I Neva Eli Tumas mo I Neva Let Tumas
I Kam Long Elda Bradli D. Fosta
Blong Olgeta Seventi
I neva eli tumas mo i neva let tumas blong lidim, tekem han, mo wokbaot long saed blong ol pikinini blong yumi from famli i blong oltaem.
Ol Brata mo sista. Yumi joen long wan faet wetem wol. Long bifo, wol i stap kompit from paoa mo taem blong ol pikinini blong yumi. Tedei, hem i stap faet blong aedentiti mo maen blong olgeta. Plante laod mo bigfala voes oli traem blong talem huia ol pikinini blong yumi, mo wanem nao oli mas biliv long hem. Yumi no save letem sosaeti i givim famli blong yumi, wan giaman pikja blong wol. Yumi mas winim faet ia. Evri samting bae i dipen long hemia.
Ol pikinini blong Jos oli singsing wan singsing we i tijim olgeta abaot tru aedentiti blong olgeta: “Mi pikinini blong God, Hem i sendem mi long ples ia, Hem i givim hom long mi long wol mo famle gud tumas.” Mo afta, toktok blong pikinini long yumi: “Lidim mi, tijim mi, plis givhan long mi, mi wantem save rod.”1
Presiden Rasel M. Nelson i tijim yumi long las jeneral konfrens blong yumi se, stat naoia i go, yumi mas “stap strong mo wantem stap olsem papa mo mama.”2 Hemia i taem blong denja. Be gudfala nius i we God i bin save se bae i olsem, mo Hem i givim kaonsel ia long skripja blong yumi save olsem wanem blong helpem ol pikinini mo ol apupikinini blong yumi.
Long Buk blong Momon, Sevya i kamaot long ol man blong Nifae. Hem i pulum tugeta ol smol pikinini blong olgeta. Hem i blesem olgeta, i bin prea from olgeta, mo i bin krae from olgeta.3 Afta, Hem i talem long papa mo mama blong olgeta: “Luk ol smolwan blong yufala.”4
Toktok ia, luk, i minim blong lukluk i go mo luk gud. ?Wanem nao Jisas i wantem papa mo mama i luk long ol smolwan blong olgeta? ?Hem i wantem olgeta blong kasem smol tabu paoa blong pikinini blong olgeta o no?
Taem yumi luk stret pikinini mo apupikinini blong yumi tedei, ?Wanem nao Sevya i wantem yumi blong luk long olgeta? ?Yumi stap luksave se ol pikinini blong yumi i bigfala grup ia blong ol investigeta blong Jos? ?Wanem nao yumi mas mekem blong oli save jenisim laef blong olgeta i stap?
Long buk blong Matiu, Sevya i tijim yumi abaot fasin blong jenisim we i stap oltaem. Wan bigfala grup blong ol pipol oli bin kam tugeta kolosap long Solwota blong Galili blong harem Hem i tij.
Long taem ia, Jisas i talem wan stori abaot ol sid—parabol blong man blong planem ol sid.5 Taem Hem i eksplenem hemia long ol disaepol blong Hem, mo tu long yumi, Hem i talem: “Sid we i foldaon long rod i olsem we man i harem tok ya we God i stap kam King blong ol man blong hem, be i no save mining blong hem.”6 Mesej blong ol papa mo mama i klia: i gat samting i defren bitwin blong harem mo blong save mining. Sapos ol pikinini blong yumi ol harem be oli no save mining blong gospel, nao doa i open i stap blong Setan i kam karemaot ol trutok ia long hat blong olgeta.
Be, sapos yumi save helpem olgeta blong oli mekem rus blong jenisim laef i gro, nao long bigfala san blong dei, taem laef i strong tumas, mo bae i strong, gospel blong Jisas Kraes i save givim olgeta wan samting insaed, we samting aotsaed i no save spolem. ?Olsem wanem nao yumi meksua se ol trutok blong paoa ia oli no jes go insaed long wan sora mo kamaot long nara sora? Blong harem toktok nomo bae i no inaf.
Yumi evriwan i save se ol wol oli jenis. Samtaem yu talem sam toktok blong yu, mo oli harem toktok blong olgeta. Maet yu stap talem ol yang pikinini blong yu, “Yu saon olsem brokbrok kaset.” Maet bae oli ansa “Papa, ?wanem ia wan kaset?”
