“26 Julae–1 Ogis. Doktrin mo Ol Kavenan 84: ‘Paoa we I Olsem Hemia blong God,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“26 Julae–1 Ogis. Doktrin mo Ol Kavenan 84,” Kam Folem Mi—Blong Wanwan Man, Woman mo Famli: 2021
Restoresen, i kam long Lis Lemon Swindel
26 Julae–1 Ogis
Doktrin mo Ol Kavenan 84
“Paoa we I Olsem Hemia blong God”
Taem yu stap rid long Doktrin mo Ol Kavenan 84, tingting hevi long ol kaonsel blong “laef folem evri toktok we i kamaot long maot blong God” (ves 44). ?Olsem wanem nao bae yu laef folem ol toktok long revelesen ia?
Raetemdaon Ol Filing mo Tingting blong Yu
Stat long taem we prishud i bin kambak bakegen long 1829, Ol Lata-dei Sent oli bin gat blesing tru long tabu paoa ia. Oli bin kasem baptaes, kasem presen we i Tabu Spirit, mo oli bin singaot blong wok tru long prishud atoriti, semmak fulap olsem yumi tedei. Be blong save yusum prishud paoa i no semmak samting olsem blong andastanem fulwan, mo God i gat fulap moa we I wantem Ol Sent blong Hem blong andastanem—speseli wetem ol restoresen blong ol tempol odinens. Revelesen blong prishud long 1832, we naoia i Doktrin mo Ol Kavenan 84, i mekem lukluk blong Ol Sent i kam bigwan moa long wanem nao i rili prishud. Mo i save semmak blong yumi tedei. Afta evri samting, i gat fulap blong lanem abaot tabu paoa we i holem “ki blong kasem save long saed blong God,” we i soemaot “paoa we i olsem hemia blong God,” mo hemia i stap rere long yumi blong “luk fes blong God, we i Papa, mo laef” (ol ves 19–22).
Sam Aedia blong Skripja Stadi blong Yuwan
Doktrin mo Ol Kavenan 84:1–5, 17–28
Mi save yusum prishud blong God mo ol blesing blong Hem.
Taem yu tingting long toktok ia prishud, wanem nao i kam long maen blong yu? ?Hamas taem yu stap tingbaot prishud mo paoa blong hem long evri dei laef blong yu? Afta blong tingting hevi long ol kwestin ia, stadi Doktrin mo Ol Kavenan 84:1–5, 17–28, mo tingting long wanem Lod i wantem yu blong save abaot prishud paoa blong Hem. ?Olsem wanem yu save yusum ol ves ia blong tokbaot gud prishud long wan man mo eksplenem ol stamba tingting blong hem?
Maet bae yu wantem tingting hevi tu long ol prishud odinens we yu bin tekpat long hem. ?Olsem wanem nao yu bin luk “paoa we i olsem hemia blong God” (ves 20) i kamaot klia long olgeta? Tingting hevi long wanem Lod i wantem yu blong mekem blong kasem paoa blong Hem moa long laef blong yu.
Luk tu long M. Russell Ballard, “Men and Women and Priesthood Power,” Ensign, Sept. 2014, 28–33; Gospel Topics, “Priesthood,” topics.ChurchofJesusChrist.org.
Doktrin mo Ol Kavenan 84:31–42
Sapos mi akseptem Lod mo ol wokman blong Hem, bae mi kasem evri samting we Papa i gat.
Elda Paul B. Pieper i bin tijim: “Hem i intresting long promes mo kavenan blong prishud [Doktrin mo Ol Kavenan 84:31–42], Lod i yusum ol toktok kasem mo akseptem. Hem i no yusum toktok ia odenem. Hem i insaed long tempol we ol man mo woman—tugeta—i kasem mo akseptem ol blesing mo paoa blong tugeta Aronik mo Melkesedek Prishud” (“Revealed Realities of Mortality,” Ensign, Jan. 2016, 21).
Taem yu stap stadi Doktrin mo Ol Kavenan 84:31–42, lukaotem ol toktok “kasem” mo “akseptem.” Tingting hevi long wanem ol toktok ia i minim long ol sentens ia. ?Olsem wanem nao yu “[stap] akseptem” Lod mo ol wokman blong Hem?
Yu save tek not tu long ol promes insaed long ol ves ia we i go wetem strong promes mo kavenan blong prishud, we God i “no save brekem” (ves 40). ?Wanem nao yu faenem we i givim insperesen long yu blong stap fetful moa blong stap akseptem Papa, ol wokman blong Hem, mo prishud paoa blong Hem?
