Hat blong Mi I Tinghevi long Olgeta Samting Ia Oltaem Nomo
I Kam long Devin G. Duran
Fas Kaonsela long Sandei Skul Jeneral Presidensi
Mi prea wetem tru hat se bae yu jusum blong tingting hevi long ol toktok blong God long wan wei we i moa longwan mo dip.
Bisnis wok blong mi, mi wan investa. Wok blong mi long fet, mi wan disaepol blong Jisas Kraes, Pikinini blong God.1 Long wok blong bisnis blong mi, mi stap folem ol prinsipol blong faenens we i wok gud. Taem mi laef folem bilif blong mi, mi traehad blong folem ol prinsipol blong spirit we i helpem mi blong kam moa olsem Sevya.
Invitesen I Karem Blesing I Kam
Plante long ol praes we mi kasem long laef oli kam from wan i invaetem mi blong mekem wan strong wok. Wetem hemia long maen, mi wanem sendem wan invitesen long wanwan long yufala, tufala invitesen. Faswan i tokbaot mane. Sekenwan, i tokbaot samting long saed blong spirit. Tufala invitesen ia, sapos yufala i akseptem, bae i nidim blong yufala i gat moa disiplin blong wan longfala taem blong kasem praes blong hem.
Fas Invitesen
Fas invitesen i simpol: Mi invaetem yufala blong sevem mane evri wik. Amaon blong mane we yu sevem i no bigwan tumas; i stap long yu. Taem yu stap developem wan fasin blong sevem mane, bae i helpem yu yuwan. Mo maet yu gat sam janis tu blong helpem ol narawan long saed blong mane from se yu yu bin wok strong. Kipim long maen blong yu—Traem tingting se wanem risal i kamaot sapos yu sevem mane evri wik blong sikis manis taem, wan yia o 10 yia o moa. Ol smol hadwok we oli gogohed longtaem, i save givim bigfala risal.2
Nambatu Invitesen
Nambatu invitesen i defren bigwan be i moa impoten long faswan. Hem i: Mi invaetem blong “tingbaehat”3 long wan ves blong skripja long evri wik. Toktok ia, tingbaehat i no stap long diksonari, be i go faenem wan ples long hat blong mi. ?So i minim wanem blong tingbaehat? Mi laekem blong talem se hem i wan kombaen 80 pesen blong tingting hevi, mo 20 pesen blong lanem baehat.
I gat tu simpol step:
Faswan, jusum wan ves long skripja evri wik mo putum long wan ples we bae yu luk evri dei.
Nambatu, ridim mo tingting hevi long ves ia plante taem evri dei, mo tingting long mining blong toktok blong hem mo ol ki toktok blong hem truaot long wik.
Traem tingting ol gudfala risal we bae i leftemap tingting blong yu taem yu mekem hemia evri wik blong sikis manis, wan yia, 10 yia o moa.
Taem yu stap hadwok from, bae yu filim se yu kam antap long saed blong spirit. Bae yu save tij mo leftemap olgeta we yu lavem long ol wei we i gat moa mining.
Sapos yu jusum blong tingbaehat evri wik, bae yu filim smol moa olsem wan we i bin glad blong go swim mo luk fis, be naoia, i disaed se bae i traem daeva blong luk fis. Wetem desisen ia, bae yu kam blong andastanem moa ol gospel prinsipol mo ol niu wei blong lukluk long saed blong spirit bae i blesem laef blong yu.
Taem yu tingbak long ves we yu bin jusum evri wik, ol toktok mo ol sentens ia, bae yu raetem long hat blong yu.4 Ol toktok mo ol sentens ia bae yu raetem tu long maen blong yu. Long nara toktok, fasin blong lanem baehat bae i kam isi moa mo i nomol nomo. Be fasfala gol blong tingbaehat i blong putum wan hae ples blong tingting blong yu i go long hem—wan ples we i kipim yu stap kolosap moa long Spirit blong Lod.
Sevya i talem: be oltaem holem taet long maen blong yufala, ol toktok blong laef.”5 Tingbaehat i wan wei we i simpol mo gudfala blong mekem hemia.
Mi biliv se Nifae i wan man blong tingbaehat. Hem i talem: “From sol blong mi i glad long ol skripja, mo hat blong mi i tingting hevi long olgeta [oltaem], mo mi raetem ol samting ia blong ol pikinini blong mi i lanem olgeta mo oli save yusum blong helpem olgeta.”6 Hem i gat tingting long ol pikinini blong hem taem hem i stap tingting hevi long raetem ol skripja ia. ?Olsem wanem nao famli blong yu i save gat gud samting taem yufala i stap gogohed blong traehad blong fulumap maen blong yufala wetem ol toktok blong God?
