap mekem nogud long olgeta. Taem yu stap tijim ol pikinini long hamas i impoten blong stap fogivim man, meksua tu se oli andastanem se, sapos wan i spolem olgeta, oltaem oli mas talem long wan bigfala man we oli trastem.

Samfala Aktiviti we Yu Save Mekem

• Blong helpem ol pikinini blong oli andastanem ol jalenj we Ol Sent long Saeon oli bin stap fesem, serem wetem olgeta: “Japta 34: God I Bin Wonem Ol Pipol long Saeon” (Ol Doktrin mo Kavenan Stori, 128–31, o vidio we i go wetem long ChurchofJesusChrist.org). Ridim Doktrin mo Ol Kavenan 98:39–40, mo askem ol pikinini blong oli lisin long wanem Lod i talem long Ol Sent blong mekem taem we enemi blong olgeta i stap askem fogivnes. ?From wanem Jisas i wantem yumi blong fogivim ol pipol, iven olgeta we oli no naes long yumi?

• Putum wan pikja blong wan hapi fes long wan wol mo wan fes we i no hapi long narasaed wol. Serem long ol pikinini sam situesen we man i no gat kaen fasin (yu save faenem ol stori ia insaed long Fren o Liahona). Givim tingting long sam wei blong folem blong fesem ol aksen ia we oli no kaen, mo helpem ol pikinini oli disaed sapos wanwan ansa bae i mekem olgeta oli hapi o no hapi. Invaetem ol pikinini blong poenem stret fes long wol.

Doktrin mo Ol Kavenan 101:16

Jisas Kraes i save karem pis i kam long mi.

Taem we Ol Sent oli bin fesem fasin blong agens, Lod i bin givim kamfot long olgeta mo i talem: “stap kwaet mo save we, mi, mi God.” Tingbaot olsem wanem kaonsel ia i save blesem ol pikinini we yu stap tijim.

Samfala Aktiviti we Yu Save Mekem

• Invaetem ol pikinini blong oli muvmuv hariap long jea blong olgeta. Afta, askem olgeta blong oli stop blong muv taem yu holem pikja blong Sevya antap mo talem sentens ia: “stap kwaet mo save se, mi, mi God” (Doktrin mo Ol Kavenan 101:16). Ripitim aktiviti ia plante taem. Eksplenem se, taem we laef i bin had long Ol Sent long taem blong Josef Smit, Jisas i bin wantem olgeta blong oli stap kwaet mo oli trastem Hem, be i no blong stap wari. ?Olsem wanem Jisas i save helpem yumi taem yumi stap gat wan had taem?

• Tugeta, singsing wan singsing abaot fasin blong stap kwaet, olsem “Reverently, Quietly” o “To Think about Jesus” (Children’s Songbook, 26, 71). Helpem ol pikinini blong luksave ol filing blong pis we oli kam taem yumi stap kwaet mo stap tingting abaot Jisas—eksampol, taem yumi stap prea o stap tekem sakramen.

• Helpem ol pikinini blong wok long aktiviti pej blong wik ia. Taem oli stap kala, talem long olgeta olsem wanem we, taem we yu stap tingting abaot Jisas Kraes, i bin helpem yu blong filim pis, iven long ol hadtaem.

  

  Wan smol pat blong peinting ia: Kraes mo Yangfala Rij Loya, i kam long Heinrich Hoffman.

Stap Tijim Doktrin: Ol Bigfala Pikinini

Doktrin mo Ol Kavenan 98:1–3, 11–14, 101:16

Ol tes blong mi oli save helpem mi blong kam moa olsem Jisas Kraes.

Taem we ol pikinini oli stap fesem ol jalenj truaot long laef blong olgeta, bae oli nidim fet ia se Sevya i save helpem olgeta long taem blong ol tes blong olgeta, mo ol tes ia, oli “wok tugeta blong gud blong olgeta” (Doktrin mo Ol Kavenan 98:3).

Samfala Aktiviti we Yu Save Mekem

• Askem ol pikinini blong helpem yu blong mekem wan lis long bod blong sam long ol jalenj ia we wan pikinini we i gat sem yia olsem olgeta i save fesem. Talem long ol pikinini abaot sam long ol jalenj ia blong Ol Sent we oli stap laef long Jakson Kaonti, Misuri, long 1833 (luk long ol japta 34 mo 35 insaed long Ol Doktrin mo Kavenan Stori, 128–34). ?Wanem advaes bae oli givim long wan pikinini we i stap gotru long ol jalenj ia? Askem ol pikinini blong ridim Doktrin mo Ol Kavenan 98:1–3, 11–14, mo lukaotem wanem rod nao Lod i soem. ?Olsem wanem oli save folem kaonsel ia taem oli stap fesem ol jalenj olsem olgeta long lis we i stap long bod?

