“19–25 Julae. Doktrin mo Ol Kavenan 81–83: ‘Taem “Mi Givim Plante, Mi Askem Plante,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“19–25 Julae. Doktrin mo Ol Kavenan 81–83,” Kam Folem Mi—Blong Wanwan Man, Woman mo Famli: 2021
Kraes mo Yangfala Rij Loya, i kam long Heinrich Hofmann
19–25 Julae
Doktrin mo Ol Kavenan 81–83
Taem “Mi Givim Plante, Mi Askem Plante”
Taem yu stap stadi Doktrin mo Ol Kavenan 81–83, raetemdaon ol prinsipol we bae i helpem yu blong mekem gud long famli blong yu, ol fren blong yu, mo ol narawan.
Raetemdaon Ol Filing mo Tingting blong Yu
Long Maj 1832, Lod i bin singaotem Jesi Gaos blong i stap wan kaonsela long Josef Smit long Presidensi blong Hae Prishud (we naoia oli singaotem Fas Presidensi). Doktrin mo Ol Kavenan 81 hem i revelesen i go long Brata Gaos, we i givim instraksen long hem long saed blong niufala koling blong hem, mo i promesem hem ol blesing sapos hem i fetful blong givim seves. Be Jesi Gaos i bin fetful blong givim seves. Mekem se Lod i singaotem Frederik G. Williams blong i tekem ples blong hem, mo nem blong Brata Gaos, oli bin riplesem wetem nem blong Brata Williams insaed long revelesen ia.
Hemia i luk olsem wan smol ditel nomo, be tu, i minim wan bigfala trutok: Plante long ol revelesen insaed long Doktrin mo Ol Kavenan, i go long sam spesifik pipol, be yumi oltaem save lukaotem ol wei we ol revelesen ia oli blong yumiwan (luk long 1 Nifae 19:23). Kaonsel blong Lod i go long Frederik G. Williams blong “mekem ol ni ia we oli no strong oli kam strong moa” i save tanem maen blong yumi i go long ol pipol we yumi save mekem oli kam strong moa (Doktrin mo Ol Kavenan 81:5). Kaonsel blong Lod i go long ol memba blong Yunaet Kampani, i blong “oli joen tru long kavenan ia” blong save mitim ol nid blong Jos we i blong laef ia, i save tanem maen blong yumi i go long ol kavenan blong yumiwan bakegen. Mo promes ia blong Lod se bae Hem i “mas folem promes taem [yumi] mekem wanem we [hem] i talem,” i save rimaenem yumi abaot ol promes blong Hem i go long yumi taem yumi stap obei (Doktrin mo Ol Kavenan 82:10, 15). Hemia bae i olsem, from se Lod i bin talem: “Wanem we mi talem long wan, mi talem long evriwan” (ves 5).
Luk long “Newel K. Whitney and the United Firm,” “Jesse Gause: Counselor to the Prophet,” Revelations in Context, 142–47, 155–57.
Sam Aedia blong Skripja Stadi blong Yuwan
Mi save stap fetful blong mekem wanem we Lod i askem long mi.
Samtaem, ?yu yu stap askem yuwan olsem wanem yu save mekem ol impoten responsabiliti insaed long laef blong yu? Olsem wan kaonsela long Profet Josef Smit, Frederik G. Williams i mas gat plante impoten responsabiliti. Long seksen 81, Lod i bin givim hem kaonsel abaot olsem wanem blong mekem olgeta responsabiliti ia. ?Wanem nao yu faenem insaed long seksen ia we i save helpem yu blong mekem ol responsabiliti blong yu, we Lod i bin givim, oli kamtru?
Hemia samfala kwestin blong helpem yu blong tingting hevi long ves 5:
-
?Wanem nao sam long ol wei we wan man o woman i kam blong hem i “nomo strong”? ?I minim wanem blong “helpem” olgeta we oli no strong?
-
?Wanem nao i save mekem se ol han blong wan man o woman “oli hang i kamdaon”? ?Olsem wanem nao yumi save “leftemap” ol han ia?
-
?Wanem nao sentens ia “ol ni ia we oli no strong” i minim? ?Olsem wanem nao yumi save mekem ol ni ia we oli no strong “oli kam strong moa”?
Maet taem yu stap stadi long ves ia, i tekem nem blong wan i kam long maen we yu save “helpem,” “leftemap, o “mekem i kam strong moa.” ?Wanem nao bae yu mekem blong givhan long man o woman ia?
Fas Presidensi: Sidni Rigdon, Josef Smit, Frederik G. Williams
Lod i stap invaetem mi blong sakem sin mo lego ol sin blong mi fogud.
Taem yu stap ridim Doktrin mo Kavenan 82:1–7, tingting blong mekem tu lis blong ol samting we yu lanem: ol woning abaot sin mo ol trutok abaot fogivnes. ?Olsem wanem ol trutok oli save helpem yu blong stanap agensem ol temtesen blong enemi?
