Olsem Sip mo Folem Bristol Fasin: Stap Klin Inaf blong Go long Tempol—long Gud Taem mo long Nogud Taem
I Kam long Elda Kwentin L. Kuk
Blong Kworom blong Olgeta Twelef Aposol
Blong folem stret ol tabu gospel prinsipol ia, bae i letem yumi stap klin inaf blong go long tempol, faenem hapines long laef ia, mo lidim yumi i gobak long hom long heven.
Profet Lihae i talem: “Sapos i no gat stret mo gud fasin, i no gat hapines.”1
Enemi i bin gat sakses blong planem wan bigfala kastom stori long tingting blong plante pipol. Hem, mo ol soldia blong hem, oli talemaot se ril joes we yumi gat, i stap bitwin hapines mo glad blong bodi, naoia long laef ia, mo hapines long wan laef we bambae i kam (mo enemi i traem talem se i no gat laef ia). Kastom stori ia i wan giaman joes, be hem i swit tumas.2
Hae stamba tingting blong plan blong God blong stap hapi, i blong olgeta stret mo gud disaepol mo famle blong kavenan blong oli joen wan long lav, gud laef, mo pis long laef ia,3 mo blong kasem selestial glori long ol taem we i no save finis wetem God we i Papa, Krieta blong yumi, mo wetem Pikinini we Hem i lavem tumas, Jisas Kraes, Sevya blong yumi.4
Taem mi yang misinari we oli sendem mi long Britis Misin, fas eria blong wok blong mi i long wanem oli singaotem tetaem ia Bristol Distrik. Wan long ol lokol Jos lida i talem gud se ol misinari we oli wok long eria ia, oli nid blong oli “olsem sip mo folem Bristol fasin.”
Fastaem, mi no save mining blong toktok ia. Be afta, mi lanem histri mo mining blong toktok ia “olsem sip mo folem Bristol fasin.” Long wan taem, Bristol i nambatu bisi wof long Inglan. Wota taed level blong hem i stap long 13 mita, we i nambatu long wol. Long taed i go daon, taem wota i pulaot, ol olfala sip bae oli sidaon long draeples mo lei long saed; mo sapos oli no bildim gud sip, bae oli kasem damej. Antap long hemia, evri samting we oli no putumgud o fasemgud, bae oli kapsaet nogud evriwan mo bae oli nogud.5 Afta we mi andastanem wanem toktok ia i minim, i klia long mi se lida ia i stap talem se, mifala ol misinari, mifala i mas stret mo gud, mas folem rul, mo mas rere blong fesem ol had situesen.
Semfala jalenj ia i blong wanwan long yumi tu. Bae mi talem se blong yumi “olsem sip mo folem Bristol fasin,” i olsem blong stap klin inaf blong go long tempol—long gud taem mo nogud taem.
From taed i go antap mo daon long bigfala Bristol reva, mo yumi save se i hapen wetaem, nao yumi save rere from; be ol hariken mo temtesen blong laef ia, yumi no save talem se bae oli kam wetaem. Be yumi save hemia: !Bae oli kam! Blong save winim ol jalenj mo temtesen we bae yumi mas fesem, bae i nid blong yumi rere long stret mo gud fasin, mo yusum ol proteksen we heven i givim. Yumi mas gat strong tingting blong stap klin inaf blong go long tempol nomata bae i kasem yumi. Sapos yumi rere, bae yumi no fraet.6
Hapines long laef ia, mo hapines long nekis laef, oli joen tru long stret mo gud fasin. Iven long taem ia bitwin ded mo Laef bakegen long ded; “ol spirit blong olgeta we oli stret mo gud bae oli kasem wan ples blong glad, we oli singaotem paradaes, wan ples blong spel, wan ples blong pis.”7
Long stat blong seves blong Sevya long wol ia, long Isrel, mo afta, long medel blong ol man blong Nifae, Sevya i tokbaot poen blong hapines long laef ia, mo long taem we i no save finis. Hem i tokbaot bigwan ol odinens, be tu, Hem i tokbaot bigwan stret mo klin fasin. Eksampol, ol disaepol bae oli gat blesing sapos oli tosta mo hanggri from stret mo gud fasin, oli gat sore, oli gat klin hat, oli mekem pis, mo folem ol nara stamba klin fasin mo tingting. I klia se, olsem wan mesej blong fandesen mo doktrin, Lod blong yumi, Jisas Kraes i talem bigwan se tugeta, ol stret mo gud fasin mo aksen long evri laef i impoten. Ol tijing blong Hem oli no stap riplesem nomo o i kam hae moa bitim sam samting long loa blong Moses,8 be tu, i sakemaot evriwan ol giaman wei blong tingting blong man.
