“30 Ogis–5 Septemba. Doktrin mo Ol Kavenan 94–97: ‘Blong Mi Sevem Saeon,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“30 Ogis–5 Septemba. Doktrin mo Ol Kavenan 94–97” Kam Folem Mi—Blong Wanwan Man, Woman mo Famli: 2021
Ketlan Tempol, i kam long Al Rounds
30 Ogis–5 Septemba
Doktrin mo Ol Kavenan 94–97
“Blong Mi Sevem Saeon”
?Wanem prinsipol mo doktrin i kamaot klia long yu taem yu bin stadi long Doktrin mo Ol Kavenan 94–97? Meksua blong raetemdaon ol filing mo tingting blong yu.
Raetemdaon Ol Filing mo Tingting blong Yu
Taem we Lod i bin givim komanmen long Moses blong bildim wan tabenakol, Hem i bin talem long Moses blong “mekem olgeta samting ya, stret olsem plan ya we mi mi soemaot finis long yu, antap long bigfala hil ya” (Hibrus 8:5; luk tu long Eksodas 25:8–9). Tabenakol tu i senta blong kamp blong Isrel long waelples (long luk Namba 2:1–2). Afta long hemia, God i bin givim komanmen long Solomon mo ol pipol blong hem blong bildim wan tempol we i folem paten o plan ia we Hem i bin talemaot finis tru long revelesen (luk long 1 Kronikel 28:12, 19).
Taem we Lod i putumbak gospel ia we i fulwan, Hem i bin givim oda long Josef Smit blong bildim ol tempol folem wan plan we Hem i bin talemaot tru long revelesen. “Oli mas bildim haos ia, i no folem fasin blong wol,” Lod i talem. “Oli mas bildim haos ia folem fasin we bambae mi soemaot” (Doktrin mo Ol Kavenan 95:13–14; luk tu long 97:10). Semmak wetem tabenakol ia long waelples, tempol hem i blong i wan stamba samting long Ketlan (luk long Doktrin mo Ol Kavenan 94:1).
Tedei, oli faenem ol haos blong Lod raon long wol. Iven sapos oli no stap long senta o medel blong ol taon blong yumi, oli save stap long senta blong laef blong yumi. I nomata we wanwan tempol i defren long wei we hem i luk, insaed long olgeta, yumi save lanem semfala tabu paten—wan plan we i kam long heven, blong tekem yumi i gobak long ples we God i stap long hem. Ol odinens we oli tabu mo oli no save finis, oli helpem yumi blong bildimap laef blong yumi, mo blong mekem ol famli blong yumi oli kam strong moa “i no folem fasin blong wol ia” be i folem plan ia we God i soem long yumi.
Luk long Saints, 1:169–70; “A House for Our God,” Revelations in Context, 165–73.
Sam Aedia blong Skripja Stadi blong Yuwan
Doktrin mo Ol Kavenan 94; 97:15–17
Lod i save stap wetem mi long evri dei laef blong mi.
Ol instraksen insaed long Doktrin mo Ol Kavenan 94 mo 97 God i bin givim long semfala dei—2 Ogis 1833. Seksen 97 i lukluk long wan tempol we, plan blong hem, i blong bildim long Jakson Kaonti, Misuri, be seksen 94 i tokbaot ol administresen bilding long Ketlan, Ohaeo. Bae yu luk se i gat sam semmak samting long wanem we Lod i stap talem abaot ol defren kaen bilding (luk long Doktrin mo Ol Kavenan 94:2–12; 97:10–17). Taem yu stap tingting hevi long ol instraksen ia, tingting long wanem yu save mekem blong gat eksperiens long glori blong God mo presens blong Hem, tugeta insaed long ol bilding blong Jos mo long evri dei laef blong yu.
Lod i stretem olgeta we Hem i lavem.
Samples faef manis i pas stat long Jenuware 1833, taem we Lod i bin givim komanmen long Ol Sent long Ketlan blong bildim wan haos blong God mo holem wan tabu asembli (luk long Doktrin mo Ol Kavenan 88:117–19). Taem we oli kasem revelesen ia we oli raetemdaon long seksen 95, oli no bin mekem yet folem komanmen ia. ?Wanem nao yu lanem aot long wei ia we Lod i stretem Ol Sent long revelesen ia? ?I gat ol komanmen o toktok blong kaonsel we yu no bin mekem folem yet? ?Wanem nao yumi filim insperesen blong go mekem?
Luk tu long D. Todd Christofferson, “As Many as I Love, I Rebuke and Chasten,” Ensign o Liahona, May 2011, 97–100.
Doktrin mo Ol Kavenan 95:8, 11–17; 97:10–17
Insaed long tempol, God i blesem ol pipol blong Hem.
