“Sipos Yufala I Lavem Mi, Bambae Yufala I Save Obei long Ol Tok blong Mi”
I Kam long Karol M. Stivens
Fas Kaonsela insaed long Rilif Sosaeti Jeneral Presidensi
Komanmen blong God i wan saen blong lav blong Hem long yumi, mo fasin blong obei long ol komanmen blong hem i wan wei blong soem lav blong yumi long Hem.
Taem we bigfala gel blong mifala, Jen, i karem nambatri bebi gel blong hem long hospital i kam long haos, mi bin go long haos blong hem blong helpem hem lukaotem ol pikinini blong hem. Afta we mi karem bak bigfala gel blong hem long skul, mifala i disaed se wanem we Jen i nidim moa naoia hem i blong spel. Mo bes samting blong mekem naoia hem i blong tekem gel blong hem Kloe i go long haos wetem mi blong mekem se mama blong hem mo niu bebi sista i save gat sam kwaet taem.
Mi putum strap blong jea blong trak raon long Kloe, putum strap blong jea blong mi, mo draev long smol rod blong kamaot long bigfala rod. Be, bifo mifala i kasem bigfala rod ia, Kloe i karemaot strap blong hem mo i stap stanap biaen long solda blong mi, mo i stap toktok long mi! Mi stopem trak long saed blong rod, go aotsaed, mo putumbak strap blong jea raon long hem.
Mifala i stat bakegen be blong wan sot ples nomo afta hem i kamaot long jea blong hem bakegen. Mi ripitim semfala step, be naoia bifo mi go insaed long trak mo taetem strap blong miwan, !Kloe i stap stanap finis!
Mi hemia mi stap sidaon insaed long wan trak, we i stop i stap long saed blong rod, we i paoa blong mi i traehad wetem wan pikinini blong tri yia. !Mo hem i stap win!
Mi yusum evri tingting we mi save tingbaot blong mekem hem i bilivim se blong no tekemaot strap blong jea hem i wan gudfala tingting. !Be hem i no bilivim! Long en mi disaed blong traem ol wei ia, sapos/ afta.
Mi talem, “Kloe, sapos yu lego strap blong jea blong trak i stap, afta, taem bae yumi kasem haos blong bubuwoman, yu save pleplei wetem klei.
No gat ansa.
“Kloe, sapos yu lego strap blong jea blong trak i stap, afta bae yumi mekem bred taem yumi kasem haos blong bubuwoman.”
No gat ansa.
Mi traem bakegen. “Kloe, sapos yu lego strap blong jea blong trak i stap, afta !bae yumi stop long maket blong pem wan swit kaekae blong yu!”
Afta tri taem we mi bin traem, Mi luksave se rod ia hemi no gat nid. Hem i no wantem save, mo no sapos/afta i no bin inaf blong mekem hem i biliv mo stap kwaet long jea.
Mifala i no save stap ful dei long saed blong rod, be mi wantem blong obei long loa mo hem i no sef blong draev wetem Kloe i stanap. Mi mekem wan kwaet prea mo harem Spirit i talem long smol voes se, “Tijim hem.”
Mi tanem mo lukluk fes blong hem mo pulumaot strap blong jea blong mi blong hem i save luk. Mi talem, “Kloe, mi stap werem strap blong jea ia from hem i protektem mi. Sapos yumi kasem wan aksiden, mi bae stap sef. Be yu no werem blong yu, mo yu bae yu no sef ia. Mi bae mi sore sapos yu kasem kil.”
Hemi lukluk mi; i olsem we mi stap luk ol wil i stap raon long maen blong hem, mi wet wetem wari long ansa blong hem. Long en, ol bigfala blu ae blong hem i saen, mo hem i talem: “!Bubuwoman, yu wantem mi tu blong werem strap blong jea blong mi from yu laekem mi!”
Spirit i fulumap trak taem mi stap talemaot lav blong mi long hem. Mi no wantem lusum filing ia, be mi save mi bin gat wan Janis mo mi go aot mo sevem hem long jea blong hem. Afta mi askem, “Kloe, yu save stap kwaet long jea blong yu?” Mo hem i mekem—long rod i go long maket blong karem wan swit kaekae! Mo strap blong jea ia i stap long hem olwe long maket i go long haos blong mi, mifala i mekem bred mo pleplei wetem klei from !Kloe i no bin fogetem!
