“9–15 Ogis. Doktrin mo Ol Kavenan 88: ‘Stanemap … Wan Haos blong God,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“9–15 Ogis. Doktrin mo Ol Kavenan 88,” Kam Folem Mi—Blong Wanwan Man, Woman mo Famli: 2021
9–15 Ogis
Doktrin mo Ol Kavenan 88
“Stanemap … Wan Haos blong God”
Presiden Russell M. Nelson i bin talem, “Mi promes se taem yu stap wok strong blong jenisim hom blong yu i kam wan senta blong lanem gospel, … paoa blong enemi insaed long laef blong yufala mo hom blong yufala bae i kamdaon” (“Blong Kam Ol Lata-dei Sent we I Givim Eksampol,” Ensign o Liahona, Okt 2018, 113).
Raetemdaon Ol Filing mo Tingting blong Yu
Fulap taem, Lod i givim long yumi wan smol tes blong ol “glori mo paoa” blong Hem we i fulap tumas (Doktrin mo Ol Kavenan 88:47) tru long ol revelesen i go long ol profet blong Hem. Doktrin mo Ol Kavenan 88 i wan gudfala revelesen tru—wan abaot laet mo glori mo ol kingdom we i save mekem ol kea blong yumi long wol ia i no impoten nating taem yumi komperem. Iven taem yumi no save kasem evri samting we Lod i stap tijim yumi, yet yumi save filim save se i gat fulap samting moa long laef we i no save finis we naoia, yumi no save andastanem yet. Yes, Lod i no tokbaot ol bigfala sikret blong Hem blong mekem yumi fil se yumi no naf o mekem yumi filim se yumi smol tumas. Be, Hem i bin promesem, “ei bambae i kam, taem bae yufala i andastanem God” (ves 49; oli ademap italik). Maet Hem i blong wan en we i hae tumas we i mekem Lod i talem strong long Ol Sent blong Hem long Ketlan blong mekem wan Skul blong ol Profet. “Oganaesem yufala,” Hem i bin talem. “Rere long evri samting we i nid; mo stanemap … wan haos blong God” (ves 119). From se hem i insaed long tabu haos blong God—mo long ol hom blong yumi—we Hem i save, bitim eni nara ples moa, leftemap lukluk blong yumi i bitim wol ia, “from we bambae hem i soemaot fes blong hem long [yumi],” mo rere long yumi blong “save stap long selestial glori” (ol ves 68, 22).
Sam Aedia blong Skripja Stadi blong Yuwan
Lod i givim yumi hop mo pis.
Afta sam dei nomo long woning se wo bae “i kapsaet antap long evri nesen” (Doktrin mo Ol Kavenan 87:2), Lod i bin givim revelesen se Josef Smit i bin singaotem wan “‘lif blong olivtri’ … we oli katemaot long Tri blong Paradaes, we i mesej blong pis we i kam long Lod i go long yumi” (Doktrin mo Ol Kavenan 88, seksen heding). ?Olsem wanem revelesen ia i olsem wan oliv lif, wan kastom saen blong pis? (luk tu long Jenesis 8:11). ?Wanem ol trutok insaed long seksen ia we i helpem yu filim hop mo pis long Kraes?
Laet mo loa, oli kam long Jisas Kraes.
Ol toktok laet mo loa oli ripitim plante taem long seksen 88. Ol toktok ia oli bin yusum long ol nara skripja blong tokbaot gud Jisas Kraes mo gospel blong Hem (eksampol, luk long Aesea 60:19; Jon 1:1–9; 3 Nifae15:9). Mekem o notem daon ol ves we faenem ol toktok ia long Doktrin mo Ol Kavenan 88:6–67, mo raetemdaon wanem yu lanem abaot Sevya, laet, mo loa. Ol ves ia i save givim insperesen long yu blong mekem ol jenis long laef blong yu blong akseptem laet mo laef folem “loa blong Kraes” moa wetem fet (ves 21).
Luk tu long Sharon Eubank, “Kraes: Laet Ia we I Stap Saen long Tudak,” Ensign o Liahona, Epril 2019, 73–76.
Skripja i holem loa blong Kraes.
Doktrin mo Ol Kavenan 88:62–126
Rere long evri samting we i nid.
