Ol Ae blong Luksave mo Ol Sora blong Haremsave

I Kam Long Elda Kim B. Klak

Blong Olgeta Seventi

Sapos yumi lukluk long Kraes mo openem ol ae mo sora blong yumi bae Tabu Spirit i blesem yumi blong luksave wok blong Jisas Kraes long laef blong yumi.

Long seves blong Hem long wol ia, Jisas i bin mekem plante bigfala merikel olsem hilim olgeta sikman mo tij wetem wan atoriti mo paoa we skripja i tokbaot se, “Nao nyus blong Hem i kavremap olgeta ples long kantri ia Siria … nao olgeta evriwan oli biaen long Hem.”¹

Plante man we oli bin luk hem i hilim ol sikman mo oli bin harem Hem i tij oli sakemaot long Hem.² Ol narafala oli bin folem Hem blong wan sot taem afta oli nomo biaen long Hem bakegen. Lod Jisas Kraes i bin stap long fored blong olgeta, be oli no bin luksave huia Hem. Olgeta i blaen mo oli jusum blong tanem baksaed. Abaot olgeta ia, Jisas i bin talem se:

“Mi bin kam long olgeta blong mi, mo olgeta blong mi i no bin akseptem mi.”³

“Olgeta i harem, harem, harem be oli no save haremsave samtaem mo oli luk, luk, luk be oli no save luksave samtaem.”⁴

Be i gat plante man mo woman wetem ol fetful Aposol blong Hem we oli putum Jisas long medel blong laef blong olgeta. I nomata se oli stap traehad wetem ol samting blong wol ia, wetem ol konfius tingting long wanem Hem i bin stap tijim, mo tu, oli gat fraet, be yet, oli biliv long Hem, oli lavem Hem, mo oli folem Hem.

Abaot olgeta Jisas i talem: “Be yufala ia, yufala i save harem gud, from we yufala i save luk ol samting ya, mo yufala i save harem ol tok ia.”⁵

Bifo Hem i safa long Garen blong Getsemane mo long Kalvari, Jisas i bin mekem wan spesel promes long ol disaepol blong hem: “Man we i biliv long Mi, hem bae i save mekem ol wok ia we mi mi stap mekem, Yes, hem bambae i save mekem plante wok moa i winim ol wok ia we mi mi mekem from we bambae mi mi go long Papa blong mi”⁶

Jisas i fulfilim promes ia: stat long dei blong Pentekos, ol disaepol oli bin kasem blesing wetem baptaes blong faea mo wetem Tabu Spirit. ⁷ Tru long fet blong olgeta long Kraes, fasin blong sakem sin, mo fasin blong obei, Tabu spirit i kam kompanion blong olgeta, i jenisim hat blong olgeta, mo blesem olgeta blong oli save stap oltaem olsem ol witnes blong trutok.

Ol presen mo blesing ia oli givim moa paoa long ol disaepol blong Lod. i nomata se taem we olgeta i bin stap laef long hem i gat plante denja mo konfius tingting, olgeta i bin kasem wan presen blong saed blong spirit blong ae i save luk mo sora i haremsave. Tru long paoa blong Tabu Spirit, olgeta i stat blong luk trutok long ol samting we i stap, speseli long Lod Jisas Kraes mo wok blong Hem wetem olgeta.⁸ Tabu Spirit i givim laet long save blong olgeta mo oli bin harem voes blong Lod moa klia. Gospel blong Jisas Kraes i draon dip long hat blong olgeta.⁹ Oli bin stap gohed mo stap obei.¹⁰ Oli prijim gospel wetem klia toktok mo paoa blong bildimap kingdom blong God.¹¹ Oli gat bigfala glad long Lod Jisas Kraes.

Yumi gat plante samting we i semmak long ol fetful man mo woman ia blong medel blong ol taem. Yumi tu, yumi stap laef long wan taem we Lod Jisas Kraes i stap mekem plante merikel—hilim ol sikman, wasemaot ol sin blong yumi, jenisim hat, mo openem fasin blong sevem man long ol pikinini blong God long tugeta saed blong vel. Long taem blong yumi, yumi gat tu ol profet mo aposol we oli stap laef, paoa blong prishud, ol presen blong spirit, mo ol bigfala blesing blong ol odinens blong fasin blong sevem man.