Afta we Lod i tok strong long olgeta from se oli no bildim haos blong Lod long Ketlan, ol lida blong Jos oli jusum wan ples long wan fil blong wit we bae oli bild long hem. Haeram Smit, brata blong Profet, kwiktaem i ron blong karem wan huknaef mo i stat blong kliarem fil ia. “Mifala i stap rere blong bildim wan haos long Lod,” hem i talem, “mo mi gat strong tingting blong mi faswan long wok ia” (insaed long Teachings of Presidents of the Church: Joseph Smith [2007], 271, 273). Tingting hevi long strong tingting blong Haeram taem yu stap ridim Doktrin mo Ol Kavenan 95:8, 11–17; 97:10–17. ?Wanem nao yu faenem we i givim insperesen long yu blong yu gat wan semmak filing, insaed long yu, blong yu kasem ol blesing blong tempol?
Haeram Smit i Kliarem Graon, i kam long Joseph Brickey
Doktrin mo Ol Kavenan 97:18–28
Saeon i olgeta “we hat blong olgeta i klin evriwan”.
Profet Josef Smit i talem: “Yumi sapos blong gat wok blong bildimap Saeon, olsem bigfala stamba gol blong yumi.” (Teachings: Joseph Smith, 186). Long olgeta Sent long ol yia 1830, Saeon ia i wan ples we i stret “siti blong God blong yumi (Doktrin mo Ol Kavenan 97:19). Be long revelesen we oli raetemdaon long seksen 97, Lod i mekem se yumi lukluk i go moa longwe long hemia. Saeon i tokbaot tu wan pipol—“olgeta we hat blong olgeta i klin evriwan” (ves 21). Taem yu stap ridim ol ves 18–28, tingting abaot mining ia taem yu ridim toktok ia, “Saeon.” ?Hem i minim wanem long yu blong gat hat we i klin evriwan? ?Olsem wanem nao tempol i help blong mekem se “fasin blong sevem Saeon” i hapen? (ves 12).
Luk tu long Moses 7:18; Gospel Topics, “Zion,” topics.ChurchofJesusChrist.org.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 95:8.?Olsem wanem we blong mekem mo kipim ol kavenan blong tempol i tekem “paoa blong heven” i kam insaed long laef blong yumi? Maet ol memba blong famli oli save serem olsem wanem oli filim abaot tempol, o oli serem ol eksperiens taem we oli bin kasem blesing wetem paoa we i kam long heven tru long wosip insaed long tempol.
Blong helpem olgeta we oli stap rere blong go insaed long tempol, yu save luklukbak long ol vidio, ol foto, mo instraksen we oli faenem long temples.ChurchofJesusChrist.org. Blong helpem ol pikinini blong lanem abaot tempol, yu save yusum “Rod blong Yu I Go long Tempol” (insaed long Ol Tempol blong Jos Ia blong Jisas Kraes Ia blong Ol Lata-dei Sent [spesel namba blong o Liahona, Okt 2010], 72–75).
-
Doktrin mo Ol Kavenan 95:1–11.?Wanem nao yu lanem abaot fasin blong stretem man aot long ol ves ia? ?Wanem nao yumi lanem abaot Lod? ?Olsem wanem ol niu tingting ia oli jenisim wei we yumi save akseptem taem wan i stretem yumi, o taem we yumi stretem wan narawan?
-
Doktrin mo Ol Kavenan 97:8.Folem ves ia, ?olsem wanem Lod i save “akseptem” yumi? ?Long wanem wei nao, hemia i defren long taem we wol nao i akseptem yumi? ?Hem i minim wanem blong “folem ol kavenan blong [yumi] tru long sakrifaes”? ?Olsem wanem nao yumi bin mekem hemia?
-
Doktrin mo Ol Kavenan 97:10–21.Profet Josef Smit i bin tijim: “Eni ples we Ol Sent oli kam tugeta, hem i Saeon; wan ples we evri stret mo gud man [o woman] we bae i bildim wan ples blong sefti blong ol pikinini blong hem” (Teachings: Joseph Smith, 186). ?Olsem wanem nao yumi save bildim Saeon insaed long hom blong yumi? ?Wanem ansa yumi faenem insaed long Doktrin mo Ol Kavenan 97:10–21? Olsem wan famli, jusum wan prinsipol blong lukluk nomo long hem long wik ia.
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan Singsing: “I Love to See the Temple,” Children’s Songbook,95.
Stap Kam Antap long Stadi blong Yuwan
Raetemdaon ol eksperiens blong yu. Raetemdaon ol eksperiens we yu bin hat wetem ol prinsipol mo doktrin we yu stap lan abaot. Ol eksperiens ia oli save kam pat blong wan histri blong yuwan we bae i blesem ol fiuja jeneresen.
Stap Bildim Ketlan Tempol, i kam long Walter Rane