Blong plante handred yia, gospel blong Jisas Kraes i givim insperesen mo stanemap ol standet blong fasin blong man, long wanem i stret mo gud, i gud blong wantem, mo klin, mo i givim risal wetem hapines, glad tingting, mo glad long hat. Be, olgeta prinsipol mo stamba klin fasin ia we Sevya i bin tijim, wol blong tedei i atakem. Kristin fasin i fesem atak. Plante oli biliv se wanem i klin mo gud fasin, i jenis.9
Yumi stap long ol taem we i had. I gat bigfala fasin naoia blong singaotem wanem we i nogud i gud, mo wanem we i gud i nogud.10 Wan wol we i tokbaot bigwan fasin blong putum yuwan antap evriwan mo fasin blong kasem paoa; hemia i wan poen blong wari long hem. Wan man blong raet we plante i save long hem, we i no blong Jos, i talem: “Sore tumas, mi no luk tumas pruf we pipol i stap hapi moa long dispensesen ia we yumi stap statem; mo pikinini blong olgeta i no stap long wan moa gud laef, o sosol jastis i no wok gud, mi no luk se namba blong mared we i go daon mo famle tri we i sot moa i promesem eni samting, be i mekem man i stap hemwan moa, mo i no stap muv nating.”11
Olsem ol disaepol blong Sevya, Lod i wantem luk yumi mekem plan, mo stap rere. Long plan blong stap glad, fridom blong stret mo klin joes i wan stamba prinsipol, mo joes blong yumi i impoten.12 Sevya i talemaot bigwan hemia long ful seves blong Hem, mo insaed long ol parabol blong Hem blong ol ten yang woman mo parabol blong ol talen.13 Long wanwan long ol parabol ia, Lod i tokbaot fasin blong rere mo aksen, mo i panisim fasin blong pusumbak samting mo fasin blong stap nating.
Mi luksave se nomata bigfala hapines we i stap insaed long tabu plan blong God, samtaem, yumi filim se yumi longwe mo no laef folem situesen blong yumi. Maet yumi filim se, olsem wan disaepol we i traehad, hapines ia i strong blong kasem. Wetem lukluk blong yumi we i sot, ol temtesen we yumi fesem mo ol nara samting, oli save pulum ae blong yumi. Long nara han, olgeta we oli stanap agensem ol temtesen ia, i luk se ol praes ia oli stap longwe mo i had tumas blong kasem. Be wan plan blong wan tru Papa we i savegud yumi, i soemaot se ol praes blong stret mo gud fasin oli stap naoia i stap. Rabis fasin, olsem nogud tingting mo fasin, i neva pat blong ansa. Alma i talem klia long boe blong hem, Korianton: “Luk mi talem long yu, rabis fasin i neva bin fasin blong stap glad.”14
Doktrin blong yumi, Amulek i talem klia long Alma 34:32: “Nao luk, laef ia hem i taem blong ol man oli rere blong mitim God; yes, luk, dei blong laef ia i dei blong ol man oli mekem ol wok blong olgeta.”
?Olsem wanem nao yumi stap rere long wan taem we i had olsem? Antap blong stap klin inaf blong go long tempol, i gat plante prinsipol we i helpem yumi stap stret mo gud. Bae mi tokbaot gud tri long olgeta:
Faswan: Kontrolem Yuwan long Stret mo Gud Fasin, mo Aksen blong Yu
Mi biliv se, samtaem, God we i lavem yumi i mas laf gud long yumi semmak olsem taem yumi mekem taem yumi stap luk ol smol pikinini blong yumi taem oli lanem samting mo gro. Yumi evriwan i kikim leg mo foldaon taem yumi kasem eksperiens.
