“23–29 Ogis. Doktrin mo Ol Kavenan 93: ‘Kasem Ful Paoa mo Glori blong Hem,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“23–29 Ogis. Doktrin mo Ol Kavenan 93,” Kam Folem Mi—Blong Wanwan Man, Woman mo Famli: 2021
Mi Luk Pikinini blong Man long Raet Han blong God, i kam long Walter Rane
“23–29 Ogis.
Doktrin mo Ol Kavenan 93
“Kasem Ful Paoa mo Glori blong Hem”
Doktrin mo Ol Kavenan 93 i tijim se “trutok hem i wan save abaot ol samting olsem we oli stap, olsem we oli bin stap, mo olsem we bae oli kam” (ves 24). Taem yu stap ridim stadi long seksen ia, lukaotem wanem i wan trutok mo raetemdaon wanem yu lanem. ?Wanem nao yu yu glad blong mekem blong kasem trutok ia? (luk long ol ves 27–28).
Raetemdaon Ol Filing mo Tingting blong Yu
Josef Smit i bin tijim: “Taem yu klaem i go antap long wan lada, yu mas stat daon evriwan, mo yu go antap, step afta step, kasem taem yu kasem antap evriwan; hem i olsem wetem ol prinsipol blong gospel—yu mas stat wetem faswan, mo gogo kasem yu lanem evri prinsipol blong kam olsem wan god” (Teachings of Presidents of the Church: Joseph Smith [2007], 268).
Samtaem, lada ia blong kam olsem wan god, i luk se i hae olgeta i no posibol blong kasem antap, be yumi bin bon i kam long wol blong yumi klaem i go kasem antap evriwan. Nomata wanem samting yumi luk se yumi no save mekem, Papa long Heven mo Pikinini blong Hem, Tufala i luk wan samting we i gud tumas long yumi, wan samting we i olsem blong wan god. Semmak olsem we Jisas Kraes “i bin stap long stat wetem Papa,” be “yumi tu” yumi bin stap (Doktrin mo Ol Kavenan 93:21, 23). Semmak olsem we Hem i bin “kasem wan gladhat mo i gro mo kasem moa gladhat, kasem taem hem i kasem ful paoa mo glori,” yu tu, “i kasem gladhat from wan gladhat” (ol ves 13, 20). Gospel we i kambak i tijim yumi abaot huia stret God, mo tu, i stap tijim yumi abaot yumiwan mo wanem yumi save kam. Nomata ol hadwok blong “”nogudwan ia” (ves 39)—mo nomata wanem yu filim se yu no gat evri samting—yu yu wan stret pikinini blong God wetem paoa blong save kasem “long stret taem, … ful paoa mo glori blong hem” (ves 19).
Sam Aedia blong Skripja Stadi blong Yuwan
Yumi stap wosipim God we i Papa, mo Pikinini blong Hem, Jisas Kraes.
Taem Hem i stap tokbaot revelesen long Doktrin mo Ol Kavenan 93, Lod i eksplenem: “Mi givim long yufala ol toktok ia blong yufala i andastanem mo save olsem wanem blong wosipim mi, mo save wanem nao yufala i stap wosipim, blong yufala i kam long Papa tru long nem blong mi, mo long stret taem, kasem ful paoa mo glori blong hem” (ves 19). Taem yu stap stadi long revelesen ia, makem ol trutok we yu faenem abaot Ol Man we yumi stap wosipim olgeta: God we i Papa, mo Pikinini blong Hem, Jisas Kraes. ?Wanem nao yu lanem abaot “wei blong wosipim” Tufala? ? abaot olsem wanem hem i wei blong “kam long Papa?”
Profet Josef Smit i bin tijim se: “Sapos man i no save andastanem fasin blong God, nao oli no andastanem olgetawan bakegen” (Teachings: Joseph Smith, 40). Taem yu stap lan abaot Sevya taem yu stap stadi long Doktrin mo Ol Kavenan 93, lukaotem tu wanem yu stap lanem abaot yuwan. Eksampol: ?Wanem nao yu lanem abaot Hem aot long ol ves 3, 12, 21, mo 26? ?Wanem semmak trutok nao yu faenem abaot yuwan long ol ves 20, 23, mo 28–29? (Luk tu long 1 Jon 3:2; 3 Nifae 27:27; Dean M. Davies, “The Blessings of Worship,” Ensign o Liahona, Nov. 2016, 93–95.)
Glori blong God hem i laet mo trutok.
