Jusum Laet
I Kam long Elda Ven P. Stanfil
Blong Olgeta Seventi
Blong save kasem paoa blong spirit, yumi mas jusum blong folem toktok blong profet, luksave mo tekem aksen folem ol toktok blong spirit, mo stap obei long ol komanmen blong God.
I no longtaem i pas, waef blong mi mo mi i disaed se mitufala i mas save gud moa ol naes ples blong wan eria kolosap long haos blong mitufala long Not Wes Montana. Mitufala i tekem baeskel blong mitufala i go long Hiawata Rod, wan rod blong tren we i krosem Naes Roki Hil, bitwin Montana mo Aedaho. Mitufala i ting se bae mitufala i gat wan gud dei wetem ol gud fren long ol naes ples ia.
Mitufala i save se ronron blong mitufala long 24 kilometa rod ia bae i pasem ol brij we oli go insaed long ol dip kanion mo ol longfala tanel we oli go insaed long ol raf hil. Mekem se mitufala i fasem rere ol laet long hat mo baeskel blong mitufala.
Olgeta we oli bin go finis oli bin talem se ol tanel ia oli tudak mo bae mifala i nidim strong laet. Taem mifala i stap grup tugeta long fored blong bigfala hol blong ston long Taf Tanel, wan gad i eksplenem sam long ol denja blong rod ia, we i gat ol dip hol long saedsaed, ol raf wol, mo bigfala tudak. Mifala i no save wet; mifala i ron i go insaed long tanel. Taem mifala i ron blong smol taem nomo, bigfala tudak ia i kavremap mifala. Ol laet we mi tekem i no naf, mo tudak i moa strong bitim laet. Nao, mi stat blong wari, gat miks tingting, mo nomo save rod.
Mi sem blong talemaot wari blong mi long ol fren mo famli blong mi. Nomata mi save ron gud long baeskel, mi filim se i olsem mi neva ron long wan. Mi traehad blong sidaon stret taem tingting blong mi i miks bigwan moa. Nao, taem mi talemaot harem nogud blong mi long olgeta raon long mi, mi go kolosap long laet, we i strong moa, blong wan fren. Wanem i stap, evriwan long grup i stat blong mekem wan sot sekol raon long hem. Taem grup i stastap kolosap long hem mo dipen blong smol taem long laet blong hem mo laet blong grup, mifala i go moa insaed long tudak blong tanel ia.
Afta wanem we mifala i luk se plante aoa, mi luk wan smol poen blong laet. Kwiktaem, mi stat blong filim gud se bae evri samting i oraet. Mi gohed blong ron i go, mi dipen long laet blong ol fren blong mi mo poen blong laet ia we i stap kam bigwan. Tras blong mi i kambak taem laet i stap gro bigwan mo strong moa. Longtaem bifo mifala i kasem en blong tanel, mi nomo nidim help blong ol fren blong mi. Evri wari oli lus taem mifala i ron i go from laet ia. Mi filim kwaet mo gud bifo mifala i ron i go long moning laet we i wom mo naes tumas.
Yumi stap laef long wan wol we bae yumi gotru ol jalenj blong bilif blong yumi. Maet yumi trastem yumi se yumi rere blong fesem olgeta jalenj ia—mo afta, faenem se yumi no bin rere inaf. Mo olsem we fren blong mi i bin wonem mi long tudak ia, tedei, yumi kasem woning. Ol voes blong ol aposol oli askem strong yumi blong yumi rere wetem strong laet blong paoa long saed blong spirit.
Semmak, maet yumi sem, no filim gud, mo gat miks tingting long saed blong spirit taem yumi fesem wan jalenj blong fet blong yumi. Plante taem, hamas nao ol filing ia bae oli strong mo kasem wetaem, bae i dipen long hao yumi fesem olgeta. Sapos yumi no mekem wan samting, bae tu tingting, hae tingting, mo afta apostasi bae i tekem yumi aotsaed long laet.
Mi lanem samfala impoten lesen aot long eksperiens blong mi insaed long tanel. Bae mi serem samfala.
Faswan. I no mata se tudak blong tu tingting ia i tudak gud, yumi jusum se bae i gat paoa long yumi kasem wetaem mo bae i strong hamas. Yumi mas tingbaot hamas nao Papa long Heven mo Pikinini blong Hem, Tufala i lavem yumi. Bae Tufala i no save lego yumi, mo bae Tufala i no save letem yumi foldaon sapos yumi lukaotem help blong Tufala. Tingbaot eksperiens blong Pita long raf solwota long Galili. Taem Pita i filim kolkol tudak raon long hem, hem i luksave trabol blong hem kwiktaem, mo i jusum, long stret taem ia, blong askem help. Hem i no gat kwestin long paoa blong Sevya blong sevem hem; hem i singaot nomo: “Masta, plis yu sevem mi.”1
Long laef blong yumi, han ia we Sevya i stretem i kam, i save kam olsem wan fren we yumi trastem, wan lida o wan famli we yumi lavem. Taem yumi stap traehad long tudak, i no gat samting i rong blong dipen smol taem long laet blong olgeta we oli lavem yumi mo wantem gud blong yumi.