Luk tu long Gaed long Ol Skripja, “Kavenan,” “Promes, Strong Promes,” olskripja.ChurchofJesusChrist.org.
Doktrin mo Ol Kavenan 84:43–58
Mi kam long Kraes mo mekem folem ol toktok blong Hem mo lisin long Spirit blong Hem.
Blong stap ridim ol skripja mo ol toktok blong profet evri taem i minim moa bitim blong krosemaot wan wok blong mekem long lis blong ol samting blong yu we nid blong mekem long saed blong spirit. ?Wanem ol trutok we yu faenem long Doktrin mo Ol Kavenan 84:43–58 we i save helpem yu blong andastanem from wanem yu nid blong stadi tok blong God oltaem? Luksave wanem i defren long laet bitwin laet mo tudak long ol ves ia; ?olsem wanem “wok strong wetem strong tingting blong folem ol toktok blong laef we i no save finis” i karem laet, trutok, mo “Spirit blong Jisas Kraes” i kam long laef blong yu? (ol ves 43, 45).
Luk tu long 2 Nifae 32:3; “The Book of Mormon—Keystone of Our Religion,” Teachings of Presidents of the Church: Ezra Taft Benson (2014), 125–35.
Blong stap stadi long ol skripja i helpem mi blong filim paoa blong Spirit.
Doktrin mo Ol Kavenan 84:62–91
Lod bambae i stap wetem taem mi stap givim seves long Hem.
Taem yu stap ridim ol ves ia, yu save luksave ol wei we Lod i bin talem se bae Hem i sapotem ol Aposol blong Hem mo ol misinari. ?Olsem wanem nao, maet, bae ol promes ia i aplae long wok we Hem i bin askem yu blong mekem? Eksampol, ?olsem wanem ol promes insaed long ves 88 i bin kam tru mo hapen long laef blong yu?
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 84:6–18.Afta blong ridim abaot olsem wanem Moses i bin kasem prishud atoriti blong hem, wan famli blong yu we i gat prishud o wan brata blong givhan i save serem eksperiens blong hem we oli bin odenem hem i go long wan ofis blong prishud. Sapos i posibol, Hem i save serem mo tokbaot prishud laen blong atoriti blong hem. ?From wanem i impoten blong yumi folembak prishud atoriti long Jos tedei i gobak long atoriti blong Jisas Kraes? Blong askem wan prishud laen blong atoriti, sendem wan imel i go long lineofauthority@ChurchofJesusChrist.org.
-
Doktrin mo Ol Kavenan 84:20–21.?Wetaem famli blong yu i bin eksperiensem “paoa we i olsem hemia blong God” we i kamaot klia tru long wan odinens olsem baptaes o sakramen? Maet bae yu save tokbaot olsem wanem ol odinens ia oli karem paoa blong God i kam long ol laef blong yumi. Yu save soem tu wan pikja blong tempol mo storian raon long olsem wanem ol odinens blong tempol i givim yumi moa paoa blong kam olsem Sevya. Maet yu wantem blong singsing wan singsing abaot prishud, olsem “The Priesthood Is Restored” (Children’s Songbook, 89), mo storian raon long wanem singsing ia i tijim abaot prishud.
-
Doktrin mo Ol Kavenan 84:43–44.Yu save rere long wan kakae o wan swit kakae tugeta mo putum nem long wanwan ingridien wetem wan toktok o wan sot sentens we i kam long ves 44. ?From wanem i impoten blong yumi putum evri ingridien? ?From wanem i impoten blong laef folem evri tok blong God?
-
Doktrin mo Ol Kavenan 84:98–102.?Wanem nao yumi lanem abaot Jisas Kraes aot long “niu singsing” (ves 98) long ol ves ia? ?Wanem nao yumi save mekem long dei blong yumi blong helpem ol situesen we oli tokbaot long singsing ia?
-
Doktrin mo Ol Kavenan 84:106–10.?Olsem wanem nao famli blong yumi bae i “evriwan i kam antap tugeta” tru long ol presen mo traehad blong “wanwan memba”? (ves 110).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “The Priesthood Is Restored,” Children’s Songbook, 89; luk long “Sam Aedia blong Kam Antap long Famli Skripja Stadi.”
Stap Kam Antap long Fasin blong Yumi blong Stap Tij
Givimaot mo folemap ol invitesen blong tekem aksen. Taem yu invaetem famli blong yu blong mekem folem wanem oli stap lanem, yu stap soem long olgeta se gospel i wan samting blong laef folem, be i no blong tokbaot nomo. ?Wanem nao yu save invaetem olgeta blong aktem aot long stadi blong Doktrin mo Ol Kavenan 84?
Rom Itali Tempol