20–26 Septemba

Doktrin mo Ol Kavenan 106–108

“Blong Gat Ol Heven Oli Open”

Tingting hevi long wanem yu save abaot ol pikinini we yu stap tijim. ?Wanem kaen aktiviti bae i tekem olgeta oli kam kolosap moa long Sevya? Tingbaot se ol aktiviti blong ol yangfala pikinini we oli stap long aotlaen ia, yu save stretem blong yusum wetem ol pikinini we oli bigwan, mo nara wei raon.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem ol pikja blong ol lida blong Jos long ol pikinini, olsem pikja blong profet, Ol Aposol, Praemeri Jeneral Presidensi, mo ol nara Jeneral Atoriti mo Ofisa. Invaetem ol pikinini blong tokbaot wanem ol lida ia oli stap mekem mo from wanem oli mas talem tangkyu from olgeta.

Tijim Doktrin: Ol Smol Pikinini

Doktrin mo Ol Kavenan 107:18–20, 42–56

Mi mi gat blesing from prishud.

Evriwan long ol pikinini blong Papa long Heven oli save kasem ol blesing we oli kam from prishud. Tingting long ol wei we yu save helpem ol pikinini we yu stap tijim taem yu filim tangkyu long hat blong yu from ol blesing ia.

Samfala Aktiviti we Yu Save Mekem

• Droem long bod wan pikja we i ripresentem “ol heven oli open long [yumi]” (Doktrin mo Ol Kavenan 107:19) from prishud ia (wan pikja olsem ol laet blong san oli stap saen tru long wan klaod). Givim ol pikinini ol pikja we oli ripresentem ol blesing we oli kam long yumi from prishud ia, olsem baptaes, sakramen, mo tempol. Invaetem olgeta blong serem from wanem oli talem tangkyu from blesing ia insaed long pikja blong olgeta, mo letem olgeta oli putum pikja blong olgeta i stap long laet ia blong san we yu droem long bod. Serem testemoni se yumi save gat ol blesing from se Papa long Heven i bin putumbak prishud.

• Mekem wan rod long floa, mo givim ol pikinini ol pikja ia blong ol prishud odinens we bae oli nidim blong oli save folem rod ia i gobak long Papa long Heven (luk long Gospel Art Buk, ol namba 103–8, 119–20). Helpem ol pikinini blong putum ol odinens ia long oda folem rod ia.

• Soem wan pikja blong Adam mo Iv wetem famli blong olgeta (luk long aktiviti pej blong wik ia, o long Gospel Art Buk, namba 5). Taem we ol pikinini oli stap lukluk long pikja ia, askem olgeta olsem wanem nao Adam mo Iv bae oli filim abaot famli blong olgeta. Yusum Doktrin mo Ol Kavenan 107: 53–56 blong serem wetem ol pikinini wanem we Adam i bin mekem blong soem se hem i lavem famli blong hem. Serem testemoni blong yu abaot wei we prishud i bin blesem yu mo famli blong yu.

• Talem nem blong ol memba blong famli we Adam i bin odenem olgeta i go long prishud, hemia folem wanem i stap long Doktrin mo Ol Kavenan 107:42–50, mo askem ol pikinini blong kaontem se hamas pipol ia hem i bin odenem olgeta. Helpem olgeta blong andastanem from wanem Adam i bin wantem evri memba blong famli blong hem blong kasem prishud. Invaetem ol pikinini blong tokbaot ol taem we olgeta, o famli blong olgeta i bin kasem ol blesing tru long prishud.

Doktrin mo Ol Kavenan 108:7

Mi mekem ol narawan oli kam strong moa.

Iven ol yangfala pikinini oli save folem kaonsel ia blong mekem ol narawan oli kam strong moa tru long “long evri storian blong yufala, tru long evri prea blong yufala, … mo tru long evri samting we yufala i mekem.”

Samfala Aktiviti we Yu Save Mekem

• Droem wan long bod, mo askem ol pikinini blong givim nem blong sam samting we wan i save mekem blong kam strong moa long bodi. (Maet bae yu droem ol masel blong man oli bigwan moa taem ol pikinini oli givim nem long ol samting). Ridim Doktrin mo Ol Kavenan 108:7, mo askem ol pikinini blong lisin long ol wei we yumi save mekem ol brata mo sista blong yumi oli kam strong moa. Eksplenem eni toktok we i had.

• Helpem ol pikinini blong tingting long ol pipol we oli save olgeta we maet oli nidim blong mekem olgeta i kam strong moa. ?Wanem nao yumi save talem long olgeta, o mekem blong olgeta? Wok tugeta blong mekem sam kad blong ol pipol ia, o leftemap tingting blong ol pikinini blong oli tingbaot ol pipol ia long ol prea blong olgetawan, o long taem blong famli prea.

Stap Tijim Doktrin: Ol Bigfala Pikinini

Doktrin mo Ol Kavenan 107:1–8, 13–14, 18–20

Prishud bae i helpem mi blong gobak long Papa long Heven.

Ol Prishud blong Melkesedek mo Aronik oli bin putumbak blong helpem ol pikinini blong God blong gobak long Hem. Helpem ol pikinini we yu stap tijim blong oli andastanem wanem i defren bitwin ol prishud diuti mo hao oli stap helpem yumi blong gobak long God.