Ves blong Mi
I no longtaem i pas, mi tingbaehat long Alma 5:16. I go olsem: “Mi talem long yufala, ?traem tingbaot se yufala i harem voes blong Lod, we i talem long yufala, long dei ia: Kam long mi yufala we mi blesem yufala, from luk, ol wok blong yufala oli ol wok blong stret mo gud fasin long fes blong wol?”
Long en blong wik ia, hemia nao we mi bin raetem long maen blong mi: “Traem tingting se yu harem voes blong Lod i talem: ‘Kam long mi yufala we mi blesem yufala, from luk, ol wok blong yufala oli ol wok blong stret mo gud fasin long fes blong wol” (Alma 5:16).
Olsem we yufala i luk, mi no bin lanem baehat ful ves, folem stret toktok. Be, mi tingting hevi plante, plante taem long ol ki samting insaed long ves, mo weaples blong faenem. Be bes pat blong rod ia i blong gat wan hae ples blong tingting blong mi save go long hem. Truaot long wik, mi gat pikja long maen blong Sevya we i talem ol toktok we i leftemap toktok blong mi. Hemia i tajem hat blong mi, mo stap blong givim insperesen long mi blong wantem mekem “ol wok blong stret mo gud fasin”. Hemia nao wanem i save hapen taem yumi lukluk long Kraes long evri tingting.”7
Yumi Mas Faetbak
Yu save askem: “From wanem bae mi mas mekem hemia?” Bae mi ansa se yumi stap laef long wan taem we ivel i stap go olbaot. Yumi no save stap mo akseptem situesen we i stap mo letem blong oli fidim yumi long ol rabis toktok mo pikja we i soem sin long evri ples we yumi tanem i go mo no mekem wan samting. Yumi mas faetbak. Taem maen blong yumi oli fulap wetem ol tingting mo ol pikja we oli leftemap tingting, taem yumi “tingbaot hem oltaem,”8 nao i nomo gat rum i stap blong ol doti mo rabis samting.
Long Buk blong Momon, Jisas Kraes i invaetem yumi evriwan blong “tingting hevi long ol samting we mi bin talem.”9 Lukluk long fasin blong tingbaehat olsem wan moa samting blong ademap long skripja stadi blong yu mo famli, be neva letem i tekem ples blong hemia. Tingbaehat i olsem we yu ademap wan niu meresin blong givim paoa long kakae blong yu evri dei.
Hem i had tumas
Maet yu save talem: “Tingbaehat i wan had samting tumas long mi.” Yu no slakem tingting. Had hem i gud. Kraes i invaetem yumi blong mekem plante had samting from se Hem i save se bae Hem i kasem blesing olsem wan risal blong hadwok blong yumi.10
Wan yang neiba blong mifala i faenem wan simpol wei blong tingbaehat. Hem i putum wik skripja blong hem long kova pikja blong skrin blong mobaelfon. Wan nara tingting i blong traem serem ves blong yu wetem wan brata o sista, wan pikinini, o wan fren. Waef blong mi, Juli mo mi, mitufala i helhelpem mitufala. Mitufala i jusum ol ves long evri Sandei. Hem i putum i stap long frij. Mi putum blong mi long trak. Afta, mitufala i serem ol tingting abaot ol ves ia raon long wik. Mo tu, mitufala i laekem blong toktok raon long ol ves ia wetem ol pikinini blong mitufala. Taem mitufala i mekem olsem, i luk se i moa isi blong oli serem tingting blong olgeta wetem mitufala long saed blong toktok blong God.
Juli mo mi tu i pat blong wan grup long Intanet, we i gat ol memba blong famli, ol fren, mo ol misinari we oli save serem ol skripja blong olgeta evri wik, mo wanwan taem, oli putum wan tingting o testemoni we i go wetem. Blong stap pat blong wan grup i mekem i isi blong stap mekem samting oltaem. Gel blong mi long hae skul mo wan grup blong fren blong hem oli yusum sosol media mo teks mesej blong serem ol skripja long wanwan long olgeta.
Plis, invaetem tu olgeta pipol blong nara fet long grup blong yufala. Oli stap lukaotem sam wei tu blong leftemap tingting blong olgeta mo filim kolosap moa long God.
?Wanem Nao I Gud?
?So Wanem nao i gud long yumi? Juli mo mi bin stap tingbaehat long wan ves long wan wik blong moa long tri yia nao. Fastaem, mitufala i putum wan gol blong 20 yia. I no longtaem i pas hem i talem: “Fastaem taem yu invaetem mi blong tingbaehat wan skripja evri wik blong 20 yia, mi stap askem miwan se ?bae mitufala i save mekem nomo blong wan manis.? Mi nomo gat tu tingting ia. Mi no save bilivim se i wan glad samting blong putum wan skripja long aesbokis evri wik, mo jes tingbaehat long hem evri taem mi luk; hemia i leftemap spirit blong mi.”
