2–8 Ogis

Doktrin mo Ol Kavenan 85–87

“Yufala I Mas Stanap long Ol Tabu Ples”

Spirit i save lidim yu blong stadi long ol prinsipol we oli stap long ol seksen 85–87 we oli no haelaetem long aotlaen ia. Folem ol toktok blong Hem.

Raetemdaon Ol Filing mo Tingting blong Yu

Fulap taem Krismes Dei hem i wan taem blong tingting hevi long ol mesej olsem “pis long wol” mo “pis i stap wetem ol man” (luk long Luk 2:14). Be long 25 Disemba, 1832, maen blong Josef Smit i fulap long ol strong toktok blong karemaot laef blong wo. Saot Karolina i jes agensem gavman blong Ol Yunaeted Stet mo stap rere blong faet. Mo Lod i bin soemaot long Josef se hemia i stat nomo: “Wo,” Hem i talem strong, “bae i kapsaet antap long evri nesen” (Doktrin mo Ol Kavenan 87:2). I olsem se profesi ia bae i no longtaem nomo bae i kam blong hapen.

Be afta i no hapen. Long taem blong sam wik nomo, Saot Karolina mo Y.S gavman i bin kam long wan agrimen, mo wo i nomo gohed. Be revelesen i no hapen o kam tru oltaem long taem o long wei we yumi tingting long hem. Kolosap 30 yia i pas, long taem afta we Josef Smit oli kilim hem i ded mo Ol Sent oli bin muv i go long wes, Saot Karolina i go agens mo wan sivil wo i bin folem. Stat long taem ia, wo truaot long wol i mekem “wol [i] krae sore” (Doktrin mo Ol Kavenan 87:6). Taem we profesi ia i hapen fulwan, valiu blong revelesen ia bae i nomo save soemaot fiuja tumas se wetaem bae i disasta i kam be, i tijim moa wanem blong mekem hapen taem disasta i hapen. Kaonsel i semmak long 1831, 1861, mo 2021: “Stanap long ol tabu ples, mo no mas muv,” (ves 8).

Sam Aedia blong Skripja Stadi blong Yuwan

Doktrin mo Ol Kavenan 85:1–2

Hem i gud “blong kipim wan histri.”

“Histri” we oli tokbaot gud insaed long ves 1 i bin rekodem ol nem blong olgeta we oli bin “kasem ol pat blong olgeta folem loa” long Saeon (luk tu long Doktrin mo Ol Kavenan 72:24–26). Nomata hemia, histri ia i moa bitim fasin blong seremaot—be i wan rekod we i gat valiu tu blong Ol Sent “long saed blong fasin blong laef blong olgeta, fet blong olgeta, mo ol wok”(ves 2).

?Yu stap kipim wan histri blong yuwan o wan jenol? ?Wanem nao yu save rekodem long saed blong fasin blong laef, fet, mo ol wok blong yu we maet bae i wan blesing blong ol fiuja jeneresen? ?Olsem wanem nao maet, bae histri ia i wan blesing blong yu?

Luk tu long “Journals: ‘Of Far More Worth than Gold,’” Teachings of Presidents of the Church: Wilford Woodruff (2011), 125–33; “Turning Hearts” (video, ChurchofJesusChrist.org).

Doktrin mo Ol Kavenan 85:6.

Spirit i stap toktok wetem “wan kwaet, smol voes.”

Tingting hevi ol toktok we Josef Smit i stap yusum blong tokbaot Spirit long Doktrin mo Ol Kavenan 85:6. ?Long wanem wei nao voes blong Spirit i “kwaet” mo “smol”? ?Wanem sam long ol samting we Spirit i “stikim” long laef blong yu?

Taem yu stap tingting abaot olsem wanem nao Spirit i stap toktok long yu, tingting long ol samting ia we i kam tru long Josef Smit: Doktrin mo Ol Kavenan 6:22–24; 8:2–3; 9:7–9; 11:12–13; 128:1. Folem wanem we yu bin ridim, ?wanem nao yu filim se yu nid blong mekem blong save luksave moa voes blong Spirit?

Luk tu long 1 King 19:11–12; Hileman 5:30.

Blong stap stadi ol skripja i helpem yumi blong harem Tabu Spirit.

Doktrin mo Ol Kavenan 86

Olgeta we oli stret mo gud oli kam tugeta long ol las dei.