Mi laekem konfrens toktok blong Presiden Dita F. Ukdof we hem i givim long 2010,15 abaot masmalo eksperiens long Stanfod Yunivesiti long ol yia 1960. Bae yu tingbaot se oli bin givim wan masmalo long wan pikinini blong 4 yia. Sapos oli save wet blong 15 o 20 minit mo no kakae, bae oli kasem wan moa masmalo. Ol vidio oli soem we ol pikinini ia oli tantanem olgeta gogo blong no kakae masmalo. Sam oli no save mekem.16
Las yia, profesa we i mekem eksperiens ia, Dokta Wolta Misel, i raetem wan buk mo i talem insaed se stadi ia i kamaot from wari blong hem long fasin blong man i kontrolem hemwan mo adiksen blong hem long sigaret. Hem i wari afta we Jeneral Ripot blong Ol Dokta long Amerika, long 1964 i talem se fasin blong smok i givim kansa long lang.17 Folem plante yia blong stadi, wan long ol fren we tufala i wok, i talem se “fasin blong kontrolem yuwan i olsem wan masel: moa yu yusum, moa i kam strong. Blong ronwe long wan samting we i temtem yu bae i helpem yu blong developem paoa blong stanap agensem ol nara temtesen long fiuja.”18
Wan prinsipol blong progres long laef we i no save finis, i we, sapos yu kontrolem yuwan mo laef long stret mo gud fasin, bae i mekem yu gat moa paoa blong stanap agensem temtesen. Hemia i tru long saed blong spirit, mo tu, laef long wol.
Ol misinari blong yumi, oli wan gud eksampol. Oli developem ol fasin olsem hemia blong Kraes mo folem stret fasin blong obei mo gat Spirit. Oli mas folem wan taem tebol we i fulap, mo spendem taem blong olgeta blong givim seves long ol narawan. Oli luk stret mo naes, be i no dresap olbaot olsem pipol blong tedei. Aksen mo lukluk blong olgeta i givim wan mesej we i series mo i klin.19
Yumi gat samples 230, 000 yang pipol we oli stap olsem misinari, o oli kambak long misin seves long ol las faef yia. Oli developem wan paoa long spirit we i bigwan, mo oli gat kontrol long olgetawan we oli mas gogohed blong mekem oltaem, sapos no, ol kwaliti ia bae oli go slak, semmak olsem ol masel we oli no yusum olgeta. Yumi evriwan i nidim blong developem mo soemaot wan fasin mo lukluk we i talem se yumi ol tru man blong folem Kraes. Olgeta we oli lego ol stret mo gud fasin o gudfala lukluk long fes blong olgeta, oli stap putum olgeta blong folem laefstael we i no tekem glad o hapines i kam.
Gospel we i kambak i givim yumi masta plan we oli raetem blong plan blong hapines, mo i pusum yumi blong andastanem, mo praktisim kontrol long yumiwan, mo stap longwe long temtesen. Hem i tijim tu olsem wanem blong sakem sin taem sin i hapen.
Nambatu: Givim Ona long Sabat bae I Mekem Stret mo Gud Fasin I Kam Antap mo I Stap Olsem Wan Proteksen long Famli.
