16–22 Ogis

Doktrin mo Ol Kavenan 89–92

“Wan Prinsipol Wetem Wan Promes”

Taem yu stap ridim Doktrin mo Ol Kavenan 89–92, raetemdaon eni filing mo tingting we yu kasem. Lisin gud long olsem wanem “Spirit i [stap] soemaot trutok” long yu taem yu stap stadi (Doktrin mo Ol Kavenan 91:4).

Raetemdaon Ol Filing mo Tingting blong Yu

Long Skul blong Ol Profet, Profet Josef Smit i bin tijim ol elda blong Isrel abaot stap bildim kingdom blong God long wol ia. Oli bin storian raon long trutok long saed blong spirit, prea tugeta, lego kakae, mo rere blong prijim gospel. Be i gat wan samting abaot taem ia we i defren smol long mifala tedei, mo Ema Smit i filim i no stret tu. Long taem blong miting, ol man oli smok mo kakae tabak, we i no nomol tumas blong taem ia, be i bin mekem mak long ol flo blong wud mo i mekem ples i smel strong. Ema i serem ol wari blong hem wetem Josef, mo Josef i bin askem Lod. Risal blong hem i wan revelesen we i go longwe moa bitim smok mo toti mak blong tabak. Revelesen ia i bin givim Ol Sent, mo ol jeneresen we bae oli kam yet, “wan prinsipol wetem wan promes”—ol promes blong helt long saed blong bodi, “waes tingting,” mo “ol bigfala rij save” (Doktrin mo Ol Kavenan 89:3, 19).

Luk tu long Saints, 1:166–68.

Sam Aedia blong Skripja Stadi blong Yuwan

Doktrin mo Ol Kavenan 89

Tok blong Waes i “wan prinsipol wetem wan promes.”

Taem ol elda long Skul blong ol Profet oli bin harem Josef Smit i ridim Tok blong Waes blong fas taem, wan taem nomo oli “sakemaot ol paep blong smok mo ol lif blong tabak blong olgeta i go long faea” (Saints, 1:168). Long taem ia, Tok blong Waes i moa olsem wan samting blong lukaot long hem, be i no tumas olsem wan komanmen, be olgeta i bin soem se oli wantem blong obei. Maet yu bin “sakemaot” long laef blong yu finis sam samting we Tok blong Waes i bin wonem yu agensem, be wanem moa yu save lanem aot long revelesen ia? Tingting long ol aedia ia:

• Lukaotem ol sot sentens we yu no bin luksave—o no bin tingting tumas long hem—bifo. ?Wanem nao yu lanem aot long olgeta?

• Doktrin mo Ol Kavenan 89 i gat tu sam promes (luk long ol ves 18–21). ?Yu ting se ol promes ia oli minim wanem?

• ?Wanem nao revelesen ia i tijim yu abaot Lod?

• ?Wanem ol eksampol we yu bin luk blong “ol nogud samting mo ol plan … blong ol man we oli stap mekem ol sikret samting”? (ves 4).

• Tingting long ol revelesen olsem “wan prinsipol wetem wan promes” (ves 3)—ol trutok we oli stap strong kasem en we i save gaedem yu blong mekem desisen—mo i no wan lis blong mekem mo no mekem nomo. ?Wanem ol prinsipol we yu save faenem we i save gaedem ol desisen blong yu?

Ol profet blong tedei oli bin wonem yumi tu long ol samting mo fasin we i save mekem yumi harem nogud we i moa longwe long wanem oli bin talem long Tok blong Waes (luk long “Helt blong Bodi mo blong Filing,” Blong Ol Yut Oli Kam Strong, 25–27). ?Wanem nao hemia i pusum yu blong mekem, blong kea gud moa long maen mo bodi blong yu?

Luk tu long Daniel 1; 1 Korin 6:19–20; Gospel Topics, “Word of Wisdom,” topics.ChurchofJesusChrist.org; “The Word of Wisdom,” Revelations in Context, 183–91; addictionrecovery.ChurchofJesusChrist.org.

Tok blong Waes i tijim yumi blong kea long bodi blong yumi.

Doktrin mo Ol Kavenan 90:1–17

Fas Presidensi i holem “ol ki blong kingdom.”

Long seksen 90, Lod i givim ol instraksen abaot “seves mo presidensi” (ves 12) blong Josef Smit, Sidni Rigdon, mo Frederik G. Williams—ol memba blong wanem we, naoia, yumi stap singaotem, Fas Presidensi. ?Wanem nao yu lanem abaot Fas Presidensi aot long ol ves 1–17? Luklukbak long ol las mesej we oli kam long ol memba blong Fas Presidensi. ?Olsem wanem nao ol toktok blong olgeta oli “eksplenem ol sikret blong kingdom”? (ves 14). ?Olsem wanem nao oli “putum oda long evri wok blong jos mo kingdom ia”? (ves 16).