Doktrin mo Ol Kavenan 86:1–7 i tokbaot olsem wanem Lod i eksplenem parabol blong gudfala sid mo rabis gras, wetem wan mining we kolosap i defren smol long wanem Hem i givim long Matiu 13:24–30, 37–43. ?Taem yu stap komperem tufala ia, wanem ol samting we defren we yu luksave? Tingting se from wanem parabol ia—wetem ol samting we oli defren—i impoten blong ripitim “long ol las dei, mo tu, naoia” (Doktrin mo Ol Kavenan 86:4). ?Wanem nao yu save laenem aot long ol parabol ia mo mining blong hem long taem blong yumi naoia?

Olsem we oli rekodem long ol ves 8–11, Lod i bin tokbaot prishud, restoresen, mo fasin blong Hem i seven ol pipol blong Hem. ?Wanem koneksen nao yu save luk bitwin ol ves ia mo parabol blong gudfala sid mo rabis gras? ?Olsem wanem nao yu save stap olsem “wan sevya long pipol blong [Lod]”? (ves 11).

Luk tu long Gospel Topics, “Apostasy,” “Restoration of the Priesthood,” topics.ChurchofJesusChrist.org.

Doktrin mo Ol Kavenan 87

Pis, oli faenem long “ol tabu ples.”

Antap long ol denja long saed blong bodi “ blad we i ron… [mo] hadtaem blong kasem kaekae, mo ol bigfala sik, mo graon we i seksek” (Doktrin mo Ol Kavenan 87:6), kaonsel long revelesen ia i save aplae tu long ol denja long saed blong spirit we yumi evriwan i fesem long ol las dei ia. ?Wanem nao “ol tabu ples” (ves 8) we yu save faenem pis mo stap sef? ?Wanem nao i mekem wan tabu ples? Antap long ol ples, maet bae i gat ol tabu taem, tabu praktis, o tabu tingting we i save givim pis. ?Wanem i minim blong “no muvmuv” long ol ples ia?

Luk tu long Henry B. Eyring, “Wan Hom we Spirit I Stastap long Hem,” Ensign o Liahona, Mei 2019, 22–25; Saints, 1:163–64; “Peace and War,” Revelations in Context, 158–64.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 85:6.?Olsem wanem yu save tijim famli blong yu blong luksave kwaet, smol voes blong Spirit? Maet yu save plei wan gem we wan man bae i wispa sam impoten instraksen long medel blong ol fulap noes. ?Wanem nao i save tekemaot tingting blong yumi blong harem Tabu Spirit? Maet ol memba blong famli oli save serem wanem oli stap mekem blong harem voes blong Spirit.

Doktrin mo Ol Kavenan 86.Droing o stap lukluk ol pikja i save helpem famli blong yu i andastanem parabol blong gudfala sid mo rabis gras. Maet yu wantem stat wetem ol pikja blong ol samting we oli tokbaot gud long Matiu13:24–30. Afta famli blong yu i save putum nem long ol pikja mo eksplenem se i kam long Doktrin mo Ol Kavenan 86:1–7 ?Olsem wanem nao yumi i olsem ol gudfala sid? ?Olsem wanem nao yu save kam olsem ol enjel we oli stap karem ol gudfala sid i kam tugeta?

Doktrin mo Ol Kavenan 87:8.Blong statem wan storian raon long olsem wanem blong mekem hom blong yumi i kam wan ples we i tabu moa, yu save invaetem ol memba blong famli blong disaenem wan hom blong wan man we i lavem Sevya. Hemia i save lid i go long ol aedia abaot olsem wanem blong “disaenem bakegen” hom blong yu blong mekem i kam wan ples blong pis long medel blong ol denja long saed blong spirit we i stap long wol. Ol singsing olsem “Lav long Hom,” “Home Can Be a Heaven on Earth” (Hymns, nos. 294, 298), o “Where Love Is” (Children’s Songbook, 138–39) i save givim sam aedia long yu.

Blong gat moa tingting blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Where Love Is,” Children’s Songbook, 138–39.

Stap Kam Antap long Fasin blong Yumi blong Stap Tij

Yusum tingting blong yu blong mekem samting i moa intresting. Taem yu tijim famli blong yu aot long ol skripja, no stopem yuwan long ol kwestin mo ol aedia blong aktiviti we oli talem long aotlaen ia. Mekem ol aedia i pusum tingting blong yu blong mekem samting i moa intresting. Tingbaot wanem famli blong yu bae i enjoem mo bae i helpem olgeta blong faenem ol koneksen bitwin ol skripja mo ol laef blong olgeta.

Lod i yusum parabol blong ol gudfala sid mo rabis gras blong soemaot olsem wanem ol pipol blong Hem bae oli kam tugeta long ol las dei.