Samfala Aktiviti we Yu Save Mekem

• Invaetem ol pikinini blong luklukgud insaed long Doktrin mo Ol Kavenan 107:1–8, 13–14, 18–20 blong kasem ol impoten toktok mo sentens we i stap tijim olgeta abaot prishud. ?Wanem responsabiliti nao olgeta we oli holem prishud oli gat? ?Olsem wanem prishud i helpem yumi blong gobak long God?

• Raetem ol kwestin we ansa i stap long Doktrin mo Ol Kavenan 107:1–8, 13–14, 18–20; olsem “Wanem nao i wan nara nem blong Melkesedek Prishud?” Givim sam minit long ol pikinini blong oli faenem ol ansa insaed long ol ves ia long ol hamas kwestin we oli save ansa long ol. Serem wetem ol pikinini ol blesing ia we yu bin kasem tru long prishud.

• Wetem ol pikinini, rid abaot Melkesedek insaed long Bible Dictionary o Gaed long Ol Skripja (olskripja.ChurchofJesusChrist.org). ?Wanem nao yumi lanem aot long laef blong Melkesedek abaot mining blong stap praktisim prishud atoriti?

Doktrin mo Ol Kavenan 107:21–26, 33–35, 65–66

Ol wokman blong Lod we Hem i bin jusum olgeta oli stap lidim Jos blong Hem.

?Wanem eksperiens nao oli bin bildimap testemoni blong yu abaot ol lida blong Jos ia? ?Olsem wanem bae yu helpem ol pikinini blong oli bildimap ol testemoni blong olgeta?

Profet i tijim yumi wanem God i wantem yumi blong save.

Samfala Aktiviti we Yu Save Mekem

• Long bod, soem wan pikja blong Ol Jeneral Atoriti mo Ofisa we i kamaot long las konfrens edisen blong Ensign o Liahona. Taem we ol pikinini oli stap rid long Doktrin mo Ol Kavenan 107:21–26, 33–35, 65–66, invaetem olgeta blong raetem long bod wanem oli lanem abaot ol responsabiliti blong sam long ol lida ia. ?From wanem yumi talem tangkyu from rod we oli stap soem long yumi? Serem wetem ol narawan olsem wanem yu kasem wan testemoni abaot ol profet mo ol aposol.

• Raetem ol toktok ia tras, fet, mo prea antap long bod. Askem ol pikinini olsem wanem yumi save sapotem Fas Presidensi blong Jos wetem tras, fet, mo prea blong yumi (luk long Doktrin mo Ol Kavenan 107:22). ?From wanem hem i impoten blong sapotem ol wokman we Lod i jusum?

Doktrin mo Ol Kavenan 108:3

Sapos mi lukaot gud blong stap laef folem ol kavenan blong mi, bae i tekem ol blesing oli kam.

Tingting hevi long wei we yu save helpem ol pikinini we yu stap tijim blong “lukaotgud stat naoia i go blong stap folem strong ol tabu promes o [ol kavenan] blong [olgeta].” ?Olsem wanem hemia bae i blesem olgeta long naoia mo long fiuja?

Samfala Aktiviti we Yu Save Mekem

• Invaetem ol pikinini blong mekem samting we i nid blong lukaotgud long hem blong gat sakses, olsem blong traem blong fulumap wota long kap mo no kapsaetem wota olbaot. ?Wanem i hapen taem yumi no stap lukaotgud? Invaetem olgeta blong ridim Doktrin mo Ol Kavenan 108:3 mo faenemaot wanem we oli bin askem long Liman Serman blong mekem wetem fasin blong lukaotgud. Wetem ol pikinini, mekem wan lis blong ol promes we oli bin mekem wetem Papa long Heven taem oli bin baptaes mo taem oli bin tekem mo kakae sakramen. Helpem olgeta blong tingbaot ol wei we oli save lukaotgud blong stap mekem folem ol promes blong olgeta.

• Singsing wan song abaot fasin blong stap kipim ol kavenan, olsem “I Will Be Valiant” (Children’s Songbook, 162). Helpem olgeta blong mekem wan saen wetem wan sentens blong singsing ia we i rimaenem olgeta blong kipim ol kavenan blong olgeta, mo leftemap tingting blong olgeta blong soem saen ia long hom blong olgeta.

• Givim sam pat blong toktok blong Sista Becky Craven “Lukaotgud agens Lukaot Wanwan Taem” (  o Liahona, Mei 2019, 9–11), mo askem olgeta blong serem wan samting we i givim insperesen long olgeta blong oli lukaotgud moa blong stap laef folem ol kavenan blong olgeta.

Stap Leftemap Tingting blong Lanem Samting long Hom

Wanwan taem, kontaktem papa mo mama blong ol pikinini we yu stap tijim mo leftemap tingting blong ol pikinini ia long ol hadwok blong olgeta blong tijim gospel insaed long hom. Maet bae yu wantem talem long olgeta wan samting we pikinini blong olgeta i bin serem long Praemeri, we oli bin lanem long hom.

Stap Kam Antap long Fasin blong Yumi blong Stap Tij

Stretem ol aktiviti folem ol nid we i stap. No tekem se ol aotlaen ia oli ol instraksen we yu mas folem. Be, yusum olgeta olsem wan ples blong kasem sam aedia blong givim laet long insperesen blong yuwan taem yu stap tingting hevi long ol nid blong ol pikinini we yu stap tijim. Long sam kes, maet bae yu filim insperesen blong stretem wan aktiviti blong ol smol pikinini blong tijim i go long ol pikinini we oli moa bigwan, o nara wei raon.