Long sam wei, yumi stap laef long wan taem we Lod i tokbaot gud se “evri samting bambae oli muvmuv olbaot; mo yes i tru, hat blong man i nomo strong” (Doktrin mo Ol Kavenan 88:91). Taem yu stap ridim ol ves 62–126, tingting long olsem wanem kaonsel blong Lod i save helpem yu blong rere from Seken Kaming blong Sevya. Hemia samfala kwestin blong tingting long hem:
-
Ol Ves 62–76.Taem yu stap tingting long ol ves ia, wanem nao yu kasem insperesen blong mekem blong “kam kolosap” long God? (ves 63). Tingting long wanem toktok blong Lod blong “mekem yufala i kam tabu” i minim long yuwan. (ves 68).
-
Ol Ves 77–80, 118–26.?From wanem maet i “nid blong yufala i andastanem” tugeta ol topik long saed blong doktrin mo long saed blong laef long wol ia? (ves 78). ?Olsem wanem nao yu stap folem kaonsel ia blong “lukaotem blong lanem samting”? (ves 118). ?Wanem nao yu ting se i minim blong lan “tru long stadi, mo tu, tru long fet”?
-
Ol Ves 81–116.Tingting blong notem daon ol profesi abaot Seken Kaming blong Sevya long ol ves ia. ?From wanem yu ting se Lod bae i wantem yu blong save abaot ol samting ia?
-
Ol Ves 117–26.Tingting blong ridim ol ves wetem tempol long maen; ?wanem nao yu faenem long ples ia we i save helpem yu blong rere blong go insaed long haos blong Lod?
Luk tu long D. Todd Christofferson, “Stap Rere from Kambak blong Lod,” Ensign o Liahona, Mei 2019, 81–84; David A. Bednar, “Seek Learning by Faith,” Ensign, Sept. 2007, 61–68; Saints, 1:164–66; “A School and an Endowment,” Revelations in Context, 174–82.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 88:14–33, 95–101.?Wanem nao yu lanem abaot Laef Bakegen long Ded aot long ol ves ia? ?Olsem wanem nao ol trutok ia oli gat paoa long ol joes we yumi mekem?
-
Doktrin mo Ol Kavenan 88:33.Yu save statem blong storian raon long ves ia taem yu askem ol memba blong famli blong tokbaot ol presen we oli bin kasem—tugeta olgeta we oli bin kasem wetem glad mo olgeta we oli no bin kasem wetem glad. ?Olsem wanem nao yumi save soem long Lod se yumi stap glad long presen ia blong selestial glori we Hem i givim long yumi? ?Olsem wanem nao yumi glad long “man we i givim presen”?
-
Doktrin mo Ol Kavenan 88:63, 68.Ol ves ia i gat sam aksen toktok we maet bae i givim insperesen long yu blong tingting long ol intresting wei blong tijim ol mesej long ol ves ia i go long ol pikinini blong yu. Eksampol, maet bae yu plei wan gem blong haed blong storian raon long sot sentens ia “lukaotem mi wetem strong tingting mo bambae yufala i faenem mi” (ves 63; oli ademap italik).
-
Doktrin mo Ol Kavenan 88:81.Olsem wan famli, lukaotem sam woning saen insaed o raon long hom blong yu, olsem ol woning toktok long ol meresin o saen blong trafik blong ol draeva. ?Olsem wanem nao ol woning ia oli helpem yumi? ?Wanem nao Papa long Heven i wantem blong “wonem neba blong [yumi]” long hem?
-
Doktrin mo Ol Kavenan 88:119.Blong givim insperesen long famli blong yu blong mekem hom blong yu olsem we oli tokbaot gud long ves 119, traem wan samting olsem: Raetem ol sot sentens aot long ves ia i go long ol pisis pepa, mo yusum blong kavremap wan pikja blong tempol. Ridim Doktrin mo Ol Kavenan 88:119 tugeta, mo letem ol memba blong famli i tekemaot wanwan pisis pepa taem oli harem wan sot sentens we go wetem hemia long ves. ?Wanem nao yumi save mekem blong ol hom blong yumi wan “haos blong God”? (ves 119).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Nearer, My God, to Thee,” Hymns, no. 100.
Stap Kam Antap long Fasin blong Yumi blong Stap Tij
Letem ol pikinini oli soem wanem oli krietem. Taem yu invaetem ol pikinini blong yu blong mekem wan samting we i go wetem wan gospel prinsipol, yu no helpem olgeta blong andastanem prinsipol ia moa nomo, be yu givim tu wan samting we oli save tajem blong rimaenem olgeta long wanem oli bin lanem (luk long Teaching in the Savior’s Way, 25).
Jisas Kraes i givim pis long yumi. Pis Mi Lego wetem Yu, i kam long Walter Rane