Taem blong yumi tedei i fulap long denja—wan taem blong bigfala fasin nogud mo temtesen, wan taem blong plante miks tingting mo man i muvmuv olbaot. Long ol taem blong denja ia, profet blong Lod long wol ia, Presiden Tomas S. Monson i singaotem yumi blong go faenem olgeta we spirit blong olgeta i nomo strong,¹² blong stanap from trutok wetem strong paoa long tingting,¹³ mo blong bildimap kingdom blong God.¹⁴ Wanem mak blong spirit o fet o fasin blong stap obei we yumi stap long hem, bambae hem i no inaf blong wok we i stap long fored. Yumi nidim plante moa paoa mo laet blong spirit. Yumi nidim ol ae we bae oli save luksave moa klia ol wok blong Sevya long laef blong yumi mo ol sora blong haremsave voes blong Hem dip insaed long hat blong yumi.

Bigfala blesing ia i kam taem yumi openem hat blong yumi mo akseptem,¹⁵ akseptem wetem tru hat, Lod ia Jisas Kraes, doktrin blong Hem, mo Jos blong Hem long laef blong yumi. Yumi no nid blong stap stret gud, be yumi nid blong yumi gud mo kam moa gud. Yumi nid blong traehad blong laef folem ol simpol trutok blong gospel. Sapos yumi tekem long yumi nem blong Jisas Kraes, gat fet long Hem blong sakem ol sin blong yumi, obei ol komanmen blong Hem mo tingbaot Hem oltaem, bambae yumi save kasem Tabu Spirit olsem fren blong yumi tru long bigfala sore mo gladhat blong Jisas Kraes.

Simpol fasin blong stap obei i tekem Spirit i kam long hat blong yumi. Long ol hom blong yumi, yumi prea wetem fet, stadi ol skripja, mo kipim Sabat dei i tabu. Long ol japel blong yumi, yumi tekem sakramen mo mekem ol tabu promes long Papa blong yumi long Heven long nem blong Kraes. Insaed long ol tabu tempol, yumi mekem ol tabu odinens long bihaf long ol brata mo sista blong yumi narasaed long vel. Insaed long ol famle mo ol wok blong yumi we i kam long Lod, yumi stap givhan long ol narafala, leftemap ol hevi trabol blong olgeta mo invaetem olgeta blong kam long Kraes.

Ol brata mo sista. Mi save se sapos yumi mekem ol samting ia, !bae Tabu Spirit i kam! Bae yumi gro long saed blong spirit mo kasem eksperiens wetem Tabu Spirit mo bae hem i kam fren blong yumi. Sapos yumi lukluk long Kraes mo openem ol ae mo sora blong yumi bae Tabu Spirit i blesem yumi blong luksave wok blong Jisas Kraes long laef blong yumi, mo semtaem mekem fet blong yumi long Hem i kam moa strong wetem promes long wanem we yumi save luk. Bambae yumi save lukluk moa long ol narafala brata mo sista blong yumi long wei we Lod i stap lukluk long olgeta, wetem lav mo sore. Bambae yumi save harem voes blong Sevya insaed long ol skripja, long smol voes blong Tabu Spirit mo long toktok blong ol profet we oli stap laef.¹⁶ Bambae yumi save luksave paoa blong God long profet blong Hem mo evri lida blong tru Jos blong Hem, mo bae yumi kam blong save wetem wan klia tingting se hemia hem i tabu wok blong God.¹⁷ Bambae yumi save luk mo andastanem yumiwan mo evriwan raon long yumi long wei blong Sevya. Bambae yumi save gat wanem we Aposol Pol i singaotem “maen blong Kraes.” ¹⁸ Bambae yumi gat ol ae blong luksave mo ol sora blong haremsave, mo bambae yumi bildimap kingdom blong God.

Bambae laef i kam moa had, i gat moa konfius tingting, i gat plante moa harem nogud, mo i daonem tingting. Mi serem witnes blong mi long yu se tru long Tabu Spirit olsem kompanion, bambae laet blong gospel blong Jisas Kraes i katemaot ol konfius tingting ia, ol harem nogud ia, mo tudak ia. I nomata se laet ia i kam bigwan wantaem o i kam sloslo, gudfala laet blong spirit ia bae i givimaot wan lav we i save hilim mo givim kamfot long hem we i wantem sakem sin, hem we spirit blong hem i no strong; bae i ronemaot tudak wetem laet mo trutok; mo i sakemaot ol tingting we i no strong mo karem i kam hop long Jisas Kraes. Bae yumi luk ol blesing ia oli kam mo bae yumi save tru long witnes blong Tabu Spirit se hemia hem i wok blong Lod Jisas Kraes long laef blong yumi. “Glad blong [Ridima blong yumi] bae i kavremap” ol hevi trabol blong yumi.¹⁹