Afta we hem i tingbaehat blong sikis wik, wan sista blong Teksas, YSA, i talem se: “Testemoni blong mi i kam strong moa. Mo mi filim kolosap moa long Papa blong mi long Heven. Mi lavem olsem wanem tok blong God i jenisim mi blong kam gud moa.”
Wan yang fren i raetem: “Mi rili laekem blong stap tingbaehat from se i bin helpem mi blong lukluk long ol samting we oli impoten tru.”
Wan long ol misinari blong yumi i serem hemia: “Mi bin stap tingbaehat long wan ves evri wik stat long Jun 2014 mo mi laekem tumas. Ol skripja ia oli kam olsem ol fren we mi save dipen long olgeta long taem blong nid.”
Long kes blong mi, mi filim Spirit moa fulwan taem mi tingbaehat evri wik. Lav blong mi long ol skripja i kam antap moa from mi traehad blong “flasem ol tingting blong mi oltaem. ”11
Tingting long invitesen ia mo hae blesing we Nifae i serem: “sapos yufala i gohed strong, mo stap kakae gud long toktok blong Kraes, mo stap strong kasem en, luk, olsem ia nao Papa i talem: ‘Bae yufala i kasem laef we i no save finis.”12 Wetem tingting blong “kakae gud long ol toktok blong Kraes,” tingbaehat i olsem we yu stap kakae wan pis blong swit kakae, mo afta, yu kakae, kakae sloslo blong stap harem tes blong hem kasem taem yu solemdaon fulwan.
?Wanem Nao Ves blong Yu?
?Bae yu tingbaehat long wan ves blong skripja long evri wik blong ful manis ia? ?blong haf yia we i stap? ?O longwan moa ating? Juli mo mi i invaetem ol strong misinari blong Teksas Dalas blong tingbaehat wetem mifala blong 20 yia. Bae yumi krosem finisim laen ia long 17 yia taem. Afta, bae mifala i putum wan nara gol blong leftemap moa tingting blong mifala mo tekem mifala i kam kolosap moa long Kraes.
?Yu save tingbaot se laef mo famli blong yu bae i jenis o no sapos yu raetem wan niu ves blong skripja long hat mo maen blong yu evri wik long ol nekis manis o yia we i stap kam o longtaem moa?
Yu save jekem mifala mo askem: “?Wanem nao ves blong yu?” Be sapos yu mekem, yu mas rere blong serem skripja blong yu tu. Wanwan long yumi bae i kam antap taem yumi serem ol tingting.
Jisas Kraes I Eksampol blong Yumi
Jisas Kraes i mas developem wan lav long ol skripja taem hem i yangfala nomo. Hem i mas ridim mo tingting hevi long ol skripja taem i yang pikinini blong kam blong save gat ol storian we i gat mining wetem waes dokta long tempol taem hem i gat 12 yia.13 Hem i statem misin blong hem taem hem i gat 30 yia14 mo i tokbaot ol skripja eli mo plante taem long taem blong seves blong Hem.15?Bae i sef blong talem se Jisas i spendem 20 yia blong stadi mo tingting hevi long ol skripja olsem pat blong rere from misin blong Hem? ?I gat wan samting o no, blong yu mekem tedei blong yu rere long saed blong spirit from ol fiuja janis blong tij mo blesem famle blong yu mo ol narawan?
Praktisim Fet blong Yu mo Mekem
Long luklukbak ol samting, mi hop se bae yu disaed blong sevem mane evri wik. Praktisim fet blong yu, gat disiplin, mo mekem. Mo tu, mi prea wetem tru hat se bae yu jusum blong tingting hevi long ol toktok blong God long wan wei we i moa longwan mo dip long evri wik. Praktisim fet blong yu, gat disiplin mo mekem.
Ol samting we i kamaot long fas sevem mane invitesen blong mi bae i stap sot taem, be hemia blong seken invitesen, sevem sol, bae i stap blong yu holem blong oltaem—i no gat bebet mo i no gat rosta blong wol ia i kakae.16.
Elda D. Tod Kristofeson i bin givim klia kaonsel mo promes ia: “Stadi long ol skripja wetem kea mo wetem tingting. Tingting hevi mo prea abaot ol skripja ia. Ol Skripja oli revelesen, mo oli tekem moa revelesen i kam.”17
Las Toktok
Mi promes se bae yu no rigret blong raetem wan ves blong ol skripja long maen mo hat blong yu evri wik. Bae yu gat wan filing se i gat wan stamba tingting, proteksen, mo paoa blong spirit i stap gogohed blong stap wetem yu.
Tingbaot ol toktok blong Jisas Kraes taem Hem i talem: “Mekem olgeta samting we yufala i luk mi mi mekem.”18 Bae yumi praktisim fulwan ol toktok blong Hem long laef blong yumi, mi prea olsem long nem blong Jisas Kraes, amen.