Taem mi stap draev i gobak long dei ia, wan skripja i fulumap maen blong mi: “Sapos yufala i lavem mi, bambae yufala i save obei long ol tok blong mi.”1 Yumi gat ol rul blong tij, lidim, mo protektem ol pikinini. ?From wanem? From bigfala lav ia we yumi gat blong olgeta. Kasem taem we Kloe i andastanem se mi wantem hem i stap sef long jea blong hem i bin from lav blong mi long hem mo wari se hem i stap sef, hem no bin wantem folem wanem we hem i luk se hemi gat limit. Hem i filim se strap blong jea ia i holem taed hem i go daon mo limitim hem long fridom blong hem.
Olsem Kloe, yumi save jusum blong luk ol komanmen olsem ol limit. Yumi save filim samtaem se loa blong God i stopem fridom blong yumi wanwan, i tekemaot fridom blong joes blong yumi, mo limitim ol janis blong yumi mo fasin blong gro. Be taem yumi lukaotem blong andastanem mo letem Papa blong yumi i tijim yumi, yumi bae stat blong luk pruf blong lav blong Hem raon long yumi. Pruf blong lav ia bae fulumap yumi wetem strong filing ia blong obei ol komanmen blong Hem.
?Sapos yumi faenem se yu stap insaed long trak long saed blong rod, yu stap tingting long wanem blong mekem, mi save givim sam prinsipol we, sapos yu folem, bae i helpem yu long rod blong fet mo fasin blong obei ?2
Faswan, trastem God. Biliv long plan blong Hem ia we i no save finis. Wanwan long yumi i “wan spirit pikinini boe o gel we papa mo mama blong heven,” Lav blong olgeta from yumi i stap nao insaed long ol loa mo komanmen. Ol komanmen oli ol impoten instraksen blong tijim, lidim, mo protektem yumi taem yumi stap “kasem eksperiens blong wol ia [mo] gro.”3
Long laef bifo laef long wol ia, yumi yusum fridom blong joes blong yumi blong jusum blong akseptem plan blong God, 4 mo yumi lanem se blong stap obei long loa blong God ia we i no save finis i impoten blong plan ia i kam wan sakses. Skripja i tijim yumi se: “I gat wan loa, we oli talem wetem atoriti long heven bifo ol stat blong wol ia we oli no save tekembak, mo evri blesing i folem loa ia.”5 Sapos yumi obei long loa, yumi bae kasem ol blesing.
Iven wetem evri mistek, agens, mo save we i folem eksperiens blong laef long wol ia, God i neva fogetem wanem we yu save mekem long laef we i no save finis, nomata yu fogetem. Yumi save bilivim Hem “from God i wantem ol pikinini blong Hem i gobak.”6 Mo Hem i mekem wan wei tru long Atonmen blong Pikinini blong Hem, Jisas Kraes. Atonmen ia “I stamba long plan blong fasin blong sevem man.” 7
Nambatu, trastem Jisas. Stret wei blong soem fasin blong obei mo klin lav hem i Atonmen blong Jisas Kraes. Hem i bin givim laef long yumi. Hem i talem: “Sapos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem hem i stap lavem mi.”8
Jisas i tijim tu:
“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.
“Hemia nao loa ya we i hae moa long ol narafala loa,
“Mo narawan we i kolosap i sem mak long hem, i talem se, Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” 9
Evri Sandei yumi gat janis ia blong tingbaot klin lav blong Sevya taem yumi stap tekempat long saen blong Atonmen blong Hem we i nogat en. Long sakramen, mi luk ol man i pusum han from bred mo wota. Mo taem mi pusum han blong tekem, mi mekem kavenan se mi wantem blong tekem nem blong Hem long mifala mo oltaem tingbaot Hem mo stap obei long ol komanmen blong hem. Mo hem i promes se yumi bae gat Spirit blong hem i stap wetem yumi oltaem.10
Nambatri, trastem ol kwaet toktok blong Spirit. ?Tingbaot eksperiens blong mi wetem Kloe we Spirit i talem long smol voes wan skripja long mi? Hem i Jon japta 14:15 : “Sapos yu lavem mi kipim ol komanmen blong mi.” Mo ol impoten ves ia i folem: “Sipos yufala i lavem mi, bambae yufala i save obei long ol tok blong mi”
“Nao bambae mi mi askem long Papa blong mi, mo hem bambae i givim wan narafala Man blong Givhan long yufala, blong hem i save stap oltaem wetem yufala.