• Invaetem ol pikinini blong no muv mo stap kwaet blong sam minit, mo semtaem bae oli lukluk long wan pikja blong Sevya, o oli stap lisin long wan singsing abaot Hem. Afta, invaetem olgeta blong serem wanem oli filim mo stap gotru long hem taem oli bin stap kwaet. Ridim Doktrin mo Ol Kavenan 101:16. ?Olsem wanem we, taem yumi stap kwaet mo stap tingting long Jisas, i helpem yumi? Helpem ol pikinini blong oli andastanem wanem i joenem fasin blong no stap muv mo stap kwaet wetem paoa blong filim Spirit mo tingting abaot Jisas.

Doktrin mo Ol Kavenan 98:23, 39–40

Jisas i wantem mi blong fogivim olgeta we oli no kaen long mi.

Lod i givim komanmen long yumi blong lavlavem yumi, blong fofogivim yumi “seventi taem seven,” mo blong yumi tanem narasaed fes blong yumi (luk long Matiu 5:39, 43–44; 18:21–22). ?Olsem wanem yu save yusum ol ves ia blong tijim ol trutok ia long ol pikinini?

Samfala Aktiviti we Yu Save Mekem

• Talem long ol pikinini abaot ol fasin blong agens we i bin hapen long Jakson Kaonti, Misuri long 1833 (luk long japta 34 mo 35 insaed long Ol Doktrin mo Kavenan Stori, 128–34). Askem ol pikinini se bae oli filim olsem wanem sapos oli bin ol memba blong Jos long tetaem ia. Invaetem olgeta blong ridim Doktrin mo Ol Kavenan 98:23, 39–40, blong faenemaot wanem we Lod i wantem Ol Sent blong mekem. ?From wanem i had blong fogivim olgeta we oli stap mekem nogud long yumi? ?Olsem wanem nao yumi kasem blesing taem yumi stap mekem olsem?

• Askem ol pikinini sapos oli save tingting long wan taem we Jisas Kraes o wan narawan insaed long ol skripja oli bin mekem wanem we Doktrin mo Ol Kavenan 98:23 i stap tijim. Blong givim wan eksampol, soem wan pikja blong Taem we Jisas Kraes I Hang long Kros (olsem hemia insaed long Gospel Art Buk namba 57). Askem ol pikinini blong oli serem wanem we oli save abaot taem ia we oli bin hangem Sevya long kros (luk long Luk 23). Invaetem olgeta blong ridim Luk 23:34. ?Olsem wanem nao yumi save folem eksampol blong Jisas Kraes?

Doktrin mo Ol Kavenan 101:23–32, 36, 38

Tru long Jisas Kraes, mi save faenem glad.

Laef, i no stap blong i fri long ol had samting, be yu save helpem ol pikinini blong faenemaot se oli stil save faenem wan ful glad tru long Jisas Kraes.

Samfala Aktiviti we Yu Save Mekem

• Putum wota insaed long wan kap. Askem ol pikinini blong talem nem blong ol samting we Sevya i bin mekem blong yumi, blong mekem se yumi gat glad, mo invaetem olgeta blong putum wan smol ston insaed long kap from evri samting we bae oli talem nem blong hem, i go kasem we kap i fulap. Wetem ol pikinini, ridim Doktrin mo Ol Kavenan 101:36, mo askem olgeta blong lukaotem wei blong yumi save gat wan ful glad. ?Wanem sam samting we yumi save mekem blong lukaotem Lod (ves 38) blong mekem se yumi save gat ful glad ia we Hem i wantem givim long yumi?

• Eksplenem se Doktrin mo Ol Kavenan 101:23–32 i stap tijim se laef bae i olsem wanem taem bae Jisas Kraes i kambak bakegen. Taem yufala i stap ridim ol ves ia tugeta, tokabaot ol samting we ol pikinini oli faenem, we i tekem glad long yumi taem bae Hem i kam. ?From wanem i help blong save abaot ol samting ia taem yumi stap long wan taem we i had?

Stap Leftemap Tingting blong Lanem Samting long Hom

Helpem ol pikinini blong jusum wan ves long Doktrin mo Ol Kavenan 98–101 we oli laekem mo oli wantem serem wetem famli blong olgeta. Helpem olgeta blong mekem wan plan blong wei we bae oli serem wanem we oli laekem abaot ves ia.

Stap Kam Antap long Fasin blong Yumi blong Stap Tij

Kam antap olsem wan tija we i olsem Kraes. Tingting hevi long ol wei we yu save kam wan tija we i moa olsem Kraes. Tingting blong yusum ol kwestin blong skelem yuwan we oli stap long pej 37 blong Teaching in the Savior’s Way blong helpem yu blong kam antap.