C. C. A. Christensen (1831–1912), Saeon Kamp c. 1878, tempera long muslin, 78 × 114 inj. Brigham Yang Yunivesiti Miusiom blong Art, presen we i kam long ol apupikinini blong C. C. A. Christensen, 1970

13–19 Septemba

Doktrin mo Ol Kavenan 102–105

“From Afta long Plante Hadtaem … Bae Blesing I Kam”

Stadi blong yuwan long Doktrin mo Ol Kavenan 102–5 mi wan stamba pat blong yu rere blong tij. Lisin long ol tingting mo filing long saed blong spirit abaot wei blong helpem ol pikinini blong oli andastanem gud moa ol skripja.

Raetemdaon Ol Filing mo Tingting blong Yu

Invaetem Ol Pikinini blong Oli Serem Wanem Oli Gat

Helpem ol pikinini blong pikimap wan singsing blong singsing long hem we bae i mekem olgeta oli tingbaot wan samting we oli bin lanem long hom mo long jos.

Tijim Doktrin: Ol Smol Pikinini

Doktrin mo Ol Kavenan 103:9

Mi save stap olsem “wan laet long wol.”

?Olsem wanem nao yu save leftemap tingting blong ol pikinini we yu stap tijim, blong serem laet blong gospel wetem olgeta we oli stap raon long olgeta?

Samfala Aktiviti we Yu Save Mekem

• Ridim Doktrin mo Ol Kavenan 103:9 i go long ol pikinini, mo invaetem olgeta blong holem ol pikja blong balb blong laet, wan kandel, o nara samting we i givim laet. Askem olgeta blong soem pikja blong olgeta long wan narawan insaed long klas. Talem long ol pikinini olsem wanem nao oli olsem wan laet long ol narawan taem we oli stap folem Jisas Kraes.

• Singsing wan singsing wetem ol pikinini abaot fasin blong stap olsem wan eksampol, olsem “Jesus Wants Me for a Sunbeam” o “I Am like a Star” (Children’s Songbook, 60–61, 163). Helpem olgeta blong tingting long sam aksen we bae oli go wetem ol toktok. ?Olsem wanem nao bae yumi stap wan laet, o wan gud eksampol long ol pipol raon long yumi?

  

  Mi save stap olsem wan laet long wol.

Doktrin mo Ol Kavenan 104:42

Lod bambae i blesem mi taem mi stap obei long ol komanmen blong Hem.

Plante taem, insaed long seksen 104, Lod i promesem “plante, plante blesing” long olgeta we oli stap fetful blong obei long ol komanmen blong Hem. ?Olsem wanem bae yu helpem ol pikinini ia blong oli filim se Hem i wantem blesem yumi plante we plante?

Samfala Aktiviti we Yu Save Mekem

• Invaetem ol pikinini blong mekem wan aksen, olsem blong oli muvmuvum ol fingga blong olgeta evri taem oli harem toktok ia “blesing” taem yu stap ridim Doktrin mo Ol Kavenan 104:42. Talem long ol pikinini olsem wanem Papa long Heven i blesem yu from yu stap obei ol komanmen blong Hem. Askem ol pikinini blong serem olsem wanem Hem i bin blesem olgeta. Invaetem wanwan pikinini blong serem wan komanmen we oli save obei.

• Blong helpem ol pikinini blong andastanem wanem ia i “wetem plante, plante blesing,” droem wan sekol long bod o long wan pepa. Askem ol pikinini blong helpem yu blong mekem plante we plante moa sekol—droem tu, mo afta fo, mo afta eit, mo afta sikstin, i go i go—kasem taem we ful bod o pepa i fulap long ol sekol. Evri taem yu ademap ol sekol, helpem ol pikinini oli tingting long wan blesing we Papa long Heven i bin givim long olgeta. Eksplenem se “plante, plante blesing” i minim we Lod bambae i fulumap laef blong yumi wetem ol blesing sapos yumi stap obei long ol komanmen blong Hem.

Doktrin mo Ol Kavenan 105:38–40

Mi save stap olsem wan we i putum pis.

I gat plante lesen we yumi save lan aot long ol eksperiens blong Saeon Kamp. Wan we maet bae i impoten long ol pikinini, i we raorao mo faet i tekem ol hadtaem i kam, mo yuniti mo pis oli tekem ol blesing oli kam.

Samfala Aktiviti we Yu Save Mekem

• Wetem ol toktok blong yuwan, talem stori blong Saeon Kamp i go long ol pikinini; stori i stap long fas toktok blong aotlaen blong wik ia long Kam Folem Mi—Blong Wanwan Man, Woman mo Famli; Saints, 1:194–206; o “The Acceptable Offering of Zion’s Camp” [Revelations in Context, 213–18]). Stop wanwan taem blong poenemaot ol lesen we yumi save lanem aot long Saeon Kamp—eksampol, se Lod i wantem yumi blong stap mekem pis mo wok tugeta, be i no blong stap raorao mo faet.

• Ridim Doktrin mo Ol Kavenan 105:38–40, mo askem ol pikinini blong stanap taem oli harem toktok ia “pis.” Eksplenem se Lod i wantem Ol Sent blong mekem pis wetem ol pipol we oli no stap kaen. Helpem ol pikinini blong tingting long sam tingting we oli save mekem blong stap olsem ol man blong mekem pis, mo invaetem olgeta blong mekem rolplei long sam situesen.