Taem yumi tingting gud long hemia, ?from wanem nao bae yumi lisin long voes we i no gat fes mo i jik blong olgeta long bigfala bilding wetem plante rum blong taem blong yumi, mo no lukluk long singaot blong olgeta we oli lavem yumi tru? Ol man blong poenem fingga ia oli wantem pulum yu daon be i no leftemap yu; oli wantem jikim yu be i no tokbaot gud yu. Ol toktok blong jik blong olgeta i save digim hol long laef blong yumi, tru long sam seken nomo blong rong lektronik klik we man i waes i putum blong prapa spolem gud fet blong yumi. ?Bae hem i waes blong putum gudlaef blong yumi we i no save finis long han blong strenja? ?Bae i waes blong kasem laet long olgeta we oli no gat laet blong givim, mo maet oli gat ol haed plan? Ol man ia we oli no gat nem, sapos oli presentem long yumi long ones fasin, bae oli no gat taem wetem yumi; be oli yusum sosol media, oli haed long sekiuriti, mo oli mekem man i bilivim olgeta.
Joes blong yumi blong folem olgeta we oli jikim ol tabu samting, bae i mekem yumi go longwe long laet ia blong Sevya we i sevem man mo i givim laet. Jon i raetem: “Jisas i talem ‘Mi nao mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.’”2 Tingbaot se olgeta we oli lavem yumi tru, oli save helpem yumi blong bildimap fet blong yumi.
Semmak olsem we mi bin sem insaed long tanel, maet yumi filim sem tumas blong askem help taem yumi gat tu tingting. Maet yumi bin wan ia nao we narawan i lukluk blong kasem paoa, mo naoia, yumi nidim help. Taem yumi luksave se laet mo gud han we Sevya i save givim long yumi i moa gud bitim blong lusum hae tingting, nao ol lida blong Jos we i gat insperesen, famli, mo ol gud fren oli save help. Oli stanap rere blong helpem yumi blong kasem tras long saed blong spirit we bae i mekem yumi kam strong moa blong fesem ol jalenj blong fet.
Nambatu. Yumi mas trastem Lod blong save developem, insaed long yumi, paoa blong yumiwan long saed blong spirit. Yumi no save dipen long laet blong ol narawan blong oltaem. Mi bin save se tudak long tanel bae i no stap longtaem sapos mi gohed blong ron long saed blong fren blong mi, mo stap sef insaed long grup. Be mi wantem gohed miwan taem bae mi luk laet. Lod i tijim yumi: “Kam kolosap long mi mo bambae mi kam kolosap long yufala; lukaotem mi wetem strong tingting mo bambae yufala i faenem mi; askem mo bambae yufala i kasem; noknok, mo bae i open long yufala.”3 Yumi mas tekem aksen, wetem tingting se Lod bae i mekem promes blong Hem blong leftemap yumi i kamaot long tudak sapos yumi go kolosap long Hem. Be enemi bae i traem blong winim tingting blong yumi se yumi neva filim paoa blong Spirit mo bae i isi moa blong stop blong traem.
Presiden Dita F. Ukdof i givim kaonsel ia blong “yumi gat tu tingting long ol tu tingting blong yumi bifo yumi gat tu tingting long fet blong yumi.”4 Long hom wod blong mi, wan yang man i talem: “I gat ol samting we mi bin filim we mi no save eksplenem, be mi save talem se oli kam long God.” Hemia i blong stap tru long saed blong spirit.
Taem yumi gat ol kwestin, o gat temtesen blong gat tu tingting, yumi mas tingbaot ol blesing mo filing long saed blong spirit we i bin go insaed long hat mo laef blong yumi bifo finis, mo putum fet blong yumi long Papa long Heven mo Pikinini blong Hem, Jisas Kraes. Mi tingbaot kaonsel we i stap long wan hym: “Yumi trastem Kraes from hem i gud. Hem i helpem yumi plante taem.”5 Blong no wantem save mo no tingting long ol eksperiens blong bifo bae i mekem yumi go longwe long God.
Taem yumi wokbaot from laet, yumi mas wantem blong luksave taem hem i stap saen long laef blong yumi. Ol skripja blong tedei oli talem wanem i laet mo oli givim promes long olgeta we oli akseptem: “Wanem we i kam long God, i laet; mo hem we i kasem laet, mo i gohed blong stap strong long God, i kasem moa laet; mo laet ia i gro i saen gud mo i saen moa gud bakegen kasem dei we i stret gud evriwan i kam.”6 Semmak olsem we taem mifala i gohed blong ron from laet, moa mifala i traem, paoa blong Hem i strong moa long laef blong yumi. Semmak olsem laet long en blong tanel, paoa blong Hem bae i mekem yumi gat tras, strong tingting, harem gud, mo—moa impoten—paoa blong save se Hem i stap laef.
Nambatri, i no gat tudak we i tik tumas, we i nogud tumas, o i had tumas we laet i no save winim. Elda Nil L. Andesen i jes tijim: “Taem devel fasin i kam antap long wol, i gat wan paoa long saed blong spirit we i stap long olgeta we oli stret mo gud. Taem wol ia i glis aot long angka blong spirit, Lod i mekem rere wan wei blong olgeta we oli stap lukaotem Hem, i givim olgeta tras we i moa bigwan, konfemesen we i moa strong, mo tras we i moa bigwan long wei blong spirit we oli stap wokbaot long hem. Presen we i Tabu Spirit i kam wan laet we i saen strong moa long fored blong laet ia we i go daon.”7
Ol brata mo sista. Hem i no letem yumi stap yumiwan blong eni kaen fos mo jenis long fasin blong wol i gat paoa long yumi, be yumi gat paoa blong jusum bilif o tu tingting. Blong save kasem paoa blong spirit we Hem i givim mo promesem, yumi mas jusum blong folem toktok blong profet, luksave mo tekem aksen folem ol toktok blong spirit, stap obei long ol komanmen blong God, mo lukaotem revelesen blong yumiwan. Yumi mas jusum. Bae yumi jusum laet blong Sevya. Long nem blong Jisas Kraes, amen.