Ol komanmen oli blong sevem mi mo protektem mi.
Sapos yu—o wan we yu save—i stap askem se from wanem Lod i givim plante komanmen olsem, Doktrin mo Ol Kavenan 82:8–10 i save help. ?Wanem ol niu lukluk, insaed long ol ves ia, i save helpem yu blong eksplenem long wan from wanem yu jusum blong folem ol komanmen blong Lod? Yu save tingting tu long hao nao ol komanmen blong Hem oli save jenisim laef blong yu. ?Wanem nao yu lanem abaot Lod taem yu stap ridim ves 10?
Luk tu long Doktrin mo Ol Kavenan 130: 20–21; Carole M. Stephens, ““Sipos Yufala I Lavem Mi, Bambae Yufala I Save Obei long Ol Tok blong Mi”,” Ensign o https://www.churchofjesuschrist.org/study/general-conference/2015/10/if-ye-love-me-keep-my-commandments?lang=bis, Okt 2015.
“Ol wido mo ol pikinini we oli nomo gat papa mo mama, bae oli kasem sapot mo samting.”
Long Epril 1832, olsem we Lod i givim instraksen, Josef Smit i bin travel kolosap 800 mael blong visitim Ol Sent we oli bin kam tugeta long Misuri (luk long Doktrin mo Ol Kavenan 78:9). Wan komuniti we hem i bin visitim, insaed long hem i gat ol wido we oli bin stap lukaotem ol pikinini blong olgetawan. Long medel blong olgeta, i gat Phebe Peck, mo Anna Rogers, we Profet i save gud tufala. Long Misuri, long ol yia 1830, ol loa blong stet, o loa blong gavman oli givim smol raet nomo long ol wido blong oli tekem propeti blong hasban blong olgeta. ?Wanem nao yu lanem aot long seksen 83 abaot wei we Lod i stap filim abaot ol wido mo ol pikinini we oli nomo gat papa o mama? ?Yu yu save eniwan we i stap long situesen ia we bae, lav o kea blong yu, bae i save helpem hem?
Luk tu long Aesea 1:17; Jemes 1:27.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 81:3.Yu save serem ol pepa hat i go long ol memba blong famli, mo invaetem olgeta blong droem o raetem wan samting we bae oli wantem prea from. Tokbaot se i minim wanem blong prea “long wan voes we i laod mo long hat blong yu.”
-
Doktrin mo Ol Kavenan 81:5.Blong lanem abaot ol prinsipol insaed long ves ia, maet ol memba blong famli oli save serem ol eksampol blong sam taem we oli bin filim se “oli no strong,” mo wan i bin helpem olgeta, o i bin mekem olgeta oli kam strong bakegen. Mo tu, yu save wajem ol vidio abaot wok blong helpem ol nara man, olsem: “Works of God” o “The Miracle of the Roof” (ChurchofJesusChrist.org). Toktok raon long ol wei we famli blong yu i save helpem, oltaem, ol nara man long ol simpol wei.
-
Doktrin mo Ol Kavenan 82:8–10.Maet wan simpol gem bae i save helpem famli blong yu blong filim se oli glad mo talem tangkyu from ol komanmen blong God. Wan memba blong famli i save givim ol instraksen blong helpem wan memba blong famli, we oli blokem ae blong hem, blong mekem wan sanwij, o i folem wan rod we plante samting i blokem. !Tingting long wan samting we i mekem man i laf mo i yusum maen blong yu! Afta, toktok raon long wei we ol komanmen oli olsem ol instraksen insaed long gem ia.
-
Doktrin mo Ol Kavenan 82:18–19.?Wanem nao wanwan memba blong famli i save mekem blong “mas kam antap long talen we hem i gat” mo “kasem ol narafala talen”? Maet bae i gud tumas blong gat wan famli talen so. Tingting long sam wei blong yusum ol talen we oli no save soem gud (olsem ol presen long saed blong spirit; luk long Doktrin mo Ol Kavenan 46:11–26). ?Olsem wanem nao, yumi, yumi save yusum ol talen blong yumi mo serem ol samting we yumi gat blong blesem famli mo neiba blong yumi? ?Hem i minim wanem blong yusum ol talen blong yumi “wetem wan ae we i lukluk nomo long glori blong God”?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Have I Done Any Good?” Hymns, no. 223; luk tu long “Sam Aedia blong Kam Antap long Famli Skripja Stadi.”
Stap Kam Antap long Fasin blong Yumi blong Stap Tij
Askem ol kwestin we i lidim man blong tekem aksen. Tingting long ol kwestin we i pusum ol memba blong famli blong tingtingbak long wei we oli save laef folem gospel, moa fulwan. “Olgeta ia, oli no kwestin blong toktok raon long olgeta; oli blong yu tingtingbak yuwan long olgeta” (Teaching in the Savior’s Way,31).
Pikja blong Jisas we i stap hilim wan man, i kam long Dan Burr