Fas Kristin Jos i jenisim fasin blong folem Sabat long Satedei i go long Sandei blong tingbaot taem we Lod i laef bakegen long ded. Ol nara tabu stamba tingting blong Sabat oli stap semmak. Long ol man Jiu mo ol Kristin man, Sabat i saen blong ol bigfala wok blong God.20
Waef blong mi mo mi, mo tu fren blong wok mo waef blong olgeta i tekpat long wan Jiu Sabat folem invitesen blong wan gud fren blong mi, Robet Ebrams wetem waef blong hem, Dayan, long haos blong tufala long Niu Yok.21 I stat long stat blong Jiu Sabat long wan Fraedei naet. Stamba tingting i blong ona long God olsem Krieta. I stat wetem blesing long famli, mo wan Sabat hym.22 Mifala i joenem seremoni blong wasem han, blesem bred, ol prea, wan kosa kaekae, mo talem ol skripja, mo singsing ol singsing blong Sabat. Mifala i lisin long ol toktok long Hibru, folem wetem Inglis translesen. Bigfala skripja i kamaot long OlTesteman, we mifala tu i laekem, we i kam long Aesea we i talem se Sabat i wan naes samting,23 mo wan we i kamaot long Esekiel we i talem se Sabat “i wan saen bitwin God mo yumi, blong yumi save se Hem i Lod, God blong yumi.”24
Bigfala filing we i kamaot long naesfala naet ia, i lav blong famli, strong tingting mo wok mo ripot long Lod. Taem mi tingbaot taem ia, mi tingtingbak long bigfala agens we ol man Jiu oli gotru long plante handred yia. I klia we, blong ona long Sabat, i wan kavenan we i gogohed, we i holemtaet mo blesem ol Jiu pipol olsem we skripja i talem.25 I givhan plante tu long gudfala famli laef mo hapines we i stap long laef blong plante Jiu pipol.26
Long ol memba blong Jos blong Jisas Kraes blong Ol Lata-dei Sent, blong ona long Sabat i wan wei blong stap stret mo gud we bae i blesem mo mekem ol famli oli kam strong moa, i joenem yumi long Krieta blong yumi, mo i mekem hapines i kam antap. Sabat i helpem yumi blong yumi seperet long samting we i no impoten, i no stret nating o i rabis. I letem yumi stap insaed long wol ia be i no folem fasin blong wol ia.
Long ol las sikis manis, wan bigfala jenis i bin hapen long Jos. I kam from ol memba oli folem toktok blong folem gud Sabat, toktok we i kam long Fas Presidensi mo Kworom blong Olgeta Twelef Aposol, mo from ol memba oli folem jalenj blong Presiden Rasel M. Nelson blong mekem Sabat i wan naes samting.27 Plante memba oli andastanem se blong stap tru blong kipim Sabat dei i tabu i wan ples blong haed long ol strong win blong laef. Hem i wan saen tu blong strong tingting we yumi gat long God mo yumi andastanem gud se sakramen miting i tabu. Be yet, yumi gat wan longfala rod blong folem, be i wan gudfala stat. Mi givim jalenj long yumi evriwan blong gohed blong akseptem kaonsel ia, mo kam antap moa long Sabat wosip blong yumi.
Nambatri: Proteksen we I Kam long Heven I Kam Taem Yumi Stret mo Gud.
Olsem pat blong tabu plan blong God, yumi gat blesing blong kasem presen we i Tabu Spirit. Presen ia “hem i raet blong gat, taem wan i klin inaf, Tabu Spirit olsem kompanion.”28 Memba ia blong Godhed i stap olsem wan spirit blong klinim yumi sapos gospel i faswan insaed long laef blong yumi. Mo tu, hem i wan voes blong woning agensem ivel mo i wan voes blong proteksen agensem ol denja. Taem yumi stap sel long ol solwota blong laef, blong folem toktok blong Tabu Spirit i wan nid. Spirit i helpem yumi blong stap longwe long ol temtesen, mo ol denja, mo i givim kamfot mo lidim yumi tru long ol jalenj. “Ol frut blong Spirit oli lav, glad, pis, safa longtaem, kaen fasin, mekem gud, fet.”29
Blong folem stret ol tabu gospel prinsipol ia, bae i letem yumi stap klin inaf blong go long tempol, faenem hapines long laef ia, mo lidim yumi i gobak long hom long heven.
Ol dia brata mo sista blong mi. Laef i no isi, mo i no blong i isi. Hem i wan taem blong tes, blong hadtaem. Semmak olsem ol olfala sip long Bristol Haba, bae i gat taem we solwota i drae mo i luk se evri samting long wol ia we i holemtaet yumi, oli lus i go. Bae yumi sidaon long draeples mo yumi lei wansaed. Long taem blong ol hadtaem olsem, mi promesem yufala se blong stap laef mo holemtaet laef we i klin inaf blong go long tempol bae i holemtaet evri samting we i impoten. Ol swit blesing blong pis, hapines, mo glad, wetem ol blesing blong laef we i no save finis mo selestial glori wetem Papa long Heven mo Pikinini blong Hem, Jisas Kraes, bae oli kamtru. Mi testifae olsem, long nem blong Jisas Kraes, amen.