Wan eksperiens blong papa mo mama blong mi plante yia i pas finis, i soemaot se paoa blong ae blong luksave mo sora blong haremsave i impoten tumas. Long 1982, oli bin singaotem mama mo papa blong mi blong givim seves long Filipin Davao Misin. Taem mama blog mi i openem leta mo i luk ples we bae tufala i go long hem, hem i singaot long papa blong mi, “!No!, yu mas ringim olgeta mo talem se yumitu no save go long Filipin. Olgeta i save se yu gat sik blong sotwin.” Papa blong mi i bin safa wetem sotwin blong plante yia, mo mama blong mi i stap wari tumas from hem.

Sam naet i bin pas, mama blong mi i wekemap papa blong mi long haf pas tu long moning. Hem i talem: “?Melin, yu bin harem voes ya?”

“No, mi no harem wan voes.”

“Mi bin harem semmak voes ia tri taem finis long naet ia, i stap talem, ‘?From wanem yu stap wari? ?Yu no ting se mi mi save se hem i gat sik blong sotwin? Bambae mi mi lukaot gud long hem mo bambae Mi lukaot gud long yu. Nao, yutufala i stap rere long ol samting blong go givim seves long Filipin.’”

Mama mo Papa blong mi i bin givim seves long Filipin mo gat wan gudfala eksperiens. Tabu Spirit hem i kompanion blong tufala, mo tufala i kasem blesing mo proteksen. Papa blong mi i neva gat problem wetem sik blong sotwin blong hem. Hem i bin stap olsem fas kaonsela long misin presidensi, mo hem mo mama blong mi i bin trenem plante misinari mo plante fetful Lata-dei Sent blong rere from ol wod mo stek we bae i kam long aelan blong Mindanao. Tufala i kasem blesing blong gat ae we i luksave mo sora we i haremsave.

Ol brata mo sista. Mi testifae abaot Jisas Kraes. Hem i Sevya mo Ridima blong yumi. Mi save se sapos yumi tekem Hem i kam insaed long laef blong yumi, mo laef folem ol trutok blong gospel blong Hem, bae yumi gat wan gud taem wetem Tabu Spirit olsem kompanion. Bae yumi gat naesfala presen ia blong ae we oli luksave mo sora we oli haremsave. Mi testifae olsem long tabu nem blong Jisas Kraes, amen.

Ol Not

1. Matiu 4:24–25.

2. Luk long Jon 6:66.

3. 3 Nifae 9:16.

4. Ol Wok 28:27; luk tu long Matiu 13:15.

5. Matiu 13:16.

6. Jon 14:12.

7. Luk long Ol Wok 2:1–4.

8. Eksampol luk long Ol Wok 10:9–15.

9. Luk long Inos 1:3.

10. Luk long Ol Wok 2:42.

11. Luk long Ol Wok 4:8–12.

12. Luk long Thomas S. Monson, “Looking Back and Moving Forward,”  Liahona, Mei 2008, 90.

13. Luk long Thomas S. Monson, “Be Strong and of a Good Courage,” Liahona, Mei 2014, 66–69.

14. Luk long Thomas S. Monson, “Faith in the Work of Salvation,” Worldwide Leadership Training Meeting, June 2013, lds.org/broadcasts.

15. Toktok ia kasem i gat fulap mining blong hem we oli impoten long ples ia: “blong tekem gud insaed long maen mo filing,” “blong letem blong i kam insaed,” blong akseptem se i tru, blong biliv, mo blong welkamem (luk long Merriam-Webster’s Collegiate Dictionary, 11th ed. [2003], “receive”).

16. Luk long Doctrine and Covenants 18:34–36; 68:3–4.

17. Presiden Harold B. Li i bin tijim se witnes ia i impoten blong kam blong jenisim laef long Lod (luk long “Be Loyal to the Royal within You” [Brigham Young University devotional, Sept. 11, 1973], 4, speeches.byu.edu).

18. 1 Korin 2:16.

19. Alma 27:17; luk tu long Alma 31:38.