“Narafala Man ia i Spirit ia we i stamba blong Trutok. Ol man blong wol ia oli no save tekem hem blong givhan long olgeta, from we oli no save luk hem, mo oli no gat rod blong save hem. Be yufala i save hem, from we hem i stap wetem yufala, mo hem bambae i stap long laef blong yufala.”11
Evri memba we i klin inaf, we i kasem konfemesen long Jos blong Jisas Kraes blong Ol Lata-dei Sent, i gat raet ia blong Tabu Spirit i stap olsem fren blong hem. Fasin blong livim kakae, prea, skripja stadi, mo fasin blong stap obei bae i helpem bigwan paoa blong harem mo filim ol kwaet toktok blong Spirit.
Taem maen blong yu i fulap wetem tu tingting mo konfius, Papa mo Pikinini bae i sendem Tabu Spirit blong givim woning long yu, blong lidim yu blong stap sef tru long ol denja blong rod blong laef ia. Bae Hem i helpem yu blong tingbaot, bae i givim kamfot long yu, mo bae i fulumap yu wetem hop mo lav we i stret evriwan. 12
Nambafo, bilivim kaonsel blong ol profet we oli stap laef. Papa blong yumi i bin mekem wan wei blong yumi harem ol toktok blong Hem mo save loa blong Hem tru long ol profet blong Hem. Lod i talem, “Toktok blong mi…evriwan oli kamtru; mo nomata oli kamaot tru long voes blong miwan o tru long voes blong ol wokman blong mi, i semmak.” 13
Ol profet blong yumi we oli stap laef oli kaonselem yumi blong “tingbaot sabat dei, blong kipim i tabu,”14 Fasin blong obei long ol kaonsel blong ol profet i givim yumi wan wei blong yumi stap obei long komanmen blong God, blong lavem Hem mo ol neiba taem yumi stap mekem i bigwan fet blong yumi long Jisas Kraes mo soemaot lav mo kea blong yumi long ol narawan.15
I gat proteksen taem yumi stap folem ol toktok blong Lod tru long ol profet blong Hem. God i bin singaotem Presiden Tomas S. Monson, ol kaonsela long Fas Presidensi, mo ol memba blong Kworom blong Olgeta Twelef Aposol olsem ol profet, sia, mo ol reveleta. Long wol ia we fraet, ol defren entetenmen, hadtaem, mo kros i stap kam antap, yumi save lukluk long olgeta blong luk olsem ol disaepol blong Jisas Kraes, we i fulap wetem lav, gud fasin, gudfala toktok, mo handelem ol problem we i save statem raorao. Olgeta i testifae long Jisas Kraes mo ansa wetem lav, klin lav blong Jisas Kraes, olgeta oli ol witnes blong Hem.
Afta long eksperiens blong mi wetem Kloe, mi bin lukluk long skripja from ol ves we i tokbaot ol komanmen mo lav. Mi faenem plante. Ol komanmen blong Hem oli wan saen blong lav blong Hem long yumi, mo fasin blong obei long ol komanmen blong Hem i wan wei blong some lav blong yumi long Hem.
Mi testifae se taem yumi biliv long God, Papa blong yumi we i no save finis; biliv long Pikinini blong Hem, Jisas Kraes mo Atonmen blong Hem; trastem smol voes blong Spirit; mo trastem kaonsel blong ol profet, bae yumi faenem rod blong yumi long saed blong rod mo gohed sef nomo—i no blong kasem en nomo be blong faenem glad long wokbaot blong yumi i go hom. Long nem blong Jisas Kraes, amen.