Luk tu long Henry B. Eyring, “Paoa blong Fet blong Sapotem Man,” Ensign o Liahona, Mei 2019, 58–60.

Doktrin mo Ol Kavenan 90:24.

“Evri samting bambae oli wok tugeta blong gud blong [mi].”

Tingting hevi long eni eksperiens we yu bin gat we i testifae abaot promes blong Lod we i stap long Doktrin mo Ol Kavenan 90:24. Tingting blong raetemdaon ol eksperiens ia, mo blong serem olgeta wetem wan memba blong famli o wan we yu lavem hem—mebi wan we i nidim blong oli toktok blong leftemap tingting blong hem. Sapos i gat ol blesing we yu stap wantem yet, tingting hevi long wanem yu save mekem blong gohed blong stap fetful taem yu stap wet blong luk olsem wanem “evri samting bambae oli wok tugeta blong gud blong yu.”

Doktrin mo Ol Kavenan 90:28–31

?Huia hem i Viena Jak?

Viena Jak i bon long 10 Jun 1787 long Masajusets. Hem i bin wan woman we i gat strong fet, mo i gat plante mane; fastaem we Viena i mitim ol misinari, hem i long 1831. Afta we hem i kasem wan witnes long saed blong spirit, se mesej blong olgeta i tru, hem i travel blong mitim Profet long Ketlan, Ohaeo; hem i bin baptaes long ples ia.

Viena i bin obei long advaes we Lod i bin givim long hem, we i stap long Doktrin mo Ol Kavenan 90:28–31. Konsekresen blong hem long Lod, wetem ol donesen we hem i bin mekem finis long Ketlan, i kam long wan impoten taem long Jos; hem i taem we ol lida oli bin stap traem blong pem graon we bae Ketlan Tempol bae i stap long hem. Viena i bin “fetful, mo … i no stap mekem nating” truaot long laef blong hem, mo long en, hem i bin “mekem gud hom blong hem” (ves 31) long Sol Lek Vale, mo hem i bin ded long ples ia taem hem i bin gat 96 yia.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 89.Maet bae famli blong yu i laekem blong droem ol pikja blong ol kaekae mo ol nara samting we oli tokbaot long Doktrin mo Ol Kavenan 89. Afta, yufala i save plei wan gem—ol memba blong famli oli save gat wanwan taem blong jusum pikja, putum ol samting we yumi no sapos blong yusum i go long pubel, mo ol samting we yumi sapos blong yusum i go long wan plet. ?Olsem wanem nao ol promes insaed long ol ves 18–21 oli bin kamtru insaed long ol laef blong yumi?

Sapos yufala i ridim “Helt blong Bodi mo blong Filing” insaed long Blong Ol Yut Oli Kam Strong (24–27) bae i save statem wan storian abaot ol wei blong kea long helt blong yumi mo abaot ol blesing we God i stap promesem.

Doktrin mo Ol Kavenan 90:5.Tokbaot olsem wanem yu “kasem ol revelesen we oli kam long God.” ?Olsem wanem nao yumi save soem se oli no “wan smol samting” long yumi?

Doktrin mo Ol Kavenan 91.Maet yu save toktok raon long hao nao advaes blong Lod abaot Apokrifa (luk long ol ves 1–2) i go tu wetem ol media we famli blong yu i fesem tedei (luk tu long Gaed long Ol Skripja, “Apokrifa,” olskripja.ChurchofJesusChrist.org). Yu save serem tu wan eksperiens blong yuwan long olsem wanem nao “Tabu Spirit i givim moa laet” (ves 5) long yu blong helpem yu blong luksave wanem i tru mo wanem i rong.

Doktrin mo Ol Kavenan 92:2.?Wanem nao i minim blong stap olsem wan “strong memba” blong Jos?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Bodi I Olsem Tempol,” STSP,pej 62.

Stap Kam Antap long Fasin blong Yumi blong Stap Tij

Yusum defren teknik. Tingting blong yusum sam defren teknik blong mekem famli blong yu i strong blong tekpat long taem blong famli skripja stadi. Eksampol: ol memba blong famli oli save singsing ol hym mo ol singsing blong ol pikinini we i go wetem wan ves, droem ol pikja blong wanem we oli stap ridim, o talem sot wan ves wetem stret toktok blong olgeta.

“Evri sent we i … mekem folem ol toktok ia, we i stap wokbaot long fasin blong obei long ol komanmen, bambae i kasem helt long bel blong olgeta mo strong kaekae long bun blong olgeta” (Doktrin mo Ol Kavenan 89:18).