Papa blong yumi long Heven i wantem yumi blong gat sakses from se long en, i tru tumas, oli bin ol pikinini blong Hem bifo oli kam pikinini blong yumi. Olsem papa mo mama long Saeon, yu bin kasem presen we i Tabu Spirit. Taem yu stap prea blong Hem i lidim yu, “bae hem i soem long yufala evri samting we bae yufala i mas mekem”7 blong tijim ol pikinini blong yufala. Taem yu developem sam rod blong lanem samting, “paoa blong Tabu Spirit i karem toktok ia i go long ol hat blong ol pikinini blong ol man.”8
Mi no save tingting long wan gud moa eksampol blong helpem wan i kasem mining blong samting bitim stori blong Helen Kela. Hem i blaen mo sora i fas, mo i laef long wan wol we i tudak mo i kwaet. Wan tija, An Sulivan, i kam helpem hem. ?Olsem wanem bae yu tijim wan pikinini we i no save luk o harem yu?
Blong longtaem, An i traehad blong toktok wetem Helen. Wan dei, samples long medeldei, hem i tekem Helen i go long wan wota pam. Hem i putum han blong Helen andanit long paep blong wota mo stat blong pamem wota. Nao An i spelem toktok ia, W-O-T- A long nara han blong Helen. I no gat wan samting i hapen. Hem i traem bakegen. W-O-T-A. Helen i holem han blong An from se hem i stat blong kasem mining. Taem tudak i kam, Helen i lanem 30 toktok. Long sam manis taem, hem i lanem 600 toktok mo i save ridim lanwis blong ol blaen man. Helen Kela i gohed i winim wan digri, mo i help blong jenisim wol blong olgeta pipol we oli no save luk o harem samting.9 Hem i wan merikel, mo tija blong hem nao i merikel wokman.
Mi luk risal blong wan nara gud tija taem hem i bin stap olsem presiden blong wan singgel adalt stek long BYY- Aedaho. Eksperiens ia i jenisim laef blong mi. Wan Tiusdei naet, mi intaviu long wan yang man, nem blong hem Pablo, blong Meksiko siti, we i wantem go long wan misin. Mi askem hem abaot testemoni blong hem, mo tingting blong hem blong givim seves. Ol ansa long ol kwestin blong mi oli stret gud. Afta nao mi askem sapos hem i klin inaf. Ansa blong hem i stret gud. I gud tumas nao mi askem miwan: “Ating hem i no save mining blong wanem mi stap askem hem.” Mekem se mi jenisim toktok blong kwestin blong mi mo faenem se hem i save stret wanem mi minim mo i ones tru.
Mi sapraes tumas wetem yang man ia, nao mi askem hem: “Pablo, ?huia i helpem yu blong kam wan poen blong laef blong yu we yu stanap stret gud long fes blong Lod?
Hem i talem: “Papa blong mi.”
Mi talem: “Pablo, talem stori blong yu long mi.”
Pablo i gohed: “ Taem mi gat naen yia, papa i pulum mi mo talem: ‘Pablo, mi tu mi bin gat naen yia long wan taem. Hemia sam samting we bae yu save fesem. Bae yu luk pipol i giaman long skul. Ol pipol raon long yu bae oli swea. Bae i gat sam dei we bae yu no wantem go long jos. Nao, taem ol samting ia oli hapen—o eni nara samting we i trabolem yu—mi wantem yu kam toktok wetem mi, mo bae mi helpem yu gotru long olgeta samting ia. Mo afta, bae mi talem long yu wanem bae i kam afta.’”
“So Pablo, ?hem i talem wanem long yu taem yu kasem 10 yia?”
“Hem i givim woning long mi abaot ponografi mo ol tok fani we oli doti.”
“?Olsem wanem taem yu kasem 11 yia?” mi askem.
“Hem i talem mi blong lukaot long ol samting we i save mekem mi gat adiksen mo mekem mi tingbaot blong yusum fridom blong joes.”