• Serem wan stori abaot wan pikinini we i wan we i stap mekem pis; tekem stori ia aot long laef blong yuwan, o aot long Fren o Liahona. Singsing wan singsing tugeta abaot fasin blong lavem ol narawan, olsem “Jesus Said Love Everyone” (Children’s Songbook, 61), mo komplitim aktiviti pej blong wik ia.

Stap Tijim Doktrin: Ol Bigfala Pikinini

Doktrin mo Ol Kavenan 104:13–18

Lod i wantem mi blong serem wanem we mi gat wetem olgeta we oli stap long nid.

Tingting long wei we bae yu helpem ol pikinini oli andastanem wei blong Lod blong lukluk long ol nid blong ol pipol blong Hem taem oli stap long nid.

Samfala Aktiviti we Yu Save Mekem

• Givim sam minit blong mekem wan lis blong ol blesing we God i bin givim long olgeta. Leftemap tingting blong olgeta blong raetemdaon long lis plante long olgeta blesing ia olsem we oli save mekem. Afta, ridim tugeta Doktrin mo Ol Kavenan 104: 13–18, mo lukaotem ol ansa blong ol kwestin olsem: “?Huia i tru ona blong evri samting? ?From wanem nao Hem i givim olgeta samting ia long yumi? ?From wanem Hem i wantem yumi blong mekem olgeta samting ia? Helpem ol pikinini blong tingting long ol wei we oli save serem ol blesing blong olgeta wetem ol narawan.

• Serem wan eksperiens, we insaed long hem, wan i givim yu wan samting we yu bin nidim, mo askem ol pikinini blong serem ol semmak eksperiens. O, soem wan vidio abaot fasin blong givim seves long ol narawan, olsem “The Coat” (ChurchofJesusChrist.org). ?Wanem nao yumi lanem aot long ol ves ia abaot fasin blong prea from ol narawan? Invaetem ol pikinini blong oli save gud olgeta we oli stap long nid, mo faenem wan blong givim seves long hem long wik ia, olsem wan we i stap long skul, o speseli wan insaed long famli blong olgeta.

• Invaetem ol pikinini blong luklukgud insaed long Children’s Songbook o Hymns o Singsing Tabu mo Singsing blong Ol Pikinini blong luk ol singsing we oli tokbaot seves o fasin blong helpem ol nara man (luk long ol topik indeks). Singsing wan o tu singsing tugeta, mo tokbaot wanem ol singsing ia oli stap tijim yumi.

Doktrin mo Ol Kavenan 105:9–19

Mi save obei long ol komanmen blong Lod iven sapos mi no andastanem ol risen biaen long ol komanmen ia.

Eksperiens ia blong Saeon Kamp i save gat wan wei we i gat paoa blong soemaot ol blesing we oli kam taem wan i stap lukaotem blong folem tingting blong Lod.

Samfala Aktiviti we Yu Save Mekem

• Soem pikja long aotlaen blong wik ia long Kam Folem Mi—Blong Wanwan Man, Woman mo Famli, mo invaetem ol pikinini blong serem wanem we oli save abaot Saeon Kamp. Sapos oli nidim help, yusum fas toktok blong aotlaen blong wik ia long Kam Folem Mi—Blong Wanwan Man, Woman mo Famli Saints, 1:194–206; o “The Acceptable Offering of Zion’s Camp” (Revelations in Context, 213–18). Invaetem ol pikinini blong oli priten se oli bin ol memba blong Saeon Kamp, mo oli stap talem ol pikinini abaot eksperiens blong olgeta. ?Wanem nao ol pikinini oli wantem lanem aot long ol eksperiens ia?

• Tugeta, ridim Doktrin mo Ol Kavenan 105:13–14, mo eksplenem se taem Saeon Kamp i kasem Misuri, Lod i talem long olgeta blong oli no traem blong tekembak graon blong Ol Sent. Sam memba blong kamp oli no glad mo oli stap askem olgetawan se from wanem oli bin kasem komanmen blong go long ples ia. ?Wanem nao bae yumi mekem taem yumi no andastanem ol risen biaen long wan komanmen? Serem sam stori aot long “Ol Voes blong Restoresen: Saeon Kamp” (insaed long Kam Folem Mi—Blong Wanwan Man, Woman mo Famli) blong helpem ol pikinini blong luk se ol blesing oli kam taem yumi stap obei long ol komanmen we God i givim long yumi tru long ol profet blong Hem, iven sapos yumi no andastanem evri risen.

Stap Leftemap Tingting blong Lanem Samting long Hom

Leftemap tingting ol pikinini blong serem ol eksperiens blong Saeon Kamp wetem wan long hom, wetem wan lesen we oli lanem aot long ol eksperiens ia. O, invaetem olgeta blong tingting abaot wan samting we God i bin blesem olgeta wetem we oli save serem wetem wan long nid.

Stap Kam Antap long Fasin blong Yumi blong Stap Tij

Toktok raon long fasin blong spolem man wetem lav. “Samtaem, wan pikinini i mekem sam samting long wan wei we bae i stopem ol narawan blong lanem samting insaed long klas. Taem hemia i hapen, gat longfala tingting, gat lav, mo andastanem olgeta from ol jalenj we maet pikinini ia i stap fesem. … Sapos pikinini ia we i stap spolem ol narawan i gat ol spesel nid, toktok long wod o stek disabiliti speselis, o visitim [disabilities.ChurchofJesusChrist.org] blong faenemaot wei blong lukluk gud long olgeta nid ia” (Teaching in the Savior’s Way, 26).