Maet yu luk finis se glori, laet mo trutok oli kamaot fulap taem insaed long revelesen ia. Taem yu stap stadi long ol ves 21–39, krietem wan lis blong ol trutok we yu lanem abaot glori, laet mo trutok. ?Olsem wanem ol trutok ia oli givim insperesen long yu blong lukaotem moa laet mo trutok? ?Olsem wanem ol trutok ia oli jenisim wei we yu stap laef long evri dei laef blong yu?
Yumi kasem laet mo trutok taem we yumi stap obei long ol komanmen blong God.
Doktrin mo Ol Kavenan 93:40–50
“Putum oda insaed long haos blong yufala.”
Samples long ves 40, i luk se Doktrin mo Ol Kavenan 93 i stap kamaot sloslo long ol tijing abaot glori blong God mo ol tabu paoa we yumiwan i save kasem, i go long instraksen abaot wei blong stap olsem wan papa mo mama, mo fasin blong putum oda insaed long haos blong yumi. ?Olsem wanem nao ol tijing blong Lod abaot laet, trutok mo glori insaed long ol ves 1–39 oli helpem yu blong andastanem mo folem kaonsel insaed long ol ves 40–50?
Luk tu long David A. Bednar, “More Diligent and Concerned at Home,” Ensign o Liahona, Nov. 2009, 17–20.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 93:2.?Olsem wanem nao Jisas Kraes i wan “tru laet” insaed long laef blong yumi? ?Long wanem wei nao yumi bin luk laet blong Hem i stap long ol nara pipol raon long yumi?
-
Doktrin mo Ol Kavenan 93:3–29.Blong helpem famli blong yu blong toktok raon long wanem we oli bin lanem insaed long seksen 93 abaot Sevya mo olgetawan, yu save plei long wan maj gem. Eksampol, yu save rere long wan set blong ol kad wetem ol ves we oli stap long seksen 93 we oli stap tijim ol trutok abaot Sevya (luk ol ves 3, 12, 21, 26) mo wan nara set we i tijim wan samting semmak abaot yumiwan bakegen (luk long ol ves 20, 23, 28–29). Wan afta wan, ol memba blong famli oli save kam mo jusum wan kad long wanwan set, oli ridim ol ves, mo oli traem blong faenem ol trutok we oli maj. ?Olsem wanem nao ol trutok ia oli lidim wei we yumi stap filim abaot Sevya mo abaot yumiwan bakegen?
-
Doktrin mo Ol Kavenan 93:12–13, 20.?Hem i minim wanem blong kasem “gladhat from wan gladhat” mo “wan gladhat mo i gro mo kasem moa gladhat”? (ol ves 12–13). ?Wanem nao ol ves ia oli stap talem long yumi abaot wei we yumi stap groap mo stap lanem samting? ?Olsem wanem we, taem yumi save hemia, bae i jenisim wei we yumi stap tritim ol nara man—mo yumiwan bakegen?
-
Doktrin mo Ol Kavenan 93:24.Ridim mining blong trutok ia we oli faenem insaed long ves ia, mo invaetem ol memba blong famli blong serem wan samting aot long seksen 93 we oli ting se bae i wan trutok we i no gat praes we i inaf long hem. ?Wanem nao ol nara mining blong trutok we yumi faenem insaed long Jon 14:6; Jekob 4:13; o wan hym abaot trutok olsem “?Wanem Nao Trutok?” (STSP, pej 31).
-
Doktrin mo Ol Kavenan 93:40.Maet, taem yu ridim ves ia, famli blong yu i save singsing wan singsing abaot fasin blong lanem samting insaed long hom, olsem “Tijim Mi blong Wokbaot long Laet Ya blong God” (STSP, ol pej 66–67). Maet ol pikinini oli wantem mekemap ol aksen we i go wetem ol toktok ia. ?Wanem nao yu filim insperesen blong mekem blong invaetem moa “laet mo trutok” insaed long hom blong yu?
-
Doktrin mo Ol Kavenan 93:41–50.Olsem wan famli, kaonsel tugeta abaot wanem we bae i no “stret insaed long haos blong [yufala].” ?Wanem nao yumi save mekem blong “putum oda insaed long haos blong [yumi]”? (Ol ves 43–44).
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Mi Pikinini blong God,” STSP, pej 58.
Stap Kam Antap long Fasin blong Yumi blong Stap Tij
Rid i bitim wan taem. Yu save jusum blong ridim Doktrin mo Ol Kavenan 93 i moa bitim wan taem long wik ia. Evri taem we yu rid, bae yu luk se ol defren trutok ia oli kamkamaot klia long yu, o oli givim insperesen long yu long wan niu wei. Taem yu rid plante taem, bae i givim tu janis long yu blong yu tingting hevi moa dip.
Laet mo Trutok, i kam long Simon Dewey