Hem i bin wan papa, yia afta yia, “tijing folem tijing; smol long ples ia, mo smol longwe,”10 we i bin helpem boe blong hem blong harem, be tu, blong save mining. Papa blong Pablo i bin save se ol pikinini bae oli lanem samting taem oli rere blong lanem samting, i no jes yumi rere blong tijim olgeta. Mi praod long Pablo, mo taem mifala i sendem misinari pepa blong hem long naet ia, mi praod moa long papa blong Pablo.
Taem mi draev i go hom long naet ia, mi askem miwan: “?Bae Pablo i kam wanem kaen papa?” Mo ansa i klia gud nomo; bae hem i olsem papa blong hem. Jisas i talem: “Mi mi Pikinini blong God mi no save mekem wan samting nating long tingting blong mi nomo. Mi save mekem ol samting ya nomo we mi luk Papa blong mi i stap mekem.”11 Hemia wei blong folem long hao Papa long Heven i blesem ol pikinini blong Hem long wan jeneresen i go long narawan.
Taem mi gohed blong tingting long eksperiens blong mi wetem Pablo, mi filim nogud from se ol fofala gel blong mi oli bigwan finis mo ol naen apupikinini blong mi we mi gat long tetaem ia oli stap longwe long mi. Afta nao mi tingting: “?Hao nao bae mi helpem olgeta long sem fasin blong papa blong Pablo i helpem Pablo? ?Taem i let finis? Taem mi mekem wan prea long hat blong mi, Spirit i tok kwaet long mi i talem bigfala trutok ia: “Hem i neva eli tumas mo i neva let tumas blong statem wok ia we i impoten tumas.” Mi save wantaem se hemia i minim wanem. Mi wantem go hom kwik. Mi askem waef blong mi, Sarol, blong singaotem evriwan long ol pikinini blong mifala mo talem olgeta se mifala i nidim blong go visitim olgeta; mi gat wan impoten samting blong talem long olgeta. Hemia i mekem oli wari smol.
Mifala i stat wetem bigfala gel blong mitufala mo hasban blong hem mo talem: “Mama blong yu mo mi i wantem yutufala i save se mitufala i gat yia blong yutufala wan taem. Mifala i bin gat 31 yia wetem wan smol famle. Mifala i save smol wanem bae yufala i fesem. Maet i wan jalenj long mane o long helt. Maet i wan taem blong gat kwestin long fet. Maet laef i hevi tumas long yutufala. Taem ol samting ia oli hapen, mitufala i wantem yutufala blong toktok wetem mitufala. Bae mitufala i helpem yutufala gotru long hemia. Nao, mitufala i no wantem kam harem bisnis blong yutufala oltaem, be mitufala i wantem se yutufala i save se mitufala i stap ia, oltaem, long kona blong yu. Taem yumi stap tugeta ia, mi wantem talem long yutufala abaot wan intaviu we mi jes gat wetem wan yang man, Pablo.”
Afta long stori, mi talem: “Mitufala i no wantem se yutufala i mestem janis blong helpem ol pikinini blong yutufala, mo ol apupikinini blong mitufala blong oli save mining blong ol impoten trutok ia.”
Ol brata mo sista. Naoia mi luksave, long wan wei we i gat moa mining, wanem Lod i wantem mi blong mekem olsem wan papa mo olsem wan bubuman blong putumap wan rod i stap blong helpem famli blong mi blong harem, be tu, blong save mining.
Taem mi stap kam olfala, mi stap tingtingbak long ol toktok ia:
!O taem, O taem, yu flae i gobak,
Mo letem olgeta oli kam smol pikinini blong mi, jes blong wan naet nomo!12
Mi save, mi no save tanem taem i gobak, be mi save hemia—i neva eli tumas mo i neva let tumas—blong lidim, tekem han, mo wokbaot long saed blong ol pikinini blong yumi from famli i blong oltaem.
Hem i witnes blong mi, se Papa long Heven i lavem yumi tumas nao i sendem Wan Stret Pikinini Ia Nomo blong Hem blong stap long wol olsem wan man we i save ded, blong mekem se Jisas i save talem long yumi: “Yu save, mi bin stap ia; mi save wanem i kam afta, mo bae mi helpem yu gotru long hem.” Mi save bae Hem i mekem. Long nem blong Jisas Kraes, amen.